«

»

فبراير 13 2011

البرجر .. Burgers

هلا والله …


من زمان و أنا أبغى أنزل موضوع عن البرجر ، أكله أموت فيها ووحده من ألذ الأشياء اللي ممكن تاكلونها ( لو تسوت صح طبعا ) ويمكن واحد من أكثر الأشياء اللي أكلتها في حياتي وما زلت آكلها زيي زي ناس كثيرين. البرجر صار رمز للأكل السريع. كثير ناس فاقدين الأمل إنهم يسوون برجر ممتاز في البيت وماشين على مثل “خل الخبز لخبازه”، فيه كثيير ناس ثانين يسوونه في البيت بس مازالوا يشوفون حق المطاعم أفضل من ناحية الطعم ولو إنهم يتعللون إن حق البيت “أصح” من حق المطاعم. شخصيا أشوف إنه إذا ماكنت بسوي شي أحسن أو على أقل تقدير في مستوى المطعم لا أسويه من الأساس !! بس هذي وجهة نظري أنا وكل واحد حر في الأخير ….


أغلب الناس في وصفات البرجر كالعاده يتوقعون السر في مكون معين ويجربون ويجربون بس ما يوصلون لنتيجة مرضيه، ناس بتحط بهارات وخلطات غريبه وتتبيلات وناس ثانيه بتتفنن في الإضافات اللي فوق البرجر بس هذي كلها ما راح تسوي فرق ولا راح تصلح برجر تعبان مهما حطيتوا منها هذا لأن السر موب في أي مكون زايد ! السر في المكونات الممتازه و التجهيز و الطبخ الصحيح بس . لا تفهموني غلط ! موب قصدي إن هذي الإضافات خطأ تنحط بس ماراح تحسن شي خربان من الأساس ..


اللي يعتقد إن برجر ماك ، هاردييز أو برجر كنج هو البرجر الصح فهذا الموضوع موب له ! خصوصا اللي يشوف إن برجر ماك مفروض يسمى برجر أصلا الله يكرم النعمه .. اللي يعتقد إن برجر فدركرز أو فرايديز أو تشيليز هو البرجر الجيد فأحب أقوله إنه ماذاق برجر للحين  !! والله العظيم تقدرون تسوون أحسن في البيت بألف مره. بس كل اللي أطلبه شوي ثقة بس شوي ثقة . أضمنلكم إن شاء الله إذا سويتوا البرجر زي ما أقول بتطلعون ببرجر لذييييذ ورطب ولين. والله يرضى عليكم ، الله يرضى عليكم لحد ياخذ ربع الكلام اللي أقول بعدين يقولي ماضبط !!


البرجر وشو ؟ البرجر عبارة عن ساندوتش محشي قرص لحم مفروم … إذا كان ينوكل بشوكه أو ملعقة فهو موب برجر لأنه موب ساندوتش. الساندوتش لازم أقدر أمسكه بيدي .. نوع الخبز ممكن يكون أي شي بس الأساس فيه يكون خبز مدسم يعني مع زبده و حليب وكذا …( يعني ما يكون خبز فرنسي مثلا ) وفي الغالب طبعا مدور . الجزأ الأساسي هنا هو قرص اللحم ! هذا الشي اللي ما يفرق مهما كان نوع البرجر دايما فيه لحم مفروم مضغوط وممسوك مع بعضه بشكل خفيف . هذا أهم شي في البرجر اللحم .. الأساس هو البقر بس ممكن يتسوى بأي شي ثاني .. هنا راح أتكلم عن البقر بس و البقر أقصد البقر beef موب عجل أو حسيل أو غيره.


طيب وش مواصفات البرجر الجيد ؟ هذا شي يختلف من شخص لشخص كل واحد له رأي غير في نوعيه اللحم و حجم القطعه و درجة الطحن ونوعية الخبز و الإضافات الثانيه. بس عموما فيه صفات ما يختلف عليها إثنين.. أول شي اللحم لازم يكون لذيييذ و رطب ولين ويتفتت في الفم ، أقصد بيتفتت إنه ما يكون زي الهوتدوق لاصق في بعض لازم يكون يتفتت شوي. الخبز لازم يكون لين وطري وهش وفي نفس الوقت يقدر يشيل طبقة اللحم بدون ما يطيح أو يتفتت. الخبز بعد موب المفروض يكون رطب  من المويه حقت البرجر ( أصلا أي ساندوتش خطأ إن الخبز يترطب ) ، حجم اللحم للخبز جدا مهم ما نبي طعم اللحم يختفي ولا نبي طعم الخبز يختفي ويطلع كأننا ناكل لحم لحاله. أسوأ شي في البرجر أو أي ساندوتش عموما هو إنه ما يكون مصمم صح ، يعني و إحنا ناكل نلاقي كل شي يطيح من الساندوتش أو يكون كبير بزياده بحيث يكن صعب ينوكل أو ينمسك. آخيرا الإضافات و الصوصات اللي تنحط تنحط عشان “تحسن” طعم اللحم و تعطيه نكهة إضافيه موب تغطي عليه .. إضافه أو إضافتين تمشي مع بعض ومع الخبز و اللحم هي كل اللي تحتاجونه أكثر ما يعني أفضل !! الإضافات تكون بكمية معقوله بحيث ما تخرب نسبة الخبز للحشوه . الإضافات هذي مسألة شخصيه كل يوم فيه إضافه جديده للبرجر يحطونها عليه سواء أنواع جبن غريبه أو مكونات ثانيه وكل شخص عنده رأي خاص وذوق مختلف في هذا الموضوع . هنا الإبداع هنا حطوا اللي تشوفون يمشي أهم شي لاتلمسون الأساس !


طريقة اللحم :

 


عشان نسوي اللحم فيه خطوات معينه. أول شي لازم نعرف نختار لحم من نوعية جيده ، بعدين لازم نعرف نختار من أي منطقه اللحم ناخذه ، بعدين لازم نعرف كيف نفرمه وكيف نشكله ، آخر شي لازم نعرف كيف نبهره و نطبخه صح.


إختيار اللحم :


اللحم المفروم حق السوبرماركت ما يمشي الحال هنا ولا راح يعطيك برجر جيد. إذا نبي نسوي لحم ممتاز لازم نسوي كل شي بنفسنا ، المسألة جدا سهله وماتاخذ دقايق يعني لحد يخاف. السبب هو إن السوبرماركت ما يفرمون قطعة معينه هم يفرمون أي لحم زايد من تنظيف اللحم عشان يسوون اللحم المفروم اللي تشرونه. يعني مثلا جاهم زبون وطلب ستيك وباقي أجزاء زايده من تنظيف اللحم وكذا يحطونها في اللحم المفروم . هو مازال لحم وينوكل عادي بس للبرجر لأ !! خلوه لإستخدامات ثانيه.

في البقر ( أو أي حيوان عموما ) طعم وصفات كل منطقه يختلف تماما عن طعم المنطقه الثانيه ( فخذ الدجاج مقابل الصدر مثلا ). فيه قطع معينه مناسبه للبرجر أحسن من غيرها.


نرجع للرسمه هذي … القطع المناسبه للبرجر أو اللحم المفروم عموما هي : chuck , brisket , plate , top-sirloin , sirloin , round … باقي المناطق ما تنفع !! .. كل منطقه لها طعم غير وصعب أوصف طعم كل منطقه وميزتها عن الثانيه حاليا .


جربت كثير ومازلت أجرب لحم من مناطق مختلفه وبعد خلطات من مناطق مختلفه أحيانا ٣ أو ٤ مناطق مختلفه … بس إلى الآن مالقيت شي أفضل من خليط مصنوع من منطقتين اللي هي منطقة الرقبه chuck ومنطقة الصدر brisket بنسبه ١:١ يعني كل جرام من هذا جرام من ذاك تقريبا يعني موب شرط الدقه هنا. الرقبه طعمها محايد ومافيها نكهة بقر قويه وقوامها رهيب إذا أنفرمت وهي أكثر شي يستخدمون المطاعم يعني الطعم مألوف لكل الناس غير كذا فيها كمية شحم حلوه وهذا مهم عشان يقعد اللحم رطب. الصدر يعطيها الشي الناقص اللي هو النكهة ، غير إنها تعطيها تباين في القوام يطلع بشكل حلو بعدين.


إذا جيتوا تشترون اللحم دوروا على جزار يبيع بقر كامل و أطلبوا منه هذي القطع أو أفضل بعد لو تطبعون الصوره وتورونه وش يعطيكم بالضبط ! … لا تخلونه ينظفها من الشحم ! المفروض القطع ما يكون عليها شحم كثير من الجوانب بس يكون الشحم داخل في اللحم زي الصوره … هذي صورة للحم الصدر .


برجر

في البقر دايما نبي اللحم يكون أحمر فاقع ويكون اللحم ناشف قدر الإمكان إذا ضغطناه باليد يعني لو ضغطنا عليه بإصبع يرجع زي ماكان . لون الشحم مفروض يكون أبيض وهو أحسن شي ، لو كان الشحم يميل للصفار معناها إن اللحم من نوعية أقل ولو كان مايل للبني معناها إن اللحم بدأ يخرب . ريحة اللحم مفروض ما تكون ريحة كريهة و أكيد ما يكون عليها أي بقع عفن بيضاء أو خضراء. لو كان اللحم مغلف في كيس أو نايلون طبيعي يطلع فيه ريحة في البدايه هذا موب من علامات الخراب هنا هذا طبيعي كونه مغلف بس. الشي الأخير هو الجوده .. كل ماكان الشحم داخل في اللحم كل ماكان اللحم أغلى و أحسن . أقصد بداخل في اللحم إنه ما يكون عالأطراف بس يعني يكون الشحم زي ما أنتم شايفين في الصوره داخل العضل.
إذا جيتوا تحسبون الكميات أحسبوا تقريبا ٢٠٠ جرام لحم لكل شخص هذي مقياس ممتاز.



فرم اللحم :

 

الحين أخترنا اللحم باقي عاد كيف نفرمه صح . نصيحة أفرموه في البيت الفرق كبير ترى وتراني كنت أفرمه عند الجزار عشان كذا أقولكم الفرق كبير !!.. اللي يبي يعرف الفرق يشوف كيف راح نفرمه في البيت وكيف بيفرمونه في المحل ويشوف الفرق بعينه.


أول شي في فرم اللحم سواء لبرجر أو غيره أهم شي كل شي يكون بااااااارد ، كل ماكان بارد أحسن بيخلي الفرم سههههل مره . الشحم ما يحتاج حراره عاليه عشان يذوب من اللحم حراره يدك كافيه إنها تذوبه !! إذا ذاب الشحم ما يرجع لمكانه خلاص ! بالضبط زي الزبده إذا ذابت خلاص ما ترجع زي ماكانت . إذا ذاب الشحم بينتج برجر لاصق في بعض ونااااااااااشف. عشان كذا نبرد كل شي قبل نبدأ.


أول شي نسويه هو إننا نقطع اللحم مكعبات تكفي تدخل في الفتحة حقت الفرامه بعدين نحط اللحم في صحن. نحط الصحن اللي فيه اللحم في الفريزر مع صحن ثاني فاضي عشان نحط اللحم المفروم فيه وبعد نحط الراس حق الفرامه لو أمكن طبعا … نخلي كل شي في الفريزر إلين يبدأ اللحم يتجمد بس يمكن نص ساعة كذا.


الحين نركب الفرامه ( في حال كانت في الفريزر ) ونبدأ نفرم على أصغر قرص ونحط اللحم المفروم في الصحن البارد الثاني.


meat grinder

فرم اللحم


الحين بعد ما نفرم كل اللحم نرجع نفرمه مره ثانيه بنفس الطريقة بالضبط عشان نضمن أحسن لحم ممكن. وبس هذا فرم اللحم موضوع تافه ماياخذ أي وقت ، بالضبط بالضبط أخذ معي ٥ دقايق عشان أفرم كيلو ونص لحم. الحين هذا اللحم جاهز للبرجر ، يمديكم تخلونه في الثلاجه بعد ما تغطونه بنايلون حوالي ٤ أيام بدون ما يتغير.  لاحظوا هنا ما أستخدمت بصل أو ثوم أو أبقسماط أو خبز أو أي بهارات أو ملح مع فرم اللحم ! هذا اللحم حق البرجر الصح لحم لذيذ صافي ١٠٠٪ ..


أنا أستخدم الفرامة اللي تجي ملحق للعجانة. هل هي أحسن شي ؟ لأ طبعا فيه نوعيات كثير تفرم كميات أكبر و أسرع ، بس كوني ساكن لحالي ومطبخي صغير ما أحتاجها !. سواء الفرامه كانت كهرب أو يدويه أو ملحق لعجانة كلها بتعطي نفس النتيجة بالضبط . الفرامة موب مهمه المهم التفاصيل الثانيه.

 


طبخ اللحم :


الحين عندنا اللحم جاهز باقي بس نجهزة للطبخ بعدين نطبخه … أول شي نسويه هو إننا نشكل اللحم على شكل أقراص. ما أعتقد تحتاج العمليه شرح ، ناخذ كمية لحم بيدنا ونشكلها على شكل كوره تقريبا بعدين نضغطها شوي إلين تصير قرص سمكه تقريبا سانتي إلى سانتي ونص ، بعدين بإستخدام إبهامنا نضغط ضغطه خفيفه في وسط القرص يعني نسوي زي الحفرة. اللي قد طبخ برجر يعرف إن اللحم مع الطبخ بينتفخ في الوسط  فإحنا نخلي الوسط أنحف شوي وبكذا إذا نفش يصير كله نفس الإرتفاع. أهم شي في تشكيل البرجر إننا ما نتعامل معه كأنه عجينة يعني لا نمسك اللحم ونقعد نعجن فيه بقوه عشان نشكله ، هذا بيخلي اللحم ناشف.


الحين هنا وقت البهارات و الأعشاب للي يبي طبعا. شخصيا ملح وفلفل بس ! تكفي وزياده وصدقوني تكفي وزياده اللحم لذيذ ما يحتاج أي شي زياده و فيه نكهات كثير في الإضافات اللي بنحط. نرش ملح وفلفل على الوجهين بعدين نخليه يمكن ربع ساعة برا الثلاجه عشان اللحم يوصل حراره الغرفه وعشان البهارات تدخل في اللحم شوي.


الحين عشان تطبخون البرجر فيه طريقتين ، يا الشوي يا التشويح القلي و الفرن موب خيارات هنا. لا تحسبون واحد أحسن من الثاني ! هي مسألة أذواق لا أكثر كثير ناس يفضلون التشويح على الشوي، المهم هنا في الحالتين إننا نستخدم حراره عاليه عشان اللحم يتحمر من برا ويكون زي القشرة لذيذه وبعد عشان اللحم ينطبخ أسرع وبكذا يخسر مويه أقل وبكذا يصير رطب أكثر.


للتشويح أنا أفضل دايما أستخدم مقله حديد cast iron و أحطها على أعلى نار أقدر أوصلها .اللي عنده صاج مسطح يقدر يستخدمه هنا وراح يعطي نفس النتيجة . اللي ما عنده يستخدم مقله ستانلس راح تأدي نفس الغرض أو حتى مقله تيفال عاديه . لحد يستخدم شوايات كهرب أو صاج كهرب هذي ما توصل لحرارات عاليه ولا راح تشوح الأكل.


نسخن المقله أو الصاج على أعلى شي ونخليه يحتر زييين بعدين ندهن شوي زيت ( ما يكون زيت زيتون ) ونحط البرجر ونخليه بدون ما نحركه وبدون ما نضغطه أو نخرمه بشوكه أو غيره هذي كلها راح تطلع الرطوبه حقت اللحم اللي إحنا سوينا كل هذا عشان نحافظ عليها. نطبخ اللحم إلين نلاقي إن لون اللحم من الجوانب بدأ يقلب من أحمر لرمادي بعدين نقلبه ( إذا شكلتوا البرجر ٢٠٠ جرام و أستخدمتوا أعلى حراره راح تاخذ تقريبا دقيقتين ) . الحين نحط الجبن لو كنا نستخدم . نكمل طبخ البرجر إلين يوصل لدرجة الطبخ اللي إحنا نحب . شخصيا أحبه يكون ميديم موب أكثر من كذا . اللي يبي يعرف متى يستوي يلمس الوسط ويشوف كيف لين مقارنه بالأطراف . اللي يبغى يطبخه كامل ويل دون يطبخه، راح يقعد رطب لا تخافون . راح ياخذ معنا تقريبا ٥ – ٦ دقايق عشان يستوي كامل.


burgers

برجر

 

 

بعد ما يستوي نشيل اللحم ونحطه في صحن دقيقتين تقريبا عشان يرتاح. ترييح أي لحم مهم بعد الطبخ. إذا ما ريحتوا اللحم المويه بتنزل عالخبز وماراح يكون شي جيد.

بس هذي طريقة طبخ البرجر …. اللي بيشوي البرجر يسوي نفس الخطوات بالضبط نار عاليه ، يقلب البرجر بعد نص الوقت ، يحط الجبن لو فيه و بعدين يريحه آخر شي بس ..

 


تركيب البرجر :


الحين سوينا اللحم وخلصنا وباقي نحط كل شي عالخبز … شخصيا أحب أسوي الخبز في البيت لأني أشوفه يسوي فرق كبيييير عن حق السوبرماركت . هنا طريقة الخبز . نحمص الخبز شوي في الفرن ، بس شوي عشان يرجع حار ويكون شوي محمص من جوا بس  . الحين ندهن طبقتين الخبز بمايونيز أو زبده أو أي دهن .. هذا سر يستخدمونه المطاعم دايما عشان يمنع المويه اللي من الحشوه تدخل الخبز .. نحط الخس فوق الطبقه اللي تحت. هذا بعد راح يمنع المويه حقت اللحم تدخل الخبز وبعدين نحط اللحم فوق الخس . الحين نبدأ نحط الإضافات اللي نبي . في حال كان فيه إضافتين يتزحلقون مع بعض مثلا طماط صغير مع خس أو فطر مع طماط نحط بينهم شي أو نحط واحد تحت اللحم عشان ما تطيح الحشوه إذا شلنا البرجر.

 


الإضافات :


الإضافات حقت البرجر ماتخلص. الأجبان بأنواعها دايما إضافه حلوه تشدر ، مونتري جاك ، جودا ، موزاريلا ، جبنة سويسريه أو حتى جبنة زرقاء blue cheese كلها بتكون حلوه ، الجبن العادي الشرايح زي كرفت وغيره حلو مع البرجر كونه يذوب بسهولة بس ماراح يعطي نفس الطعم اللي الجبن الحقيقي يعطيه.


البيكن ، الفطر المشوح أو السوتيه أو حتى المشوي رهيب مع البرجر ، البصل المشوح ( زي ما سويت في الصوره ) أو حتى الني أو حلقات البصل لذيذه معه ، الطماط طبعا و الخس بأنواعه ، المخللات مقطعه أو كامله سواء مخلل خيار أو غيره زي مخللات الفلفل مثلا حلوه ، الفلفل الملون المشوي رهيب مع البرجر ، البيض المقلي بعد رهيب مع البرجر ، أي نوع خضار زي الكوسه أو القرع أو الباذنجان حلوه مع البرجر.


الصوصات خياراتها كثيره بعد .. المايونيز سواء ساده أو مع نكهة . شخصيا المايونيز هو خياري مع البرجر ودايما دايما أسويه في البيت إذا كنت بقدمه مع شي زي البرجر. الكتشب أكيد ، الخردل بعد ، الجواكمولي و الباربيكيو صوص رهيبيبن مع البرجر ، الصلصات المكسيكيه حقت الطماط بعد رهيبه معه ..


هذي موب كل الإضافات اللي ممكن تنحط مع البرجر أي شي يمشي ممكن ينحط هنا .. تذكروا أهم شي إنها زي ماقلت إضافه بس موب الأساس ! مافيه شي بيعوض ويحسن قطعه لحم تعبانه ! .


بس هذا تقريبا كل اللي تحتاجونه عشان تسوون برجر رهيب في البيت … أهم شي :

١ـ أشتروا لحم من نوعية جيده ومن المناطق اللي كتبت فوق وبنفس النسبة .

٢ ـ بردوا اللحم زييين بعدين أفرموه في البيت مرتين بدون أي إضافه ثانيه .

٣ ـ شكلوا اللحم على شكل قرص و أضغطوه في النص .

٤ـ تبلوا اللحم وطلعوه من الثلاجه قبل ربع ساعة تقريبا من الطبخ .

٥ـ أطبخوا اللحم على حراره عاليه سواء في شوايه أو شوحوه على صاج أو مقله إلين يوصل درجة الطبخ اللي تبون.

٦ـ خلوا اللحم يرتاح

٧ـ أستخدموا خبز ممتاز وحمصوه شوي .

٨ـ أدهنوا الخبز بدهن أو مايونيز بعدين حطوا فوقه المكونات .

٩ ـ لا تكثرون من الإضافات ! وتأكدوا إنكم تبنون البرجر صح .

 


home made burger

برجر منزلي مع خس ، طماط، جبن تشدر ، بصل مشوح ، مايونيز بالفلفل المشوي و مخلل خيار

 

 

هنا سويت البرجر مع خبز مسويه في البيت مع مايونيز بعد مسويه في البيت مطعم بفلفل هالبينو مدخن مع بصل مشوح ، جبن تشدر ، طماط و مخلل خيار وكتشب. و عالجنب بطاطس حلوه ( جزر يماني ) مقليه كتغيير عن البطاطس العادي.

 


home made burger


برجر

burgers


عن الكاتب

Top Chef

218 comments

Skip to comment form

  1. فهد

    اخوي شكرا على المجهود
    الصعوبة الاكبر هي توفر قطع اللحم مثل
    Chuck
    Brisket
    Serlion
    هل ممكن تدلني على طريقة معينه للحصول عليها
    جربت كل الاماكن مثل الدانوب والتميمي
    اما عدم توفرها او جهل الجزار

  2. غير معروف

    لو سمحت ابي طريقه صوص لبطاطس الي مع البرجر

  3. غير معروف

    السلام عليكم
    بصراعه شرح رائع وهذي نفس طريقتنا الي نسويها
    في محلنا برجر البيت القديم وانا اشهد انك ذوق
    في الاكل واتمنئ منكم تزورونا في محلنا الواقع
    في الشرقيه -الخبر حي العقربيه شارع 22 تقاطع عنيزه
    تلفون المحل 0138955808

  4. abdulhakeem

    السلام عليكم
    بصراحة مدونتك مكان ثري بالمعلومات
    وطريقة شرحك أكثر من رائعه
    أنا مقدم على فتح مطعم ولي أكثر من سنتين أشتغل على
    الفكره لكن أكبر عائق لي هو توفر اللحوم بالمنطقه إلي أنا فيها
    يعني ما فيه جزار تحصل عنده النوع إلي تبغاه فجربت مفروم أمريكانا المجمد
    بصراحه طعمه كويسه لكن في زخنه قويه فقررت أبتعد عنه وبعد بحثي وجدت
    لحم مجمد لكن بخيارات محدوده وهي راوند وستريب ليون وشانك
    وعلى حسب فهمي من المقال الذي أستطيع إستخدامه للبرقر هي منطقة الراوند
    فهل منطقة الرواند لوحدها قادره على إعطائي لحم برقر طري ولذيذ
    وبرأيك هل اللحوم المجمده كقطع أفضل كرائحه من اللحوم المفرومه المجمده
    وما هي أفضل طريقه لفرمها هل أفرمها وهي بحالتها المتجمده أم يفضل فرمها بعد تذويبها
    بالثلاجه

    أعرف إني ثقلت عليك بالأسئله
    لكن أعتقد إنك بإذن الله إنك راح تكون الدافع
    لي لتحقيق حلمي

  5. غير معروف

    بطله الطريقه واعجبت زوجي اللي ماكان يعجبه ايبرجر اسويه وخصوصاً اللي طلع بالرياض الفرسان فيها ريحة زنخه وحتى لو افرم اللحم بملحمه تطلع نفس الريحه مافيه زي البيت .
    شكراً لك بالتوفيق.

  6. مصعب

    مرحبا شيف

    الله يعطيك العافيه على الطريقه الواضحه والبسيطه جدا، مشكلتي فقط في ايجاد افضل محل يبيع اللحم البقري في الرياض :(

  7. Lolo

    عملتهاا .. كل اللي ذاقوها انهبلوا عليها و بعدها بكم يوم طلبو مني اعملها تاني … مااعرف كيف اشكررررك :”)

  8. عهد محمد

    السلام عليكم

    حضرتك ذكرت ان النوع ومكان التقطيع يفرق فالطعم. و عرفنا افضل ناطق لقطع اللحم بس ماعرفنا النوع؟. هل نستخدم لحم استرالي ولا محلي ولا شلون؟
    شكرا جزيلا

  9. Nice6

    السلام عليكم
    شيف ذكرت إنك مازلت تجرب تركيبات مختلفة من اللحم
    هل توصلت لتركيبة أفضل أو التركيبة المذكورة إلى الآن هي الأفضل
    مع جزيل الشكر مقدما ويعطيك العافية

    1. Top Chef

      وعليكم السلام ،،،،

      جربها وقلي وش رايك ….

  10. أم النووور

    السلام عليكم ورحمة الله و بركاته
    يعطيك ألف عافية شيف على هالمعلومات الاكثر من رائعة و شاكرين لك أخلاصك في نقل المعلومة و مراعاة جميع مستويات الفهم و ربي يجعل كل معلومة صدقة جارية لك و في ميزان حسناتك ليوم الدين يارب.

    عندي سؤال لوماعليك أمر:
    أنا أسوي كمية كبيرة من اللحم و احطها في الفريزر عشان أسويها باستمرار لزوجي و لولادي بس أحط على اللحم لما اخلطه روشيستر شاير و ملح وفلفل اسود فقط لاغي هل تنصحنيي لما اسوي كمية من اللحم المفروم واحطها في الفريزر ما أضيف عليها الا الملح و الفلف الاسود باخذ نفس النتيجة ولا لا؟

    والسؤال الثاني:
    هو اني أستخدم ألة لتشكيل البرغر بالضغط عليها هل هالجهاز يفقد البرجر قوامه ؟

    والسؤال الثالث و الأخير:
    أنا بحكم شغلي أسوي كمية من اللحم المفروم بعد ما احط البهارات الملح والفلفل الاسود و روشيستر شاير صور اخلطهم بأيدي لازم ولا كيف اخلطهم من غي ما اقلبهم مع العلم انك ذكرت لا نعجنهم كثير بس عشان تجانس النكهات لازم اخلطهم ياريت لو تفيدني بهذا الشي وشكر.

    اسفة على الاطالة

    1. Top Chef

      وعليكم السلام و الرحمة ….

      ممممم الصراحة وأنا ما أحب المجامله. بس فرم اللحم وتتبيله وتجميده موب الشي اللي بيعطي نتيجة جيده. ما أقول إن الشي اللي بيطلع موب لذيذ بس أقرب للكفته من البرجر.

      آلات التشكيل موب شي أستخدمه شخصيا ، حاليا نسوي كميات مهولة من البرجر في المطعم ومع هذا ما قد أحتجنا آلاة لها.

  11. غير معروف

    جزاك الله خير وماقصرت شرح كافي ووافي..
    طبقت الطريقة وعجبتهم عندي بالبيت لدرجة زوجي قال بنفتح محل

    1. Top Chef

      بالعاااافية وبالتوفيق في مشروعكم … مافي شي يمنع.

Page 3 of 3«123

View all comments

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: