Candying Fruits …..

هلا والله ….

.

جاني سؤال عالآسك أمس بخصوص صناعة الزنجبيل المسكر أو الحلو Crystallized  Ginger وكان السؤال في وقته صراحة كونه كان عندي زنجبيل وودي أسوي فيه شي . أنا تكلمت من زمان عن شي قريب مره من هذا اللي هو قشر الحمضيات المسكر أو المحلى كلهم لهم نفس المبدأ . للي ما يعرف اللي قاعد أتكلم عنه هو عباره عن شرايح زنجبيل نحيفه تنباع في السوبرماركت في الغالب وتكون كذا مغطيه بطبقة سكر وطعمها زنجبيل خفيف ومره لذيذه . ترجمة الإسم شوي صعبة صراحة بس حسب ترجمة جوجل طلع إسم حلو مره اللي هو “ملبس الزنجبيل” .هل بس ينفع الزنجبيل ؟ لا طبعا أي أي شي ثاني تقدرون تستخدمونه . مثلا قشور الحمضيات بأنواعها رهيبه كذا . المكسرات بأنواعها تصير رهيبه بعد وخصوصا إذا تحمصت شوي . الفواكه بأنواعها ممكن تستخدم مثل التفاح ، الكرز ، الأناناس ، الكمثرى … كل هذي ممكن تستخدم .. الفواكه الصغيره مثل الكرز أو اليوسف أفندي الصغير ممكن تستخدم كامله ! أو ممكن تتقطع حسب الرغبه وحسب الشكل و الإستخدام المطلوب .

.

الملبس ببساطه شديده هو عبارة عن فواكه أو أي شي ثاني بعد مثل خضار أو غيرها مطبوخه و محفوظة في شيرة سكر . الشيرة مليانه سكر صح و السكر يحب المويه وراح يسحب الرطوبه من الفواكه اللي أستخدمها وبكذا تصير الفواكه بيئة غير ملائمه للبكتيريا تعيش فيها وبكذا تعيش الفواكه فترة أطول . غير كذا السكر اللي حولين الفواكه راح يسحب الرطوبه من أي بكتيريا تجي وهذا راح يقتلها علطول . نفس المبدأ هذا هو السبب اللي يخلي شي زي المربى يعيش فترات طويله .

.

نقدر ببساطه نطبخ الفواكه هذي في شيرة وبعدين نقفل النار ونخلي الأكل في الشيره هذا بيخليها ملبس عادي أو نقدر نشيلها من الشيره ونغطيها بسكر عادي وخلاص وهذا بيكون طبقة سكر ثقيلة حولينها . أو نقدر ناخذ خطوة زيادة ونطبخها زود بعد إلين ما يرجع السكر يسكر مره ثانيه أو يتبلور يعني يتحول جامد مره ثانيه ويكون طبقة سكر خفيفه على الفواكه .

.

شوفوا الطريقة اللي تعجبكم أكثر وسوها كل الطرق تنفع .. الشي الوحيد المشترك بين كل الطرق واللي راح تلاقونه في كل الوصفات هو إن فيه شيره وفيه شي ينطبخ فيها وهذا هو المهم . شخصيا أفضل الطريقة الأخيره لأشياء زي القشر أو الزنجبيل و الطريقة الأولى لأشياء مثل الفواكه الكامله .

.

نجي للتفاصيل ، كيف نسويه بالتفصيل . راح أعطكم مثال هنا للزنجبيل وقيسوا عليه باقي الأشياء .

.

أول شي ناخذ الزنجبيل أي كمية نبي ما يفرق ونقشره ونقطعه شرايح نحيفة قد ما نقدر . موب شرط أبدا تكون نحيفه بس كون الزنجبيل طعمه قوي مره لو كانت الشرايح متينة شوي بيكون طعم الزنجبيل قوي مره .

 .

sliced ginger

.

الحين ناخذ الزنجبيل ونسلقه في مويه كافيه إنها تغطيه وزياده إلين يصير لين ويخف حدته شوي . العملية هذي ممكن تاخذ من ٢٠ – ٣٠ دقيقه حسب عمر الزنجبيل ذوقيه وشوفي هل صار لين ولا لأ . هذي العملية تستخدم بعد مع أشياء مثل قشور الحمضيات مثلا أو الفواكه القاسيه عشان نلينها شوي أو نشيل من حدة طعمها مثل لو كنت أسوي قشر جريب فروت مثلا . بس هي موب ضروريه ! مثلا مع الكرز أو الأناناس أو مثلا المكسرات هذي الخطوة مالها داعي بس مع الأشياء القاسيه أو اللي طعمها قوي مره مثل هنا تكون مهمة . بعد السلق نصفي الزنجبيل مع الإحتفاظ بمويه السلق .

.

موية سلق الزنجبيل حلوه تنخلط مع أشياء ثانيه مثل السفن أب مثلا أو العصيرات أو مثلا مع الشاهي تصير مره لذيذه عشان كذا لو تبون أحفظوا المويه حرام تنرمي. راح أستخدم المويه هنا حقت الزنجبيل عشان أسوي الشيره اللي بطبخ الزنجبيل فيها . الهدف هو إني أعطي طعم زنجبيل للتغطيه بعد بس هي موب ضروريه أبد يعني يمديكم تستخدمون مويه عاديه لو ما تبون .

.

الحين نوزن الزنجبيل اللي عندنا ونحطه في قدر ونزيد عليه بنفس الكمية سكر أبيض عادي .

.

candied ginger

.

الحين نزيد عليه شوي من مويه السلق نحط شوي من موية السلق حوالي ملاعق بس إلين يصير السكر شوي رطب وهو مع الحراره بيصير سايل .مثلا في حالتي أستخدمت ملعقتين كبار بس مع كميه السكر اللي في الصوره اللي فوق ! .

.

ginger in suyrp

.

الحين نخلي الشيره تطبخ على حرارة وسط وشوي شوي بنلاقي إن الفواكه بدت تصير شفافه .شوي شوي العملية ما تطول يمكن ١٠ دقايق تقريبا (للزنجبيل بس كل نوع فواكه بياخذ وقت غير). عند هذي المرحلة خلاص هذا ملبس ! يمديكم الحين تطفون النار وتخلون الشيره و الفواكه تبرد وتحفظونهم في الثلاجه. بتعيش لوقت طويل حوالي ٦ شهور . أو لو تبون شيلوه من الشيره وغمسوه بسكر عادي عشان تعطونه الشكل المعروف . أو كملوا معي .

خلوا السكر يطبخ على حراره وسط وهو يطبخ جهزوا شبك تبريد فوق صينية وأدهنوا الشبك بشوي زيت زي كذا :

.

.

خلوا الشيره تكمل طبخ إلين تلاقون إن السكر بدأ يتبلور مره ثانيه ويرجع سكر جامد زي كذا :

.

candied ginger

.

لاحظوا أطراف القدر كيف السكر هنا . الحين شيلوا الخليط من النار ووزعوا الزنجبيل أو الفواكه المستخدمه على لوح التبريد وخلوا الشيره الزايده تنزل من الشبك عادي .

.

زنجبيل ملبس

.

بعد يمكن ساعتين بتلاقون إن الشيره بدت ترجع سكر جامد وبيصير شكله يشبه حق السوبرماركت . بس هذا الزنجبيل الملبس جدا سهل ومقاديره متوفره في كل بيت و يعيش لوقت طويل . و نصيحة لا توقفون عند الزنجبيل فيه أشياء وفواكه كثير تصير رهيبه كذا إضافه إنها تنحفظ لوقت طويل . يعني إذا لقيتوا إن عندكم فواكه أو شي زايد بدال ما ترمونه سوووه بهذي الطريقة .

كذا شكله النهائي :

.

زنجبيل ملبس

.

أحفظوه بعلبه تتقفل زين في الثلاجه وراح يعيش وقت طويل يمكن ٦ شهور أو أكثر بعد .

هذا تطبيق ثاني بس أستخدمت قشر جريب فروت .

.

قشر جريب فروت

.

نقشر الجريب فروت زي كذا . بعدين نشيل الجزأ الأبيض هذا كونه مر مره نفس العمليه أسويها لكل الحمضيات بعد . بعدين نقطعه حسب الرغبه نقدر نخليه كبير أو شرايح نحيفه حسب الرغبه المسألة راجعتلك . هنا أنا قطعتها شرايح نحيفة .

.

قشر قريب فروت

.

الحين نعيد نفس العملية حقت الزنجبيل بالضبط . نسلق القشر إلين يصير لين شوي بعدين نصفيه ونحط عليه سكر بنفس وزنه وشوي مويه ونطبخه إلين يقلب شفاف بس . هنا بسويه بطريقتين الأولى زي الزنجبيل .

.

قشر ملبس

.

طعمه رهيب كذا . شوي يقرمش وفيه طعم جريب فروت مره حلو .

أو أسويه بدون ما أخليه يسكر علي يعني بس أطبخه في شيرة إلين يقلب شفاف زي كذا :

.

قشر جريب فروت ملبس

.

لاحظوا كيف شفاف صار ! .

طيب نجي للخلاصة وش الفايده ؟ ليش أسوي هذي الأشياء أو وش إستخداماتها ؟ إستخداماتها كثيره في الحلويات (أو الموالح زي قشر برتقال مع بط مثلا) يمديكم تقطعونهم صغار وتضيفونهم لموس أو سوفليه ، يمديك تحطونه كقطع صغيره في إيسكريم أو مع خلطة كوكيز (الجينجر سنابس ما ينفع إلا مع زنجبيل مسكر مثلا) ، مع أشياء زي حشوه جبن (زي الكانولي مثلا) ، فوق إسكريم ، فوق كيك ، مع كريب. أو حتى يمديكم تاكلونها لحالها زي الزنجبيل مثلا مع الشاهي يطلع حلو .

.

إسكريم مع ملبس قشر جريب فروت

.

Follow TopChefCooks on Twitter

 

34 comments

8 pings

Skip to comment form

    • Anonymous on 6 April, 2014 at 12:03 am
    • Reply

    شيف لو بسوي تفاح اقطعه واطبخه مع الشيرة ثم اطلعه منها والا احفظه معها؟

    1. الإثنين ممكنين. إذا خليتيه في الشيره بيجيك شيره تفاح + تفاح لذيذ وإذا طلعتيه بيجيك شي يشبه التفاح المجفف

    • Anonymous on 9 December, 2013 at 4:15 pm
    • Reply

    سؤال، بالنسبة للطرق اللي ذكرتها، اما اخليه بالشيرة واحفظه معها
    او تشيله من الشيرة واحط عليه سكر
    او اخليه يطبخ لين ما يتكرمل السكر عالفاكهة
    سؤالي بالنسبة للخطوة الاخيرة.. قصدك اشيل الفاكهة واغمسها بسكر بعدين ارجعها عالنار؟ ولا اخليها بالشيرة بدون ما اطلعها واخليها تكمل طبخ بدون ما اطلعها؟ واطلعها اخر شي لما يتكرمل السكر؟

    1. لا لا لا مو يتكرمل ! يتسكر يعني يرجع حبوب من جديد.

      لا خلي الفاكهة في الشيره وكملي طبخ مع التحريك بعد إلين تلاقين القدر فجأه نشف وصارت الفواكه جامده ومسكره.

    • شيف مبتدئ on 8 May, 2013 at 2:05 pm
    • Reply

    مرحبا شيفنا القدير

    حبيت وصفاتك جدددا وطبقت الكثير منها والحمد لله ضبطت مع العلم أني توي أكتشفك وندماانه علي تأخري بالإكتشاف هههههه…

    السؤال : كيف أسوي الباي فيلينق المنزلي اللي يوضع على التشييز كيك ؟ لأن العلب الجاهزه اللي بالسوبر ماركت طعمها جدا مزعج ،، غير كذا أحب الصوص يكون صافي مافي قطع وقوامه معتدل مايكون ثقيل والفاكهة نفسها تكون طازجه ومشكوووور على كل حاجه مقدما

    1. أهلين … أخبارك …

      بالعافية على قلبك ….

      الباي فيلينج من إسمه هو باي فيلينج يعني حشوة باي مدري كيف تحول بقدرة قادر لصوص تشيز كيك هههه ، هو فعلا حلو وحامض أكثر من اللازم ولا فيه أي طعم للفواكه اللي يقولون إنه مصنوع منها. إذا تبين تحطين شي فوق التشيز كيك سويي كوليه بأي فاكهة تبين فيه موضوع كامل في المدونة عن الشي هذا هنا :

      http://topchefcooks.com/fruitcoulis/

  1. السلام عليكم ورحمة الله وبركاته
    شيف ينفع اسوي جزر مسكر ؟؟

    1. وعليكم السلام و الرحمة …

      ينفع بس موب شي مشجع الصراحة هههه يمديك تجربين لو يعجبك بس ماقدرت أتصور القوام كيف بيكون …

  2. ابدعت صراحه

  3. جرربت بقشر البرتقال
    طعععععمها مررررررة لذيذ .. خخخ كنت مشتهية آسيكريم وحطيتها معه
    بسس مرررة لذيذ طعمها

    • جوري on 22 May, 2012 at 1:43 pm
    • Reply

    جربت من قبل الزنجبيل بس ما تركته ينزل الشيرة كلها
    وعلى طول حطيتها بعلبة وع الثلاجة ع طول
    من غير شي انا احب الزنجبيل كيف لو كنت انا اللي مسويته
    اكلت منه لحد ما صرت بكبري زنجبيل
    والشيرة حقتها شي ثاااني خطيرة حدها نكهه عجيبة على البسبوسة

  4. انا قبل امس قريت الموضوع وسويت تفاح وموز وافندي التفاح جف الباقي لسى بس التفاح رووووووووووووعه الله يوفقك ..ناويه اسوي كل شي بالمدونه

    • منى on 3 May, 2011 at 7:10 pm
    • Reply

    ذكرتني بحلويات الجلي اللي ينباع وسط السوق بكشك اكيد عرفتها

    لا تكون نفسها ؟

    1. لا هذيك شي ثاني

  5. ماشاء الله تبارك الله
    تصوير روعة
    بصراحة ماقريت الوصفة من الصور شكلها صعب
    لكن ماشاءالله عليك الواضح أن لك مزاج
    أتوقع لك مستقبل مبهر جداً ممكن تكونين شف عالمي
    شدي حيلك و حاولي تحترفي
    والتصوير خطير ومشهي
    بالتوفيق

    1. هلا والله ….

      أختي أنا ولد ترى هههههه

      الطريقة جدا سهلة …. تطبخين فاكهة .. تحطين بنفس وزنها سكر وتطبخينهم مع بعض بس …..

      ومشكوره على تشجيعك ..

    • قارئة on 1 December, 2010 at 2:03 pm
    • Reply

    ماشاء الله تبارك الله , بإذن الله في أقرب وقت أطبقها ,
    لكن سؤالي كمية السكر والزنجبيل توزن بالميزان ؟ أم يكفي مثلا كوب من السكر مع كوب زنجبيل ؟

    وفقك الله لما يحبه ويرضاه وأسعدك

    1. هلا والله ….

      كمية الزنجبيل للسكر تكون بالوزن . كوب زنجبيل راح يختلف حسب كيف تقطعين الزنجبيل عشان كذا الكمية مستحيل حسابها بالحجم .

    • lolitta on 1 December, 2010 at 6:40 am
    • Reply

    مرحبا شيف

    تدري اني جربت الوصفه من نزلتها بس قطعت الزنجبيل اعرض من كذا بشوي
    واجلست انتظر يلين وانتظر وانتظر وتنشف المويه وازيد
    جلست على هالحاله وبالاخير نسيته ونشفت المويه واحترق خخخخ

    فقررت اشتريه جاهز من الرفاعي لان هونت اجرب شي من بعد فشلي الذريع

    1. الزنجبيل راح ياخذ بالكثير نص ساعة تقريبا … عموما أنا أحبه نحيف بس ترى فيه ناس يقطعونه كبار ! هي مسألة أذواق لا أكثر ..

      شكلك شكلك ماغطيتي القدر صح … شوفي بتشرينه جاهز أشريه على راحتك .. بس تذكري إن الواحد ما يتعلم إلا من إخطائة .

      1. وين مكتوب اننا نغطي القدر ؟

          • Top Chef on 1 February, 2012 at 2:39 pm
            Author

          موب مكتوب بس إذا حطيتي أكل عالنار مفروض يطبخ في سائل وطبخ وقت طويل لازم تعرفين إن المويه بتتبخر وعشن كذا يا إنك تراقبين القدر وتزيدين مويه إذا أحتاج أو تغطينه بحيث إن اللي يتبخر يرجع للقدر مره ثانيه. للوصفه العادي ما نحتاج نغطي القدر بس هي قطعته كبار و أحتاجت إنها تطبخه وقت أطول .

    • شوكولانا on 30 November, 2010 at 8:46 am
    • Reply

    ابدعت صراحه .. شي حلو التميز بالتزيين للحلويات بالطرق هذي

    كل الشكر

    1. هلا والله …

      هي ترى موب بس زينه أنا أحترت في التسميه صراحة بس زينه هنا بمعنى garnish يعني تقريبا شي عالجنب موب شي للنظر بس ماله أي تأثير علاطعم . مثلا المكسرات عالإسكريم هي زينه صح بس هي في الأساس للطعم . المقصود

    • Anonymous on 29 November, 2010 at 10:57 am
    • Reply

    ماشاء الله تبارك الرحمن الله يزيدك ياشيف

    انا بكون متابعه دائمه للمدونه بإذن الله لاني اعشق الطبخ

    1. حياك الله في أي وقت

    • Anonymous on 29 November, 2010 at 10:34 am
    • Reply

    يعطيك العافية شيف
    الزنجبيل هذا ممكن يتسوى منه شاي زنجبيل؟ ولا ماتضبط.. لان عندي مشكلة بحفظ الزنجبيل احطه بالفريزر بس اذا طلعته يصير لين ومايتقشر بسهولة..

    1. هلا والله …

      هو الطريقة يمديك تستخدمين المويه حقت السلق وتسوين فيها شاهي زنجبيل ، أو يمديك بعد تصبين شاهي على شوي منهم وراح يعطي نكهة زنجبيل خفيفة للشاهي .. بس إذا قصدك إنها تصير الطريقة الموحده للشاهي أحس شغل زياده عن اللزوم شوي . الزنجبيل عشان تفرزينه قشريه و أبشريه أول بعدين فرزيه . أو لو بيكون إستخدامك له بس للشاهي حتى ما يحتاج تقشرينه بعد أبشريه بقشره علطول .

    • lolitta on 29 November, 2010 at 4:12 am
    • Reply

    يعطيك العافيه شيف ، ربي يجزاك الجنه
    والحين لو اكمل معك لاخر الوصفه الزنجبيل راح يكون طري شوي والا كريسبي ?
    وبايش اقدر ابدل الدبس بالكوكيز بالدارك كورن سيرب ؟

    1. هلا والله …
      راح يكون زي حق السوبرماركت . يعني من برا يقرمش شوي من السكر ومن جوا طري أو chewy بالأصح .طبعا مع الوقت راح ينشف وراح يصير يقرمش أكثر و أكثر لو هذا اللي تبين .

      الدبس ممكن يتبدل بالعسل أو كورن سيرب .

    • mona_daloo3ah on 28 November, 2010 at 11:09 pm
    • Reply

    صباح الخير

    فعلا لذيذ ذقت منها انواع كثيرة وكلها لذيذه لكن كلها عليها طبقة سكر

    بعد لو جربت مع السكر قليل جدا من الفلفل الحار البودرة “شطة تكورنية ”

    لها طعم خيال خصوصا لمحبين الحار

    طبعا في شرق اسيا تعتبر نوع من المسليات او سناكس اجربها هالحين خصوصا الفواكة الحمدلله متوفرة بكثرة

    لكن سؤال ؟؟؟ليش استعملت قشر القريب فروت او البرتقال ليش مايكون هو الفاكهة نفسها ؟؟؟

    مايكون فيها نوع من المرارة او ان السكر يكون طاغي عليها

    1. صباح النور و السرور .

      اللي تنباع في طبقة سكر هذي لأنها من السوبرماركت . ماراح تلاقين اللي تجي كامله أبدا في السوبرماركت . خيارات النكهات ما تنتهي وما أقدر أغطي كل نكهة ممكنه أنا بس حبيت أحط الطريقة العامه لها إن شاء الله تكونين فهمتي وش أقصد .

      سبب إستخدام القشر بدال الفاكهة نفسها مسألة شخصيه وهي مجرد مثال لا أكثر .. ما قلت إنه ما ينفع تستخدمين الفاكهة . بس أنا الأمثلة اللي طبقت كنت محتاج القشر أكثر كوني مسويها في الأساس عشان تنخلط مع سوربيه جريب فروت .

      عموما قشور الحمضيات فيها نكهة الحمضيات نفسها بدون الحموضه اللي في الثمرة نفسها . لو ذقتي عصير الليمون مقابل قشر الليمون راح تفهمين وش أقصد . العصير حامض وبس تقريبا بس القشر هو اللي فيه الريحة والنكهة اللي إذا شميتيها تقولين هذا ليمون علطول . السبب هو إن في قشور الحمضيات فيه زيوت عطريه هي المسأولة عن الريحة أو النكهة هذي . لو كنت بسوي شي زي تفاح مثلا ماراح أستخدم القشر كون ماله طعم حلو زي الفاكهة نفسها .

      بالنسبة للمرارة القشر فعلا مر بس مو القشر نفسه ! الجزأ اللي مر في القشر هو الجزأ الأبيض ولاحظي إني قلت إنك لازم تشيلينه من القشر قبل لا تسلقينه عشان ما تكون المراره موجوده .

        • mona_daloo3ah on 29 November, 2010 at 12:09 pm
        • Reply

        مدري اليوم جربت الموز صار خبيصة خخخخخخخخ

        على كلام شغالتي تقول الفواكة توصل عندكم وهي ناضجة ضروري تكون قاسية واول مراحلها كذا مايصلح

        لانها تكون مستوية ولينة ومع السكر تلين اكثر واكثر .

        ولو بغيتيه لازم يتنقع في موية وبيكربونات عشان يصير قاسي وبعدين نحطه في سكر

        بخرب بكرة التفاح واعيط خبر

        مدري انت جربت قبل كذا تسوية ولا هذه اول مرة ؟؟؟

          • Top Chef on 29 November, 2010 at 9:20 pm
            Author

          هلا والله ….

          الموز في أي وصفة أي أي وصفة فيها موز يلمس حرارة دايما أستخدمي موز شوي أخضر من فوق . الموز في الشجر يكون مليان نشا وكل ما أستوى كل ما تحول هذا النشا سكر . مع الحرارة العملية هذي تصير أسرع بس .

          غير كذا لا تسلقين الموز يكفي تحطينه في شيره وتطبخينه إلين يصير شفاف وخلاص .

          الفواكه موب ضروري تكون موب مستويه عشان تسوين فيها كذا … حسب الفاكه هي عموما .. التفاح مثلا مايحتاج يكون أخضر عشان تسوين كذا .. بس بعد إختيار نوع التفاح الأفضل لهذي الحاله مهم موب كل تفاح بيعطي نتيجة زي الناس ترى . فيه خواص للمكونات مقدر أشرحها كلها في موضوع واحد !؟ هي أشياء تجيك مع الوقت و التجربه ؟

          بالنسبة للنقع في البيكربونات هذا خطأ كبييييييييير .. كونه يدمر النكهة والفايده في الفواكه وبعد يخلي الجدران لينه أكثر موب قاسيه أكثر .

          نعم قد جربته أكثر من مره بعد … سويت بالخوخ و سويت بالكمثرى .. وسويت الإثنين اللي فوق .

  1. […] تكلمت في موضوع قديم عن عملية التسكير أو التلبيس candying هنا ووضحت كيف إنها ممكن تستخدم لطبخ وحفظ أشياء كثير زي […]

  2. […] في موضوع قديم عن تسكير الفواكه وقشور الفواكه وعن عملية التسكير أو التلبيس بالأصح بشكل مطول وسويت […]

  3. […] تكلمت في موضوع قديم عن عملية التسكير أو التلبيس candying هنا ووضحت كيف إنها ممكن تستخدم لطبخ وحفظ أشياء كثير زي […]

  4. […] في موضوع قديم عن تسكير الفواكه وقشور الفواكه وعن عملية التسكير أو التلبيس بالأصح بشكل مطول وسويت […]

  5. […] في موضوع قديم عن تسكير الفواكه وقشور الفواكه وعن عملية التسكير أو التلبيس بالأصح بشكل مطول وسويت […]

  6. […] التشيز كيك .. صوص شكولاته مثلا ، مكسرات محمصه أو حتى مسويه ملبس حلوه بتطلع ، أي فواكه لها علاقه بالحلى هذا بعد حلوه […]

  7. […] تكلمت في موضوع قديم عن عملية التسكير أو التلبيس candying هنا ووضحت كيف إنها ممكن تستخدم لطبخ وحفظ أشياء كثير زي […]

  8. […] 15 جرام زنجبيل مسكر ياجاهز يا تسوونه في البيت. مقطع […]

Leave a Reply

Your email address will not be published.

%d bloggers like this: