«

»

مايو 07 2011

المكسيك : تشيلي ريينوس .. chile rellenos

هلا والله ….

ANY CHARACTER HERE

هذا الموضوع الثالث في فعالية حول العالم في ٣٠ يوم.


الأكل المكسيكي واحد من ألذ أنواع الأكل بالنسبة لي. المطبخ المكسيكي هو تطور من أكل السكان الأصليين لأمريكا أو الهنود الحمر ويعتمد بشكل كبير على المكونات الموجوده في نفس المنطقة. تأثر المطبخ المكسيكي بثلاث ثقافات أساسية اللي هي الأمريكية من الشمال ، و الكاريبيه من الشرق و الجنوب و طبعا الأسبانية من الغزاة الأسبان. الأكل المكسيكي يعتبر أكل شعبي و أكل شارع و غالبا مكوناته رخيصه. أهم المكونات المستخدمه في المطبخ المكسيكي هي : الذرة و الرز كمصدر نشا ، البقوليات (بكثرة) و البقر و الخنزير و طبعا الدجاج كمصدر بروتين في الشمال و الجنوب و الأسماك و المأكولات البحريه جنب السواحل ، الفلفل بأنواعه سواء كان طازج أو مدخن أو مجفف أو مطحون من أهم المكونات عندهم وتقريبا يدخل في كل طبخه ( جنوب أمريكا هو الموطن الأساسي للفلفل و الطماط و البطاطس للمعلوميه ووصلت لباقي العالم عن طريق المستعمرين ) ، الكمون و الكزبرة و القرفة كبهارات و أعشاب و الطماط و التوماتيو ( شي يشبه الطماط بس أخضر ) و  الأفواكادو كفواكه . الشكولاته تستخدم في الأكل المكسيكي بشكل جدا كبير ( خصوصا إنه موطنها الأصلي ) سواء كشراب أو حتى في الأكل كمادة عشان تثقل الصوصات وطبعا الحلويات.


الأكله اللي بسويها اليوم هي التشيلي ريينوس أو الفلفل المحشي . هي عبارة عن فلفل مشوي و محشي وبعدين مقلي ويقدم مع أو بدون صوص . الأكله هذي منتشره بشكل كبير في المكسيك ولها تفرعات كثير مره سواء كانت في الحشوة أو القلي أو التغطية أو حتى نوعية الفلفل، ناس يسوونها محشية بجبن وناس بلحم وناس بفاصوليا و ناس بدجاج وناس بأكل بحري وممكن تنحشي بأي شي ثاني. ناس يستخدمون فلفل “البوبلانو” وناس يستخدمون فلفل “الهالبينو” وناس ثانين يستخدمون فلفل “الأناهيم” أو الفلفل الأمريكي ، فيه ناس حتى يستخدمون فلفل مجفف ، الخيارات جدا كثيره.  ناس يقلونه وناس لأ ، ناس يستخدمون تغطيه بيره وناس يستخدمون تغطية بيض وناس يستخدمون تغطيه طحين عاديه . فيه ناس يقدمونه مع صوص وناس يقدمونه لحاله وناس يقدمونه داخل خبز تورتيا حتى يعني زي حشوه تورتيا. الخيارت جدا كثيره وسهل مره تعدلون على الوصفة إذا عرفتوا الخطوات الأساسية. النوع اللي بسوي اليوم مصنوع من فلفل إسمه “بوبلانو” poblano وهو عبارة عن فلفل حار كبير بس بحرارة معتدلة. الحشوة عبارة عن جبن تشدر بس ممكن تستخدمون أي نوع جبن تحبون.


المقادير :

ANY CHARACTER HERE

٨ حبات فلفل “بوبلانو” poblano أو “هالبينو” jalapeno  أو أي فلفل حار ثاني بتجويف كبير ينفع ينحشي.

تقريبا ٣ أكواب جبن تشدر أو مونتري جاك أو أي جبن ثاني تحبون.

طحين

٤ بيضات مفصولة

رشة ملح

زيت للقلي

للزينة :

صلصة مكسيكية

ساور كريم

ورق كزبرة

ANY CHARACTER HERE

* هذا شكل فلفل البوبلانو للي يبي يدوره وزي ماقلت هو موب ضروري أو مهم أو حتي بيعطي أحسن نتيجة هذا بس اللي أنا أستخدمت وكل مره أسوي الوصفة بطريقة غير.. أي فلفل حار مجوف ممكن يستخدم.

ANY CHARACTER HERE


ANY CHARACTER HERE

الصلصة المكسيكية اللي أقصد هي الصلصة العادية اللي تنباع في القسم المكسيكي جنب بهارات التاكو وهذي الأغراض. هي موب ضروريه أبدا الفلفل لذيذ بدونها.

ANY CHARACTER HERE

الطريقة :

طريقة تجهيز الفلفل :

ANY CHARACTER HERE

أول شي بنسويه هو إننا بنشوي الفلفل عشان نقشرة وعشان نعطيه طعم شوي لذيذ، هذي الخطوة ضروريه وتقدرون تسوونها قبل بكم يوم ، لو ما قشرنا الفلفل أول ما يدخل الزيت بتطيح التغطيه غير كذا القشر قاسي وصعب ينوكل وهو مقلي . عشان نشوي أي فلفل فيه أكثر من طريقة : الطريقة الأولى هي إننا نحطه على عين الغاز علطول ونشويه إلين يقلب أسود من كل مكان ، الطريقة الثانيه ( المفضله بالنسبة لي وهي أسرع شي )  هي إننا نستخدم دافور زي حق الكريم بروليه ونحرق الفلفل من كل مكان ، الطريقة الثالثة هي إننا نستخدم الشواية حقت الفرن يعني نشغل الفرن من فوق على أعلى شي ونحط الفلفل في صينية في أعلى رف في الفرن بحيث يكون قريب من النار ونشويه إلين يقلب أسود من كل مكان مع التقليب من وقت لوقت.

ANY CHARACTER HERE

charred pepper

تقشير الفلفل


بعد ما نشوي الفلفل نحطه في صحن ونغلفه بنايلون تقريبا ربع ساعة ، البخار اللي يطلع بينزل عالفلفل وهذا بيسهل التقشير . نقشر الفلفل بيدنا شوي شوي ونحاول قدر الإمكان ما نخرمه. بعد ما نقشر الفلفل نسوي فتحة على طول الفلفل بالسكين ونشيل البذور حقت الفلفل مع الراس حقها بس نخلي الجذر . الحين الفلفل جاهز للحشي .

ANY CHARACTER HERE

بوبلانو

طريقة حشي الفلفل :

ANY CHARACTER HERE

نبشر الجبن بعدين ناخذ الكمية اللي نبي نحشيها ونضغطها شوي ونشكلها على شكل أسطوانه ، نحشي الفلفل بالجبن  ( أو أي حشوة ثانيه تحبون ) بعدين نقفل الفتحة بعود أسنان خشب. نقفل أي فتحة أو شق ثاني في الفلفل بنفس الطريقة بإستخدام عود أسنان خشب.

ANY CHARACTER HERE

CHEESE STUFFED

طريقة التغطية :

ANY CHARACTER HERE

ناخذ بياض البيض ونخفقة في صحن معدن ونسوي منه مرانج إلين يوصل مرحلة الرؤوس الصلبة. نخلط صفار البيض مع رشة الملح في صحن ثاني بعدين نخفق الصفار عالبياض مع ملعقة كبيره طحين شوي شوي إلين يكونلنا تغطيه كثيفة .

ANY CHARACTER HERE

تغطية

طريقة القلي :

ANY CHARACTER HERE

القلي عملية كثير ناس يتساهلون فيها بعدين يستغربون ليش أكلهم يشرب الزيت ؟ أو ما يقرمش ؟ التحكم بحرارة الزيت هو سر القلي دايما ، لو الزيت كان بارد الأكل بيشرب الزيت ولو الزيت كان حار أكثر من اللازم الزيت ممكن ينحرق أو الأكل ممكن ينحرق من برا قبل يستوي من داخل. أنا أنصح أي شخص يشتري ميزان حرارة حق زيت ، ميزان الحرارة بيخليكم تراقبون حرارة الزيت بالضبط كم وتعرفون هل هو حار ولا بارد هذا غير إنه يعطيكم تحكم أكثر بكثير.

ANY CHARACTER HERE

سخنوا الزيت على حرارة أعلى من وسط بشوي إلين يوصل حرارة 375  فهرنهايت . اللي ماعندهم ميزان حطوا شوي من التغطية في الزيت إذا طفت يعني الزيت جاهز و إذا نزلت للقاع يعني لسا بارد. الحين خذوا حبه من الفلفل ( أمسكوها من العود حقها ) وغطسوه في شوي طحين بعدين شيلوا الزايد. الحين غطسوا الفلفل في التغطيه بعدين حطوه في الزيت الحار وسوا نفس الشي بباقي الفلفل أهم شي لا تزاحمون الفلفل في المقله لأن هذا بيبرد الزيت. أطبخوا الفلفل مع التقليب إلين تقلب التغطيه ذهبيه وتصير تقرمش بعدين جففوه على ورق نشاف وقدموه مع الصلصة و الساور كريم.

ANY CHARACTER HERE

الفلفل لازم ينقلي قبل الأكل مباشره ، تقدرون تشوونه وتحشونه قبلها بيومين وتحفظونه في الثلاجة بس القلي و التغطيه لازم تتسوى قبل الأكل علطول. بعد القلي حطوا الفلفل في فرن دافي إلين تقدمونه بس زي أي شي مقلي ماراح يعيش وقت طويل و القشرة بتترطب و الحشوة اللي كانت ذايبة بتجمد.

ANY CHARACTER HERE

قلي الفلفل

تشيلي ريينوس

chillie rennos

فلفل محشي

عن الكاتب

Top Chef

25 comments

8 pings

Skip to comment form

  1. rozee

    مشكووور على الوصفه بس تنفع مع الفلفل الرومي

    1. Top Chef

      ممممم موب شي بسويه شخصيا ، طعم مختلف تماما.

  2. nana

    عجبتني الطبخة وأكيد لذيذة بوجود الفلفل الحار
    شكرا على التفاصيل في شرح الطبق

  3. بدور

    الله يعطيك العافيه ، ممكن تنزل وصفات مكسيكيه اكثر لأني احبها كثير ^_^

  4. أنمار

    روووعه ابداع مرا
    لازم اجرب وصفاتك
    بس لازم قبلها انزل السوبر ماركت واشتريه كله D:

  5. الاوتار

    الي حصلته اكبر من الفلفل الرومي نفسه ان شاء الله اسويها مره ثانية واظبطها ومشكور

    1. Top Chef

      أكبر من الرومي ؟ مدري والله من وين جبته هههههه بس شكله رومي كبير.

  6. الاوتار

    سويتها اليوم المشكلة الي صارت معي التقشير استخدمت فلفل اكبر من الي في الصورة ما اعرف اسمه يمكن شويته زيادة

    1. Top Chef

      ما تقدر تشويه أكثر من اللازم ؟

      ما أعتقد فيه فلفل أكبر من هذا إلا فلفل رومي ؟

  7. الاوتار

    مشكور على الوصفه

  8. عاصميه

    روعه بس عندي سوال الجبن اي كان نوعه ماراح يذوب ويطلع مع الزيت وقت القلي ؟؟ لاني احس ان عود الاسنان مو كافي

    1. Top Chef

      التغطيه هي اللي تمنع موب الجبن. العود بس عشان يمسك شكله وإحنا نغطسه في التغطيه.

      بشكل عام أمشي عالخطوات بالضبط زي ما أقول وإن شاء الله ما تجيك مشاكل

  9. جود الفهد

    إذا جبن كرافت مو طيب بالاكل ،، اجل اش النوع الشيدر اللي تنصحنا فيه ومتوفر في الاسواق السعوديه والعربيه

    1. Top Chef

      أي نوع ما يكون معلب .

  10. طبخ

    إبداع, وين طبق أسبانيا؟

  11. غير معروف

    يسلمو ايديك مستر

    هذه تذكرت وصفة قريب منها حبة وهي اخذ الفلفل واحشية ثم الفة بشرايح بف باستري واقلية

    ما اكذ عليك حسيتها ثقيلة ودسمة بس وصفتك شكلها تعذب من هنا ما تحملت شوفتها اجل وشلون طعمها

    عموما عندي فلفل احمر حار اجربها بعون الله بكرة وارد لك خبر

  12. سفونه الليمونه

    صراحه الشكل شهي بالمره

    طيب سين سؤال يامستر شيف

    الصوص الاحمر اللي تحت الفليفله ممكن طريقته ؟؟لاتقول مو ضروري انا حابه اعرف نفس الطريقه
    وبالنسبه للجبنه ينفع تشدر كرافت؟؟
    وااخر سؤال=ماصار سؤال الى الان3 :/
    السور كريم مو دايم متوفر هل فيه بديل وطريقة اكل الطبق كيف يعني يتقدم مع رز او خبز او……

    متحمسين للبقيه

    1. Top Chef

      الصوص الأحمر جدا سهل وبيني وبينك بالعادة أسويه بس مادوي أحط أكثر عشان لا يستصعبون الناس الموضوع .. الصوص طريقته إنك تحطين ٤ حبات طماط مع ٤ حبات فلفل حار في فرن حار وتشوينها . بعد ما تشوينها حطيهم في خلاط ( وشيلي حبوب الفلفل لو تبينه أبرد شوي ) مع حبة بصل كبيره وفصين ثوم و أخلطي كل شي بس خليه شوي خشن . الحين سخني ١/٤ كوب زيت وبعد ما يحتر صبي عليه خليط الطماط و أطبخيه إلين يقلب لونه برتقالي شوي ويثقل .

      تشدر كرفت الله يكرم النعمة . جربيه على مسؤوليتك ..

      الساور كريم تقدرين تحطين بداله زبادي بس بيكون طعمه واضح شوي فحطي أقل .

      الطبق ممك يتقدم كطبق مقبلات أو ممكن يتقدم كطبق رئيسي مع شوي سلطة ورق مثلا أو يمديك حتى تسوينه بفلفل هالبينو وتسوينه مقبلات صغيرة يعني زي السمبوسة

  13. غير معروف

    طبق ولا اروع باذن الله نجرب الطبق حال توفر الفلفل الاحر كون هذا النوع ما عمري شفتة صراحة

  14. غير معروف

    ايوه كذا تمااااااام
    بعدنا عن اللحوم
    رووووووعه بانتظارك الحلويات يارب يصير لها نصيب

  15. um nwaf

    ماشاء الله
    حبيتها الفكرة جدا..خصوصا التغطية

    اقترح تخلي الفعالية في تصنيف مستقل

    1. Top Chef

      هلا والله …

      أسهل لو يكون التصنيف كذا .. الفعالية في الفترة هذي بس ، بعد فترة محد يهتم بالفعالية بس الوصفات باقية وودي تكون مفهرسة صح .. بحط فهرس للوصفات في موضوع الفعالية آخر شي .

  16. غير معروف

    شكلها روووووعه
    طيب انا مااحب الحار
    ينفع اسويها بالفليفلة؟
    تسلم ي شيفنا

    1. Top Chef

      و طعمها أضمنلك أروع ..

      تذكري إن الفكرة من الفعالية إننا نجرب شي جديد ونفتح لنفسنا أبواب في الأكل جديده .. جربي الطريقة زي ماسويت ومتأكد راح تغيرين نظرتك عن الفلفل كلها .. الحرارة في الفلفل موجوده في الأشياء اللي تمسك الحبوب بجسم الفلفل إذا شلناها تختفي الحراره تقريبا مهما كان نوع الفلفل ( ماتروح تماما بس تقل بشكل جدا كبير ) تحت الحرارة هذي كل فلفل له طعم غير عن الثاني ، طعم أحيانا ما تتصورينه ولا تتوقينه ، فيه بعض الأنواع تجيك حلوه وفيها نكهات فواكه حتى !

      الفليله كبيره وجلدها قاسي وتحتاج وقت طبخ أطول بكثير .. تقدرين تسوينها فيها بس ماراح تكون النتيجة بنفس الطعم ..

  17. غير معروف

    ماشاء الله عليك ياتوب شيف انا متابعه لك وانبسطت لما لقيت لك مدونة

  1. البيض المحشي .. Deviled Eggs » Top Chef Blog .. مدونة توب شيف

    […] ختام فعالية حول العالم في ٣٠ يوم …. » Top Chef Blog .. مدونة توب شيف على المكسيك : تشيلي ريينوس .. chile rellenos […]

  2. ختام فعالية حول العالم في ٣٠ يوم …. » Top Chef Blog .. مدونة توب شيف

    […] المكسيك : تشيلي ريينوس […]

  3. أمثلة لوصفات بيتزا .. Pizza Examples » Top Chef Blog .. مدونة توب شيف

    […] و ناشفه ، ذرة ، فلفل أحمر مشوي ( تلاقون طريقة شوي الفلفل هنا ) ، ريحان ، بقدونس ، سبانخ وبصل أحمر. المكونات تمشي مع […]

  4. البيض المحشي .. Deviled Eggs « مدونة توب شيف … Top Chef

    […] الصفار مع شوي زيت زيتون وفلفل أحمر بارد مشوي ومقطع وشوي […]

  5. أمثلة لوصفات بيتزا .. Pizza Examples « مدونة توب شيف … Top Chef

    […] و ناشفه ، ذرة ، فلفل أحمر مشوي ( تلاقون طريقة شوي الفلفل هنا ) ، ريحان ، بقدونس ، سبانخ وبصل أحمر. المكونات تمشي مع […]

  6. ختام فعالية حول العالم في ٣٠ يوم …. « مدونة توب شيف … Top Chef

    […] المكسيك : تشيلي ريينوس […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: