المكسرات المسكره .. Candied Nuts

هلا والله …

.

تكلمت في موضوع قديم عن تسكير الفواكه وقشور الفواكه وعن عملية التسكير أو التلبيس بالأصح بشكل مطول وسويت شكل من أشكال تسكير المكسرات في موضوع المارون جلاسيه. الفكرة بإختصار شديد هي إننا نطبخ شي في شيره سكر بحيث تعطي طعم جديد أو غريب عن الطعم الأصلي بالإضافة إلى إنها تحفظ الشي اللي مطبوخه فيه زي ما يصير في الفواكه. في المكسرات الحفظ موب النقطة كون المكسرات تعيش أصلا فترات طويلة بس التسكير يعطي المكسرات طعم مختلف تماما. المكسرات المسكره يتكون عليها طبقة سكر خفيييفة تقريبا زي الكراميل تعطيها قرمشة رهيبة هذا غير إن الحلاوه اللي تغطي المكسرات تمشي بشكل رهيب مع الطعم الغني و الثقيل للمكسرات. 

.

المكسرات المسكره ممكن تنوكل لحالها، زي السناك تقريبا مع شاهي أو أي شي ثاني أو تستخدم في أكله أو نوع حلويات ، هي تعطي قرمشة حلوه للأكل. جربوها مع إسكريم أو فوق بانكيك أو وافل أو كطبقة مقرمشة فوق كيك مثلا أو داخل خليط كوكيز أو حتى في السلطات أو غيرها.

.

فيه عدة طرق لعمل المكسرات المسكرة بس كلها تعتمد نفس المبدأ. شيره سكر جدا مركزه نطبخ المكسرات فيها ونكمل طبخ إلين تتسكر الشيره علينا (هنا التسكر مطلوب موب مشكلة). تغيير نوع السكر (ميبل سيرب ، عسل ، سكر أبيض ، سكر بني) أو النكهات اللي ممكن نضيفها عالعملية بيعطينا ملايين الخيارات و الخيارات. الطريقة اللي مستخدم هنا جدا سهلة وممكن تستخدم مع أي نوع مكسرات. أنا أستخدمت بيكان هنا لأنه هو اللي محتاجه في الوصفة اللي سويت المكسرات عشانها بس أي نوع مكسرات لذيذ هنا.

.

المقادير :

.

كوب بيكان محمص

٤ ملاعق كبيرة سكر بني يفضل لو كان فاتح

ملعقة كبيرة موية

رشة ملح

ربع ملعقة صغيرة فلفل مطحون حار (إختياري)

.

.

* شرحت طريقة تحميص المكسرات في موضوع تحميص المكسرات. ممكن إستخدام مكسرات نيه هنا بدون أي مشاكل بس أفضل النكهة العميقة للمكسرات المحمصة.

.

* الفلفل إختياري هنا بس أنا أحب طعمه مع البيكان و السكر البني. هو ماراح يضيف حراره بس لذعه جدا خفيفه ورهيبة.

.

الطريقة :

.

نسخن الفرن على ٣٥٠ فهرنهايت ونجهز صينية فرن بإننا نغطيها بورق بارتشمنت.

.

في قدر صغير نخلط المويه مع السكر و الملح و الفلفل ونطبخه إلين يوصل غليه ويذوب السكر.

.

شيره

.

نضيف البيكان أو المكسرات اللي بنستخم عالشيره ونحرك زين إلين تتغطى المكسرات بالشيره.

.

ننقل الخليط لصينية فرن ونحاول نبعد حبات البيكان عن بعضها قدر الإمكان.

.

ندخل الصينية الفرن إلين ما تبدأ الشيره تغلي عالبيكان تقريبا ٨-١٠ دقايق.
.

Candied Pecans.

نطلع الصينية من الفرن ونخليها تبرد تماما قبل نشيل البيكان.

.

المكسرات المسكره تنحفظ في علبة تتقفل بإحكام في دولاب مطبخ بتعيش شهور.

.

Candied pecans.
Follow TopChefCooks on Twitter

30 comments

3 pings

Skip to comment form

  1. ح نجربها إن شاء الله تطلع تماااام ما شاء الله شرحك واااافي

    • Anonymous on 23 October, 2014 at 9:42 pm
    • Reply

    مرحبا شيف يعطيك العافيه وصفاتك مضبووطه دايم بالملي تحمسني كل مره اجرب شي جديد من وصفاتك .. سؤالي عندي سكر بني بس اللي يجي رطب شوي و استخدمته و شكلي ما قفلت الكيس زين و الحين يابس متماسك ! استخدمه عادي ولا خلاص نشف ارميه 🙁 ؟

  2. السلام عليكم

    مبروك عليك الشهر
    الله يعافيك حاولت اسوي المكسرات المسكره بالسكر اللي عندي سكر خشن اسمر زي السكر الابيض بس لونه اسمر
    الحاصل اني عرضته ع النار ماذاب!! انت قلت غليه وحده انا خليته اكثر من غليه

    انتقلت للخطوه الثانيه وانا مدري اللي سويته صحيح او لا
    على ان الكميه صارت اقل من المكسرات ومب سايحه

    ودخلتها الفرن وشهب لونها صار ابيض ناشف وخشن بدل مايتتطابخ وللحين بالفرن احتريه يسيح

    بهالحاله هو صالح للاستعمال؟؟ والا ارميه 🙁

    اصلا احترق وانا اكلمك 🙁

    يعني مااستفدت من التجربه

    اذا مالك خلق تقرا سؤالي بس قولي السكر عادي خشن او لازم ناعم

    1. وعليكم السلام وآسفين عالتأخير ….

      والله الصدق ما أعرف ؟ هو مفروض يذوب بس طبعا بدون أقولك التحريك هنا مطلوب عشان يذوب السكر زي ما نحرك السكر في الشاهي مثلا. جربي بسكر بني عادي وشوفي هل تستمر المشكلة أو لأ يمكن من نوع السكر.

    • Anonymous on 17 October, 2013 at 8:55 pm
    • Reply

    ممكن سكر ابيض؟

    1. أكيد ممكن. الطعم بيختلف شوي ، بيكون أقل نكهة كاراميل.

    • Anonymous on 28 March, 2013 at 12:03 am
    • Reply

    لالاااااااااااا ابشركم حصلتة اليوم واخييييييييييييييرا
    في كارفور والكيلو بـ 148 ريال بس

    • Anonymous on 21 March, 2013 at 4:01 am
    • Reply

    استفدت منك كثيييييييير … معلومات وشرح واافي جدا .. لدرجة اني سهرانة لي كم يوم ع صفتحك وانا اقراء ومشدووهة جدا واقول في نفسي وهذا وانا اطبخ وذوقي بالطبخ صعب ولا شيء يعجبني ولما جيت هنا طلعت ولا شيء عندك
    بس فية اشياء ماافهمها مااعرفها .. مثل الاشياء الغريبة ياليت تنزل لها صورة او يكون شرح لها بالعربي
    بسال عن البيكان وشووو ؟؟ اذا لة اسم غير او صورة
    حتى بقوقل دورت ماحصلت غير هذا الاسم .. وانا حابة اسوي السينامون بطريقتك وبسويها بحذافيرها وانا واثقة فيها جدا
    والله يعطيك العافية ويزيدك من علمك

    1. حياك الله في أي وقت ومشكوره على كلامك …..

      البيكان نوع مكسرات إسمه بيكان هو موب جوز ولا لوز ولا بندق ولا كاجو ولا ماكادميا هو بيكان !! .. لو سألتي عنه في محلات المكسرات يعرفونه أكيد.

        • Anonymous on 23 March, 2013 at 3:09 am
        • Reply

        لا والله !!
        اكرة شيء عندي اسال احد من دون ماادور قبل واذا تعبت وطفشت سالت صاحب الموضوع
        في بالك اول شيء سالتك من دون ماتعب نفسي بالسؤال والتنقيب في اغلب سوبر ماركات الرياض ومحلات المكسرات من رمضان اللى فات
        ماتركت احد ماطلبتة منة يدورة لي وانا بعد اروح مخصوص ادورة كلهم اسمع منهم هذي الجملة انا اول مرة اسمع هذا الاسم !!! 🙁
        مسوية مكافأة للي بيحصلة لي ويجيبة 🙁 << شوي وتبكي ع نفسهاا

          • Anonymous on 23 March, 2013 at 8:46 am

          أختي روحي الرفاعي او باجة اذا يائسة من انه تلاقيه بس هو جدا معروف حتى موجود في بندة والدانوب والعثيم واللولو والتميمي يعني في كللللل مكان وصورته نفس اللي حاطته الشيف وأحيانا قليلة يسمونه جوز أمريكي بس هو معروف في الغالب باسمه الأصلي بيكان صراحة افتكرتك عايشة في قرية بس لما طلعتي في الرياض وتقولي ما فيه غريييييييبة

    • Anonymous on 28 November, 2012 at 4:44 pm
    • Reply

    ممكن ابدل ملعقة المويه بزبدة
    لان هذه الطريقة كل ما اسويها يطلعلي السكر جامد شوي ومتكتل
    او يكون الجوز مو متغطي تمام بالسكر

    1. ليش زبدة ؟ السكر يذوب في الدهن ؟

      السكر مفروض يتكتل هنا هو موب خراب أو فشل إنه يتكتل …. إذا أستخدمتي جوز يمكن ما تكفي كمية الشيره اللي حاط إنها تغطيه كامل بسبب شكله العريض ، أستخدمي جوز أقل أو زيدي الشيره …

    • Anonymous on 1 November, 2012 at 4:59 pm
    • Reply

    ماشاء الله عليك ياشيف ،،
    أنت ذكرت أن ممكن نحفظها بدولاب المطبخ لأشهر طيب في أنواع مكسرات مثل البيكان يفضل أنها تكون بالثلاجة ،،
    يعني ماراح تخرب لما تكون داخل الدولاب /؟

    1. إلا راح تخرب أكيد بس موب في كم يوم .. كم ومتى بتخرب بيعتمد على أشياء كثير أهمها أنتي يوم شريتي المكسرات أصلا هل كانت جديده أو لأ ؟ وهل كانت محفوظة صح أو لأ ؟

      الشي الثاني اللي لازم تعرفينه هو إن التسكير يحفظ المكسرات. المكسرات تخرب بإن الدهون اللي داخلها تتأكسد وتبدأ تتفكك لدهون (أو أحماض دهنية بالأصح) كثير منها طعمه وريحته سيئة وهذا اللي يخليها تفسد، التبريد ما يمنع هذا التفاعل هو بس يخليه أبطأ. التسكير يغلف المكسرات بطبقة جدا خفيفة من السكر (تخيليه طبقة كاراميل) وهذي الطبقة تعزل المكسرات عن الأوكسجين اللي في الجو بدرجة جدا كبيرة وبكذا التسكير يساعد إنه يطول في عمر المكسرات حتى بدون تبريد.

      الثلاجه تخرب المكسرات المسكره (وأي نوع حلى فيه طبقة كاراميل أو سكر مقرمشة). الثلاجه رطبة والرطوبة عدو السكر الأول فاللي بيصير هو إن الطبقة الخفيفة المقرمشة اللي عالمسكرات راح تشرب الرطوبة اللي في الثلاجه وتصير لينه ولزجة بدال ما تكون مقرمشة. غير كذا حتى لو حفظنا المكسرات في علبة تتقفل بإحكام في الثلاجه (طبعا مافيه شي محكم ١٠٠٪) بحيث نمنع عنها الرطوبة، المكسرات كونها باردة راح يتكثف عليها رطوبة أول ما تطلعينها من الثلاجه وهذا يسوي نفس المشكلة. عشان كذا قلت في الدولاب. نقدر نحفظها في الفريزر (جاف أكثر) بإننا نحط المكسرات في علبه داخل علبة وإذا جينا نستخدمها نطلع العلب من الفريزر ونخليهم طول الليل يدفون بعدين نطلع المكسرات من العلبه الصغيرة.

        • Anonymous on 1 November, 2012 at 8:37 pm
        • Reply

        تسلم ياشيف دائماً معلوماتك مفيدة وغنية،،
        عطاك ربي ألف عافية ،،

  3. يعطيك العافيه اخووووي

  4. هاي شيف يارب تكون بصحه كويسه تسلم ع الوصفات الجميلله في حااجه حابه أسألك عنهااا عارفه انو برا الموضوع بس من جد ابيها الي هي طريقه الشكولاته الساخنه موحابه الي بلباودر اذا فيه طريقه حلوه ومعتدله من ناحيه السكروالدهون ياليت تحكيلنا عنهااااا لانو اعشق الشكولاته الساخنه وشكراااا كثير يا اروع شيف

    1. هلا والله …

      نزلت الطريقة في صفحة الوصفات

    • Anonymous on 29 September, 2012 at 8:09 pm
    • Reply

    طيب فيه فرق عن المكسرات اللي علمتنا في الايسكريم ؟

    1. ايه هذيك برالاين شي ثاني تماما

    • Anonymous on 29 September, 2012 at 8:08 pm
    • Reply

    يعني ما نخلي المكسرات تغلي مع الخليط ؟ مجرد تختلط فيه بس ،صح؟

    1. إيه. يمديك تسوينها بطريقة ثانية إنك تخلينها تغلي بس ما أحب هذي الطريقة لأنها تصير كلها قطعه وحده كبيره ويبيلك تفرقينهم عن بعض

    • Anonymous on 29 September, 2012 at 1:57 am
    • Reply

    ايش هو ورق البارتشمنت؟؟تقصد ورق الزبده؟؟؟

    1. عليك نور ..

    • Anonymous on 28 September, 2012 at 10:41 pm
    • Reply

    شكرا لك ..طيب ايش ممكن نستفيد من المكسرات بعد تسكيرها؟؟

    1. العفو ….

      في الموضوع تكلمت عن الإستخدامات …

    • الاوتار on 28 September, 2012 at 10:29 pm
    • Reply

    مشكور على الموضوع اخوي

    1. حياك الله دايما …

  1. […] من البيكان المسكر أو كوب بيكان عادي […]

  2. […] من البيكان المسكر أو كوب بيكان عادي […]

  3. […] من البيكان المسكر أو كوب بيكان عادي […]

Leave a Reply to Top Chef Cancel reply

Your email address will not be published.

%d bloggers like this: