كريم تشيز فروستنج .. Cream Cheese Frosting

هلا والله …

.

كثير ناس يسألوني عن تغطيات الكيك وحشواته وعن “أفضل” تغطية. مافيه جواب واحد ، تغطيات الكيك جدا كثيرة وكل وحده لها طعمها ومميزاتها ومشاكلها اللي تتميز فيها هذا طبعا غير إن كل وحدة بتمشي مع نكهات غير الثانية. غطيت في المدونة هنا عدد من التغطيات و الحشوات المشهوره و المهمة مثل الكريمة المخفوقة و الجاناش و تكلمت عن البتركريم بشكل عام وعطيت مثال له اللي هو بتركريم المرانج السويسري وهذي طبعا موب كل الخيارات الموجوده كونه لسا باقي عدة أنواع راح أحاول أغطيها في المستقبل إن شاء الله.

.

الكريم تشيز فروستنج أو تغطية الفيلادلفيا وحدة من أشهر و ألذ التغطيات الموجودة. هي ممكن تستخدم فوق أي كيك بس هي جدا مشهورة فوق أشياء زي كيكة الجزر Carrot Cake و الريد فيلفت كيك Red Velvet Cake وطبعا فوق السينامون رول. هي ممكن تستخدم كحشوة لكيك أو سويس رول أو حتى تنحط فوق أشياء زي البانكيك أو الوافل أو حتى الكريب ، خيارات الإستخدام ما تنتهي هنا.

.

الكريم تشيز فروستنج موب عائلة جديدة في الفروستنج هو في الأصل بتركريم (غالبا أمريكي بس ممكن يتسوى بالسويسري أو الإيطالي) بس مطعم بكريم تشيز أو فيلادلفيا. معنى هذا الكلام إن كل اللي ينطبق عالبتركريم ينطبق عالكريم تشيز فروتسنج سواء كنت نسب المواد لبعض أو ثباته أو غيره. راح أتكلم إن شاء الله بشكل أفضل عن البتركريم الأمريكي وراح توصل الفكرة بالضبط. ناس كثير يشتكون إن المقادير تختلف من وصفة لوصفة ، فيه أشياء ممكن تختلف زي كمية الزبدة للكريم تشيز أو النكهات المضافة وغيرها وفيه أشياء ثابتة ما تتغير زي كمية الدهن المستخدم مقابل السكر وغيرها. هذا فروستنج هو موب مفروض يكون لو فات low fat ولا المفروض يكون حلاه معتدل ! هو مصمم عشان يأدي غرض وهو إنه يحفظ الكيك ويحافظ على رطوبته ويحافظ عليه من الفساد وقت أطول. عشان كذا ياليت تلتزمون باللي مكتوب بالوصفة قبل تغيير أي شي فيها.

.

المقادير :

.

أصبع زبدة (١١٣ جرام)

١/٣ كوب جبن فيلادلفيا على حرارة الغرفة(٩٧ جرام)

رشة ملح

عود فانيلا

كوبين سكر بودره منخولة (تقريبا ٣٠٠ جرام)

.

* يفضل وبشدة تمشون بالوزن هنا.

.

* لو ماعندكم فيلادلفيا هنا أو ما تفضلونها ممكن تبدلونها بأي نوع كريم تشيز بنفس الوزن اللي طالب.

.

* أنا أحب نكهة الفانيلا الأعواد القوية هنا بس إذا ما عندكم أستخدموا ملعقة صغيرة فانيلا سايلة أو نص ملعقة صغيرة فانيلا بودرة أو حتى أتركوها من الأساس أو بدلوها بنكهة ثانية (شوفوا موضوع بتركريم المرانج السويسري لو تبون خيارات نكهات أكثر).

.

* لو تبون نكهة كريم تشيز أقوى ممكن تبدلون الزبدة أو جزأ منها بكريم تشيز بنفس الوزن وليس الحجم ! يعني نقصوا ١٠ جرام هنا وزيدوها هنا وكذا بس عن نفسي أشوف هذي النسب اللي فوق ممتازة.

.

.

الطريقة :

.

حطوا الزبدة و الكريم تشيز و الملح و الفانيلا في صحن الخلط حق العجانة (أو صحن خلط عادي لو بتستخدمون خلاط يدوي) وأخفقوهم مع بعض بالكف حقت الخلط إلين يتجانسون تماما ويصير الخليط لين.

.

حطوا عليهم السكر المطحون وغيروا الكف حقت الخلط للمضرب الشبك (اللي زي خفاقة البيض). شغلوا الخلاط على أقل سرعة في البداية (عشان لايطير السكر في كل المطبخ) بعدين أرفعوا السرعة لأعلى شي و أخفقوا الخليط إلين يصير منفوش وخفيف تقريبا ٤ دقايق. لو لقيتوا الخليط جامد ممكن تزيدون شوييي مويه أو حليب أو كريمة عشان تخففون القوام أو حطوه شوي في الثلاجه عشان يمسك شكله بشكل أفضل.

.

Cream Cheese Frosting

.

أحفظوا الخليط في علبة تتقفل بإحكام في الثلاجة لمدة أسبوعين تقريبا أو فرزوه لمدة شهر ونص تقريبا إلى شهرين. لو قررتوا تفرزونه بتلاحظون إنه صار جامد شوي بعد التذويب أرجعوا أخفقوه شوي وبيرجع لين وتقدرون تزيدون عليه مويه أو حليب أو كريمة مع الخفق عشان يخليه أخف شوي.

.

Cream Cheese Frosting

.

Follow TopChefCooks on Twitter

61 comments

2 pings

Skip to comment form

    • Shahad on 31 July, 2018 at 9:17 pm
    • Reply

    السلام عليكم
    حبيت حبيت من زمان نفسي ألقى طريقتها
    وشخص يتكلم عنها بالتفصيل
    تسلم شيف

    بس عندي سؤال
    في السوبرماركت لقيت سكر مطحون لكن فيه نوعين
    نوع معاه نشا ونوع بدون
    هل راح يفرق ؟ وأيهم أخذ للفروستنق ؟

  1. ألف شكر على الطريقة …بارك الله فيكم ..
    الوصفة سهلة و دقيقة …التغطية رائعه ..

  2. عجبتني الطريقه الله يعطيك العافيه
    شكرا على الشرح الوافي والبسيط

  3. بس بسأل ماعليش كريمك التشيز وشي ذيمت اسأل

    • Anonymous on 21 July, 2016 at 2:06 pm
    • Reply

    لوسمحت شيف
    الزيده ما وضحت بأي حراره تكون فيما لوكانت بحرارة الغرفه اولأ لاني جربت اذا كانت الزبده بحرارة الغرفه في وصفه تانيه بلاحظ الكريما بتفرط معي وبتفصل وفيها زي الحبيبات ارجوك شيف وضحلي ايش ممكن يكون سبب لاني حاب اجرب وصفتك بس خايف اغامر بموضوع زبده فأرجو توضيح وبكون ممنونه الك

    • Anonymous on 18 September, 2014 at 11:45 am
    • Reply

    مشكورة من أول أدور على طريقة الكريم تشيز طلعت تقريباً نفس البتر كريم مع إضافة التشيز متحمسة اعملها للكب كيك

  4. ماشاء الله مدوووونه روووووووعه الله يجزاك كل خير

    1. حياك

    • roba on 17 March, 2014 at 9:00 pm
    • Reply

    هل يمكن استبدال الجبنة الفيلادلفيا بجبنة كيري

    1. أكيد ، أو أي جبن كريمي ثاني زي ماسكاربوني أو غيره ، طبعا الطعم بيكون شوي مختلف (مختلف ، أفضل أو أسوأ شي راجع لذوقك الشخصي أكيد).

    • Anonymous on 13 March, 2014 at 2:36 pm
    • Reply

    شيف ياليت تعطيني طريقه كيك فانيلا يكون هش ولذيذ

    1. موجود في صفحة الوصفات و إذا تبين في كيكة الآنجل فوود بعد

    • Anonymous on 4 November, 2013 at 5:30 am
    • Reply

    شكرا شيف
    رح غير نوعية سكر ..تسلم ع الاجابة

    • روز on 2 November, 2013 at 8:27 pm
    • Reply

    فديتك شيف ع الوصفات كلش روعة
    الله يعطيك العافية شيف
    انا جربت كريم اشيز وكانت مرة لديدة بس بقا قوام السكر فى الفم رغم انى شتريتو
    مطحون جاهز بس ماعرف ليش مادب قوام الكريم وطعمو حلو بس سكر واظح
    ارجو التوضيح
    شكرا

    1. بالعافية …

      هو بشكل عام البتركريم الأمريكي (هذا واحد منهم) دايم فيه هذي المشكله. دايم فيه أثر للسكر بس هو أثر جدا جدا جدا بسييييط وما يلاحظه إلا اللي يذوق حلويات كثيره موب شي واضح. لو كان فيه حبوب واضحه ففيه كذا سبب. ممنك السكر حق السوبرماركت موب من نوعيه ناعمه مره. ممكن ما نخلتي الخليط. ممكن ما خفقتي الخليط بشكل كافي كونه لازم يذوق.

    • mno on 4 September, 2013 at 3:20 pm
    • Reply

    في طريقي لشراء المقادير باذن الله و اذا ضبطت لك مني قطعه من القاتو

    1. هههه بالتوفيق يارب.

  5. مرحبا شيف
    كنت حابة اسأل هل يبيعوا سكر مطحون في السوبرماركتات
    وايش أحسن نوع

    1. إي أكيد طبعا ؟ أصلا ماتقدرين تطحنينه في البيت بنفس النعومة حقت الجاهز.

      والله ما أعرف الصراحة ماقد سمعت إن فيه فرق في الأنواع

    • لامعه on 13 August, 2013 at 10:53 pm
    • Reply

    اليووووم بجرب طريقتج…. تسلمين شيف^^

    بس شو الهدف من تخزينها بالفريزر؟

    اقدر استخدمها مباشرة بعد تبريدها… ولا اذا قعدت بالثلاجة اكثر تكون احسن؟

    1. الله يسلمك بس تراني ولد مو بنت.

      مافيه هدف من التخزين بس أحيانا يبقى عندك فروستنج زايد أو فيه ناس يحبون يسوون كمية فروستنج كبيره مثلا أو يكون عنده جبن فيلادلفيا زايد ويحتاج إنه يستخدمه في شي فبس حبيت أذكر في الموضوع إنه ينفع يتخزن وكيف يتخزن ووش يصير فيه بعد الذوبان وكيف تحلينه.

      الأصل إنك تستخدمينها علطول ، في بعض الحالات تكون جدا لينه وهنا ممكن تستفيد من كم دقيقة في الثلاجه عشان تحافظ على قوامها بشكل أفضل بس عموما بعد الخفق علطول أستخدميها.

  6. تسلم على الوصفة
    مدونة جبنا التايهة
    http://alchef.blogspot.com/

    • Anonymous on 18 March, 2013 at 6:42 pm
    • Reply

    مقرودة انا ، حطيت سكر مب مطحون صار مفصول عن الزبدة والجبن

    1. هههههه عادي عادي اتحداك ان عدتي الخطأ مره ثانية

    • bebo on 4 February, 2013 at 7:16 am
    • Reply

    يعني الحين لو بغيت اسويها هل اقدر اشكل فيها مثلا اسوي وردات على الكب كيك ؟! ولا ماحتنفع

    1. تنفع ونص …

    • Noura on 24 January, 2013 at 5:29 pm
    • Reply

    فيه best cream cheese frosting جاهزة ؟
    اذا ايه ايش احسن نوع ؟

    1. جاهزة أعتقد فيه … بس هل صعب تخلطين زبدة وكريم تشيز وسكر ؟

    • Anonymous on 8 January, 2013 at 4:15 pm
    • Reply

    مساء الخير .. كم تقريبا أضع من حبة جبن كيري ؟

    1. نفس الوزن اللي حددت

    • غادة on 1 January, 2013 at 5:12 am
    • Reply

    ايش رايك في الماسكروبوني ؟ من كارفور و هل ممكن استخدمه بدل الزبدة هنا ؟
    شريت منه 3 علب على اساس استخدمه في تغطية الكيك و طلعت الخلطة فاشلة :”( و ابغى استثمر العلب الباقية بشيء ممتاز

    1. الماسكاربوني كريم تشيز في الأخير أستخدميه في أي مكان بدال الفيلادلفيا بالضبط. سويي تيراميسو …. ما أعتقد تحتاج تفكير هههه

  7. الله يجزاك خير مجهود كبير تشكر عليه
    لكن انا اعاني دائما من الزبده في الكريمات اللي كذا وغيره
    أحيانا بتفصل معي ويطلع حبوب ويخرب شكل الخليط
    وش الحل ؟؟

    1. جربتي هذي ؟ ما اضمن وصفات غيري ولا اقدر اعطي لها حلول …

    • Anonymous on 24 December, 2012 at 6:58 pm
    • Reply

    ينفع لو حطيت بدل الفيلادلفيا جبن كيري ؟

    1. دايما ينفع … بس دايما الطعم غير !! موب أسوأ موب أحسن بس غير . إذا تحبين هذا الطعم حلو.

    • Anonymous on 17 December, 2012 at 3:53 pm
    • Reply

    شيف ايش افضل زبدة استخدمتها…. لاني لاحظت انه الزبدة تأثر كثير على قوام وطعم التغطية
    انا استخدم المراعي واحس انها مره طعمها قوي وواضح ولونها على أصفر شوي

    1. هنا أفضل لورباك.

      أكيد طبعا طعم الزبدة جدددددا مهم في عمل البتركريم بأنواعه. من إسمه كريمة زبدة !!! نكهة الزبدة جددددا مهمة هنا.

      اللون الأصفر لازم تفهمين إنه موب عيب في الزبدة !! هو يتعلق بفصيلة البقر ونوع العلف ، بعض الأعلاف فيها صبغة تذوب في دهن الحليب اللي ينتجه البقر وهذا يسبب تغير اللون. الصبغة هذي مالها أي نكهة ولا تأثر في الطعم هي مجرد صبغة. في كثير دول يتعمدون إنهم يضيفون هذي الأعلاف للبقر أو يضيفون لها أدوية فيها الصبغة هذي عشان تعطي الزبدة هذا اللون لأن الجمهور يشوف اللون الأصفر هذا مرغوب عندهم.

      هل هي من علامات جودة الزبدة ؟ لا طبعا بس اللي أبي أوصله إنها ما تفرق في النكهة !! هي مجرد لون. هل الأبيض لون دايم أحسن في التغطيات ؟ بعد لأ لأن مهما كانت التغطية دايم بيكون لها لون بيج أو يميل للصفرة إذا كان مستخدم فيها زبدة حقيقية أعتبري لون التغطية علامة جودة إنك أستخدمي زبدة طبيعية لا تفهمينها إنها خطأ أو عيب في التغطية حقتك.

      اللي يخليني أبعد عن المراعي الصراحة هو إني قد شريت زبدة وكانت محمضه وخربانه ! بالعربي منتجهم حسيت فيه تفاوت في الجوده من مكان لمكان ومن وقت لوقت بس في الغالب ممتازه.

    • Nas on 16 December, 2012 at 11:55 pm
    • Reply

    السلام عليكم:
    شكرا على التفاصيل الدقيقة و التوضيح من هدف كل خطوة .
    بس بسأل وين القى اعواد الفانيليا ؟

    1. وعليكم السلام و الرحمة …

      عن نفسي أشتريها من النت …

    • Tete on 8 December, 2012 at 1:41 am
    • Reply

    مرحبا اخوي خالد
    ذقت هالكريم بمحل كب كيك عالرد فيلفت
    كان طعم الجبن واااضح ولذيذه وحلاها قليل
    عشان كذا لمن شفت طريقتك تحمست لها جدا وعملتها
    بس المشكله سويت كلللل شي زي ماقلت بالتفصيل
    لكن السكر رغم اني نخلته جلس بالكريمه ما ذاب 🙁
    طبعا لان الوقت متأخر عندي شلتها بالثلاحة لبكرة وبعيد اخلطها من جديد
    أي نصايح تقدمها لي؟  

    1. السكر مطحون جاهز ولا طاحنته في البيت ؟ السكر عموما في كل بتركريم أمريكي (زي هذا) ماراح يذوب بشكل كامل ! هذي وحده من مشاكل هذا النوع من التغطيات. يمديك تسوين كريم تشيز فروستنج بطريقة البتركريم السويسري (فيه موضوع في المدونة عنه) وهذا بيكون أخف وبدون أي خشونة عاللسان كوننا نذوب السكر أول بس هو شوي أصعب من هذا.

        • Tete on 8 December, 2012 at 5:16 pm
        • Reply

        هلا فيك أخوي ..
        السكر طحنته بالبيت ونخلته
        بس الظاهر المنخل مو ناعم .. حجم حبة السكر بالكريمة نفس حجم الملح الناعم .. شي مزعج جدا
        بخصوص البتر كريم السويسري كيف اضيف له نكهة الجبن
        اتا مره حابه نكهتها القوية 🙁
        بس هنا مالها نكهة قوية

          • Top Chef on 8 December, 2012 at 5:35 pm
            Author

          بالضبط زي ما توقعت. السكر المطحون حق البيت ما يكون بنعومة الجاهز لو تسوين اللي تسوين مافيه أي جهاز ممكن يعطي سكر بنعومة الجاهزة. دايما في الحلويات إذا طلبت سكر مطحون أو بودرة أستخدمي سكر مطحون جاهز موب سكر طاحنته في البيت. النخل هنا موب عشان الحبات الكبيره ما تدخل مع الفتحات ، النخل هنا عشان نشيل الكتل اللي تتكون أحيانا في السكر المطحون وهذي لو طاحت في الكريمة بتكون كتل سكر وسط التغطية وعشان كذا ننخل السكر.

          البتركريم السويسري سويه عادي بس بدلي جزأ من الزبدة بكريم تشيز على حرارة الغرفة.

          لو تبين نكهة جبن أقوى نقصي الزبدة وبنفس الوزن اللي نقصتي زيدي كريم تشيز ، يمديك حتى تستخدمين ١٠٠٪ كريم تشيز لو تبين. عن نفسي أشوفها نكهة شوي مزعجة بهذي القوة وأحب نكهة الزبدة مع الجبن هنا بالكميات اللي حطيت بس الخيار طبعا راجعلك.

        • Tete on 9 December, 2012 at 3:15 am
        • Reply

        يعطيك العافية يارب .. راح اسويها قريب وأوافيك بالنتايج

    • Anonymous on 24 November, 2012 at 6:58 am
    • Reply

    لما خفقت الزبده مع الجبنه صارت جامده وحلوه بس لما أضفت السكر سالت معي
    ورجعتها للثلاجه ونفس الشي ما جمدت
    وأذكر إنك تقول ان السكر في الطبخ يعتبر من السوائل

      • Anonymous on 24 November, 2012 at 7:01 am
      • Reply

      بس نسيت أقولك اني ما استخدمت هذي الوصفه
      استخدمت الوصفه اللي حاطها مع كيكة الجزر

      1. صحيح السكر بيسيلها لحد معين بعدين خلاص تخلص المويه الموجوده.

        لو حطيتيها في الثلاجه وقت كافي أكيد بترجع تجمد ….

    • ام رفيف on 16 November, 2012 at 3:07 pm
    • Reply

    السلام عليكم
    طيب ابغي اسويها نكه برتقال اضيف بشر البرتقال

    بزينبها كب كيك للاطفال

    معليش عالسؤال تجلس فترة ساعه برة لزوم الديكور
    ماتسيح في غرفة مكيفة

    انا يعجبني في الكريمه الخفق النباتي رغم سوء طعمها الا انها تجلس جامدة لمدة طويله

    وشكرااا لك و الله ماقصرت من تحت يدك طلعت مواهب فينا انت تحط الاساس ونحن نكمل جزاك الله خير

    1. وعليكم السلام و الرحمة ….

      بالضبط …. زيدي بشر برتقال أو زيت برتقال أو حتى نكهة برتقال بس أحس البشر ممتاز.

      هي تذوب إذا كانت في حرارة كافيه إنها تذوب الزبدة ، الكريم تشيز يعطيها قوة أكبر (بسبب المواد المستحلبة اللي فيه) بس بشكل عام إذا الحراره تشوفينها حاره للدرجة اللي تذوب زبدة هي راح تذوب معك بغض النظر عن الوقت اللي تحطينها.

    • Anonymous on 10 October, 2012 at 3:33 pm
    • Reply

    هذا ثاني تطبيق لي لوصفة السينابون
    بس المره الماضية واجهتني مشكله في التغطيه لما استخدمت سكر طحنته بالبيت. وتجاوزت المشكله باني زدت كريمه للخليط لانه مارضي ينفش وحطيته شوي ع النار واكلناه بالعافيه ههههه
    المهم كانت تجربه اولى جميله
    الحين انا عندي ١٥٠ جرام جبنة فلادلفيا ابي استخدمها كلها في الصوص وابي اقلل كمية السكر المطحون لكاسه هل ينفع لاني ماابيها تكون حاليه مره
    جزيت الجنه

    1. جيتي عالنقطة اللي بالذات بالذات بالذات تكلمت عنها بالتحديد بالضبط بكل وضوح !!! الموضوع واضح لو ترجعين تقرين المقدمة بتلاقين الجواب على سؤالك.

    • Anonymous on 8 October, 2012 at 3:25 am
    • Reply

    الله يجزاك كل خير

  8. روووووووووووووووووووعة

    • Anonymous on 30 September, 2012 at 8:50 pm
    • Reply

    طيب كيف اخليها سايله تنفع للسنبون؟؟؟

    1. أقري موضوع السينامون رول اللي بعده

    • nahed on 29 September, 2012 at 7:37 pm
    • Reply

    لك الله يعطيك العافيه ويسلم ايديك.

    • Anonymous on 29 September, 2012 at 1:53 am
    • Reply

    واااو حلو
    هذي التغطيه اللي اتمناها
    يعني لو بغيتها لتزيين الكب كيك اخليها نفس الكثافه
    ولو حبيت احطها على السينمون اخففها بحليب او كرية خفق
    صح كذا؟؟؟

    1. لا لا التخفيف حسب الرغبة إذا لقيتي شكلها ثقيل ممكن تزيدين سائل حسب كيف تبين تستخدمينها حتى للكب كيك ممكن تضطرين تخففينها مثل لو كنتي بتستخدمين التغطية لكتابة مثلا أو تبين تخففينها للدرجة المناسبة لك عشان تسوين فيها أشكال بالقمع وكذا … أنسي موضوع السينامون رول الحين هذا موضوع مفصول تماما عنه …

    • الاوتار on 28 September, 2012 at 11:31 pm
    • Reply

    الف شكر على الموضوع

  1. […] « كريم تشيز فروستنج .. Cream Cheese Frosting […]

  2. […] وصفة من فروستنج الكريم تشيز […]

Leave a Reply

Your email address will not be published.

%d bloggers like this: