«

»

يناير 22 2011

الجاناش .. Chocolate Ganache

هلا والله …..


الجاناش هو الشكولاته بأجمل صورها وواحد من أكثر الأشياء مرونه في المطبخ .الجاناش هو مصطلح فرنسي لخليط الشكولاته و الكريمة. منشأ الجاناش فيه خلاف كبير ناس يقولون إنه إختراع فرنسي وناس يقولون سويسري بس محد يعرف بالضبط إلى الآن . الجاناش سهل وسريع تحضيره ومكوناته متوفره في كل مكان . أي واحد يحب الحلويات راح يفهم علطول كيف هذا المكون ممكن يساعده في المطبخ إذا عرف كيف يسويه حسب ما يبغى.


الجاناش ببساطه شديده هو خليط كريمي ،ناعم من قشطة الخفق و الشكولاته . بعبارة أدق الجاناش هو مستحلب دهن ومويه ( الدهن من القشطة ومن زبدة الكاكاو و المويه من القشطة ) . مستحلب يعني خليط متجانس من مادتين ما يذوبون في بعض بشكل طبيعي زي المويه و الزيت مثلا . اللي يسوي الإستحلاب هنا هو مادة الليسثن اللي تكلمت عنها هنا في موضوع الشكولاته و الموجوده في الشكولاته وبكميات بسيطه في القشطة بعد . شكولاته وقشطة خفق هي كل اللي راح نحتاجه عشان نسوي جاناش .



إستخدامات الجاناش




الجاناش أنواع وكل نوع له فائده و إستخدام غير الثاني . بتغيير حرارة الخليط و نسبة المواد لبعض نغير الجاناش حسب رغبتنا . الجاناش ممكن يكون :


حشوة filling : لكيك مثلا أو ماكرون أو سويسرول أو حتى كانولي أو إكلير أو ملفيه  . جربوا تسوون كيك شكولاته عادي حتى لو من علبه و أحشوا الكيك بجاناش وشوفوا كيف يتحول لشي مميز ورهيب .


تغطيه frosting : الجاناش ممكن يتسوى منه تغطيات للكيك أو الكب كيك . الشي الحلو فيها هو إنها تتحمل الحراره ومايحتاج تتخزن في الثلاجه و التغطيه لحالها تعيش وقت طويل . سواء كانت التغطيه المرغوبه مخفوقه وخفيفه أو ثقيله شوي كلها ممكنه بالجاناش .


طلاء glaze : الجليز هو عبارة عن طبقة  (لامعة في الغالب)  فوق الحلويات أو الأكل عموما . التغطيه تكون في الغالب ثقيله بينما الجليز يكون طبقه خفيفه ولامعه . الجاناش ممكن يستخدم كجليز للكيكات أو الإسكريمات أو الموس . الجليز حق الجاناش ممتاز كونه لذيذ و الحلو فيه إنه يحفظ رطوبة الكيك غير إنه يعطي شكل إحترافي للكيكات مهما كانت بسيطة .


ganache frosting

مثال لإستخدام الجاناش كطلاء

ترفل truffle : الترفل في الأساس هو إسم الفقع بالإنجليزي ومن الفقع جت فكرة حلى الترفل اللي يشبه الفقع وهو طالع من الأرض . الترفل عبارة عن كور جاناش مغطيه بطبقة شكولاته ذايبة و بودرة كاكاو عشان تصير تشبه الفقع الأصلي . راح أغطي الترفل إن شاء الله بعدين .



ترفل جاناش

ترفل مصنوع من جاناش


زينة أو ديكور decoration : الجاناش ممكن يتشكل بأشكال ويتزين فيه الكيكات أو الصحون . الصب يكون إما إنه ينحط في قوالب إلين يجمد أو مثلا بإستخدام كيس حلويات و راس .


صوص : الجاناش أسهل صوص شكولاته ، جربوا تسوون صوص شكولاته بجاناش مصنوع بشكولاته ممتازه وبتفهمون وش أقصد . للي سألوني عن نافورة الشكولاته أو فوندو الشكولاته الجاناش بعد ممتاز هنا .


 

المكونات و الأنواع


المكونات الأساسية للجاناش هي الشكولاته و الكريمة ( قشطة الخفق )  بس فيه إضافات ثانيه بعد ممكن تنحط مع الجاناش .


* الشكولاته : أهم مكون في الجاناش وماله أي بديل هنا . اللي ما قرأ الموضوع حق الشكولاته يشوفه هنا . أي نوع شكولاته ( إلا البودرة ) ممكن يستخدم عشان يتسوى منه جاناش. يعني الشكولاته الغامقة أو اللي بالحليب أو المره أو البيضاء كلها تنفع . النوع اللي بتكلم عنه و الوصفه اللي بعطيها كلها راح تكون بالشكولاته الغامقة .

الشي المهم اللي لازم تعرفونه هنا هو إن جودة الشكولاته هي المحدد لجودة الجاناش . مافيه أي قناع ممكن نتخفى وراه هنا، لو الشكولاته ما تعجبنا لو أكلناها لحالها لا نسوي منها جاناش ماراح يكون لذيذ لو نسوي اللي نسويه . لو الشكولاته موب ناعمه الجاناش راح يكون خشن لو الشكولاته حامضه أو مره أكثر من اللازم الجاناش راح يكون كذا بعد . عشان كذا هذي وحده من الحالات اللي أستخدموا فيها أحسن شكولاته ممكنة . اللي ما يعرف وشلون يختار أحسن شكولاته يقرأ موضوع الشكولاته .


* الكريمة ( قشطة الخفق whipping cream ) : بعد زي الشكولاته الجوده مهمه هنا . لو الكريمة طعمها جيد الجاناش بيكون أطعم و ألذ . أفضل كريمة هي النوعية اللي تكون قصيرة الأجل . أبعدوا عن الكريمه النباتيه هنا !! . اللي يبي يعرف أكثر عن الأنواع حقت الكريمة يقرأ هنا .  الدهن اللي في الكريمة يعطي الجاناش نعومة إضافيه ولمعة و بروتين الحليب يساعد إنه يمسك الخليط مع بعض . الدريم ويب موب كريمة ! الدريم ويب مركب صناعي ما ينفع هنا …


* الزبدة : الزبدة مكون إختياري . الزبدة تعطي لمعة حلوه للجاناش وبتعطي طعم زبدة لذيذ وبتخلي الجاناش أنعم . الزبدة المستخدمه ( وكل الإضافات عموما ) لازم تكون على حرارة الغرفه عشان تذوب بسهولة .


* شراب الذرة corn syrup : بعد مكون إختياري . شراب الذرة يعطي حلاوة ( في حال أحتاج الجاناش ) بدون أي نكهة خاصة فيه ، الحلو فيه هو إنه سايل يعني ما يحتاج إنه يذوب وسهل ينخلط مع الخليط . أغلب الوصفات اللي تستخدم شراب الذرة تستخدمه لأنه يعطي لمعة قويه للجاناش . شراب الذرة بعد بيحفظ الجاناش ولو بشكل بسيط وبيخليه لين أكثر حتى في الثلاجه . الكمية المستخدمه تكون بشكل جدا بسيط في الغالب بس عشان تعطي اللمعة المطلوبه .


* إضافات ثانيه : السكر بأشكاله سواء سايل أو جامد مثل الجلوكوز أو العسل أو الميبل سيرب هذي كلها ممكن تستخدم كتحليه للجاناش . الدهون مثل الزيت بعد ممكن تستخدم ولو إن الزبده هي المستخدمه في الغالب . إضافات ثانيه ممكن تكون عشان تغيير النكهة مثل خلاصات الفانيلا أو اللوز أو البندق أو البرتقال أو النعناع أو أي نكهة ثانية عموما ممكن تستخدم . البهارات و الأعشاب ممكن تستخدم ، بهارات مثل الزنجبيل أو القرفة أو غيرة و أعشاب مثل اللافندر و النعناع مثلا . المربيات و عصيرات الفواكه مثل مربى التوت مثلا أو البرتقال ممكن تستخدم بعد . المكسرات بعد ممكن تستخدم في الجاناش عشان تعطي طعم مكسرات لها أو حتى ممكن تكون على شكل قطع داخل الجاناش . محسنات النكهات مثل الملح ممكن إضافاتها .  أهم شي في الإضافات هذي كلها هو إنها تكون على حرارة الغرفة.


أنواع الجاناش :


فيه شيين أساسيات نتحكم فيها بنوعية الجاناش وإستخدامه : نسبة المواد لبعض و حرارة الخليط . كل مازادت نسبة الشكولاته للكريمة نتج عندنا جاناش ناشف أكثر وكل ما قلت كل ما صار عندنا جاناش لين وكريمي أكثر . الجاناش وهو حار بيكون سايل وسهل ينصب وكل ما يبرد بيبدأ يجمد أكثر و أكثر .


* الجاناش الثقيل : نستخدم هنا ٣ أجزاء شكولاته غامقة ( بالوزن ) لكل جزأ كريمة ( بعد بالوزن ) . يعني لو أستخدمنا ١٠٠ جم كريمة نحط ٣٠٠ جرام شكولاته . هذا الجاناش هو المستخدم إذا جينا نسوي جليز أو طلاء .

* الجاناش الوسط : نستخدم هنا جزئين شكولاته غامقة ( بالوزن ) لكل جزأ كريمة ( بعد بالوزن ) . يعني لو أستخدمنا ١٠٠ جم كريمة نستخدم ٢٠٠ جم شكولاته . هذا الجاناش ممتاز كحشوة ثقيلة لترفل مثلا أو كيك أو ماكرون  أو تارت مثلا .


* الجاناش الخفيف : هنا نستخدم جزأ شكولاته غامقة ( بالوزن ) لكل جزأ كريمة ( بعد بالوزن ) . هذا الجاناش بيعطينا حشوة خفيفه ممتازه لشي زي الإكلير أو الماكرون مثلا . هذا الجاناش بعد بيعطينا تغطيه ممتازة للكيك أو أستخدموه وهو حار كصوص شكولاته لذيذ أو نافورة شكولاته أو فوندو .خلوه يبرد شوي و تقدرون تسوون فيه ديكورات للكيك وغيره بإستخدام قوالب أو كيس حلويات وراس .


* الجاناش المخفوق : مافيه شي جديد هذا جاناش خفيف بس متروك على حرارة الغرفه إلين يبرد تماما بعدين ينخفق بخلاط يدوي أو خفاقة يدويه عاديه عشان ينفش شوي . هذا بعد ممكن يستخدم كتغطيه أو حشوة خصوصا للكيكات الخفيفه مثل السويسرول مثلا .


أنواع الجاناش هذي عبارة عن خطوط عامة بس . مثلا مين قال إني ما أقدر أسوي حشوة بإستخدام ١٠٠ جم كريمة و ١٥٠ جم شكولاته ؟ .


شي ثاني لاحظوا إني قلت في كل الحالات هذي شكولاتة غامقة ! . هذي النسب للشكولاته الغامقة بس لو أستخدمتوا هذي النسب لشكولاته بيضاء أو شكولاته بالحليب النتيجة ماراح تكون نفس الشي . مثلا لو كنتوا تبون جاناش وسط وحطيتوا جزئين شكولاته بيضاء مع جزأ كريمة الناتج هنا جاناش خفيف موب وسط ! هذي يمكن تسبب مشاكل . عشان كذا في حالة الشكولاته البيضاء و الشكولاته بالحليب دايما زيدوا كمية الشكولاته للكريمة . مثلا بدال ٣ أجزاء شكولاته غامقة لجزأ كريمة عشان جاناش ثقيل أستخدموا ٥ أجزاء شكولاته بيضاء و ٤ أجزاء شكولته بالحليب .. وزي كذا ….


الطريقة

مهما كان نوع الجاناش المستخدم أو الإضافات اللي معه كلهم سووا نفس الطريقة بالضبط .

١ـ نقطع الشكولاته قطع صغيرة . مهم إن الشكولاته ما تكون قطع كبار عشان ما تتعبنا بعدين في الذوبان . أفضل طريقة لتقطيع الشكولاته هو إستخدام سكين خبز ولوح تقطيع كبير . نحط القطع في صحن قزاز أو ستانلس ( بعدوا عن الألمنيوم يعطي طعم ولون للأكل ) .

٢ـ نسخن الكريمة  في قدر صغير مع التحلية المستخدمه سواء كانت سكر أو شراب ذرة أو غيره ( طبعا لو كنا نستخدم موب شرط ) إلين توصل غليه قويه بعدين نطفي النار .

٣ ـ نصب الكريمة على الجاناش ونخليها دقيقتين بعدين نضيف الزبده ( لو كنا بنستخدم ) و نبدأ نحرك الخليط بملعقة شوي شوي إلين ما يتحول لخليط متجانس بدون أي قطع لا تخلطون أكثر من اللازم ! . مكن نستخدم خفاقة بيض للخلط أهم شي أنتبهوا تخلطون بقوه و تدخلون هواء للخليط . عند هذي النقطة نضيف النكهات الثانيه لو كنا بنستخدم .

ganache
ganache

جاناش خفيف

جاناش

 


 

 

تعديل النكهة

الشكولاته مكون يمشي مع نكهات كثير وعشان كذا حلو إننا نقدر نسوي جاناش بنكهات مختلف عشان يمشي مع النكهات اللي إحنا نقدم الجاناش معها .

طريقة تطعيم الجاناش  بنكهة معينة تكون بإحدى طريقتين :

١ ـ إما إننا نضيفه بشكل مباشر للخليط . خلاصات النكهة ( الفانيلا ، اللوز ، البندق ، البرتقال ، النعناع … إلخ ) ، البهارات ، المربيات و العصيرات هذي أمثله لهذي المواد . هنا  لازم تكون على حرار الغرفة عشان ما يجمد الجاناش ويتكسر عليكم .نضيفه آخر شي ونحرك إلين يتمازج كل شي .

٢ ـ نطعم الكريمة بنكهة معينة ونسوي جاناش بهذي الكريمةالمطعمه . نطعم الكريمة بإننا نخليها تغلي مع الشي المطلوب بعدين نطفي النار ونخليها تتطعم فترة ( كل ماطالت أحسن ) . الفانيلا الأعواد ، قشور الحمضيات ( برتقال ، ليمون … إلخ ) ، الأعشاب ( النعناع ، اللافندر كمثال ) ، المكسرات بأنواعها ( لوز ، جوز ، صنوبر … ) ، جوز الهند . بعد ما تتطعم الماده نصفي الكريمة ( لو حبينا طبعا إلا إذا نبيها بقطع ) بعدين نرجع نسوي جاناش عادي زي اللي بدون نكهة .

كمية الإضافات هذي تعتمد على الطعم المطلوب منها . أفضل حل هو إننا نذوق ونشوف هل الطعم قوي بشكل كافي ولا نبغاه أقوى .

المشاكل و الحلول

مع إن الجاناش سهل إلا إن المشاكل ممكنه .

 

١ ـ جاناش محبب : إما إن الشكولاته نوعيتها سيئة أو خلط سريع أكثر من اللازم . الحل : صفوا الخليط بعدين أخلطوا شوي شوي و إذا ما ضبط ماله حل .

 

٢ ـ جاناش جامد من الثلاجه أو الجلوس لوقت طويل : هذا شي طبيعي الحل هنا هو إنكم تحطون الصحن فوق صحن فيه مويه حاره شوي وتحركون شوي شوي عشان ما تدخلون هواء .

 

٣ ـ جاناش فصل ( يعني الدهن و الشكولاته مفصولين عن بعض ) : في الغالب السبب هو الإستعجال في الخلط . الدهن هنا ماراح يكون المستحلب وراح يكون طبقة على وجه الخليط . الحل تضيفون شوي كريمة باردة وتخلطون .

 

٤ـ جاناش ما يجمد : في حالة كانت النسب مضبوطه يكون السبب في الغالب إن الكريمة ما وصلت غليه .

 

٥ـ قطع شكولاته ماذابت : السبب في الغالب هو إن الشكولاته حجمها كبير . حطوا الخليط في حمام مائي إلين تذوب الشكولاته أو أستخدموا خلاط مولينكس .

الحفظ

الجاناش ينحفظ على حرارة الغرفة ( شرط تكون الغرفة باردة ) يومين تقريبا . حطوا طبقة نايلون على الوجه عشان ما يكون قشرة . الكيك اللي يتزين بالجاناش ممكن ينحط على حرارة الغرفة يومين بعد بدون أي ضرر ( بشرط الكيكه تكون تنفع تتخزن برا الثلاجه طبعا ) .

 

أطول من يومين حطوه في الثلاجه إلى أسبوع تقريبا أو ثلاث شهور في الفريزر . طلعوه من الفريزر وحطوه في حمام مائي وسخنوه إلين يرجع سايل بس .

 

عن الكاتب

Top Chef

87 comments

6 pings

Skip to comment form

  1. أم لينا

    السلام عليكم”
    كم مقدار الزبدة اللي نحطها للغاناش الوسط عشان يعطي لمعة؟

  2. Meme

    شنو نوع السكر الي اضيفه على الكريمة يصير عادي ولا لازم مطحون

  3. أم حلا

    الله يعطيك العافية ما قصرت …

    كيف اسوي حشوات ثابته ما تسيح على درجة حرارة الغرفة ومتنوعه من الجانش للماكرون ؟؟

    والله يوفقك دنيا واخرة

    1. غير معروف

      نسيت اذكر ان ما أبغى الجانش او الحشوة اللي تكون زبدتها كثيرة

    2. Top Chef

      سويي جاناش عادي وخليه يجمد على حراره الغرفه ساعتين أو أكثر (ممكن تسرعين الموضوع في الثلاجه بس مشكلة تبريد الجاناش في الثلاجه إنه يخليه أقل ثبات من إذا برد شوي شوي على حرارة الغرفة). الجاناش يتحمل الحرارة بدون مشاكل.

  4. tota

    شيف لو بسوي جليز لكيكة باردة زي الموس والايسكريم كيف أعمل لأنك كاتب في الردود انه الجاناش يكون حار والكيكة مش باردة؟

    1. Top Chef

      الموس عادي خليه يدفى شوي.

      الأيسكريم عندك حلين يا تحطين كيك فوق أو أي طبقة بين الإسكريم و الجليز يا إنك تسوين عادي يعني تصبين الجليز وتوزعنيه بملعقة ، ماراح يكون ناااعم بس بيكون حلو عادي

  5. غير معروف

    ههههههههه
    شيف والله ماعرفت اميززز وحاولت افهم اسم الى انت حاطهااا ماعرفتتت والله عجزت احاول

    1. Top Chef

      ما تعرفين إذا شي في فمك يعجبك طعمه أو لأ ؟

  6. ام عمر

    السلام عليكم
    شيف انا زمان سويت جاناش بالقشطة قيمر مع سيمي سويت هيرشي حقيقتا انا ماذقتها لاني كنت صايمه بس الي اكلو الكيكه قالو رهيبه فطريقتي تعتبر جاناش طبعا خليت القشطه في قدر حتي تقلت وبعدين حطيت الشوكليت
    وشكرا جزيلا لك الله يجعل المدونه في صالح اعمالك

    1. Top Chef

      وعليكم السلام و الرحمة ….

      زي ماقلت فيه كذا طريقة ممكن تصبين الكريمة عالشكولاته زي هنا أو العكس أو حتى تذوبينهم الإثنين مع بعض. خطر إنك تحرقين الشكولاته من أطراف القدر الحاره في الطريقة اللي تستخدمين هو المشكلة. طبعا لو أنتبهتي في تسخين الكرمة وأستخدمتي قدور جيده إن شاء الله مافي مشاكل وعموما كلهم صح.

  7. غير معروف

    هل بمكن ان اعمل مقدار صغير كتجربة الجناس الى يغطى به الكيك ويكون لامع كدلك أيهم افضل لتغطية الكيك وتكون تغطيه فيها لمعه ومتسويه وبطريقة محترفه الجناش الخفيف او المتوسط او التقيل وبارك الله فيك

    1. Top Chef

      أعملي نص جرام لو تبين هذي حلاوة المقادير بالوزن سهل جدا تكبيرنها أو تصغرينها بدون إختلاف في النتيجة.

      الجاناش الثقيل يعطي جليز يعني خليط ناعم وطبقة نحيييييفة جدا. الجاناش الخفيف أو المخفوق يعطي فروستنج أو تغطية يعني طبقة متينه أكثر ومنفوشة. كل واحد غير.

  8. RORO

    السلام عليكم شيف ان شاء الله تكون بخير …. حابه اسالك عن الجاناش اللي ينحط تحت عجينه الفوندان .. يعني بعد ما يبرد يكون قوي فوق الكيكه وينحط عليه الفوندان … انا حاولت اسويه اكثر من مرا بحيث اني ازيد نسبه الشوكلاته بس ما كان يضبط معاي وكان يجمد اول ما احطه ع الكيكه ويتعبني … ياريت اعرف كم المفروض تكون النسب حق الشوكلاته والكريمه وكمان الطريقه هل هيا زي الجاناش العادي اسويه بنفس الووقت واستخدمه والا لازم احطه في الثلاجه ؟؟؟

    1. Top Chef

      وعليكم السلام و الرحمة ….

      هذا جليز الجاناش glaze ويستخدم فيه جاناش ثقيل وهو توه حار ينصب عالكيك والكيكه فوق شبك، الزايد بيطيح (يمديك ترجعين تستخدمينه) و بيغطي الكيك بطبقة جامده ومتساويه كذا. أهم شي تصبين الجاناش وهو سايل مره والكيك مايكون بارد يعني ما يكون من الثلاجه أو فريزر (أصلا ليش أحد بيحط كيك في ثلاجه ؟).

  9. أم كنان

    الله يفتح عليك دنيا واخرة ، صراحة جدا استفدت ، الان فهمت ليه صار معي كده بالمرة الثانية .
    أول مرة جيت اعمل تغطية للكيك وكانت ثقيلة وممتازة وكانت بماعيير معينة ، مثل ماذكرت بس كانت جدا كثيرة على الكيكة
    وزادت وماعرفت وين اوديها وانكبت للاسف .

    تاني مرة جيت اعمل التغطية قللت كمية الشوكلاته بس خليت الكريمة مثل ماهي مقدارها وطلعت متوسطة ومازبطت معي
    بالتغطية زي اول مرة ، لدرجة انه شكيت انه مجرد صدفة زبطت اول مرة .

    بس الحمد لله على نعمة العلم ، الله يجزاك الخير كده الواحد ياخد باله ، بس ممكن تعطيني مكونات تغطية لكمية صغيرة .
    يعني مثلا احط 50 كريمة و150 شوكلاته او كيف ؟!

    1. Top Chef

      شرحت كيف تسوين كل شي ما تحتاجين وصفة مكتوبه !! كمية صغيره يعني تقريبا كم ولأيش ؟ هذي كلها أشياء أفضل تتعلمينها. سويي كمية وشوفي هل تكفي اللي تحتاجين أو لأ وبعد فترة بتعرفين تقريبا كم تحتاجين لكل إستخدام. الجاناش يعيش وقت طويل وممكن يستخدم بكذا شي فحتى لو زاد شوي موب خسارة أبدا …

      1. غير معروف

        ان شاء الله عزيزي بجرب استخدمها واحفظها زي ماذكرت وان شاء الله تزبط معايا .
        انا عملتها قبل تغطية لكيكة بس كانت الكيكة قطرها صغير مش كبير .
        لك ودي

  10. تغريد عبد الحميد

    جزاك الله الف الف خير وياليت تضيفينى عندك بالايميل لانه احيانا احتاج رد لاسئلتى ان شاء الله القى الجواب عندك جزاك الله الف خير كثير استفدت من موضوع الجاناش جعله الله فى ميزان حسناتك ايميلى هو remal-1@hotmail.com

  11. أنفال

    السلام عليكم..
    يعطيك العافية يا خوي..شغلك مميز ماشاء الله..وانا من الناس اللي تحب تبربس بالمطبخ وهالمدونة فيها كمية معلومات وافرة الله يكتب لك الأجر….
    بالنسبة للجاناش انا كنت اسويه من دماغي ..
    اذوب الشوكلت بعدين وهي على البان ماري احط كريمة الخفق..واحركه شوي وبس ويصير كويس..

    1. Top Chef

      وعليكم السلام و الرحمة ….

      مين فينا ما خلط حليب أو كريمة أو زبدة مع شكولاته وذوبهم قبل يعرف إن هذا الشي إسمه جاناش ؟ بس أسهل إني أسميه جاناش من إني أسميه خليط شكولاته وكريمة ذايبين مع بعض D-:

      فيه مليون طريقة لعمل الجاناش زي إنك تسخنين الحليب وبعدين ترمين الشكولاته فيها أو إنك تذوبين الشكولاته وتسخنين الحليب وغيرها كثير وكلها تقريبا بتعطيك جاناش. بس فيه سبب ليش فيه طرق قديمة وتستخدم للآن حتى مع كبار طباخين الحلويات وهذا لأنها مضمونه أكثر وأثبتت نجاحها في ظروف كثيرة. تسخين الشكولاته زي ما تسوين يعرضها للحرق وتسخين الكريمة والشكولاته معها يعرض الدهون اللي في الكاكاو إنها تفصل هذا طبعا غير إنها أصعب في الخلط بعدين وخصوصا إذا تخيلتي إنك قاعدة تسوين كمية جدا جدا كبيره من الجاناش زي ٢ أو ٣ كيلو شكولاته وهذا شي يصير في محلات الحلويات كل يوم تقريبا.

  12. NeeMo

    السلام عليكم..
    ممكن نستخدم كريمة الطبخ بدل كريمة الخفق؟

    1. Top Chef

      في اي وصفة ممكن هم نفس الشي بالضبط. الفرق الوحيد ان هذي يحطون عليها مثبتات تخليها اسرع تنخفق وتثبت اكثر بعد الخفق وهذيك يحطون عليها مثبتات عشان ما تفصل بسهولة لو (غلطتي) وغليتيها بقوة وقت طويل. المثبتات موب ضرورية هي يحطونها تجنبا لأغلاط الناس في الطبخ صراحة. الكريمة تنخفق لو بردتيها زين والكريمة ما تفصل لو ما غليتيها بقوة حتى لو بدون هذي المثبتات.

      لا تخلينهم يخدعونك عشان يبيعونك نوعين ما تحتاجينهم. من فترة قريبة محد كان يعرف الا كريمة الخفق ويمشون فيها كل امورهم

  13. غير معروف

    ماشاءالله تبراك الرحمن يعني وش نقول حاجة ماتخرش المية بس ياليت تتطرق لعمل الماكرون آآه كم آعشقة

    1. Top Chef

      فيه موضوع عن الماكرون بالتفصيل ؟

  14. ريم

    خلاص شيف اسفه سالت قبل مااقراء ردود الناس لقيت جوابي بواحد من الاسئله الموجوده
    يعطيك العافيه شيف انا لو علي عطيتك جائزه الطبخ للسلام بدل نوبل للسلام
    لنك كريم ومسالم وصادق وحريص في اعطاء المعلومات

  15. ريم

    مرحبا شيف يارب تكون بخير
    بالنسبه للجاناش الخفيف انت كاتب في الجناش الخفيف
    جزء شكولاته جزءكريمه
    ممكن تفهمني اياها بالنسب زي الباقيين لني مافهمتها وشكرا

  16. الاوتار

    الف شكر لك اخوي خالد اذكر مرة جربت فوندو في مطعم الله يكرم النعمة رجعت وسويته في البيت ولا احلى

    1. Top Chef

      هي كلللللها في نوعية الشكولاته. الموضوع موب سر

  17. غير معروف

    جزاك الله خير
    موضوع اكثر من راااااااائع
    انا بحب الجناش جداااااااااا وبعمله كتير
    وبيبقى طعمه راااااائع
    بعمله متوسط كميه كريمه مع كميتين شيكولاته مبشورة
    وفعلا عندك حق فى موضوع ان لو نوع الشيكولاته مش حلو الجناش كمان هيكون مش حلو
    لان حصلت معايا مرة جبت شيكولاته ولقتها طعمها مش حلو وجربت الجناش بيها مكنش ظريف
    جزاك الله خير

  18. عهود

    رااااااااااااااااائع

    مجهود تشكر عليه لاحرمك الله الأجر ..

    ألف شكر شيف .. استفدت من شرحك .. وجاري التطبيق بأذن الله ..

    دعواتي الخالصه وشكري ..

  19. بيرو

    مبدع كعادتك ..
    استفدت كثير بالذات من موضوع الشوكلاته
    ماشاءالله مفصل تفصصصييل
    ماعندي سؤال لان اللي يقرا مدونتك قبل لايسال متاكده بيحصل جوابه
    تسجيل اعجاب فقط لا غير =)

  20. nano

    شيف انت مافكرت تسوى كتاب
    شكرا شيف

  21. nano

    شيف لو سمحت كم كمية الجلكوز فى الجناش او على حسب المذاق

    1. Top Chef

      حسب الذوق وحسب اللمعة اللي تبين مافيه كمية محدده ولا تنسين إنه شي إختياري

  22. nano

    بارك الله فيك شيف

  23. nano

    شيف لو سمحت عندى سؤالين بالنسبة للجاناش الخفيف
    ايش يعنى شوكلا بالوزن وكريمة بالوزن يعنى كوب شوكلا وكوب كريمة
    السؤال التانى ينفع احط الجلكوز بدل الكورن سيرب لان مو موجود عندنا
    بارك الله فيك شيف وسلمت يمناك

    1. Top Chef

      لا بالوزن يعني بالوزن يعني ١٠٠ جرام شكولاته و ١٠٠ جرام كريمه.

      الجلوكوز نفس الكورن سيرب الفرق الوحيد هو من وين يجي السكر تقدرين تبدلينهم ببعض في أي وصفة.

  24. غير معروف

    يعني انا كنت السبب انك تعرف شئ جديد :) Candy Melts لاحظت بالمواقع الاجنبية بيستخدموها احيانا لتغليف الحلويات اللي تحتاج تغطية شوكلاتة وأحيانا يستخدموا الشوكلاته العادية وكنت حابه اعرف الفرق سواء بالطعم او بالنتيجة ككل
    انا احتاج اعرف لأني ابغى اعمل Cake Pops او Cake Balls
    وكنت حابه اغلفهم بالشوكلاته العادية او البيضاء او الملونة عشان الاظفال , وكنت بحاول اوصل لأفضل طريقة انها تطول وماتسيح على طول
    انت بتقول ايش الفايدة اذا ماذابت في فمي الشوكلاته , حقلك لأنو Cake Balls اصلا لين وغالبا بيكون بالشوكلاته يعني محتاجه شئ يكون متماسك من برا
    موضوع الشوكلاته قرأته واستفدت منه جدااا بس الشئ اللي بدور عليه مختلف عن مجرد تغطية

    1. Top Chef

      ما أعرف الكاندي ميلت زي ماقلت أول ولا قد جربتها الصراحة. بس الفكره سهلة ، إذا مابتذوب في الجو مابتذوب في فمك.

      فاهم عليك إنك تبين شي متماسك من برا ، بس الشكولاته العاديه لو ذوبتيها صح تصير متماسكه وفي نفس الوقت تذوب في الفم بالضبط زي الترفل كيف فيه طبقه تقرمش عليه.

  25. غير معروف

    طيب انت قلت الهيرشي نوعية سيئة طيب نفس الشئ اللي تبع نستله ؟؟… و لو انا ابغى شوكلاتات ملونة لتغليف الحلويات هل تنصحني ب Candy Melts او chocolate melting discs ؟؟
    انا قلت انو الشوكلاته تسيح زيها زي الشوكلاتة في الجو الخارجي…. بس اكيد في نوع معين يستحمل ويطول اكتر من غيره ؟؟
    بعض الناس يخلطوا الشوكلاتة الدارك مع جالاكسي … ايش رأيك؟؟

    1. Top Chef

      ذوووووووووووووووقي ، ذوقي وشوفي ، الموضوع جدا سهل ، شكولاته في الفم طعمها حلو أجل هي نوعية ممتازه بس . أقري موضوع الشكولاته شرحت كل شي عن الشكولاته وحتى عن تذوق الشكولاته ووش الطعم و النكهات اللي تدورين و أنتي تذوقين.

      الشكولاتاتا الملونة ماعندي أي خبره فيها الصراحة ؟ أصلا أول مره أسمع عنها هنا .

      فكري فيها شوي، الأنواع اللي ماتذوب في الجو الخارجي ماراح تذوب في فمك وش الفايدة ؟ ، الشكولاتات الأصليه المصنوعه من كاكاو وسكر بس زي ماشرحت في موضوع الشكولاته راح تذوب على حرارة الجسم مهما كانت نوعيتها.

      المهم في ذوبان الشكولاته هو إنك تكونين مسويه TEMPERING للشكولاته قبل تشكلينها عشان تمسك شكلها وما تذوب بسرعه، كثير ناس يذوبون الشكولاته بعدين يحطونها في الفريزر ويقولون ليش تذوب بسرعه ؟

      إذا كنت بأطبخ بشكولاته أبي أحسن شكولاته ، ليش أستخدم جلكسي ؟ جوده المكونات من جوده الأكل .

  26. nor

    مشكوووور اخوي على الرد
    طيب ممكن توضح اكثر اذا سمحت
    انت هنا ذكرت اربع انواع للجاناش ثقيل وسط وخفيف ومخفوق
    اي واحد ممكن استخدم الثقيل يعني ياليت اخوي تشرح لاني جدا محتاجه اعرف عمل الورده بالجاناش
    واعتذر على كثرة اسئلتي
    وشكرا لك

    1. Top Chef

      كل واحد من الأنواع بيعطي قوام غير بعد ما يجمد ، جربي وشوفي ، أبدي بالثقيل وبعدين شوفي إذا تبينه أخف.

  27. nor

    مشكوووور توب شيف والله يعطيك العافيه
    سؤالي اذا سمحت لي :
    كيف طريقة الجاناش اللي يستخدم في عمل الورود واوراق الشجر اللي يكون شكله زي الفوندان تقريبا
    وجزاك الله خير

    1. Top Chef

      ماله طريقة خاصه هو جاناش عادي. خليه يبرد شوي إلين يصير يتشكل وبعد ما تشكلينه خليه شوي يجمد.

  28. غير معروف

    سويت جاناش خفيف بس ما طلع سايل !!
    يعني اذا شلته بملعقه وطيحته يطيح جزا بسيط ومره وحده
    ابي اخليه مثل الهرشي السايل كيف؟؟

    1. Top Chef

      أي شكولاته أستخدمتي ؟ هو راح يكون خفيف بس ماراح يكون سايل.

      1. غير معروف

        لندت
        بس المقطع اللي انت حاطه سايل

        1. Top Chef

          ههههه أي مقطع ؟ هو راح يكون سايل يعني يطيح من الملعقة زي العسل تقريبا بس ماراح يكون سايل زي الهيرشي يعني شبه مويه.

        2. غير معروف

          ايوه كذا انت تمام فهمتك
          تدري المشكله مقياسك غير مقياس الناس احيانا
          انا شبه جامد تزلق قطعه كبيره وبس وبالدف بعد
          وربي حاطه نفس المكتوب بالضبط 100 جرام من الكريمه والتشوكلت وملعقه صغيره زبده

  29. rasha

    جزاك الله خيرا اسفه يا شيف كثرت الاسئله شيف اذا بسوي جناش شوكلت وزينت بيه الكب كيك ما يسيح اذا خرجت بيه في حراره الجو

    1. Top Chef

      زيه زي الشكولاته إذا الشكولاته بتسيح هو بيسيح

  30. بت بت

    سويت نص تارت الجاناش

    بس الصينية اللي استعملتها ما تنفك

    فـ لمن بردت شوي قلت بأنقلها لصحن و أصب الجاناش فيها ( أسوي فيها فاهمة يعني ×_× )

    بس

    لمن جيت أنقلها
    ا ن ك س ر ت
    :'(
    و ربي إحباط

    حطيتها في الفريزر و …..
    مو عارفة وش أسوي فيها؟

    1. Top Chef

      التارت قصدك القشرة بس اللي أنكسرت ؟ إذا بس القشرة أحس يعني سهلة كلها شغل ١٠ دقايق وتسوين وحدة ثانية .. إذا ما تبين تسوين وحدة ثانية كسري القشرة اللي عندك ورصيها في صحون صغيرة وصبي الجاناش عليها وقدميها بحيث تنوكل بالملعقة .

      1. بت بت

        أوك

        سويت وحدة جديدة و ضبطت الحمدلله :)

        بس اللي انكسرت بأسوي فيها زي ما قلت إن شا الله

        جزاك الله خير

  31. بت بت

    سؤال

    340 جم كريمة خفق
    كم تساوي لتر؟ ×_×
    هل هي نصف لتر فقط؟

    1. Top Chef

      ما أدري والله أوزنيها وشوفي

      1. بت بت

        هذا اللي شكله بيصير
        جزاك الله خير

  32. بت بت

    السلام عليكم

    كنت بسألك
    الجاناش الخفيف

    اللي بنستعمله في تارت الجاناش

    نستخدم 340 جم كريمة؟

    و ايش نوع الكريمة اللي تستخدمه يا شيف؟

    و

    جزاكَ الله خيراً ..

    1. Top Chef

      جزأ شكولاته لجزأ كريمة واضح أحس ؟

      أي نوع كريمة من بقر ( يعني موب نباتي !) ، قصير الأجل ( يعني موب طويل الأجل ) و كامل الدسم ينفع يستخدم وبيعطي نتيجة ممتازة. مدري عن الأنواع كلها اللي موجودة في السعودية بس المراعي عندهم نوع ينطبق عليه هذا الكلام .

  33. rema

    : )

    شيف اول مره اكتب تعليق في مدونه

    اعذر ( غفلتي ) فأنا لم انتبه ان التعليق و الرد يكون بالأعلى

    ( متعوده على اسلوب المنتديات )

    ( عذرا )

    يعطيك العافيه شيف

    1. Top Chef

      هههه بسيطة

  34. rema

    صباح الخير …

    شيف تسلم على الطريقه و الشرح

    رووعه ..

    بغيت أسال .. لو بعمل طريقة الطلاء
    كيف تطلع مرتبه و مضبوطه و تفتح النفس زي اللي بالصوره

    ممكن تشرح لي الطريقه ..؟؟

    الله لايهينك ..

    1. Top Chef

      صباح النور ..

      الطريقة بالضبط زي الفيديو اللي حطيت ( أقصد طريقة الصب و كذا موب شرط تمشين عالجاناش اللي هو مسوي ).. إذا أستخدمتي شكولاته ممتازه وناعمه و حطيتي طبقة أوليه ناعمه بتطلع معك كذا .

      المسألة مسألة تمرين وتدريب بس .. سويها كذا مره وكل مره بتطلع أحلى من المره اللي قبلها تبين تتعلمين تزيين كيك طبقي أكثر و أكثر مافيه إختصار للموضوع . طبعا لو لاحظتي هو ما يلمس الطلاء بعد ما ينحط يحاول قدر الإمكان يصبه بشكل صحيح عشان يطلع بلمعة حلوه.

  35. rema

    مساء الخير

    يسلمو شيف … و لااروع من كل النواحي : )

    حبيت أسأل لو بغيت اعمل الجاناش كطلاء

    كيف اعمل و كيف اصبه ..؟

    كيف الطريقه بالتفصيل … الله لا يهينك : )

  36. rema

    السلام عليكم

    كنت ابحث عن طريقة الجاناش و طحت على هالصفحه : )

    روعه و معلومات دقيقه و وصف حلو

    توب شيف يسلموو و بالتوفيق

    اللي ابي اعرفه لو حبيت استخدم الجاناش كـ طلاء و بقيته مرتب مثل اللي بالصوره

    متى اصبه ؟ و كيف ارتبه ….
    كيف الطريقه بالتفصيل ؟

    الله لايهينك

    1. Top Chef

      وعليكم السلام و الرحمة …

      إذا بتسوين طلاء سهل .. سوي جاناش حق طلاء بالضبط زي ما شرحت في الموضوع وبعدين وهو مايزال سايل صبيه على كيكه بشرط تكون شوي دافيه يعني ما تكون الكيكه من الثلاجه علطول .. لو تبين الكيكه تكون ناعمه مره لازم تحطين طبقة أولى أول بعدين تحطين الطلاء ..

      شوفي الفيديو يوريك كيف تصبينه :

  37. لحن الجحيم

    هلا اخوي

    حبيت استفسر عن الترافل

    كل كوب كريمه كوبين كاكاو

    طبعا الكوب الامريكي

    وهل تنفع كاكاو hershey’s الحبات

    1. Top Chef

      هلا والله ….

      لا لا … أرجع أقرأ الموضوع …

      المعايير بالوزن موب بالحجم .. كوب شكولاته كيف مقطع ؟ لو فكرت فيها شوي بتلاقي إنك لو كسرت الشكولاته كبار الكوب بيطلع وزن ولو قطعته صغار بيطلع وزن ثاني ولو قطعته أصغر بيطلع وزن ثاني بعد .. عشان كذا مستحيل تقيس الشكولاته بالحجم ..

      الهيرشي يمكن تنفع وبتعطيك ترفل صح .. بس هل بيكون أطعم ترفل ؟ طبعا لأ .. الهيرشي شكولاته جودتها جدا سيئة وطبق زي كذا ١٠٠ شكولاته مهم تستخدم أحسن نوعية شكولاته متوفره .. كتبت موضوع عن إختيار الشكولاته إذا كنت مهتم …

  38. ABEER

    اخوي توب شيف

    انا عملت الجاناش الخفيف بس طلع جدا مر وغامق !!
    استخدمت لندت 75٪ دارك
    ابيه معتدل مع حليب كيف؟؟
    بستعمله كجليز مع كرات الثلج

    1. Top Chef

      هلا والله …

      بسألك سؤال ذقتي الشكولاته قبل و أعجبتك ؟

      أرجعي أقري الموضوع و أقري بعد موضوع الشكولاته … لازم الشكولاته المستخدمه تكون معجبتك طعما .. ٧٥ أشوف إنه قوي بزياده ومر بزياده .. بس فيه ناس يحبونه .

      1. ABEER

        طيب ابي استعمل اللي بالحليب ينفع او لا ؟
        عندي بعض افراد الاسره ما تفضل الدارك شوكليت
        وابي اقولك معلومه انا ولا الف مره اقرا مواضيعك واحيانا ابي اطلع الغلط وين بالضبط ما لقاه
        اذكر مره سويت تجربتين فاشله والثالثه ضبطت
        بس شي مكلف بالنسبه لي لاني اخسر المكونات اللي احيان اتعب عشان احصلها يمكن الف اكثر من 4 اماكن تخيل !
        وشاكره لك ع تجاوبك السريع :)
        جزيت خيراً

        1. Top Chef

          يمديك تسوين جاناش بشكولاته بيضاء وبشكولاته بالحليب بآخذلك إقتباسات من الموضوع لأني تكلمت عن كل هذي النقاط :
          “أي نوع شكولاته ( إلا البودرة ) ممكن يستخدم عشان يتسوى منه جاناش. يعني الشكولاته الغامقة أو اللي بالحليب أو المره أو البيضاء كلها تنفع . النوع اللي بتكلم عنه و الوصفه اللي بعطيها كلها راح تكون بالشكولاته الغامقة .”
          هذا يجاوب على سؤال الحليب .

          “الشي المهم اللي لازم تعرفونه هنا هو إن جودة الشكولاته هي المحدد لجودة الجاناش . مافيه أي قناع ممكن نتخفى وراه هنا، لو الشكولاته ما تعجبنا لو أكلناها لحالها لا نسوي منها جاناش ماراح يكون لذيذ لو نسوي اللي نسويه . لو الشكولاته موب ناعمه الجاناش راح يكون خشن لو الشكولاته حامضه أو مره أكثر من اللازم الجاناش راح يكون كذا بعد . عشان كذا هذي وحده من الحالات اللي أستخدموا فيها أحسن شكولاته ممكنة . اللي ما يعرف وشلون يختار أحسن شكولاته يقرأ موضوع الشكولاته .”
          هذا بخصوص نوعية الشكولاته .

          “شي ثاني لاحظوا إني قلت في كل الحالات هذي شكولاتة غامقة ! . هذي النسب للشكولاته الغامقة بس لو أستخدمتوا هذي النسب لشكولاته بيضاء أو شكولاته بالحليب النتيجة ماراح تكون نفس الشي . مثلا لو كنتوا تبون جاناش وسط وحطيتوا جزئين شكولاته بيضاء مع جزأ كريمة الناتج هنا جاناش خفيف موب وسط ! هذي يمكن تسبب مشاكل . عشان كذا في حالة الشكولاته البيضاء و الشكولاته بالحليب دايما زيدوا كمية الشكولاته للكريمة . مثلا بدال ٣ أجزاء شكولاته غامقة لجزأ كريمة عشان جاناش ثقيل أستخدموا ٥ أجزاء شكولاته بيضاء و ٤ أجزاء شكولته بالحليب .. وزي كذا ….”
          هذا عن كيفية إستخدام الشكولاته البيضاء و اللي بالحليب ..

          بالنسبة للدارك .. شخصيا وفيه ناس كثييييير يشاركوني الرأي .. الشكولاته بالحليب حقت أكل بس .. إذا أنخلطت مع مواد ثانيه تضيع وما يبان طعم الكاكاو فيها .. اللي ما يحب الدارك أحلفلك ماقد جرب دارك زي الناس .. دوري دارك هادي شوي ٥٥٪ أو بالنسبة لي ٦٤٪ هي أحسن درجة ..

          داري المقادير أحيانا ما تتوفر في كل مكان وداري بعد إن الواحد أحيانا يشتري نوع ويتورط فيه .. بس برأيك وش العمل ؟ كذا الواحد يتعلم .. تشترين أنواع وتجربين مافيه طريق مختصر للتعلم .. أنتي الحين جربتي وشفتي أنا متأكد إنك تعلمتي أكثر من شي من تجربتك هذي .. المرات الجايه بتعرفين أحسن ..

          لو جاده في الموضوع وتطبخين كثير وتسوين حلويات كثير أشتري من النت .. في النت يمديك تشترين أحسن أحسن نوعيات شكولاته وبأسعار جدا ممتازه وبكميات كبيره تكفيك ٦ شهور أو سنة مثلا .. دوري على نوعيات زي valrohna , amedi , lindt , domori , Scharffen Berger هذي كلها ماركات شكولاته جدددددا ممتازة وتقدرين تشترينها من النت بأحجام ٥ – ١٥ كيلو وبتلاقين الأسعار أرخص من السوبرماركت لو حسبتيها ..

  39. موني

    بس بسأل الحين صوص الشوكولاتة يعني جاناش بالفرنسي ؟

    1. Top Chef

      لا … صوص شكولاته يعني أي شي سايل مصنوع من شكولاته تقدرين تخلطين بودرة كاكاو ومويه وتسمينه صوص شكولاته … الجاناش خليط كريمة و شكولاته و ممكن يتسوى بقوام خفيف بحيث يكون صوص شكولاته.

  40. موني

    يسلمو توب شيف استفدت جداً من الجاناش
    الله يوفقك وين ما كنت ..

  41. صوصو

    ما شاء الله وش ده الإبداع والفنون ياشيف صراحة المفروض يخلوك مدرس طبخ عالمي ..
    وبخصوص الجاناش أنا عندي مكعبات شوكولاتة غير محلى يصلح أستخدمه ؟؟؟
    وبعدين أنا دايم أشتري دونات من السدحان فيها حشوة شوكولاتة حلوة جدا جدا ومغطى بشوكولاتة متماسكة ولذيذة حسب خبرتك ياشيف هل هي الجاناش ؟!!

    وياليت تسيب المكان اللي عايش فيه وتجي الرياض وتفتح لنا مطعم وربحك مضموووون !! إلا انت وين ؟؟

    1. Top Chef

      هلا والله ….

      الشكولاته الغير محلاة تنفع بس لازم تغيرين الكميات ولازم تحطين كمية سكر كبيرة .. أفضل خليها لشي ثاني ..

      الشكولاته اللي عالدونات ممكن تكون أكثر من شي صعب أعرف وشي بدون ما أشوفها.

      حاليا أدرس في كندا ..

  42. هنوده

    ماشاء الله شرح وااافي
    ربي يسعدك يا شيف

    1. Top Chef

      مشكورة على مرورك وحياك الله دايما .

  43. Top Chef

    متاخرة بس مستفيده اكيد :)

    كل الشكر لك توب شيف فعلا الجاناش حلي الوحيد وقت الزنقات
    والنتيجه المذهلة دايما

    تسلم:)

    1. Top Chef

      الله يسلمك … مشكوره على مرورك .

  44. شغف

    لا جاء طاري الشوكلاته علومي تضيع

    بعد موضوعك هذا عرفت ليش الجاناش تكتل معي بعد ما أضفت الكريمه والسبب انها كانت بارده :$

    التوبه ماعاد بعيدها أبد الأبديين

    تسلم على هالكم من المعلومات والشرح الواضح ، لاهنت

    *اعذرني مارجعت رديت على موضوع الشوكلاته بسبب الاختبارات بس الأكيد اني قريتها واستفدت

    1. Top Chef

      هلا والله ….

      الله يسلمك مشكوره …

      خذي راحتك في الردود . دامك قريتيه هذا والله اللي يهمني .

  45. غير معروف

    ياخي الله يوفقك دنيا واخره …
    مدونتك كنز صراحه لكل واحد يبي يتعلم الطبخ عبى اصوله ويتفنن فيه …
    والله اقدع ميه مره من دراسه قسم الاقتصاد اللى ضاع عمرنا فيه
    ولا وصلو لنا ربع المعلومات اللى توصلها لنا …
    موفق ان شاء الله …

    1. Top Chef

      آآمين وياك و الجميع إن شاء الله ..
      مشكورة على كلامك وعلى مرورك .

  1. كريم تشيز فروستنج .. Cream Cheese Frosting | Guiddz

    […] و الحشوات المشهوره و المهمة مثل الكريمة المخفوقة و الجاناش و تكلمت عن البتركريم بشكل عام وعطيت مثال له اللي هو […]

  2. كريم تشيز فروستنج .. Cream Cheese Frosting » Top Chef Blog .. مدونة توب شيف

    […] بارفيه الموز بالشكولاته و اللوز و جوز الهند.. Banana ,Coconut, Chocolate and Almond Parfait » Top Chef Blog .. مدونة توب شيف على الجاناش .. Chocolate Ganache […]

  3. بارفيه الموز بالشكولاته و اللوز و جوز الهند.. Banana ,Coconut, Chocolate and Almond Parfait » Top Chef Blog .. مدونة توب شيف

    […] نسويه هو إننا ناخذ مقادير الصوص حق الشكولاته ونسوي فيه جاناش ، الطريقة في الموضوع . هذا صوص شكولاته جدا لذيذ تقدرون […]

  4. كريم تشيز فروستنج .. Cream Cheese Frosting « مدونة توب شيف … Top Chef

    […] و الحشوات المشهوره و المهمة مثل الكريمة المخفوقة و الجاناش و تكلمت عن البتركريم بشكل عام وعطيت مثال له اللي هو […]

  5. جاناش شوكولاته Chocolate Ganache | laila abdullah

    […] من هنــــــــــــــــا .. من تدوينه التوب شيف     شكرا لك […]

  6. بارفيه الموز بالشكولاته و اللوز و جوز الهند.. Banana ,Coconut, Chocolate and Almond Parfait « مدونة توب شيف … Top Chef

    […] نسويه هو إننا ناخذ مقادير الصوص حق الشكولاته ونسوي فيه جاناش ، الطريقة في الموضوع . هذا صوص شكولاته جدا لذيذ تقدرون […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: