سينامون روول مع البيكان المسكر .. Cinnamon Rolls with Candied Pecans

هلا والله …

.

فيه ملايين وملايين الوصفات للسينامون رول بس زي هذي ما أتوقع فيه ! هذي موب زي حقت المحلات، إذا تسوت صح هي تتفوق على أي شي ممكن أحد يشتريه. الوصفة سهلة بس تحتاج شوي شغل وشوي وقت بس النتيجة النهائية تستاهل التعب و أضمنلكم هذا الشي.

.

هذي الوصفة هي للسينامون رول بالمكسرات تقدرون تستخدمون نفس الوصفة بالضبط بنفس الخطوات بالضبط لو بغيتوا تسوونها ساده، بس أتركوا المكسرات و الباقي نفس الشي. أنا أستخدمت هنا بيكان مسكر Candied Pecans لأنه يعطي طعم وقرمشة ما تنوصف مع السينامون رول بس يمديكم تسوونه ببيكان محمص عادي أو أي مكسرات ثانية أو تشكيلة مكسرات.

.

العجينة اللي هنا عجينة جدا دسمة، تقريبا أقرب مالها البريوش ، هي مليانه سكر ودهن وبيض وهذا واحد من أسرار النكهة هنا أرجوا إن محد يحاول يغير شي من راسه. كثير ناس يسوون السينامون روول بأي عجينة مرميه عنده ويشكلها بشكل حلزوني ويسميه سينامون رول و النتيجة دايما مخيبة للآمال !.

.

العجينة هنا تحتاج إنها تقعد يوم في الثلاجة. هذي الخطوة ضرورية عشان تعطي أحسن نكهة. اللي يبي يعرف وش يفرق وليش نسوي كذا يقرأ موضوع البيتزا الإيطالية شرحت هناك الحكمة من قعدة العجينة في الثلاجة.

.

المقادير :

.

للعجينة :

.

٤ صفارات بيض على حرارة الغرفة

بيضة كاملة على حرارة الغرفة

١/٤ كوب سكر

٦ ملاعق كبيرة زبدة مذوبه (تقريبا أصبع إلا ملعقة كبيره)

١٧٠ جرام لبن كامل الدسم على حرارة الغرفة(تقريبا ٣/٤ كوب)

٤ أكواب طحين

ملعقتين صغار خميرة instant yeast

١/٣ ملعقة صغيرة ملح

.

للحشوة :

.

كوب سكر بني (يفضل فاتح)

ملعقتين كبار قرفة يفضل لو مطحونه جديده

رشة ملح

ملعقتين كبار زبدة مذوبة

وصفة من البيكان المسكر أو كوب بيكان عادي محمص

.

التغطية :

.

وصفة من فروستنج الكريم تشيز

.

.

* هذي العجينة جدا متعبة على الخميرة وعشان كذا مهم إن كل شي يكون على حرارة الغرفة عشان تنفش بسهولة.

.

* المقصود باللبن هنا اللبن العادي اللي نعرف يعني المراعي ، الصافي أو غيرهم موب الحليب !

.

* بخصوص القرفة. إسم الأكلة سينامون روول أو سينامون بن Cinnamon Bun يعني خبز القرفة. القرفة هي أهم شي هنا فمهم إننا نستخدم أحسن نوع قرفة موجود إذا نبي أفضل طعم. اللي لاحظته في السوق هو إن أغلب اللي موجود هو نوع قرفة جدا سيء اللي هو الأندونيسي اللي يجي كأنه قشور شجر. طعم هذي القرفة حاد ويميل للحرارة بدون الحلاوة المعروفة عن القرفة. هو جدا قوي لهذي الوصفة برأيي وماراح يعطي طعم ممتاز أبدا. أنا أفضل إني أشتري أعواد قرفة جيدة و أطحنها في البيت لهذي الوصفة ، هذا راح يعطينا أفضل نكهة قرفة ممكنة.

.

Cinnamon

عاليسار القرفة الأندونيسيه وعاليمين قرفة سيلانية ممتازة.

.

الطريقة :

.

للعجينة :

.

في صحن خلط أو في عجانة نخلط صفار البيض مع البيضه و اللبن و السكر و الزبدة إلين يعطوننا خليط متجانس.

.

cinnamon roll.

نحط نص الطحين و نحط الخميرة و الملح ونبدأ نخلط إلين يعطينا عجينة جدا رطبة. نحط الخطاف حق الخبز ونضيف باقي الطحين ماعدا ٣/٤ كوب تقريبا (يمكن نحتاجها يمكن لأ) ونبدأ نعجن على سرعة خفيفة (أو ممكن نعجن باليد) ٥ دقايق تقريبا.

.

بعد ٥ دقايق نشوف العجينة. العجينة مفروض تكون لينة ورطبة بس ما تلصق باليد إذا لمسناها. إذا لقينا العجينة تلصق نزيد شوي طحين ونكمل عجن إلين توصل للمرحلة اللي قلت. نكمل عجن ٥ دقايق زيادة تقريبا بعدين نشيل العجينة من العجانه ونكورها. ندهن صحن بشوي زيت ونحط العجينة فيه ونغطي الصحن بنايلون ونترك العجينة تتخمر على حرارة الغرفة إلين يتضاعف حجمها تقريبا ساعتين إلى ٣ ساعات.

.

Cinnamon roll dough.

ندهن صينية بايركس كبيرة (يعني تقريبا ١٣ في ٩ إنش أو أي شي يكفي إنه يشيل تقريبا ١٠ حبات سينامون رول) بشكل جيد بزبدة.

.

للحشوة :

.

بسكين نقطع البيكان المسكر قطع كبيره.

.

chopped pecans.

في صحن صغير نخلط السكر البني و القرفة و الملح ونخليهم عالجنب إلين نكمل العجينة.

.

نرش الطاولة حقت الشغل بشوي طحين بعدين نحط العجينة عليها. نفرد العجينة بالنشابة بحيث تكون مستطيلة تقريبا. نحاول قدر الإمكان العجينة تكون مستطيلة بعد الفرد لأن هذا بيعطينا قطع مرتبة أكثر. نفرد العجينة بحيث يكون سمكها حوالي ٤-٥ ملليمتر وأبعادها تقريبا ١٨ في ١٢ إنش.

.

Cinnamon roll dough.

الحين ندهن العجينة بشكل جيد بالزبدة الذايبة. نبقي ١ سم تقريبا من الطرف العلوي بدون دهن عشان نلصق العجينة بعدين.

.

نوزع خليط السكر و القرفة فوق الجزأ المدهون من العجينة بالتساوي وبعدين نرش البيكان المقطع فوقهم. نرص الحشوة عالعجينة بيدنا بشكل خفيف عشان تلصق.

.

cinnamon roll dough.

الحين نبدأ نلف العجينة. نبدأ نلف العجينة من الطرف القريب لنا من الوسط بيديين ونحاول نخلي اللفات ضيقة قدر الإمكان.

.

cinnamon roll.

الحين لازم نلصق الفتحة حقت العجينة عشان ما تنفرط علينا. ناخذ الطرف الأخير المفتوح من العجينة ونلصقة بالعجينة نفسها بإننا نضغط عليه بأصابعنا كأننا “نقبصه هههه”. زي الصور تحت.

.

تقفيل عجينة السينامون

العجينة قبل التقفيل

.

closing cinnamon roll

طريقة تلصيق طرف العجينة

.

الحين نشوف العجينة ونحاول نعدل سماكتها بيديننا بحيث تكون كلها تقريبا نفس السماكة.

.

الحين للتقطيع : بإستخدام سكين خبز (شوفوا موضوع سكاكين المطبخ إذا ما تعرفون وشي سكين الخبز) نقطع نهايات العجين (موب شرط بس شكلها موب حلو). نقسم العجينة نصين بالسكين بعدين نقسم كل نص ٥ قطع متساوية السماكة بحيث يكون عندنا ١٠ قطع. ممكن نقطع العجينة إلى ١٢ قطعة لو حابين بس أشوف ١٠ تعطي السماكة المثالية برأيي. نرص القطع على صينية البايركس اللي دهنا أول بعدين نغطي الصينية بنايلون وندخلها الثلاجه طول الليل أو إلى ١٦ ساعة لو نبي.

.

cinnabon rools.

ثاني يوم، نطلع الصينية من الثلاجه ونحطها في فرن بارد. نحط في الرف اللي تحت الصينية صينية ثانيه ونملاها مويه مغليه بعدين نقفل الباب ونترك العجينة نص ساعة تقريبا في البخار. البخار هنا بيسوي شيين أول شي هو بيدفي العجينة وبيرجع الخميره للشغل من جديد. ثاني شي هو بيرطب وجه العجينة وهذا يعني إن الوجه بيكون رطب وماراح يتصلب بسرعه في الفرن وهذا يعني نفشة أكبر في الفرن. هذي النفشة في عمل الخبز يسمونها نفشة الطاولة Bench Proof ووظيفتها تنفش الخبز قبل يدخل الفرن للنفشة الأخيرة اللي يسمونها نفشة الفرن Oven spring.

.

.

بعد نص ساعة نطلع الصياني من الفرن ونشغل الفرن ل ٣٥٠ فهرنهايت.  بنلاحظ إن وجه العجينة جدا رطب وإن العجينة نفشت كثير تقريبا للضعف.

.

cinnamon roll after bench proof

شكل الروول بعد حمام البخار

.

بعد ما يحتر الفرن ندخل الصينية الفرن ونخليها إلين تتلون وتصير ذهبية من الأطراف (يعني موب بس من فوق) بتاخذ تقريبا ٢٥-٣٠ دقيقة. لو عندكم ميزان حرارة فوري هو أفضل شي للتأكد من إستواء الخبز ، طلعوا الصينية بعد ما توصل الحرارة الداخلية ل ١٩٠ فهرنهايت.

.

Checking cinnamon rolls for donness.

الحين و السينامون روول حار ندهن الحبات بالتغطية عشان تذوب وتسيح عالأطراف.

.

Cream Cheese frosting.

أحب أقدم السينامون روول مع زيادة صوص عالجنب أحطه في المايكروييف إلين يصير سايل شوي.

.

سينامون روولز مع البيكان المسكر.

cinnamon rools.

سنامون روول.

.

Follow TopChefCooks on Twitter

109 comments

1 ping

Skip to comment form

    • Hasan Jasem on 23 May, 2014 at 1:06 am
    • Reply

    واااو .. الصراحة تفاجأت .. أجمل شي انه شغل بيت

    أنا آحب الطبخ مثلك .. جرب مرة تحطي التمر بدال البيكان

    صدقني خياااااال

    و إلى الأمام يا صديقي 🙂 أنا فخور بك

    1. بالعافية ….

      مجرب بالتمر وصوص طحينه خفيف بدال الكريم تشيز ….

      شكرا وحياك …

    • حصه on 21 May, 2014 at 9:16 pm
    • Reply

    السلام عليكم
    حبيت اسالك يصير ابدل واحط الجوز

    1. وعليكم السلام و الرحمة …

      تكلمت عن هذا في ثاني فقرة ، أي مكسرات ممكن تستخدم

    • Anonymous on 16 May, 2014 at 2:03 am
    • Reply

    كيف الصوص صار سايل؟ وفي الرابط كان قوامه ثقيل؟ أحطه في المايكرويف قبل ؟ Thank you

    1. بيسيل من يوم تدهنينه عالسينامون رول الحار

    • جنا on 10 May, 2014 at 9:18 am
    • Reply

    النتيجة روعة 🙂
    جزاك الله خيرا ويبرك لك فى علمك ؛؛؛؛؛؛؛؛بعد ما كنت أخاف من العجن الان بفكر أفتح محل سينامون رولز:-D

    1. بالعافية …

    • جنا on 8 May, 2014 at 7:07 pm
    • Reply

    جزاك الله خيرا على الشرح المفصل لكن عندى سؤال المقصود باللبن هو الزبادى ؟؟؟؟؟؟؟؟؟

    1. المقصود هو اللبن السائل موب زبادي وموب حليب

  1. اهلا شيف
    احس بتقول شفيه دا بكل وصفة يسأل
    لا بس هذي اسألة من زمان ابي اسألك وماكان يزبط معي بالردود او الاسك

    المهم انا عملت نفس ما قلت بس عكست بدون قصد وخليت العجينة وهي كورة بالثلاجة بدل ما السينامون وهو مقطع
    المهم ان بالنهاية طلعت خيال زي ماتوصفها
    لكن بعد كم ساعة تنشف من داخل مو مثل الي اشتريها من المول طرية اغلب الوقت
    نفسي اسويها وتظل فترة طويلة طرية عشان ودي اذا رحت لأحد احملها معي وتكون لينه اطول فترة ممكنه
    وبالنسبة لميزان الحرارة وين احصلة ؟
    ههههه شفت بالصيدلية بس طلع لأطفال

    1. هههه لا عادي حياك الله في أي وقت.

      ماراح يفرق كثير المهم تدخل الفرن وتكون نافشه ، وش يجي أول موب المهم.

      طبعا أي خبز طبيعي ينشف بعد الخبز هذي موب عيب في وصفة معينه هذي طبيعة الخبز كذا. سبب هذا الجفاف هو عملية يسمونها starch retrogridation واللي يصير فيها إن النشا في الخبز يبدأ يتركب على بعض ويكون شكل هندسي منتظم قوي تعطي الإنتطباع في الفم إنه ناشف. وضع الخبز في الثلاجه يسرع هذي العملية وعشان كذا دايم نقول الثلاجه موب المكان الصحيح لحفظ الخبز. وعدم تغطية الخبز بشكل جيد يساعد بعد على تسريع هذي العملية. في المقابل التسخين يرجع الخبز زي ماكان وعشان كذا الحل هو إنك تغطي السينامون رول بشكل جيد (بعد ما يبرد طبعا عشان لايتكثف بخار مويه داخل) ، تحفظه خارج الثلاجه وتسخنه قبل الأكل.

      اللي تشوف في المحلات موب شي طبيعي !! هم يضيفون محسنات خبز عشان يوصلون لعجينة تعيش وقت طويل زي ما قلت ويقدر يسويها أي شخص بغض النظر عن خبرته في الخبز فلو تخمر الخبز ساعة أكثر أو ساعة أقل ماراح يكون في فرق كبير في النتيجة بالنسبة لهم بسبب هذي المحسنات.

      الموازين موجوده في أغلب محلات أغراض المطابخ.

    • Anonymous on 4 May, 2014 at 3:05 am
    • Reply

    الله يعطيك العافيه شيف ،،بسأل عن الملعقه الصغيره خميره اي وحده بملاعق القياس انا استخدمت مو الكبيره مره اللي اضغر صح كذا ؟

    1. حسب الملاعق اللي عندك … بعضهم يحطون ملاعق كبيره عباره عن 2 tb يعني ملعقتين طعام فلو كان المجموعه اللي عندك كذا بيكون اللي أصغر منها 1 tb يعني ملعقة طعام وهذا خطأ !!

      شوفي الملاعق اللي عندك وبتلاقين مكتوب على كل ملعقة المقاس حقها إما بتلاقين teaspoon أو ts أو حتى لو بالمللي هي بتكون 5ml أو ٥ مللي ليتر.

    • Anonymous on 16 March, 2014 at 6:50 pm
    • Reply

    الطعم روعة ،، لكن بعض القطع تشققت من الجنب والرول اتفتحت بعد ربع ساعة تقريبا في الفرن،، بعض القطع لم تتحمل ضغط الحرارة مع اني قفلت الرول كويس جدا،، ودرجه حرارة الفرن كانت ١٧٠ درجه ،،، هل ممكن السبب في صفار البيض الكتير؟

    1. صفار البيض ماله علاقة . السبب غالبا بتقفيلك للعجينة. تأكدي إنك ما تدهنين الزبده على كل العجينة المفرودة ، لو غلطتي في منطقة صغيييييرة ممكن تخلي حبة تنفتح ومهم بعد إنك تلصقين وتقفلين العجينة بشكل جدا جيد.

    • سارة on 2 February, 2014 at 3:46 pm
    • Reply

    لو سمحت يا شيف ، انا لما حطيت السينابون في التلاجة وغطيتة و سيبته ليلة كاملة جيت اليوم التاني لاقيت السكر زي ما يكون سايح او ذائب و مكون ماء مسكر تحت كل رول ، مع العلم اني استخدمت سكر ابيض مش سكر بني ، فهل في خطأ في اي خطوة ؟

    1. كملي عادي.

      السكر يذوب في كمية الرطوبة البسيطة اللي تتكثف على العجينة ويكون زي الشيره وهذي اللي بتشوفينها في الصحن بس مافي مشكله أو خطأ.

        • سارة on 3 February, 2014 at 11:42 pm
        • Reply

        متشكرة جداا ليك ، انا فعلا كملت عادي بس فضلت اتابعها كويس في الفرن الا السكر يتحرق تحتها ، و هو عمل لون غامق اكيد و بقت ناشفة شوية من تحت لكن طلعت حلوة جدا جدا بجد ، تسلم ايديك يا شيف 🙂

    • Anonymous on 22 November, 2013 at 8:19 pm
    • Reply

    الطحين اللي مستخدمه
    bread flour or all purpose flour؟

    1. متعدد إستخدامات وأي وصفة ما تحدد أفترضي إنه متعدد إستخدامات.

  2. الاكواب اللي استخدمتها وشي اخاف استخدم حقت الجبن العاديه وتصير مب مثلك

    1. بدون سؤال هذي خليها قاعده دايما دايما دايما أكواب معياريه. داري إن فيه ناس كثير يحددون كاس جبن النوع الفلاني الشكل القديم وغيره بس هذي موب قياسات مضبوطه لازم لازم أكواب معياريه دايما.

    • أم لولي on 5 November, 2013 at 4:46 pm
    • Reply

    ما شاء الله شكلها لذيذه…راح أجربها إن شاء الله
    جزاك الله خير..

  3. جربتها وكانت من افضل الطرق اللي جربتها في حياتي
    وخلاص بعتمدها باذن الله
    سؤالي
    انا صلحت العجينه بحذافيرها
    ولاننا شخصين طلعت الكميه كبيره جدا
    فرزنت الباقي
    الحين لو برجع استخدمها كيف اتعامل معها
    مابي تفقد لذتها وجمال طعمها المره الاولى
    الله يجزاك خيرر

    1. عليك بالعافية ….

      إذا جيتي تفرزينها فرزيها بعد التشكيل و التقطيع (يعني قبل تخلينها في الثلاجه لثاني يوم). إذا جيتي تستخدمينها طلعيها من الفريزر وحطيها في الثلاجه لثاني يوم وكملي عادي.

    • خولة on 7 October, 2013 at 3:11 am
    • Reply

    الله يسعدك يا شيف
    اسفة والله على تكرار السؤال ،،،
    انا حطيته هنا في صفحة السينمون
    وكل مرة ارجع ما القاه في نفس الصفحة وارجع اعيده
    ما دريت انه نزل في صفحة الآسك !! الا لما رديت علي انك جاوبت ..
    ومعه طريقة كمان للستيكي بونز
    كثر خيرك ويجزاك بالجنة ووالديك

    1. حياك.

      داري المدونة فيها مشاكل إنه يطلع أحيانا إن السؤال مانزل بس هو يكون نازل. كثير أشوف أسئلة تتكرر وعشان كذا مالم يكن في الأسئلة فقره منسيه أو كذا أمحي المكرر

    • خولة on 6 October, 2013 at 3:33 pm
    • Reply

    شيف معليش انا شكيت في نفسي
    ثلاث مرات ارسل السؤال خلال اسبوع
    ويظهر لي في الصفحة انها وصلت
    لكن اتفاجأ بعدين بإختفاء السؤال !!!
    ما ادري فيه مشكلة في طريقة الارسال ؟؟؟؟

    • خولة on 6 October, 2013 at 3:31 pm
    • Reply

    السلام عليكم شيف خالد
    حبيت اسألك عن الفرق بين السينمون رول
    والستيكي بونز !!!

    ولي طلب لاهنت
    طريقة غاناش لذيذ مضبوط لتغطية كيكة وبين طبقات
    الكيكة …

    وشكراً

    1. وعليكم السلام و الرحمة ….

      الجاناش نزلت موضوع كامل في المدونة عنه شرحت فيه كللل شي.

      بالنسبة للستيكي بونز سألتيني كذا مره وحذفتهم كلهم وجاوبت على أول سؤال زي ما أسوي دايم. لو رجعتي لسؤالك الأول بتلاقين الجواب.

    • Anonymous on 3 October, 2013 at 12:20 am
    • Reply

    ألف ألف ألف شكر لك شرح بدقة وبذمة وضمير ، وبعد أحس إني فاهمة كل خطوة أسويها ، والنتيجة سينابون ولا في الأحلام ، أحلى مما كنت أتوقع يطلع معي ، الله يجزاك عنا كل خير

    1. حياك وعليك ومن أكله بالعافية.

  4. السلام عليكم
    بغيت استفسرك بالاكواب الي تستخدمها في وزن الاشياء (٤ أكواب طحين )

    عادي استخدم كوب جبنة بوك (:

    1. وعليكم السلام و الرحمة ….

      للأسف لأ دايم أستخدمي معياري

    • Anonymous on 18 April, 2013 at 6:32 pm
    • Reply

    الحين المقادير فيها اربع اكواب دقيق !!
    وكم حبة سينامون طلعت معك ؟؟ ماشوف لاا تقسيم للعجينة وشغل طوويل وتعب
    ولا معطينا المختصر المفيد !

    1. حقك علي ….

      كان فيه صينية ثانيه كبيرة زيادة عال ٤ اللي هنا كان فيها تقريبا ٨ حبات أو أكثر شوي ناسي بس قدمتها لناس وما أمداني أصورها فصورت هذي وغاب عني ذا الشي.

    • Anonymous on 6 April, 2013 at 10:24 pm
    • Reply

    الله يعطيك العافيه

    • Anonymous on 16 March, 2013 at 5:32 pm
    • Reply

    ممكن استبد السكر البني بسكر ابيض

    1. ممكن بس ماراح تعطي نفس الطعم أبدا …

    • falcon on 5 March, 2013 at 7:34 pm
    • Reply

    السلام عليكم شيف .. سويت السينمون والحمدلله ضبط وطلعع لذيييذ الله يعطيك العافية
    بس التغطية يوم حطيتها ماذابت معي ,, ما ادري إن كان عشاني ماطولت بخفق الكريمة مثل ماقلت 4 دقايق ,, بس نفشت معي شلتها وحطيتها ع السينمون
    حتى السكر البودرة باين ما اختلط كويس ,, احس فيه وانا اتذوق التغطية ,, ما ادري ان كان هذا سبب انها ماذابت ع السينمون
    المهم مررررة شكرا ويعطيك العافية ,, هذي السنمون الي كنت اتمناها دايم , مشكور مشكور مشكور ^^

    • Anonymous on 27 November, 2012 at 4:06 pm
    • Reply

    السلام عليكم ..
    شكرا كثير على المدونه الرائعه والمفيدة ..
    لدي سؤال بسيط في عجينة السينامون هل اضع العجينه في الثلاجه لمدة يوم بعد ما اطلعها من العجانه مباشره ؟ اشكل علي فهم وضعها في الثلاجة ..
    وجزيت خيرا ..

    1. لا … خمريها ، شكليها وحطيها في الصينية بعدين حطيها في الثلاجة

    • domy on 24 November, 2012 at 1:35 am
    • Reply

    السلام عليكم
    ليش استخدمت صينيه بايركس ؟والا مايفرق عن التيفال

    انا عندي قناعه بالتيفال ماستخدم الا هو للكيك والفطاير ولا اعترف بالبايركس الا اذا جيت اطبخ دجاج بالفرن علشان ماينشف المرق

    1. وعليكم السلام و الرحمة …..

      التيفلون (إسم المادة السوداء اللي عالتيفال) مادة يدهنون فيها المعادن عشان تصير ما تلصق. غير كذا هي صياني عاديه غالبا ألمنيوم. موب دايما فيه خطر إن الأكل يلصق وموب دايما الألمنيوم هو أفضل شي للطبخ وعشان كذا إستخدام التيفلون في كل شي موب مطلوب وممكن يكون مشكلة بعد.

      في حالتنا هنا تقدرين تستخدمين أي صينية بس يبيلك تنتبهين زييييين. البايركس يوصل الحراره أبطأ من الألمنيوم (اللي مدهون عليه التيفلون) وهذا يعني إنك بتلاقين الحبات تتحمر من تحت أسرع من اللازم ويمكن حتى تحترق من تحت قبل تستوي من داخل. شفت حالة لوحدة صار معها نفس الشي بسبب هذا التبديل (أعتقد فيه صور لتطبيقها بس ناسي وين كانت في أحد المنتديات)

      خلاصة الكلام … المادة اللي مصنوع منها صينية الفرن بتحدد سرعة دخول الحراره … التيفال موب مهم هو بس مادة عشان تمنع الإلتصاق بس ماله أي خواص حرارية.

    • ندى on 17 November, 2012 at 10:44 am
    • Reply

    يعطيك العافيه شيف .. طيب لو كنسلت خطوة الثلاجة .. وعلى طول خبزت الرولات بيفرق شي؟

      • ندى on 18 November, 2012 at 7:49 am
      • Reply

      خليتها بالثلاجة 4 ساعات .. والنتيجة كانت مذهله .. مدري كيف لو بمشي على طريقتك بالضبط .. وفيه نقطة ثانيه .. اعترف اني لخبطت في المقادير.. ماكان عندي لبن كامل الدسم .. فاستخدمت حليب كامل الدسم وخلطته بمعلقة كبيرة خل وتركته ربع ساعه .. هل تصرفي صحيح .. ولا خربت الوصفه وكان ممكن تكون الذ من لو اني ما حرفت في المقادير؟ .. والشي الثاني غلطت واستخدمت كوب كامل حليب بدال ثلاث ارباع .. الصراحة ومع هالاغلاط كلها .. الا ان النتيجة كانت ولا اروع

      1. مدام أعجبتك هذا أهم شي بس حاولي تصيرين أدق المرات الجاية موب دايما تطلع النتيجة حلوه.

    • ... on 10 November, 2012 at 6:18 pm
    • Reply

    السلام عليكم …
    شيف السكر البني والعادي يكونون مطحونين صح ؟؟

    1. وعليكم السلام و الرحمة ….

      إذا الوصفة قالت مطحونين مطحونين … الوصفة صحيحة مافيها خطأ لا تخافين طبقيها زي ماهي مكتوبة.

        • ... on 13 November, 2012 at 12:12 am
        • Reply

        مرحبا شيف…
        كيف احفظ اعواد القرفة عشان ما تفقد نكهتها ؟

          • Top Chef on 13 November, 2012 at 3:17 am
            Author

          زي أي نوع بهارات … أعداء البهارات هي الحرارة و الأوكسجين و النور بعديهم عنها وأنتي بخير … حطي البهارات في علب تتقفل بإحكام في مكان بعيد عن النور و الحرارة …

    • ام هشام on 10 November, 2012 at 5:47 am
    • Reply

    بالنسبة لي انا اعشق الحلويات بجميع انواعها ومنها اترزق الله اسوي في البيت وابيع لان ورايه تسع اشخاص اعيلهم
    جربت طريقتك ولانها مثالية ومعيارية يبغالها وقت ومخمخة ههههههه
    بس بجد اشكرك لانه الزباين انهبلوا عليهاااا الف شكر شيف خالد
    واتمنى ما تحرمنا جديدك دائمااا

    تقبل تحياتي

    1. بالعافية على قلبك والله يرزقنا ويرزقك …

    • ساره on 9 November, 2012 at 1:19 am
    • Reply

    السلام عليكم

    جربت الطريقة الصراحه شي يفوق الخيال
    طعمها حلوو وهشه

    اكيد راح اجربها مره ثانية وثالثه
    خرعتني من قصة نفش العجينه
    لاني نسيت ما ظلعت البيض واللبن الا متاخر
    غسلتهم بالماي عشان تخف برودتهم
    والحمدلله ما جات ساعتين الا تضاعفت العجينة
    وكل شي كان مضبوط
    يصير اسويها اصغر
    لانها ما شاء الله استوت كل قطعه كبيرة
    حق التقديم احلى حجم صغير

    جزاك الله خيرر
    عنا احنا الحريم
    معاناة في المطبخ ما تخلص
    وصفاتك تعني ابداع

    1. وعليكم السلام و الرحمة …

      تفكير سليم … غسيلهم بالماء هي الحركة اللي يستخدم كل الطباخين عشان يوصلون شي لحرارة الغرفة بسرعة …

      يصير تسوينها بأي شكل أكيد ….

  5. بااارك الله فيك
    ك

    • طارق on 8 October, 2012 at 2:12 pm
    • Reply

    أول مرة أجرب سينامون واللذة لا توصف : ) رغم أني جربت بنصف المقادير وأستبدلت البيكان باللوز مسكر المرة المقبلة سيكون إن شاء الله تجريب الوصفة كما هي بدون تبديلات …غلطت لما وضعت التغطية فوق القطع ثم وضعتها في الفرن …لما رجعت للموضوع وجدت انك ذوبت التغطية في ميكرووند قبل وضعها على قطع السنامون …..جزيل الشكر لك خالد على الشرح..
    التطبيق http://www.mediafire.com/view/?5b31674pb2ax6tn

    1. بالصحة …..

      اللوز لذيذ معهم وأي نوع مكسرات ممكن يستخدم …

      التغطيه ما يحتاج لا تنحط في الفرن ولا المايكروييف هي بس تندهن عالخبز وهو حار وهو راح يذوب لحاله. أنا قصدت بالمايكروييف التغطية الزايدة اللي أقدمها عالجنب …

        • طارق on 8 October, 2012 at 7:51 pm
        • Reply

        هي بالفعل اللي قصدت التغطية الزايدة اللي تقدمها على جنب … في الصورة اللي وضعت تظهر جامدة ..رغم أني وضعتها بمجرد ان خرجت القطع …

  6. طيب شيف فيه حركة شفتها بمسلسل عن الخبز ,, واتوقع تعرفها
    انك تحط في الفرن كاست موية ع شان ترطب جو الفرن ويطلع الخبز رطب
    ,, ينفع اسويها مع السينبون ؟؟ لأني ماثق بفرننا صراحة ,, -_-

    1. لا لا ما فهمتي الحركة …. هذي الحركة موب عشان تخلي الخبز رطب أصلا الخبز يستوي إذا وصل الحراره اللي تكون المويه اللي داخله “تقريبا” تبخرت يعني مهما حطيتي بخار داخل الفرن ماراح يطلع الخبز رطب.

      فكرة الحركة اللي تقصدين هي إنها تدخل بخار في الفرن. الأفران التجارية فيها زر يدخل بخار مويه داخل الفرن بس أفران البيوت مافيها فنضطر ندور حل ثاني زي إننا نحط ثلجه أو صينية فيها مويه حاره أو حتى إننا نرش الخبز نفسه بمويه.

      طيب وش فايدة المويه في عمل الخبز ؟ الفايدة الأولى هي إن الخميرة تحب الرطوبة وهذا يعني إنها راح تشتغل زي المجنونه في أول دقايق تدخلين الخبز الفرن ، خميرة تشتغل أقوى يعني خبز منفوش أكثر.

      الفايدة الثانية هي إنها تخلي وجه الخبز رطب فترة أطول وهذا يعني إنه ماراح يتصلب بسرعة في الفرن. إذا كان وجه الخبز لين في الفرن هذا يعني إنه بيستمر ينفش فترة أطول وهذا يعني خبز منفوش أكثر.

      طيب هل تنفع هذي الحركة في أي وقت وأي مكان ؟ لأ طبعا !!! بعض أنواع الخبز هيكلها جدا هش وبتطيح مع هذي الحركة وبعض الأنواع بتستفيد. الموضوع شوي معقد بس خلاصة الكلام هي !! أمشي عاللي مكتوب في الوصفة !!!! اللي كاتبين الوصفات يعرفون شغلهم ما فاتت عليهم !!

    • Anonymous on 5 October, 2012 at 10:57 am
    • Reply

    هل يوجد مسميات اخر للبيكان ؟؟

    1. حسب ما أعرف مافيه بس منيب متأكد من كلامي. أسمعهم يسمونه أحيانا لوز أمريكي إذا جيت أفهمهم ويعرفونه بس ما أعتقد إنه إسم رسمي ؟

    • Anonymous on 4 October, 2012 at 2:01 am
    • Reply

    السلام عليكم
    اشكرك ع الوصفه
    جربتها اليوم حطيت ٣ كاسات وربع دقيق
    واستعملت صينيه عاديه موب زجاج وقبل الوقت اتحمرت من تحت سودت شوي

    الحين باقي عندي سينابونات ما اكلناهم بعضها عليها صوص وبعضها لا هل اقدر احطها في الفرن وحط تحتها في صينيه شوي مويه ساخنه عشان ترجع رطبه لاني احس انها ناشفه شوي رغم اني مشيت ع الوصفه بس مشكلة التحمير الزايد قهرني
    الله يكتب لك الخير في كل حرف تكتبه ويسخر لك عباده ويحفظك لوالديك

    1. وعليكم السلام و الرحمة ….

      اذا كنتي حطيتيها على صينية معدن أكيد راح يصير كذا لأن المعدن ينقل الحرارة أسرع من الجزاز وراح تستوي غالبا أسرع من الجزاز بعد.

      حطها في حمام بخار ماراح يعالج شي. تقدرين تسخنينها وهذا بيلينها شوي بس ماراح يخليها لينه مره لأن هذا طبيعي في أي خبز يقدم يصير فيه كذا.

    • Anonymous on 2 October, 2012 at 1:33 am
    • Reply

    This is unbelievable! Can I marry you already please?? Gosh! Everything you do looks AMAZING!

    1. lol thanks a lot I appreciate it but are you willing to clean lots and lots of dishes 😉

        • Anonymous on 2 October, 2012 at 9:35 pm
        • Reply

        with the utmost pleasure! I would even enjoy doing the dishes after someone’s served me this paradise of food for free 😉

          • Top Chef on 2 October, 2012 at 10:46 pm
            Author

          Lol then it is dcided

  7. ما هذه الاكلة

    • Anonymous on 1 October, 2012 at 2:44 pm
    • Reply

    أرجوك شيف تجاوبني وما تحذفه لأنه حاولت أضعه في الأسئلة العامة وما زبط بقول فيه مشكلة… فيه ناس سألوك عن الكبسة دورت في الوصفات ما لقيتها… كمان انا عندي مشكلة بالفرن بما انه عندك خبرة يمكن تساعدني… فرني غاز واذا جيت اولعه من تحت يولع عادي بس بتلاقيه بعد فترة بلشت تضعف النار وبضطر أقويها من مفتاح الفرن… وبطلت اقدر أعمل كيك لأنه هيك ما بعرف درجة الحرارة أولا… وثانيا النار بتكون جدا عالية وغير ثابتة… اذا مر عليك هيك مشكلة يا ريت تفيدني بالحل… وما تنسى رابط الكبسة… مشكووووووووووور مع الاعتذار

    1. نزل السؤال هناك وجاوبت عليه هناك عشان كذا احطف المكرر

        • Anonymous on 1 October, 2012 at 3:53 pm
        • Reply

        معلش شيف سامحني بس رجعت دورت ومالقيته هناك ممكن تجاوبني لأني بستنى الجواب من خبرتك شيف… مشكووووور مرة ثانية وبتأسف عالازعاج

          • Top Chef on 1 October, 2012 at 4:03 pm
            Author

          منيب في البيت الحين ارجعي بتلاقين سؤالك والجواب

        • Anonymous on 1 October, 2012 at 7:04 pm
        • Reply

        والله ياشيف دورت منيح واكثر من مرة وما لقيته انا بغلبك بس هاد من زود طيبك وعشمنا فيك معلش ترد هنا

          • Top Chef on 1 October, 2012 at 7:12 pm
            Author

          تفضلي هذا رابط الجواب أحس مالك عذر الحين هههههه

          http://topchefcooks.com/ask-me/comment-page-93/#comment-14961

    • Anonymous on 1 October, 2012 at 2:06 pm
    • Reply

    شيف ميزان الحرارة من هنا ولا من كندا؟ وكم سعره تقريبا ؟

    1. من كندا. لو بتدلعين نفسك وتشترين أحسن أحسن أحسن ميزان حراره مستحيل يتعدى ١٠٠ دولار !! هذا مثلا كان ب ٧ دولار على ما أعتقد.

    • Anonymous on 1 October, 2012 at 10:03 am
    • Reply

    وكمان اذا ما فيها غلبة هل يوجد تكملة أو جزء ثاني للآيس كريم والمثلجات

    1. إن شاء الله بس ماراح يكون قريب

    • Anonymous on 1 October, 2012 at 5:58 am
    • Reply

    اخوي سألتك عن التغطيه قلت لي راجعي صفحة السينمون هذا انا فيها وقريت الموضوع ماحصلت طريقة التغطيه السايله!مدري انا مااشوف ولا شالسالفه!

    1. هلا والله …..

      “الحين و السينامون روول حار ندهن الحبات بالتغطية عشان تذوب وتسيح عالأطراف. ”

      سويها مره وحده وبتفهمين العملية كلها أوضح صدقيني….

    • Mohammed on 30 September, 2012 at 6:36 pm
    • Reply

    هلا شيف ، الكمية شوي كبيرة هل اقدر بعد مرحلة التخمير الثانية (التخمير داخل الثلاجة) افرزنها ؟

    1. لا أفضل قبل يعني بعد التشكيل مباشره بعدين طلعها إذا بغيتها من اليوم اللي قبل وخلها في الثلاجه طول الليل بعدين كمل عادي. مدري عن الطعم ماراح يكون نفس الشي بالضبط ترى هنا.

    • هدى on 30 September, 2012 at 6:24 am
    • Reply

    سبحان الله كنك عارف اني بطلبها منك

    كنت امس اقول بكرا بسال شيف خالد عن السينبون

    الله يعطيك الف عااافيه وبحول الله وقوته بجربها قريب

    جعل يدينك ماتمسها النار يارب

    1. آمين يارب …

      بالعافية على قلبك…

  8. تسلم يدينك ..

    • nahed on 29 September, 2012 at 9:10 pm
    • Reply

    شيف خالد ….
    بدي منك الكبسه السعوديه
    وشكرا على تعبك معنا
    اسلوبك رائع بالشرح والتوضيح والتدقيق عالمكونات وكل شي
    هدا الصح

    1. موجوده في صفحة الوصفات ….
      .

    • nahed on 29 September, 2012 at 8:43 pm
    • Reply

    لك الله يعطيك العافيه ويسلمو هل ايدين .

    1. الله يسلمك

    • Najah on 29 September, 2012 at 12:48 pm
    • Reply

    السلام عليكم
    مع إني ما أحب السينامون كثير بس حمستني أجرب،،
    سؤالين؛
    الأول: هل صحيح إنه الخميرة الأفضل تنحفظ في الثلاجة أو الفريزر ولا عادي ما تفرق لو كانت برا؟!
    الثاني: عندي مشكلة مع السكر البني،، بعد أول استخدام ألاقيه نشف وصار تقريباً متكتل كأنه حصى مع إني مقفلة عليه وما خليته مكشوف،، ايش المشكلة وكيف المفروض أحفظه؟!

    1. وعليكم السلام و الرحمة ….

      الخميره اللي نستخدم مجففه. إذا الرطوبة اللي في الهواء وصلتها ممكن ترجع تعيش وتموت ومع الوقت يموت عدد كبير منهم ويخليها تصير أضعف و أضعف إلين تصير جدا ضعيفة. موب شرط تحفظينها في الفريزر بس هذا بيطول عمرها.

      السكر البني فيه رطوبة. إذا تبخرت هذي الرطوبة يبدأ يتلصق في بعض ويطلع زي ما تشوفين. غطي العلبة زيييين ولو تبين حطي معها من الحافظات حقت السكر البني اللي تنباع اللي تكون زي الفخار تنقعينه في مويه وتحطينه في العلبة حقت السكر. عن نفسي أشوف أسهل حل إنك تحطينه في المايكروييف إلين يرجع يلين من جديد هذا أسرع حل لقيته.

    • الاوتار on 29 September, 2012 at 6:01 am
    • Reply

    الف شكر على لوصفة الرهيبة

    • اروى من مكة on 29 September, 2012 at 1:40 am
    • Reply

    السلام عليكم ورحمة الله ..
    يسعدني ان اكون من اللي جربوا عمل السينامونرولز على طريقتك ..
    لقيتها بمنتدى شامواه و سويتها مرتين .. واخرتها امس .. لكن واجهتني مشكلة ان العجينة تطلع ناشفة ويابسه .. صدق انها لذيذة وتذوب بالفم بس ناشفة ..
    انا الصراحة اخطأت بالمقادير ومااكتشفت الا يوم قريتها بالمدونة .. المكون اللي اخطأت فيه هو الخميرة .. بالمنتدى ماخصصت حجم الملعقة واكتفيت بذكر انها ملعقتين ونص خميرة .. طبعا بما انك ماخصصت قلت انا اكيد انها كبيرة .. الصدق ريحة الخميرة صرعت قلبي .. بس بما اني واثقة بطريقتك تحملت ..
    عاد ما ادري اذا كثر الخميرة له دور بجعل العجينة ناشفة .. ؟
    وجزاك الله خير .. ووفقك ..

    1. وعليكم السلام و الرحمة ….

      معاك حق في الخطأ وحقك علي هو فعلا خطأ كبير بس للأسف مقدر أعدل شي بعد الكتابة في المنتديات. عموما في الخميرة نادرا ما تستخدم الملاعق الكبيره وخصوصا على كمية طحين بسيطة زي كذا !!

      زيادة الخميرة ممكن تسبب إن العجينة تنفش أسرع من اللازم وبكذا تطيح في الفرن وتبان ناشفة بس أكبر سبب ممكن يسبب هذي المشكلة هو الطبخ أكثر من اللازم وإستخدام طحين أكثر من اللازم. في الطحين حطي طحين يكفي إنه يوصل العجينة للمرحلة اللي ذكرت بس ما يحتاج تستخدمين كل الطحين أبدا !

    • Anonymous on 29 September, 2012 at 1:37 am
    • Reply

    ياإللهي سينمون

    1. ليش مستغربة كأنه مستحيل أحد يسوي شي أطعم من محل أو مطعم ؟

      الكويتي حق جميع إستخدامات و الثاني حق جميع إستخدامات. شخصيا ما شفت فرق …

      عندك خميرة طازجة هههههه ؟ الخميرة أكيد فوريه …

    • dalal mys on 29 September, 2012 at 1:36 am
    • Reply

    سبق و طرحت المقادير في أحد المواقع و جربتها النتبجة أكثر من رائعة و الطعم مثل ما قلت يفوق شغل محلات السينابون

    دمت متألق دوما أخوي خالد

    1. بالعافية ومشكوره على كلامك

    • شروق on 29 September, 2012 at 1:21 am
    • Reply

    خطير جدا….. يعطيك العافية.

    1. مشكورة من ذوقك

Leave a Reply

Your email address will not be published.

%d bloggers like this: