كندا : سالمون مع صوص الصويا مطبوخ بخشب الأرز .. Cedar Planked Salmon

هلا والله …

هذا أول موضوع في فعالية حوال العالم في ٣٠ يوم وقلت أبدأها بمكاني هنا في كندا ونتحرك من هنا.

كلمة أكل كندي شوي واسعة لأن كل منطقة لها أكلها الخاص. نقدر نبسط الأكل الكندي بإننا نقسمه لأكل شرق و أكل غرب و أكل مقاطعة كوبيك ( اللي أنا فيها ). كوبيك هي المقاطعة الفرنسية من كندا ، أغلب السكان اللي هنا ( بإستثناء المهاجرين طبعا ) يرجع أصلهم لفرنسا، هذا أكيد أنعكس على أكلهم اللي يعتبر فرنسي بشكل جدا كبير لدرجة إن بعض الناس يعتبرونه فرع من فروع الطبخ الفرنسي !. الأكل الكندي زي أي أكل ثاني تأثر بشكل كبير بالمهاجرين اللي هاجروا لكندا. عشان كذا نلاقي إن الأكل الكندي فيه من الأكل الصيني و الهندي و العربي و الإيطالي و الروسي وطبعا الفرنسي .

الوصفة اللي بسوي اليوم جدا تقليدية خصوصا في غرب كندا. الوصفة عبارة عن سمك سالمون مطبوخ فوق خشب أرز ومدهون بصوص مصنوع من الميبل و الصويا. السالمون للي ما يعرفه نوع سمك دهني جدا جدا لذيذ واحد من ألذ الأسماك بالنسبة لي، عكس السمك الأبيض السالمون له طعم واضح ودايما رطب عشان الدهن اللي فيه. الميبل عبارة عن شيره تطلع من نوع شجر معين ، هذي الشيرة جدا لذيذه وهي مكون أساسي في الأكل الكندي (لدرجة إنهم حاطين ورقة الشجر حقتها عالعلم !). الخشب بيعطي السمك نكهة دخان خفيفة تشبه السالمون المدخن تقريبا. خشب الأرز هو اللي بستخدم اليوم بس أي خشب قوي ممكن يستخدم أهم شي ما يكون معالج يعني يكون طبيعي ١٠٠٪.  السالمون بعد موب ضروري لهذي الوصفة تقدرون تستخدمون دجاج مع الجلد و العظم أو حتى السمان أو الحمام بيكون رهيب بهذي الطريقة.

المقادير :

كوب ميبل سيرب maple syrup (يسمونه الظاهر شراب القيقب )

ملعقتين كبار زنجبيل مهروس أو مبشور

٥ ملاعق كبيره عصير ليمون

٣ ملاعق كبيره صوص صويا

فصين ثوم مفرومه

كيلو فيليه سالمون

قطعة من حطب الأرز الغير معالج تكون أطول شوي من السالمون

بصل أخضر مقطع على زاوية

* خشب الأرز مقطع جاهز متوفر عندنا في السوبرماركت يجي شكله زي كذا :

في حال ما توفر عندكم ولا قدرتوا تلاقون خشب بديل تقدرون تسوون الوصفة بصينية فرن وبتطلع في كل الأحوال لذيذه..

الطريقة :

نخلط الميبل مع الصويا و الزنجبيل و الثوم و عصير الليمون وشوي ملح وفلفل في قدر ونخليه يطبخ على غلية جدا خفيفه إلين ينقص ويصير الخليط تقريبا ٣/٤ كوب تقريبا نص ساعة. نشيل الخليط من النار ونخليه يبرد شوي.

نسخن الفرن ل ٣٥٠ بعدين ندهن الخشب لو كنا بنستخدم بزيت زيتون. ندخل الخشب الفرن ونخليه تقريبا ربع ساعة. الهدف هنا هو إننا نطلع شوي من نكهة الخشب عشان تدخل بسرعة في السمك.

نطلع الخشب من الفرن ونفرش الخشب بشوي بصل أخضر بعدين نحط شريحة السالمون عليها. نرش ملح وفلفل على وجهين السالمون بعدين ندهن بفرشة شوي من الصوص عليه من كل الجوانب. ندخل الخشب وفوقه السالمون عالفرن ونخليه إلين يستوي تقريبا ٣٥ دقيقه إذا كان بالخشب أو ٢٠ دقيقه إذا كان بصينية فرن.

نوزع السالمون عالصحون ونقدمها مع زيادة من الصوص الباقي .