المكسرات المسكره .. Candied Nuts

هلا والله …

.

تكلمت في موضوع قديم عن تسكير الفواكه وقشور الفواكه وعن عملية التسكير أو التلبيس بالأصح بشكل مطول وسويت شكل من أشكال تسكير المكسرات في موضوع المارون جلاسيه. الفكرة بإختصار شديد هي إننا نطبخ شي في شيره سكر بحيث تعطي طعم جديد أو غريب عن الطعم الأصلي بالإضافة إلى إنها تحفظ الشي اللي مطبوخه فيه زي ما يصير في الفواكه. في المكسرات الحفظ موب النقطة كون المكسرات تعيش أصلا فترات طويلة بس التسكير يعطي المكسرات طعم مختلف تماما. المكسرات المسكره يتكون عليها طبقة سكر خفيييفة تقريبا زي الكراميل تعطيها قرمشة رهيبة هذا غير إن الحلاوه اللي تغطي المكسرات تمشي بشكل رهيب مع الطعم الغني و الثقيل للمكسرات. 

.

المكسرات المسكره ممكن تنوكل لحالها، زي السناك تقريبا مع شاهي أو أي شي ثاني أو تستخدم في أكله أو نوع حلويات ، هي تعطي قرمشة حلوه للأكل. جربوها مع إسكريم أو فوق بانكيك أو وافل أو كطبقة مقرمشة فوق كيك مثلا أو داخل خليط كوكيز أو حتى في السلطات أو غيرها.

.

فيه عدة طرق لعمل المكسرات المسكرة بس كلها تعتمد نفس المبدأ. شيره سكر جدا مركزه نطبخ المكسرات فيها ونكمل طبخ إلين تتسكر الشيره علينا (هنا التسكر مطلوب موب مشكلة). تغيير نوع السكر (ميبل سيرب ، عسل ، سكر أبيض ، سكر بني) أو النكهات اللي ممكن نضيفها عالعملية بيعطينا ملايين الخيارات و الخيارات. الطريقة اللي مستخدم هنا جدا سهلة وممكن تستخدم مع أي نوع مكسرات. أنا أستخدمت بيكان هنا لأنه هو اللي محتاجه في الوصفة اللي سويت المكسرات عشانها بس أي نوع مكسرات لذيذ هنا.

.

المقادير :

.

كوب بيكان محمص

٤ ملاعق كبيرة سكر بني يفضل لو كان فاتح

ملعقة كبيرة موية

رشة ملح

ربع ملعقة صغيرة فلفل مطحون حار (إختياري)

.

.

* شرحت طريقة تحميص المكسرات في موضوع تحميص المكسرات. ممكن إستخدام مكسرات نيه هنا بدون أي مشاكل بس أفضل النكهة العميقة للمكسرات المحمصة.

.

* الفلفل إختياري هنا بس أنا أحب طعمه مع البيكان و السكر البني. هو ماراح يضيف حراره بس لذعه جدا خفيفه ورهيبة.

.

الطريقة :

.

نسخن الفرن على ٣٥٠ فهرنهايت ونجهز صينية فرن بإننا نغطيها بورق بارتشمنت.

.

في قدر صغير نخلط المويه مع السكر و الملح و الفلفل ونطبخه إلين يوصل غليه ويذوب السكر.

.

.

نضيف البيكان أو المكسرات اللي بنستخم عالشيره ونحرك زين إلين تتغطى المكسرات بالشيره.

.

ننقل الخليط لصينية فرن ونحاول نبعد حبات البيكان عن بعضها قدر الإمكان.

.

ندخل الصينية الفرن إلين ما تبدأ الشيره تغلي عالبيكان تقريبا ٨-١٠ دقايق.
.

.

نطلع الصينية من الفرن ونخليها تبرد تماما قبل نشيل البيكان.

.

المكسرات المسكره تنحفظ في علبة تتقفل بإحكام في دولاب مطبخ بتعيش شهور.

.

.