«

»

سبتمبر 29 2012

سينامون روول مع البيكان المسكر .. Cinnamon Rolls with Candied Pecans

هلا والله …

.

فيه ملايين وملايين الوصفات للسينامون رول بس زي هذي ما أتوقع فيه ! هذي موب زي حقت المحلات، إذا تسوت صح هي تتفوق على أي شي ممكن أحد يشتريه. الوصفة سهلة بس تحتاج شوي شغل وشوي وقت بس النتيجة النهائية تستاهل التعب و أضمنلكم هذا الشي.

.

هذي الوصفة هي للسينامون رول بالمكسرات تقدرون تستخدمون نفس الوصفة بالضبط بنفس الخطوات بالضبط لو بغيتوا تسوونها ساده، بس أتركوا المكسرات و الباقي نفس الشي. أنا أستخدمت هنا بيكان مسكر Candied Pecans لأنه يعطي طعم وقرمشة ما تنوصف مع السينامون رول بس يمديكم تسوونه ببيكان محمص عادي أو أي مكسرات ثانية أو تشكيلة مكسرات.

.

العجينة اللي هنا عجينة جدا دسمة، تقريبا أقرب مالها البريوش ، هي مليانه سكر ودهن وبيض وهذا واحد من أسرار النكهة هنا أرجوا إن محد يحاول يغير شي من راسه. كثير ناس يسوون السينامون روول بأي عجينة مرميه عنده ويشكلها بشكل حلزوني ويسميه سينامون رول و النتيجة دايما مخيبة للآمال !.

.

العجينة هنا تحتاج إنها تقعد يوم في الثلاجة. هذي الخطوة ضرورية عشان تعطي أحسن نكهة. اللي يبي يعرف وش يفرق وليش نسوي كذا يقرأ موضوع البيتزا الإيطالية شرحت هناك الحكمة من قعدة العجينة في الثلاجة.

.

المقادير :

.

للعجينة :

.

٤ صفارات بيض على حرارة الغرفة

بيضة كاملة على حرارة الغرفة

١/٤ كوب سكر

٦ ملاعق كبيرة زبدة مذوبه (تقريبا أصبع إلا ملعقة كبيره)

١٧٠ جرام لبن كامل الدسم على حرارة الغرفة(تقريبا ٣/٤ كوب)

٤ أكواب طحين

ملعقتين صغار خميرة instant yeast

١/٣ ملعقة صغيرة ملح

.

للحشوة :

.

كوب سكر بني (يفضل فاتح)

ملعقتين كبار قرفة يفضل لو مطحونه جديده

رشة ملح

ملعقتين كبار زبدة مذوبة

وصفة من البيكان المسكر أو كوب بيكان عادي محمص

.

التغطية :

.

وصفة من فروستنج الكريم تشيز

.

.

* هذي العجينة جدا متعبة على الخميرة وعشان كذا مهم إن كل شي يكون على حرارة الغرفة عشان تنفش بسهولة.

.

* المقصود باللبن هنا اللبن العادي اللي نعرف يعني المراعي ، الصافي أو غيرهم موب الحليب !

.

* بخصوص القرفة. إسم الأكلة سينامون روول أو سينامون بن Cinnamon Bun يعني خبز القرفة. القرفة هي أهم شي هنا فمهم إننا نستخدم أحسن نوع قرفة موجود إذا نبي أفضل طعم. اللي لاحظته في السوق هو إن أغلب اللي موجود هو نوع قرفة جدا سيء اللي هو الأندونيسي اللي يجي كأنه قشور شجر. طعم هذي القرفة حاد ويميل للحرارة بدون الحلاوة المعروفة عن القرفة. هو جدا قوي لهذي الوصفة برأيي وماراح يعطي طعم ممتاز أبدا. أنا أفضل إني أشتري أعواد قرفة جيدة و أطحنها في البيت لهذي الوصفة ، هذا راح يعطينا أفضل نكهة قرفة ممكنة.

.

Cinnamon

عاليسار القرفة الأندونيسيه وعاليمين قرفة سيلانية ممتازة.

.

الطريقة :

.

للعجينة :

.

في صحن خلط أو في عجانة نخلط صفار البيض مع البيضه و اللبن و السكر و الزبدة إلين يعطوننا خليط متجانس.

.

cinnamon roll.

نحط نص الطحين و نحط الخميرة و الملح ونبدأ نخلط إلين يعطينا عجينة جدا رطبة. نحط الخطاف حق الخبز ونضيف باقي الطحين ماعدا ٣/٤ كوب تقريبا (يمكن نحتاجها يمكن لأ) ونبدأ نعجن على سرعة خفيفة (أو ممكن نعجن باليد) ٥ دقايق تقريبا.

.

بعد ٥ دقايق نشوف العجينة. العجينة مفروض تكون لينة ورطبة بس ما تلصق باليد إذا لمسناها. إذا لقينا العجينة تلصق نزيد شوي طحين ونكمل عجن إلين توصل للمرحلة اللي قلت. نكمل عجن ٥ دقايق زيادة تقريبا بعدين نشيل العجينة من العجانه ونكورها. ندهن صحن بشوي زيت ونحط العجينة فيه ونغطي الصحن بنايلون ونترك العجينة تتخمر على حرارة الغرفة إلين يتضاعف حجمها تقريبا ساعتين إلى ٣ ساعات.

.

Cinnamon roll dough.

ندهن صينية بايركس كبيرة (يعني تقريبا ١٣ في ٩ إنش أو أي شي يكفي إنه يشيل تقريبا ١٠ حبات سينامون رول) بشكل جيد بزبدة.

.

للحشوة :

.

بسكين نقطع البيكان المسكر قطع كبيره.

.

chopped pecans.

في صحن صغير نخلط السكر البني و القرفة و الملح ونخليهم عالجنب إلين نكمل العجينة.

.

نرش الطاولة حقت الشغل بشوي طحين بعدين نحط العجينة عليها. نفرد العجينة بالنشابة بحيث تكون مستطيلة تقريبا. نحاول قدر الإمكان العجينة تكون مستطيلة بعد الفرد لأن هذا بيعطينا قطع مرتبة أكثر. نفرد العجينة بحيث يكون سمكها حوالي ٤-٥ ملليمتر وأبعادها تقريبا ١٨ في ١٢ إنش.

.

Cinnamon roll dough.

الحين ندهن العجينة بشكل جيد بالزبدة الذايبة. نبقي ١ سم تقريبا من الطرف العلوي بدون دهن عشان نلصق العجينة بعدين.

.

نوزع خليط السكر و القرفة فوق الجزأ المدهون من العجينة بالتساوي وبعدين نرش البيكان المقطع فوقهم. نرص الحشوة عالعجينة بيدنا بشكل خفيف عشان تلصق.

.

cinnamon roll dough.

الحين نبدأ نلف العجينة. نبدأ نلف العجينة من الطرف القريب لنا من الوسط بيديين ونحاول نخلي اللفات ضيقة قدر الإمكان.

.

cinnamon roll.

الحين لازم نلصق الفتحة حقت العجينة عشان ما تنفرط علينا. ناخذ الطرف الأخير المفتوح من العجينة ونلصقة بالعجينة نفسها بإننا نضغط عليه بأصابعنا كأننا “نقبصه هههه”. زي الصور تحت.

.

تقفيل عجينة السينامون

العجينة قبل التقفيل

.

closing cinnamon roll

طريقة تلصيق طرف العجينة

.

الحين نشوف العجينة ونحاول نعدل سماكتها بيديننا بحيث تكون كلها تقريبا نفس السماكة.

.

الحين للتقطيع : بإستخدام سكين خبز (شوفوا موضوع سكاكين المطبخ إذا ما تعرفون وشي سكين الخبز) نقطع نهايات العجين (موب شرط بس شكلها موب حلو). نقسم العجينة نصين بالسكين بعدين نقسم كل نص ٥ قطع متساوية السماكة بحيث يكون عندنا ١٠ قطع. ممكن نقطع العجينة إلى ١٢ قطعة لو حابين بس أشوف ١٠ تعطي السماكة المثالية برأيي. نرص القطع على صينية البايركس اللي دهنا أول بعدين نغطي الصينية بنايلون وندخلها الثلاجه طول الليل أو إلى ١٦ ساعة لو نبي.

.

cinnabon rools.

ثاني يوم، نطلع الصينية من الثلاجه ونحطها في فرن بارد. نحط في الرف اللي تحت الصينية صينية ثانيه ونملاها مويه مغليه بعدين نقفل الباب ونترك العجينة نص ساعة تقريبا في البخار. البخار هنا بيسوي شيين أول شي هو بيدفي العجينة وبيرجع الخميره للشغل من جديد. ثاني شي هو بيرطب وجه العجينة وهذا يعني إن الوجه بيكون رطب وماراح يتصلب بسرعه في الفرن وهذا يعني نفشة أكبر في الفرن. هذي النفشة في عمل الخبز يسمونها نفشة الطاولة Bench Proof ووظيفتها تنفش الخبز قبل يدخل الفرن للنفشة الأخيرة اللي يسمونها نفشة الفرن Oven spring.

.

.

بعد نص ساعة نطلع الصياني من الفرن ونشغل الفرن ل ٣٥٠ فهرنهايت.  بنلاحظ إن وجه العجينة جدا رطب وإن العجينة نفشت كثير تقريبا للضعف.

.

cinnamon roll after bench proof

شكل الروول بعد حمام البخار

.

بعد ما يحتر الفرن ندخل الصينية الفرن ونخليها إلين تتلون وتصير ذهبية من الأطراف (يعني موب بس من فوق) بتاخذ تقريبا ٢٥-٣٠ دقيقة. لو عندكم ميزان حرارة فوري هو أفضل شي للتأكد من إستواء الخبز ، طلعوا الصينية بعد ما توصل الحرارة الداخلية ل ١٩٠ فهرنهايت.

.

Checking cinnamon rolls for donness.

الحين و السينامون روول حار ندهن الحبات بالتغطية عشان تذوب وتسيح عالأطراف.

.

Cream Cheese frosting.

أحب أقدم السينامون روول مع زيادة صوص عالجنب أحطه في المايكروييف إلين يصير سايل شوي.

.

سينامون روولز مع البيكان المسكر.

cinnamon rools.

سنامون روول.

.

Follow TopChefCooks on Twitter

عن الكاتب

Top Chef

108 comments

1 ping

Skip to comment form

  1. غير معروف

    اهلا توب شيف
    طريقتك جربتها جدا لذيذه لكني واجهت مشكله ان الحشوه تنزل من السينابون أثناء الطبخ؟
    ما الحل؟

  2. Top Chef

    شكرا وحياك الله دايما…..

  3. هدي

    الموقع عجيب سويت السينامون طلع عجيب ومن اول مره

    1. Top Chef

      بالعافية

  4. مراسم الطموح

    ماشاءالله تبارك الله .. مدونتكم ممتعة ومفيدة ..
    اتمنى ان يصدر كتابكم قريبا … جزاكم الله خيرا
    جاري التنفيذ بإذن الله …

Page 2 of 2«12

View all comments

  1. simpleNewz - Top Chef Blog .. مدونة توب شيف RSS Feed for 2014-10-28

    […] سينامون روول مع البيكان المسكر .. Cinnamon Rolls with Candied Pecans […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: