البرجر .. Burgers

هلا والله …


من زمان و أنا أبغى أنزل موضوع عن البرجر ، أكله أموت فيها ووحده من ألذ الأشياء اللي ممكن تاكلونها ( لو تسوت صح طبعا ) ويمكن واحد من أكثر الأشياء اللي أكلتها في حياتي وما زلت آكلها زيي زي ناس كثيرين. البرجر صار رمز للأكل السريع. كثير ناس فاقدين الأمل إنهم يسوون برجر ممتاز في البيت وماشين على مثل “خل الخبز لخبازه”، فيه كثيير ناس ثانين يسوونه في البيت بس مازالوا يشوفون حق المطاعم أفضل من ناحية الطعم ولو إنهم يتعللون إن حق البيت “أصح” من حق المطاعم. شخصيا أشوف إنه إذا ماكنت بسوي شي أحسن أو على أقل تقدير في مستوى المطعم لا أسويه من الأساس !! بس هذي وجهة نظري أنا وكل واحد حر في الأخير ….


أغلب الناس في وصفات البرجر كالعاده يتوقعون السر في مكون معين ويجربون ويجربون بس ما يوصلون لنتيجة مرضيه، ناس بتحط بهارات وخلطات غريبه وتتبيلات وناس ثانيه بتتفنن في الإضافات اللي فوق البرجر بس هذي كلها ما راح تسوي فرق ولا راح تصلح برجر تعبان مهما حطيتوا منها هذا لأن السر موب في أي مكون زايد ! السر في المكونات الممتازه و التجهيز و الطبخ الصحيح بس . لا تفهموني غلط ! موب قصدي إن هذي الإضافات خطأ تنحط بس ماراح تحسن شي خربان من الأساس ..


اللي يعتقد إن برجر ماك ، هاردييز أو برجر كنج هو البرجر الصح فهذا الموضوع موب له ! خصوصا اللي يشوف إن برجر ماك مفروض يسمى برجر أصلا الله يكرم النعمه .. اللي يعتقد إن برجر فدركرز أو فرايديز أو تشيليز هو البرجر الجيد فأحب أقوله إنه ماذاق برجر للحين  !! والله العظيم تقدرون تسوون أحسن في البيت بألف مره. بس كل اللي أطلبه شوي ثقة بس شوي ثقة . أضمنلكم إن شاء الله إذا سويتوا البرجر زي ما أقول بتطلعون ببرجر لذييييذ ورطب ولين. والله يرضى عليكم ، الله يرضى عليكم لحد ياخذ ربع الكلام اللي أقول بعدين يقولي ماضبط !!


البرجر وشو ؟ البرجر عبارة عن ساندوتش محشي قرص لحم مفروم … إذا كان ينوكل بشوكه أو ملعقة فهو موب برجر لأنه موب ساندوتش. الساندوتش لازم أقدر أمسكه بيدي .. نوع الخبز ممكن يكون أي شي بس الأساس فيه يكون خبز مدسم يعني مع زبده و حليب وكذا …( يعني ما يكون خبز فرنسي مثلا ) وفي الغالب طبعا مدور . الجزأ الأساسي هنا هو قرص اللحم ! هذا الشي اللي ما يفرق مهما كان نوع البرجر دايما فيه لحم مفروم مضغوط وممسوك مع بعضه بشكل خفيف . هذا أهم شي في البرجر اللحم .. الأساس هو البقر بس ممكن يتسوى بأي شي ثاني .. هنا راح أتكلم عن البقر بس و البقر أقصد البقر beef موب عجل أو حسيل أو غيره.


طيب وش مواصفات البرجر الجيد ؟ هذا شي يختلف من شخص لشخص كل واحد له رأي غير في نوعيه اللحم و حجم القطعه و درجة الطحن ونوعية الخبز و الإضافات الثانيه. بس عموما فيه صفات ما يختلف عليها إثنين.. أول شي اللحم لازم يكون لذيييذ و رطب ولين ويتفتت في الفم ، أقصد بيتفتت إنه ما يكون زي الهوتدوق لاصق في بعض لازم يكون يتفتت شوي. الخبز لازم يكون لين وطري وهش وفي نفس الوقت يقدر يشيل طبقة اللحم بدون ما يطيح أو يتفتت. الخبز بعد موب المفروض يكون رطب  من المويه حقت البرجر ( أصلا أي ساندوتش خطأ إن الخبز يترطب ) ، حجم اللحم للخبز جدا مهم ما نبي طعم اللحم يختفي ولا نبي طعم الخبز يختفي ويطلع كأننا ناكل لحم لحاله. أسوأ شي في البرجر أو أي ساندوتش عموما هو إنه ما يكون مصمم صح ، يعني و إحنا ناكل نلاقي كل شي يطيح من الساندوتش أو يكون كبير بزياده بحيث يكن صعب ينوكل أو ينمسك. آخيرا الإضافات و الصوصات اللي تنحط تنحط عشان “تحسن” طعم اللحم و تعطيه نكهة إضافيه موب تغطي عليه .. إضافه أو إضافتين تمشي مع بعض ومع الخبز و اللحم هي كل اللي تحتاجونه أكثر ما يعني أفضل !! الإضافات تكون بكمية معقوله بحيث ما تخرب نسبة الخبز للحشوه . الإضافات هذي مسألة شخصيه كل يوم فيه إضافه جديده للبرجر يحطونها عليه سواء أنواع جبن غريبه أو مكونات ثانيه وكل شخص عنده رأي خاص وذوق مختلف في هذا الموضوع . هنا الإبداع هنا حطوا اللي تشوفون يمشي أهم شي لاتلمسون الأساس !


طريقة اللحم :

 


عشان نسوي اللحم فيه خطوات معينه. أول شي لازم نعرف نختار لحم من نوعية جيده ، بعدين لازم نعرف نختار من أي منطقه اللحم ناخذه ، بعدين لازم نعرف كيف نفرمه وكيف نشكله ، آخر شي لازم نعرف كيف نبهره و نطبخه صح.


إختيار اللحم :


اللحم المفروم حق السوبرماركت ما يمشي الحال هنا ولا راح يعطيك برجر جيد. إذا نبي نسوي لحم ممتاز لازم نسوي كل شي بنفسنا ، المسألة جدا سهله وماتاخذ دقايق يعني لحد يخاف. السبب هو إن السوبرماركت ما يفرمون قطعة معينه هم يفرمون أي لحم زايد من تنظيف اللحم عشان يسوون اللحم المفروم اللي تشرونه. يعني مثلا جاهم زبون وطلب ستيك وباقي أجزاء زايده من تنظيف اللحم وكذا يحطونها في اللحم المفروم . هو مازال لحم وينوكل عادي بس للبرجر لأ !! خلوه لإستخدامات ثانيه.

في البقر ( أو أي حيوان عموما ) طعم وصفات كل منطقه يختلف تماما عن طعم المنطقه الثانيه ( فخذ الدجاج مقابل الصدر مثلا ). فيه قطع معينه مناسبه للبرجر أحسن من غيرها.


نرجع للرسمه هذي … القطع المناسبه للبرجر أو اللحم المفروم عموما هي : chuck , brisket , plate , top-sirloin , sirloin , round … باقي المناطق ما تنفع !! .. كل منطقه لها طعم غير وصعب أوصف طعم كل منطقه وميزتها عن الثانيه حاليا .


جربت كثير ومازلت أجرب لحم من مناطق مختلفه وبعد خلطات من مناطق مختلفه أحيانا ٣ أو ٤ مناطق مختلفه … بس إلى الآن مالقيت شي أفضل من خليط مصنوع من منطقتين اللي هي منطقة الرقبه chuck ومنطقة الصدر brisket بنسبه ١:١ يعني كل جرام من هذا جرام من ذاك تقريبا يعني موب شرط الدقه هنا. الرقبه طعمها محايد ومافيها نكهة بقر قويه وقوامها رهيب إذا أنفرمت وهي أكثر شي يستخدمون المطاعم يعني الطعم مألوف لكل الناس غير كذا فيها كمية شحم حلوه وهذا مهم عشان يقعد اللحم رطب. الصدر يعطيها الشي الناقص اللي هو النكهة ، غير إنها تعطيها تباين في القوام يطلع بشكل حلو بعدين.


إذا جيتوا تشترون اللحم دوروا على جزار يبيع بقر كامل و أطلبوا منه هذي القطع أو أفضل بعد لو تطبعون الصوره وتورونه وش يعطيكم بالضبط ! … لا تخلونه ينظفها من الشحم ! المفروض القطع ما يكون عليها شحم كثير من الجوانب بس يكون الشحم داخل في اللحم زي الصوره … هذي صورة للحم الصدر .


برجر

في البقر دايما نبي اللحم يكون أحمر فاقع ويكون اللحم ناشف قدر الإمكان إذا ضغطناه باليد يعني لو ضغطنا عليه بإصبع يرجع زي ماكان . لون الشحم مفروض يكون أبيض وهو أحسن شي ، لو كان الشحم يميل للصفار معناها إن اللحم من نوعية أقل ولو كان مايل للبني معناها إن اللحم بدأ يخرب . ريحة اللحم مفروض ما تكون ريحة كريهة و أكيد ما يكون عليها أي بقع عفن بيضاء أو خضراء. لو كان اللحم مغلف في كيس أو نايلون طبيعي يطلع فيه ريحة في البدايه هذا موب من علامات الخراب هنا هذا طبيعي كونه مغلف بس. الشي الأخير هو الجوده .. كل ماكان الشحم داخل في اللحم كل ماكان اللحم أغلى و أحسن . أقصد بداخل في اللحم إنه ما يكون عالأطراف بس يعني يكون الشحم زي ما أنتم شايفين في الصوره داخل العضل.
إذا جيتوا تحسبون الكميات أحسبوا تقريبا ٢٠٠ جرام لحم لكل شخص هذي مقياس ممتاز.



فرم اللحم :

 

الحين أخترنا اللحم باقي عاد كيف نفرمه صح . نصيحة أفرموه في البيت الفرق كبير ترى وتراني كنت أفرمه عند الجزار عشان كذا أقولكم الفرق كبير !!.. اللي يبي يعرف الفرق يشوف كيف راح نفرمه في البيت وكيف بيفرمونه في المحل ويشوف الفرق بعينه.


أول شي في فرم اللحم سواء لبرجر أو غيره أهم شي كل شي يكون بااااااارد ، كل ماكان بارد أحسن بيخلي الفرم سههههل مره . الشحم ما يحتاج حراره عاليه عشان يذوب من اللحم حراره يدك كافيه إنها تذوبه !! إذا ذاب الشحم ما يرجع لمكانه خلاص ! بالضبط زي الزبده إذا ذابت خلاص ما ترجع زي ماكانت . إذا ذاب الشحم بينتج برجر لاصق في بعض ونااااااااااشف. عشان كذا نبرد كل شي قبل نبدأ.


أول شي نسويه هو إننا نقطع اللحم مكعبات تكفي تدخل في الفتحة حقت الفرامه بعدين نحط اللحم في صحن. نحط الصحن اللي فيه اللحم في الفريزر مع صحن ثاني فاضي عشان نحط اللحم المفروم فيه وبعد نحط الراس حق الفرامه لو أمكن طبعا … نخلي كل شي في الفريزر إلين يبدأ اللحم يتجمد بس يمكن نص ساعة كذا.


الحين نركب الفرامه ( في حال كانت في الفريزر ) ونبدأ نفرم على أصغر قرص ونحط اللحم المفروم في الصحن البارد الثاني.


meat grinder

فرم اللحم


الحين بعد ما نفرم كل اللحم نرجع نفرمه مره ثانيه بنفس الطريقة بالضبط عشان نضمن أحسن لحم ممكن. وبس هذا فرم اللحم موضوع تافه ماياخذ أي وقت ، بالضبط بالضبط أخذ معي ٥ دقايق عشان أفرم كيلو ونص لحم. الحين هذا اللحم جاهز للبرجر ، يمديكم تخلونه في الثلاجه بعد ما تغطونه بنايلون حوالي ٤ أيام بدون ما يتغير.  لاحظوا هنا ما أستخدمت بصل أو ثوم أو أبقسماط أو خبز أو أي بهارات أو ملح مع فرم اللحم ! هذا اللحم حق البرجر الصح لحم لذيذ صافي ١٠٠٪ ..


أنا أستخدم الفرامة اللي تجي ملحق للعجانة. هل هي أحسن شي ؟ لأ طبعا فيه نوعيات كثير تفرم كميات أكبر و أسرع ، بس كوني ساكن لحالي ومطبخي صغير ما أحتاجها !. سواء الفرامه كانت كهرب أو يدويه أو ملحق لعجانة كلها بتعطي نفس النتيجة بالضبط . الفرامة موب مهمه المهم التفاصيل الثانيه.

 


طبخ اللحم :


الحين عندنا اللحم جاهز باقي بس نجهزة للطبخ بعدين نطبخه … أول شي نسويه هو إننا نشكل اللحم على شكل أقراص. ما أعتقد تحتاج العمليه شرح ، ناخذ كمية لحم بيدنا ونشكلها على شكل كوره تقريبا بعدين نضغطها شوي إلين تصير قرص سمكه تقريبا سانتي إلى سانتي ونص ، بعدين بإستخدام إبهامنا نضغط ضغطه خفيفه في وسط القرص يعني نسوي زي الحفرة. اللي قد طبخ برجر يعرف إن اللحم مع الطبخ بينتفخ في الوسط  فإحنا نخلي الوسط أنحف شوي وبكذا إذا نفش يصير كله نفس الإرتفاع. أهم شي في تشكيل البرجر إننا ما نتعامل معه كأنه عجينة يعني لا نمسك اللحم ونقعد نعجن فيه بقوه عشان نشكله ، هذا بيخلي اللحم ناشف.


الحين هنا وقت البهارات و الأعشاب للي يبي طبعا. شخصيا ملح وفلفل بس ! تكفي وزياده وصدقوني تكفي وزياده اللحم لذيذ ما يحتاج أي شي زياده و فيه نكهات كثير في الإضافات اللي بنحط. نرش ملح وفلفل على الوجهين بعدين نخليه يمكن ربع ساعة برا الثلاجه عشان اللحم يوصل حراره الغرفه وعشان البهارات تدخل في اللحم شوي.


الحين عشان تطبخون البرجر فيه طريقتين ، يا الشوي يا التشويح القلي و الفرن موب خيارات هنا. لا تحسبون واحد أحسن من الثاني ! هي مسألة أذواق لا أكثر كثير ناس يفضلون التشويح على الشوي، المهم هنا في الحالتين إننا نستخدم حراره عاليه عشان اللحم يتحمر من برا ويكون زي القشرة لذيذه وبعد عشان اللحم ينطبخ أسرع وبكذا يخسر مويه أقل وبكذا يصير رطب أكثر.


للتشويح أنا أفضل دايما أستخدم مقله حديد cast iron و أحطها على أعلى نار أقدر أوصلها .اللي عنده صاج مسطح يقدر يستخدمه هنا وراح يعطي نفس النتيجة . اللي ما عنده يستخدم مقله ستانلس راح تأدي نفس الغرض أو حتى مقله تيفال عاديه . لحد يستخدم شوايات كهرب أو صاج كهرب هذي ما توصل لحرارات عاليه ولا راح تشوح الأكل.


نسخن المقله أو الصاج على أعلى شي ونخليه يحتر زييين بعدين ندهن شوي زيت ( ما يكون زيت زيتون ) ونحط البرجر ونخليه بدون ما نحركه وبدون ما نضغطه أو نخرمه بشوكه أو غيره هذي كلها راح تطلع الرطوبه حقت اللحم اللي إحنا سوينا كل هذا عشان نحافظ عليها. نطبخ اللحم إلين نلاقي إن لون اللحم من الجوانب بدأ يقلب من أحمر لرمادي بعدين نقلبه ( إذا شكلتوا البرجر ٢٠٠ جرام و أستخدمتوا أعلى حراره راح تاخذ تقريبا دقيقتين ) . الحين نحط الجبن لو كنا نستخدم . نكمل طبخ البرجر إلين يوصل لدرجة الطبخ اللي إحنا نحب . شخصيا أحبه يكون ميديم موب أكثر من كذا . اللي يبي يعرف متى يستوي يلمس الوسط ويشوف كيف لين مقارنه بالأطراف . اللي يبغى يطبخه كامل ويل دون يطبخه، راح يقعد رطب لا تخافون . راح ياخذ معنا تقريبا ٥ – ٦ دقايق عشان يستوي كامل.


burgers

برجر

 

 

بعد ما يستوي نشيل اللحم ونحطه في صحن دقيقتين تقريبا عشان يرتاح. ترييح أي لحم مهم بعد الطبخ. إذا ما ريحتوا اللحم المويه بتنزل عالخبز وماراح يكون شي جيد.

بس هذي طريقة طبخ البرجر …. اللي بيشوي البرجر يسوي نفس الخطوات بالضبط نار عاليه ، يقلب البرجر بعد نص الوقت ، يحط الجبن لو فيه و بعدين يريحه آخر شي بس ..

 


تركيب البرجر :


الحين سوينا اللحم وخلصنا وباقي نحط كل شي عالخبز … شخصيا أحب أسوي الخبز في البيت لأني أشوفه يسوي فرق كبيييير عن حق السوبرماركت . هنا طريقة الخبز . نحمص الخبز شوي في الفرن ، بس شوي عشان يرجع حار ويكون شوي محمص من جوا بس  . الحين ندهن طبقتين الخبز بمايونيز أو زبده أو أي دهن .. هذا سر يستخدمونه المطاعم دايما عشان يمنع المويه اللي من الحشوه تدخل الخبز .. نحط الخس فوق الطبقه اللي تحت. هذا بعد راح يمنع المويه حقت اللحم تدخل الخبز وبعدين نحط اللحم فوق الخس . الحين نبدأ نحط الإضافات اللي نبي . في حال كان فيه إضافتين يتزحلقون مع بعض مثلا طماط صغير مع خس أو فطر مع طماط نحط بينهم شي أو نحط واحد تحت اللحم عشان ما تطيح الحشوه إذا شلنا البرجر.

 


الإضافات :


الإضافات حقت البرجر ماتخلص. الأجبان بأنواعها دايما إضافه حلوه تشدر ، مونتري جاك ، جودا ، موزاريلا ، جبنة سويسريه أو حتى جبنة زرقاء blue cheese كلها بتكون حلوه ، الجبن العادي الشرايح زي كرفت وغيره حلو مع البرجر كونه يذوب بسهولة بس ماراح يعطي نفس الطعم اللي الجبن الحقيقي يعطيه.


البيكن ، الفطر المشوح أو السوتيه أو حتى المشوي رهيب مع البرجر ، البصل المشوح ( زي ما سويت في الصوره ) أو حتى الني أو حلقات البصل لذيذه معه ، الطماط طبعا و الخس بأنواعه ، المخللات مقطعه أو كامله سواء مخلل خيار أو غيره زي مخللات الفلفل مثلا حلوه ، الفلفل الملون المشوي رهيب مع البرجر ، البيض المقلي بعد رهيب مع البرجر ، أي نوع خضار زي الكوسه أو القرع أو الباذنجان حلوه مع البرجر.


الصوصات خياراتها كثيره بعد .. المايونيز سواء ساده أو مع نكهة . شخصيا المايونيز هو خياري مع البرجر ودايما دايما أسويه في البيت إذا كنت بقدمه مع شي زي البرجر. الكتشب أكيد ، الخردل بعد ، الجواكمولي و الباربيكيو صوص رهيبيبن مع البرجر ، الصلصات المكسيكيه حقت الطماط بعد رهيبه معه ..


هذي موب كل الإضافات اللي ممكن تنحط مع البرجر أي شي يمشي ممكن ينحط هنا .. تذكروا أهم شي إنها زي ماقلت إضافه بس موب الأساس ! مافيه شي بيعوض ويحسن قطعه لحم تعبانه ! .


بس هذا تقريبا كل اللي تحتاجونه عشان تسوون برجر رهيب في البيت … أهم شي :

١ـ أشتروا لحم من نوعية جيده ومن المناطق اللي كتبت فوق وبنفس النسبة .

٢ ـ بردوا اللحم زييين بعدين أفرموه في البيت مرتين بدون أي إضافه ثانيه .

٣ ـ شكلوا اللحم على شكل قرص و أضغطوه في النص .

٤ـ تبلوا اللحم وطلعوه من الثلاجه قبل ربع ساعة تقريبا من الطبخ .

٥ـ أطبخوا اللحم على حراره عاليه سواء في شوايه أو شوحوه على صاج أو مقله إلين يوصل درجة الطبخ اللي تبون.

٦ـ خلوا اللحم يرتاح

٧ـ أستخدموا خبز ممتاز وحمصوه شوي .

٨ـ أدهنوا الخبز بدهن أو مايونيز بعدين حطوا فوقه المكونات .

٩ ـ لا تكثرون من الإضافات ! وتأكدوا إنكم تبنون البرجر صح .

 


home made burger

برجر منزلي مع خس ، طماط، جبن تشدر ، بصل مشوح ، مايونيز بالفلفل المشوي و مخلل خيار

 

 

هنا سويت البرجر مع خبز مسويه في البيت مع مايونيز بعد مسويه في البيت مطعم بفلفل هالبينو مدخن مع بصل مشوح ، جبن تشدر ، طماط و مخلل خيار وكتشب. و عالجنب بطاطس حلوه ( جزر يماني ) مقليه كتغيير عن البطاطس العادي.

 


home made burger


برجر

burgers


218 comments

Skip to comment form

  1. السلام عليكم … اشكرك ع المعلومات الرائعه … انا فتحت محل برغر في احد المولات .. طبعا انا بشتري برغر من امريكانا يعني جاهز … وفكرت اني اصنع البرغر بنفسي … وحاولت .. وللاسف فشلت كل المحاولات … لأن البرغر تنكمش وتصغر .. وعندي شواية بالفحم درجة حرارتها توصل 300 درجه … اش سبب الانكماش … بالرغم من ان البرغر الجاهزة ماتنكمش … وشكرا
    shaker_1010@hotmail.com

    1. وعليكم السلام و الرحمة …

      كتبت طريقة البرجر وكل كل شي أعرفه عنه في موضوع البرجر في المدونة أمش على الطريقة اللي كاتب ومالك إلا برجر رهيب لا ينكمش ولا غيره.

      أي لحم ينطبخ لازم ينكمش شوي هذا طبيعي بس إذا كان ينكمش أكثر من الالزم يمكن فيه خطأ. أول سبب هو خليط اللحم يمكن مافيه شحم كافي ، ثاني سبب هو إنه ينطبخ أكثر من اللازم وثالث سبب هو إن اللحم مشكل ومفروم خطأ. الطريقة الصحيحة لعمل كل هذي الخطوات كاتبها في الموضوع حق البرجر.

  2. ماشاءالله تبارك الله وش هالمدونه العجيبه

    • هبة on 29 November, 2011 at 8:02 am
    • Reply

    يم يم يمممممممممي تسلملي هاليدين وهالنفس ماشاء الله لاقوة الا بالله

    سهلة كثييير بس وين نحصل بقرة طازة هههههه ا

    هو زوجي جنبي يقول ماغير نشيل صورة هالبقرة وندور بها في الملاحم ولعل وعسى نحصل

    لوسويتها وضبطت بخبرك ..وان ماضبطت برضو بخبرك 🙂

    تحياتي

    • الاوتار on 25 November, 2011 at 5:51 pm
    • Reply

    مشكور اخوي على المعلومات عاد الحين انا مسافر ان شاء الله اذا رجعت احاول اطبق وانا الحمد الله اذا سوبت اظبطه

    • منصور on 21 November, 2011 at 6:10 am
    • Reply

    السلام عليكم …أسعد الله صباحك
    أنا أبي مشورتك في فتح مطعم برجر ,,حيث أنني توكلت على الله في فتح مطعم برجر مميز وقررت أن أشرف على المطعم والأخذ بمشورتك في اللحمة أن تكون طازجة ومختاره بعناية ولكن سؤالي هو كيف أوفر كميات كبيرة من اللحم للمطعم
    هل اتفق مع مصنع لحوم يختار اللحوم حسب مواصفاتي ويفرمها ويعدها على شكل قوالب بالحجم الذي أريده؟ وفي حال ذلك كيف أتأكد بأنه أختار لي اللحمة حسب طلبي ؟لربما يخلط لحوم أخرى …!!! كيف أثق طبعا كل شي مكتوب في العقد وراح أدفع للمصنع التكاليف كاملة
    طبعا فكرت بأن أخصص مطبخي لذلك ولكن لا يوجد تفرغ ناهيك عن الكمية الكبيرة ولازم يكون الشغل باحترافية …ّ!
    طبعا من الصعب أن أجعل العمال في المطعم اعدادها لأن العمل يحتاج نظافة واعداد صحيح كذلك تفرغ عامل معين
    صراحة أنا طلبت مشورتك لأني أثق بكلامك النابع من القلب وببساطتك من دون تكلف لو أنتى مكاني اش بتسوي في موضوع اللحمة مع شكري وتقديري صراحة محتاج بريدك الاكتروني

    1. وعليكم السلام و الرحمة …

      قبل كلللل شي شكلك ملخبط أخوي تراني ولد ههههه

      عموما … بالنسبه للمطعم خيارك الأفضل إذا كنت تدور الطعم هو إنك تسوي زي كل المطاعم وتشتري اللحم وتفرمه وتشكله عندك في المطعم. مصانع اللحم و غيرها ما أعتقد تقدر توفر نفس الإهتماما و الجوده اللي أنت بتوفرلها لنفسك ولا كان لقيت كل مطاعم البرجر يتعاملون معهم. فرم اللحم في المطعم نفسه بيحتاج عمال أكثر وفاهمين في هذا المجال وفي السلامه الغذائية وبيحتاج مساحة و أجهزه إضافيه فأحسبها وشف.

      الصراحة أخوي أنا مالي أي خبره في هذا المجال ومالي أي خبره في الناحية المالية و الإدارية من الموضوع وكيف تقدر توفر وتجيب عمال وتلاقي الأدوات التجاريه وطريقة تخطيط المحل وكل هذي الأمور مالي أي خبره فيها ولا ودي أورطك معي فيها. أنا أعرف أطبخ ولكني منيب صاحب مطعم أو حتى صاحب خبره عملية في مجال المطاعم وعشان كذا يمكن ما أكون الشخص المناسب إنك تعتمد عليه في المشوره دائما.

      إيميلي تفضل :
      md7t_basha@hotmail.com موجود في البروفايل حقي.

    • نواف on 19 November, 2011 at 1:15 am
    • Reply

    سلام يا شيف
    حبيت اسألك بخصوص قطعة معدنية يستخدموها الطباخين لعمل شرائح البرجر يعني تكون شريحة لحم البرجر مستوية الأطراف يعني أبغى شغل مرتب قطرها وارتفاعها واحد أي أجدها في جدة
    السؤال الثاني ما عليك أمر ما الفرق بين لحمة البرجر المفرومة مع بصل واللحمة المفرومة من غير بصل أنا جربت اللحمة المفرومه مع البصل رائعة جدا ؟؟؟
    الف شكر على المدونة الرائعة

    1. وعليكم السلام و الرحمة …

      الظاهر تقصد اللي زي هذي :
      http://acimg.auctivacommerce.com/imgdata/0/0/8/6/8/3/webimg/701497.jpg

      هذي قالب على شكل حلقه عادي موب خاص بالبرجر بس. الصراحة ما أدري وين ينباع بس شف محلات الأواني المنزليه. إذا تبي نصيحتي هو موب ضروري أبببدا إلا بالعكس ممكن يخرب قوام البرجر. إذا تذكر قلت إن البرجر قرص لحم مرصوص بشكل خفيف وركز على خفيف هنا ، إذا ضغطنا البرحر في قالب صح شكله بيكون مدور بس بيكون القوام مضغوط أكثر بدال ما يكون لين ويتفتت ويذوب في الفم زي ما إحنا نبيه. العشوائية أحيانا حلوه موب شرط كل شي يكون بالمملي بخصوص الشكل أهم شي الطعم ما يخرب.

      اللحم مع البصل زي ماقلتلك قبل موب مسألة إنه موب لذيذ بس موب برجر بيكون طعمه أقرب للكفته أو الكباب. البصل طعمه باين في البرجر و أنا أبي نكهة اللحم تبان بدون شي معها ، أي نكهة بحط معاه أحطها فوق البرجر ليش نخلطه معها ؟

    • منصور on 15 November, 2011 at 3:56 am
    • Reply

    السلام عليكم ورحمة الله وبركاتة

    جعل الله كل حرف كتبته في ميزان حسناتك آمين يارب
    والله ثم والله أبداع من مبدع وانا أشكرك على الجهد الكبير والله ودي أوقف وأصفقلك على الإبداع
    طبعا أنا مبسوط منك لأن شخصيتي قريبة جدا من شخصيتك أنا أحب الطبخ كثيرا مع أنني محاضر في الجامعة ولكن أحب الطبخ و برامج الطبخ والمسابقات والابتكارات ودائما أسوي أكلات كثيرة في بيتي وبالذات أكلات المطاعم المكلفة ودائما أتحدى زوجتي
    ما أبغى أطول عليك راح أدخل في الموضوع أنا من محبين البرجر ودائما أنوع في المطاعم مرة مكدونالدز ومره برجر كينج ولكن في الفترة الأخيرة كثرت مطاعم البرجر في مدينتي جدة لدرجة أن بعض المطاعم الصغيرة أصبحت تتفنن في البرجر مثل مطعم (جان برجر) والهمبرجر لذيد وب 8 ريال ولا أبالغ دخله اليومي يبدأ من 5 الاف إلى 10 الآف الخلاصة أنا قررت أسوي برجر في البيت حتى أكتشف سر البرجر مين يدري ممكن أفتح مطعم برجر المهم قدرت أسوي برجر لذيذ والطريقة أخذتها من مقيم لبناني عايش في أمريكا وهذا اللبناني بسوي البرجر بطريقة لذيذه جدا ويعزم قاربه وكلهم مدحوا طريقته وراح أقلك الطريقة وأبغى رايك في الطريقة
    طبعا يجيب اللحمة نفسها اللي ذكرتها في موضوعك ويقرمها ومن ثم يجيب بصل أبيض مفروم ناعم ومن ثم بيضة وفلفل وملح ويلخبطهم جيدا
    ثم يسوي شرائح البرجر مثلك تماما ومن ثم يحطهم في الفريزر …ولكن السر العجيب اللي يخلي لحمة البرجر لذيذة جدا هي أثناء الشوي يدهن اللحمة بصوص الباربكيو لشركة عالمية قلي عليها طبعا قدرت أحصل على صلصة الباربكيو من امريكا المهم يدهن اللحمة من الجهتين أثناء الشوي ومن ثم يضع نفس مكوناتك على الخبز ..المهم أنا جربت الطريقة وصراحة طلع البرجر لذيذ جدا جدا لدرجة اني قررت أفتح السنة الجاية محل برجر
    أنا أبغى رايك في الطريقة واش رايك في فتح مطعم برجر
    في سؤال محيرتي في مطعم جديد في جدة في المحمدية يبيع البرجر ب 30 ريال وعليه طلب غير طبيعي حقيقي أنا ما جربته بس ليه كذا غالي على كلام قريبي هو يصنع الخبز ويكون جامبو واكيد اللحمة هو يصنعها بس هل فعلا يوصل لهذا المبلغ 30 ريال مع البيبسي
    متظر ردك بفارغ الصبر وشكرا

  3. مرررره حلوه الوصفه

    • رشة ملح on 6 July, 2011 at 12:03 am
    • Reply

    طريقة روعه

    تعبت وانا اعمل برجر و يتفتت عندي, طيب قالو لي حطي بيض! حطي طحين! ووووو ولسه ماضبط!

    1. الطريقة مو روعة هذي طريقة البرجر ، الناس الله يهديها هم اللي حرفوا الموضوع وخلوه كباب مسطح. البرجر مايحتاج لا طحين ولا بيض ولا بصل ولا أي شي ثاني . أنتي تبين البرجر يتفتت بس ما تبينه ضعيف ويتفتت في يدك و أنتي تطبخينه عشان كذا أفرميه صح بدون ما يحتر الشحم ( هو اللي يخليه كذا يتفتت ) بعدين شكليه وخليه يبرد شوي قبل تطبخينه و أضمنلك ما يتفتت.

    • روح وجيه on 5 July, 2011 at 5:52 am
    • Reply

    ياشيخ روح انت فنااااااااااااااااااااااااان ماشاء الله الله يحميك من كل عين

    • بشرى .. on 29 May, 2011 at 12:43 am
    • Reply

    ما شاء الله تبارك الله ,
    طيب ينفع لحم الجمل واي جزء ؟ لاننا ما ناكل بقر
    أو دجاج ؟!

    1. أرجعي أقري الموضوع وشيلي أي جزأ يتكلم عن اللحم وجودته و أهميته و أهميه إختيار اللحم من المنطقة هذي بالذات وبتلاقين الموضوع تلخص إلى إنك تشكلين لحم وتشوينه بملح وفلفل بس !! صح ولا لأ هههه طيب وش الجديد اللي شدك في الطريقة هذي بالذات إذا كذا ؟ ماحطيت بهارات غريبة ولا طريقة غريبة ولا حتى طريقة طبخ غريبة ؟

      ما أقولك ما ينفع .. بس البرجر الصحيح مصنوع من بقر صح يمديك تسوينه من أي شي بس هذا موضوع ثاني .. برجر البقر عشان يطلع بأحسن طريقة بالنسبة لي أنا بس سويه زي ما سويت فوق .. كل واحد له ذوقه بس أنا أحب البرجر حقي بالضبط زي ما كتبت فوق ..

  4. ابداع بمعنى الكلمة
    الله يوفقك ويزيدك
    أقول ممكن أشوف طريقتك بتتبيل و شوي الدجاج؟

    1. مافيه طريقة وحده للتتبيل ليش الواحد يربط نفسه بطعم ونكهة وحدة وفيه آلاف النكهات غيرها ؟ يمكن اليوم مسوي مينيو صيني أسوي دجاج ببهارات صينية بكرى بسوي شي إيطالي أسويه ببهارت إيطاليا . لو أعتمدت وصفة وحده المنيو يصير مقطع ومشوش وهذا أبدا موب شي حلو..

      تخيل معي مثلا سبرينج رولز مع دجاج إيطالي تحس ما تركب .. بس لو ببهارت صينية يمشي الوضع .

    • استثنائيه on 23 May, 2011 at 3:41 pm
    • Reply

    كتبت نفس تعليقي بس مدري وين 🙁

    المهم الصوره مشهيييه
    وبجربه ان شاء الله

    بس ابي اسالك اللي بجنب البرجر بطاطس اتوقع كيف سويته
    اشتهيته :$

    1. البطاطس هذي بطاطس حلوه مقلية . الصراحة شوي صعبة يبيلها موضوع

        • استثنائيه on 24 May, 2011 at 1:28 pm
        • Reply

        يعني الطريقة من مخك ؟ 🙁

        مافيه امل القاها في النت

          • Top Chef on 24 May, 2011 at 1:30 pm
            Author

          لا موب كذا بس تحتاجين ميزان حرارة و طحين بطاطس

          • استثنائيه on 1 June, 2011 at 1:21 pm

          اذا ممكن تكتب لي طريقتها لوو بالمختصرر
          اشتهيتهاا 🙁

          • Top Chef on 1 June, 2011 at 8:16 pm
            Author

          بإختصار أنقعي البطاطس الحلوه بعدين طلعيها من المويه ورشي عليها نشا بطاطس و أقليها وبعد ما تطلع من الزيت رشي عليها سكر بني وملح وبابريكا وكمون

          • استثنائيه on 2 June, 2011 at 12:08 pm

          ششششششكرا لك
          بدور نشا البطاطس هذا واجربها

          انت مبدع (f)

    • غادة on 19 May, 2011 at 9:04 am
    • Reply

    جربت البرغر ، جدًا راااااائعة ما كنت اتخيل اني ممكن بيوم من الأيام أقدر اسوي شيء أفضل من المطاعم !
    صرت أكره ماك و هارديز وغيره و أحب برغري ^^
    الناس اللي ما تاكل لحم ، كيف تسوي برغر دجاج ؟
    كيف أسوي الدجاج بدل اللحم

    1. بالعافية على قلبك …

      الناس اللي ماتاكل لحم أقطعي علاقتك معاهم أسهل بيتعبونك لو بتعطينهم وجه صدقيني ههههه

      عموما .. ما أحب همبرجر الدجاج المفروم عن نفسي .. إذا تحبينه فيه آلاف الطرق في النت بس صراحة ماقد سويته ولا عندي نيه بعد… إذا تبين همبرجر دجاج برأيي مافيه شي أحسن من إنك تاخذين صدر دجاج وتتبلينه ( فيه آلاف التتبيلات نزلت في المدونة أو أي تتبيلة ناشفة أو رطبة تعجبك ) وتشوينه أو تشوحينه .. هذا بيعطيك أطعم أطعم برجر دجاج خصوصا مع الخبز هذا …

    • Dream on 14 May, 2011 at 6:48 pm
    • Reply

    أتعب وأنا أقووول فنان ومبدع ~ ما شاء الله عليك عساك ع القوة ^_^

    • أماني on 9 May, 2011 at 7:37 pm
    • Reply

    يا جمال مدونتك وروعة طبخك لا إله إلا الله
    فننن !!
    الله يزيدك ويحميك

  5. مااشاااء الله كل شيء احلى من الثااني …
    تحمست اسوويه ان شااء الله..

    • منى on 3 May, 2011 at 6:29 pm
    • Reply

    مشكلتنا ماعندنا محل لحوم نظيف ومضمون هنا

    صارلي مده ابحث عن طريقة لحم البرجر الحين برجع ابحث عن محل كويس يبيع لحم بقر

    يعطيك العافيه

    • منى on 3 May, 2011 at 6:25 pm
    • Reply

    مشكلتنا هنا وين نلقى محل يبيع بقرة كاملة زي ماقلت واذا كان فيه وش المصداقية اللي عندهم عشان يعطوني اللي ابي ,, اذا كل مره باخذ مفروم طعمه غير عن المره اللي قبل

    صارلي فتره ابحث بالنت عن طريقة لحم البرجر واي جزء من البقره اخذ ومابقى كلمة بحث ماحطيتها

    بس انت وضحت كل شي يعطيك مليون عافيه

    الحين ببحث عن مكان جيد لبيع اللحوم في جده :>

      • انيس اليافعي on 26 May, 2012 at 6:45 am
      • Reply

      اختاه يوجد محل في كيلو 2 النازل للبلد قبل الكبري اسمه ملك العجول او الرضوع او الحم المهم او في عماير بن محفوظ امام الكندره مول هذا ماشاء الله خبير بالحوم وانا اخذ منه دايما لحم نظيف جدا ينقي الماشيه نقوة من اليمن وجيزان لان من اليمن وجيزان افضل لحم ماشاء الله

    • بوسأم on 14 April, 2011 at 8:17 pm
    • Reply

    أجل يبي له ويك اند على كدا… لأنو بصراحة شغلته شغله بس أنا متأكدة أنو يسوى … و شكرا على ردك السريع … انت مو بس مبدع و مثابر أيضا!!! لأنك تسوئ شغلك. ببراعة و تتابعه بعد!!! ما شاء الله أهنيك …

    1. هلا والله …

      تراك معقده الشغله صدقيني أسهل مما تتصورين .. إذا أشتريتي اللحم وجبتيه البيت وبردتيه في الفريزر شوي يبقالك نص ساعة بالكثير وتخلصين كل شغلك من فرم وطبخ وكله .. لو بتسوين الخبز معها زيدي عالشغلة خل نقول نص ساعة شغل حقت الخبز …

        • بوسأم on 15 April, 2011 at 6:59 pm
        • Reply

        !!!!! معقدة الشعلة!؟؟ ؤ الله انت بروفشنال ما شاء الله و تحسب أنو إحنا لو سويناها بنصير زيك… بس يعجبني تشجيعك..
        عاد يوم قلت معقدة الشغلة كاني تعقدت صدق. ): …

          • Top Chef on 16 April, 2011 at 12:46 am
            Author

          أنا أبرد شي في المطبخ هههه أبطأ واحد ممكن تشوفينه أنا … صدقيني ما كذبت يوم أقولك وبتجربين وتشوفين هي بس المسألة ومافيها إنك متخوفة من الشغلة ، أول مره وبعدها خلاص ..

    • بوسا م on 12 April, 2011 at 7:09 pm
    • Reply

    يعطيك ألف عافية… بصراحة ما عمري فكرت أسوي برجر بالبيت بس طريقتك شوقتني جد … لكن عندي مشكلة الوقت… يعني لو بشتري اللحم و بفرمه و أقرصه.. راح تأخذ الشغلة وقت. زايد أنو أنا ما أكل شيء مشوح بزيت. يعني هل يينفع أقرص البرجر و أفرزنه!!! و المرة الجاية بدال ما أبدى من الصفر اطلعه يذوب الثلج و أسويه و بنفس الوقت ممكن استخدمه لو كنت ناوية أاعمل بأربكيو…. منتظرة ردك

    1. ما يحتاج تسوين كل شي بنفس اليوم …

      الفريزر ما أفضله كونه يخرب اللحم . بس اللحم يعيش في الثلاجه وقت طويل ترى ..

      يعني مثلا يمديك تشترين اللحم وتخلينه في الثلاجه إلى ٥ أيام بدون ما يتأثر ( يطول الشرح بس هو بيتحسن بعد ) بعدين تفرمينه وتشكلينه. بعد الفرم اللحم المفروم بيعيش في الثلاجه يوم تقريبا بدون ما يتأثر بس أكثر من يوم بتضطرين تطبخين البرجر ١٠٠٪ وإحنا مافرمناه في البيت إلا عشان نقدر نطبخه ميديم .

      لو فرمتيه وفرزتيه وشكليته بتضرطين تخلينه يذوب قبل الطبخ وصراحة الطعم بيفرق كثير عن لوكان مبرد بس.

  6. ويح قلبي

    لي رجعه ان شاء الله بتمعن لان البرغر من اكثر الوصفات قربا الى قلبي واكثر وصفات احب اجرب فيها

    يعطيك العافيه

    1. الله يعافيك ..

      حياك الله دايما ..

    • ABEER on 10 April, 2011 at 3:25 pm
    • Reply

    قريته ، بس سالتك يمكن تعرف محل معين

    طيب برايك اختار واحد منهم واخلطه مع العنق؟

    1. والله ما أعرف محل .. قلتلك أنا جربت وهذي أحسن خلطة طلعت معي للحين ، بتسوين بنوع بتسوينه بأنواع ثانيه شي راجعلك بس أنا كتبت الخلطة اللي طلعت معي ألذ شي .

    • ABEER on 10 April, 2011 at 11:16 am
    • Reply

    يعطيك العافيه

    انا دورت كثير بمحلات اللحوم ماحصلت الا رقبه
    الصدر مالقيته ابد ،
    وش احط بداله؟

    وبعدين اذا اخترت اللحمه بخليه يفرمها هو وباكد عليه يبردها قبل ، احس مشوار افرمها بالبيت وهو فرامته قدامه هههه

    1. الله يعافيك …

      أرجعي أقري الموضوع .. شرحت كل شي فيه . تقدرين أكيد تخلينه يفرمها في المحل بس بتضطرين تطبخينها ويل دون كذا ما ينفع تطبخينها نص طبخ .

    • Dora on 4 April, 2011 at 2:11 pm
    • Reply

    تبارك الرحمن مبين تمتلك ذوق عالي
    كثير استفدت من مدونتك ,
    واليوم طبقت البرجر , وما أقدر أوصفه من روعته !

    ولا عليك أمر , ممكن تساعدني في طريقة السيزر سالاد . بالضبط
    لأن لها مليون طريقة وبعضها جربتها لكن النتيجة ماكانت مرضية
    فـ ممكن طريقتها الأصلية
    والرافيولي كيفك معاه ؟ لأن نفس حكاية السيزر سالاد مستحيل يضبط معاي خاصة الصوص تبعه
    الأكلتين هذي مرة أعشقها , وأضطر أروح للمطاعم حتى أكلها ,
    فـ أتمنى يجي اليوم الي فعلًا اقاطع المطاعم لأني استغنيت عن أكلهم بأكل البيت :/

    1. هلا والله …

      بالعافيه على قلبك …

      هذا السيزر :

      السيزر صوص سلطة مطعم بثوم ، بارمزان ، أنشوجه (سمك) ، و صوص وستشير ومذوب مع بعض بصفار بيض.. السلطة اللي معها مصنوعه من خس عربي عكس كل الوصفات اللي تشوفينها بالخس الأمريكي … و أهم شي أهم شي هو الشابورة اللي مطعمه بالثوم … كثير ناس يسوون السيزر وينسون أهم أشياء فيها .. البيض ، الأنشوجه و البارمزان وطبعا الثوم في الخبز .. هذي هي أهم شي الدجاج ماله علاقة في السيزر .. اللي فكر يحط دجاج في الغالب عشان يخليها وجبه كامله يعني ما تصير طبق جانبي بس .. هذي طريقة السيزر الأصليه يمكن شوي غريبه بس هذي الأصليه جربيها و أحكمي …

      أخلطي صفار بيضه + فص ثوم + فيليه أو فيليهين سمك أنشوجه + عصير نص ليمونة + رشة صوص وستشير + ملعقة صغيرة خردل ديجون في خلاط إلين تصير خليط ناعم بعدين صبي عليها زيت زيتون إلين توصل للقوام الي تبين مع ملاحظة إنك كل مازدتي زيت بتصير أثقل موب العكس . ذوقي الملح و الفلفل و بس ..

      وملاحظة صغيرة أغلب المطاعم ما تسويها صح … يمديك تسوينها أطعم بألف مره في البيت

      …………………………

      الرافيولي و الباستات الطازه ككل تكلمت عنها كثييييييييييييير آخر ١٠ تدوينات تقريبا كلها كانت عن الباستا .. ما تحتاجين طريقة رافيولي بالضبط أقري من المقدمة حقت الباستا للمواضيع اللي بعدها وبتلاقين كل شي تحتاجينه وتبين تعرفينه عن الباستا

  7. اشكرك على تجاوبك توب شيف

    بالنسبه للمقله انا عندي من ايكيا وجربتها بعمل الرغيف …فيه ناس يسمونها مصالي او قرصان ماني متأكده اللي يدهنونها بالسمن او الزبد …بصراحه بالمقله الحديد الزهر طعم ثاني…
    طبعا انا اسألك لاني ناويه اطلب وحده من امازون كبيره شوي لان اللي عندي مقاس 4 الى 5 بيضات:( ماحصلت اكبر
    عشان كذا سألت عنها ……افكر بالسمك فيها بس خايفه يتقطع مدري ليه

    اما الجبن احب لون التشدر البرتقالي اكثر من الاصفر…,كيف تقدر تساعدني بوصفات الجبن عشان اعرف اميز؟؟؟

    1. المقلة الحديد الزهر أو الفخار أو حجر البيتزا أو الستانلس أو غيرها ما أشوف إنها تعطي طعم للأكل هي مجرد وسط طبخ لا أكثر .. بعض القدور لها خصائص حراريه تساعد إنك تطبخين الأكل بشكل أحسن وهذا يعطيك طعم نهائي أحسن طبعا بس عموما هي نفسها ما تعطي نكهة للأكل .. يعني البيتزا مثلا اللي مسويه بحجر مافيها طعم حجر .. بس الحجر يساعد إنها تصير تقرمش أكثر و رطبه من داخل بس مافيها نكهة حجر إن صح التعبير ..

      المقلة الحديد الزهر تعاملي معها بالضبط زي ما تعاملين التيفلون .. أصلا مع الإستخدام تصير تقريبا ما تلصق زيها زي التيفلون .. مافيها خوف ولا شي طول عمري أستخدمها أطبخ فيها كل شي حتى الحلويات .

      بالنسبه للتشدر حلو إنك قلتي لون لأنه هو بالضبط زي ماقلتي بس لون .. التشدر الأصلي لونه أبيض مافيه شي في العالم إسمه تشدر أصفر هذي صبغة يحطونها لغرض التسويق لا أكثر …

      أساعدك قصدي أشتري أنواع جبن ما جربتيها و أنا أعطيك وصفه حلوه معها .. مع إن في الغاب أي وصفه فيها جبن يمديك تستخدمين نوع جبن ثاني معها ..

    • Anonymous on 30 March, 2011 at 6:26 pm
    • Reply

    وايش افضل انواع الجبن مع البرقر احتار اذا رحت السوبر ماركت…مدري شالفرق بين القشقوان والموزاريلا والتشيدر ووووو!!!!!!
    هل الفرق بين الموزاريلا والتشدر مثلا ان هذي تتمطط والثانيه لا؟؟:>>>>>>>>>>احس اني ماخذه جرعة غباء اقوى شيء

    1. كل نوع جبن غير .. أفضل و أسوأ هذي مسألة شخصية .. أحسن حل أشتري كم نوع وذوقيه وجربيه مع كذا وصفه ( ومستعد أساعدك في أي وصفة لو تبين ) وكذا بتعرفين الفروقات ..

    • *سفونه الليمونه* on 30 March, 2011 at 6:22 pm
    • Reply

    الله يعطيك العافيه اخوي
    بغيت اسألك كم سؤال
    الحين انا اللي عندي مايحبون البقر ومافي امل….وش البديل عنه غنم او دجاج افضل(اكيد الدجاج)=بس وش الاجزاء المناسبه؟؟؟

    وبالنسبه للمقلاةcast iron هل هي مناسبه للسمك سواء كان فيليه او شرائح كنعد؟؟؟واللا حاره عليه وبتقطعه؟؟

    1. هلا والله …

      الله يعافيك أولا …

      برجر الدجاج شي ثاني تماما ويختلف عن برجر اللحم .. نوعية الدجاج المفروض و الإضافات تختلف شوي عن البقر .. صراحة مالي أي تجارب في برجر الدجاج ..

      المقلة مناسبة لكل شي حتى البيض لو تبين .. هي مقلة عاديه مافيها أي شي غير تقدرين تستخدمينها على حرارة هاديه أو عالية ماتفرق .

    • احلام on 28 March, 2011 at 3:01 pm
    • Reply

    ماشاءالله

    شغل مرتب الله يحفظك

    ياليت لو تسوي لنا برجر محشي بالجبن

    والسموحه

    1. هلا والله …

      مشكوره على مرورك وعلى كلامك أختي ..

      بالنسبه للبرجر المحشي هذاك قلتيها ما تحتاجين وصفه سويي كل شي و أحشيه جبن بس .. شخصيا ما تعجبني كل هذي الحركات لأن إذا جينا عالبرجر أحب البساطه في الإضافات بس هي شي راجعلك .

    • Anonymous on 28 February, 2011 at 11:10 am
    • Reply

    السلام وعليكم ورحمة الله وبركاته
    لو سمحمت ياشيف ممكن طلب لو ما عليك كلافة !!!

    أنا عندي شواية كهربائية وودي أشوي بها لحم بس عجزت ألاقي تتبيلة أو طريقة حلوة تناسب وحدة تشوي أول مرة وخايفة تجرب أي طريقة !!!

    وآسفة جدا عالطلب وأتمنى ما يضايقك كثرة طلباتنا .. وربي يجزيك الجنة ويبارك لك في مالك وعيالك على الجهد المبذووووووول .. !!

    1. وعليكم السلام …

      أبيك تفهمين شي قبل كللللل شي …

      التتبيله ما تحسن شوي خطأ .. ملح وفلفل كافي إنك تتبلين اللحم فيه وبيكون رهيب .. بس إذا شويتيه صح .. الشواية الكهربائية عمرها ما توصل حرارات كافيه إنها تشوي اللحم .. اللحم بيكون رمادي ماراح يوصل للمرحلة اللي يكون متحمر من برا اللي برأيي هي الهدف من الشوي بالدرجة الأولى.

      هنا بتلاقين تتبيلة حلوه ونصايح للشوي عموما :
      http://topchefcooks.com/2010/12/03/skirt-steak-fajita/

      بس زي ماقلت .. الشواية الكهرب والله ماراح تعطي نتايج حلوة .. مع العلم هي كل اللي أهلي يستخدمون هههه يعني مجرب ميتين مره .

        • Anonymous on 28 February, 2011 at 11:59 am
        • Reply

        بس يا شيف الشواية اللي عندي أقدر أتحكم بحرارتها ( يعني أقدر أحطها على نار عااااالية جدا)
        وإذا مايصلح حتى مع التحكم بالحرارة أرميها مثلاً هههه !!
        وآسفة جدا إذا مللتك بكلامي .. تحملني شوي لأني مشتهية لحم مشوي مووووووووووت
        وتسلم المعلومات الرائعة !!!!

          • Top Chef on 28 February, 2011 at 12:04 pm
            Author

          فاهم عليك .. بس أنا أقصد إنها حتى على أعلى شي ماراح تعطيك حراره كافيه ….

          ترمينها ولا لأ هذا شي راجعلك .. أنا كلامي عن أحسن شوي…

    • هيونه on 27 February, 2011 at 12:51 am
    • Reply

    ياخي حتى البطاطس في الصوره غير اوووووووووه اولا لااا ماودك تعزمنا طيب افتح مطعم وحنا نجيك سببت لي ازمه نفسيه ربنا يسامحك

    1. هلا والله …

      ليش العزايم و الكلايف طيب هههه عندك الطريقة وسويها …

    • hani on 22 February, 2011 at 4:37 pm
    • Reply

    هل ممكن احصل مثل هالبرجر جاهز للشوي علطول بالسوبر ماركت

    1. هلا والله ….

      في السوبرماركت دايما اللحم المستخدم هو قصاصات اللحم الباقيه من تقطيع أي قطع لحم .. ماراح تلاقي أي شي بنفس التفاصيل المطلوبه هنا … حتى المطاعم المتخصصه في البرجر موب كلهم يسوون البرجر زي كذا .

    • Anonymous on 22 February, 2011 at 1:20 pm
    • Reply

    السلام وعليكم ورحمة الله وبركاته ..
    لو سمحت يا شيف أقدر أسوي البرجر على الشواية الكهرائية ..
    وتسلم عالموضوع وبصراحة رووووعة ..

    1. وعليكم السلام والرحمة …

      من الموضوع “لحد يستخدم شوايات كهرب أو صاج كهرب هذي ما توصل لحرارات عاليه ولا راح تشوح الأكل.”

      الله يسلمك ما سوينا شي .

  8. اولا : مدونتك بالنسبه لي مفاجئه لاني اصلا اتابع مواضيعك بمنتدى واكيد انه انت
    ثانيا : تصرف دبر حالك ابي همبرجر حالا بالا مره جوعانه وضعيفه واكسر الخاطر ومستعده ادفع اللي وراي ودوني ويكون عندي احد يطبخ لي بفن ولزازه
    ثالثا : ابيك في بيزنس وش راااااااااااايك ؟؟؟
    واولا واخيرا ماشاءالله تبارك الله

    1. هلا والله ….

      أنا بتلاقيني في منتدى شمواه ، المساطيل و مقهى العيال و أحيانا في جسد الثقافة .. غير كذا ماقد كتبت شي برا …

      ههههه الهمبرجر تبينه صح أتعبي عشانه ..

      بزنس .. والله مشكوره عالفكرة بس ما أعتقد صراحة …

    • ام صبا on 17 February, 2011 at 7:55 pm
    • Reply

    الله يعطيك العافية

    هذي صورة لفرامه البصل

    http://i40.tinypic.com/de7klf.jpg

    هل ممكن استخدمها لفرم اللحم؟

    1. الله يعافيك …

      جربت أفرم قبل بخلاط مولينكس وكانت النتيجة محبطة صراحة .. محبطة لدرجة إنه صعب تاكلينها موب بس عاديه .

    • suha on 17 February, 2011 at 6:45 pm
    • Reply

    سلام عليكم

    بسالك

    قد ايش نسبة الدهون في الكليو ؟

    يعني مسلا 20 % من الوزن الاجمالي ؟

    1. وعليكم السلام و الرحمة …

      والله صعب تعرفين كم … تقدرين تحسبينها لو كنتي مستعدة بس يكون قبل الفرم وبتطلعين برقم تقريبي بس كذا بشكل عام صعب مره .. كل مره تشترين لحم كمية الشحم الللي داخل العضل و اللي عالوجه تختلف وطبعا حسب نوع القطعه بعد بتختلف ..

    • Anonymous on 17 February, 2011 at 10:05 am
    • Reply

    ماشاء الله تبارك الله
    شكله لذييييييييييييذ ويسسسعبل

    طيب شيف ممكن تقول طريقة بالمايونيز .. كيف تصلحه في البيت ؟؟
    وسؤال ثاني .. بشرح طبخ اللحم ذكرت انو نضيف جبن لو كان متوفر
    وش تقصد بالجبن اللي نضيفه ؟؟ ووين بالضبط اضيف ؟؟ <- الاستيعاب دمار :$

    1. هلا والله …

      المايونيز بنزله بعدين في موضوع لحاله كونه موضوع كبير شوي

      الجبن أقصد لو كنتي تبين جبن مع البرجر ، تحطينه فوق اللحم وهو يطبخ وهو بيذوب .

    • Anonymous on 16 February, 2011 at 3:21 pm
    • Reply

    اهلين شيف
    طيب لحم الدجاج يصلح برقر ؟؟؟؟
    واي جزء

    1. يصلح .. أي لحم يصلح .. نعام ، دجاج ، غنم ، سمك … أي شي .. بس طبعا لكل واحد تعامل غير ..

      الدجاج أحسن شي تسوينه بصدر وتخلطين معه شوي فخذ .. الدجاج لازم معه إضافات تمسكه زي بياض بيض مثلا أو شحم (جلد) مخلوط … ما أعرف ولا قد سويته في البيت وبصراحة ما أحبه … لو تبين برجر دجاج أحس ألذ شي إنك تشوين صدر دجاج كامل أو تقلينه .

    • mimo on 16 February, 2011 at 11:23 am
    • Reply

    توب قصدي فرامة البصل(ست البيت ) استخدمها لفرم اللحم

    وشاكرة لك سعة صدرك

    1. والله ما أعرفها …. ما أدري بس صراحة جربت أفرم لحم في خلاط كذا مره وكانت النتيجة مخيبة للآمال صراحة مدري عن الجهاز هذا بس أعتقد مافيه بديل للفرامة .

  9. السلام عليكم توب شيف

    من زمان وانا اطلطل على المدونة الله يرفع قدرك ومكانتك بالدنيا والآخرة

    بكل حرف تفيدنا فيه ….

    السؤال هنا وش رايك بست البيت اللي يستخدمونها بفرم البصل هل تنفع هنا او لا ؟؟؟

    استمر بإبداعاتك ..ربي يحميك ..

    1. وعليكم السلام و الرحمة … هلا والله …

      وين قصدك هنا ؟؟؟ البرجر ما أحط معه بصل .. ولا أنصح بعد تحطين معه بصل .. ما يحتاج بصل .

      ست البيت والله ما أعرفه ولا قد شفته صراحة …

    • suha on 14 February, 2011 at 5:26 pm
    • Reply

    طيب ممممم

    طعمها لايت مطعم تقريبا نفس الشي

    يعني مسلا تشيليز ابل بيزز

    فرايديز

    تقريبا يعني عشان اتخيل ايش ممكن يكون طعمها بس

    1. هم كلهم طيب يسوون نفس البرجر … كلهم نفس الشي بس يتفاوتون في الجوده … مدري بس يعني فيه برجر لذيذ وفيه برجر لأ بس … مافيه أنواع عشان تقولين هذا لأي مطعم أقرب …

        • suha on 14 February, 2011 at 6:42 pm
        • Reply

        منتا فاهم عليا

        يعني مستحيل يجي في مخي طعم البرقر دي زي ماك مسلا !!!

        انا ابا اتخيل الطعم

        مو زي دا المطعم ولا دا المطعم الز

        لا لا

        فاهمة انو في شي كويس وشي مو كويس

        بس مجرد تخيل مو اكتررر

          • Top Chef on 14 February, 2011 at 7:01 pm
            Author

          أنتي الحين خايفة من إيش بالضبط ؟ خايفه ما يكون لذيذ ؟؟؟ مهما كان سيء أضمنلك بيكون لذيذ إن شاء الله … الطريقة مافيها شي معقد أو حركة غريبه تميزه عن باقي أنواع البرجر . هو بس برجر بس مسوى صح … مدري كيف أوصف الطعم ؟؟؟؟ ليش نذوق إذا كذا ؟؟؟ نتخيل وخلاص ؟

    • Anonymous on 14 February, 2011 at 9:56 am
    • Reply

    ماشاء الله تبارك الله
    من جد شي لايقاوم

    لكن الله يرضى عليك بسألك
    الكيلو من اللحم كم راح يسويلي حبه برجر ؟

    1. حسب كم جرام تسوين كل حبه .. لو شكلتيها ٢٠٠ جرام زي ما سويت بتسويلك ٥ حبات تقريبا .

    • Anonymous on 14 February, 2011 at 9:23 am
    • Reply

    اقوله من شكل يعني كمظر رائع
    لكن ماذقته عشان احكم وانا متوقعه انه يجنن
    لاتخاف ماراح اسبك وانا مجربه وصفاتك ….هههههه

    • Anonymous on 14 February, 2011 at 5:29 am
    • Reply

    ماشاء الله هذا اشلون تاكله …؟؟؟؟؟؟؟

    عليك بالعافيه
    شغل رائع كشكل

    1. لا يغرك شكله هو بس منفوش …

      بعدين مافهمت وش قصدك كشكل ؟؟؟؟

    • suha on 13 February, 2011 at 8:27 pm
    • Reply

    صباح الخيرر

    اول شي يعطيك العافية

    تاني شي بسالك كم سؤال

    ابغا محل تدلني عليه في جدة تعرفو اشتري منو اللحمة

    هوا لحم بقر عادي كبيرة ولا صغيرة يعني قصدي عمر البقرة ولا ما يفرق

    لو كنت ابا افرزنها كيف؟؟ وكم المدة اللي تقعد محافظة فيها على طعمها؟
    واتبلها وافرزنها ولا التتبيل قبل ما استخدمها بعد ما اطلعها من الفريزر ؟

    عيش البرقر مممممم اقدر اخبزو وافرزنو ؟؟ ولا افرزنو ولمن اطلعو اخبزو ؟

    بسسس

    يلا جاوبني بالتفصيل الممل

    شكرا

    1. صباح النور و السرور …

      الله يعافيك …

      المحلات والله ما أعرف كل مره أروح يطلع عند محل شي غير أنتي وحظك.. يعني أروح الدانوب أحيانا ألاقي عنده لحم ممتاز و أجي مرات ألاقي لحم تعبان .. أنتي وحظك عندك الدانوب الكبير أحيانا تلاقين فيه ، عندك بعد وسمي تلاقين عنده لحم جيد .. اللحم يكون بقر مو عجل ..

      تفرزين اللحم ولا تفرزين البرجر ؟ إذا بتفرزين اللحم بعدين تذوبينه بعدين تفرمينه هذا أفضل حل . إذا بتفرمين اللحم بعدين تفريزنه ممكن بعد بس إذا بتشكلينه اللحم وتفريزنه ما أنصح لأنك لازم تذوبينه ولازم تطبخينه وهو على حرارة الغرفه وراح يخرب شكله مع الذوبان ولازم تشكلينه من جديد في الغالب .
      إذا بتتعبين نفسك وتشترين لحم زي الناس وتفرمينه بنفسك نصيحة لا تفرزينه .. أنتي تدورين أحسن طعم و الفريزر ماراح يعطيك أحسن طعم . اللحم ممكن يقعد في الثلاجه إلى ٥ أيام بدون ما يتغير يعني عندك وقت طويل تهزين اللي بتجهزينه .

      الخبز تقدرين تفرزينه زي أي خبز ثاني .. الخبز عموما يا ينحفظ على حراره الغرفه يا في الفريزر أبدا ما ينحفظ في الثلاجه. أهم شي سخنيه قبل تستخدمينه .

    • lolitta on 13 February, 2011 at 2:04 pm
    • Reply

    ما شآء الله تبارك الرحمن ، ربي يحفظك
    ولا اطلق محل برغر

    1. هلا والله …

      حياك ومشكورة على مرورك ..

  10. بكل صدق أقدر أعترف وأقول “جبتني على وجهي ”

    البرجر طبقي المفضل بأي مكان وأى زماان

    أول ماشفت الايميل جين أركض هنا

    مجربتها الله لا يعوق بشر

    تسلم لا هنت

    1. هههههههه .. حياك وش دعوه …

      بالعافيه مقدما عموما ..

    • Anonymous on 13 February, 2011 at 5:26 am
    • Reply

    يسسسسسسسسسسسسسسلمو والله يدينك

    طيب سؤال بما اني جربت كور اللحم ليش ما احطها هنا بما انها متماسكة وطرية وتذوب في الفم هذا اولا

    ثانيا مو كان الطبقات صارت كثيرة بزيادة <<ناطحة سحاب يعني ههههه لو سويتها لعيالي راح تطيح ما وصلت فمهم "لاتاخذها بمبدء النقد تكفى"

    صراحة ما اخفيك كنت اصلحه في البيت الخبز واللحم وبعد اتفنن في الخلطة واحيانا بالدجاج لكن اختك صايرة عجازة تبي السريع السهل ولا ادري ما يقارن شغل السوق بشغلي لدرجة اني ما صرت اكل برجر برى ابد

    1. الله يسلمك …

      البرجر مانبي إلا لحم ، نبي لحم يتفتت ما يكون ماسك زي كرات اللحم .. تدرين نفففس الطريقة اللي حاط بالضبط لو سويتي شي سخيف زي إنك تحطين ملح مع اللحم قبل الفرم ممكن يسوي فرق كبييييييير . شوفي هذي الصوره تشرح اللي أبي أقول وزياده :
      http://aht.seriouseats.com/images/20091211-salting-meat-salted-cs-unsalted-composite.jpg

      اللي عاليسار همبرجر مضبوط و اللي عاليمين نفففس البرجر بس مع ملح …

      تبين تحطين كرات اللحم حطي ، تبين تستخدمين لحم حاشي أستخدمي ، تبين تسوينه بلحم مفروم من السوبرماركت سويه هذي كلها برجر بتطلع معك … بس هذا كله ما يهمني شخصيا اللي قصدته من الموضوع كيف تسويين أحسن برجر بس.

      إذا الحجم كبير نقصي من الإضافات أو نحفي اللحم شوي .. كل هذا في الموضوع …

        • Anonymous on 13 February, 2011 at 6:11 am
        • Reply

        هالحين الي على اليسار مضبوط!!!!!!!!!!!

        اقسم بالله دايم يطلع معي كذا ولا يعجبني احسه مو مضبوط اشوف المضبوط هو المتماسك والي طالع قرص مرتب

        عموما حلو ان في النت واحد مثلك يعلمنا وين الصح والغلط والي احنا من هذه المطاعم نشوفه العكس

          • Top Chef on 13 February, 2011 at 6:23 am
            Author

          كلي اللي يعجبك .. هذا المهم … بس لو جربتي اللي أقصد مره وحده بتعرفين وجهة نظري من الموضوع كله .

    • ام اقوبي on 13 February, 2011 at 5:07 am
    • Reply

    يعطيك مليووووون عافيه

    انا من المدمنات على الهمبرجر

    شكله واااو ماشاء الله

    1. الله يعافيك …

      وطعمه أرهب بعد .. أضمنلك هذا الشي هههه

  11. دوبي وانا اقرا طريقه الخبز ع الايميل قلت ليته يكمل البرجر
    ما شاء الله عليك حتى المايونيز مسويه بالبيت 🙂
    من جد مدونتك مدرسه
    استمر

    1. كنت ناوي أنزلهم مع بعض بس ما أمداني …

      حياك أختي ماسوينا شي

Leave a Reply

Your email address will not be published.

%d bloggers like this: