ألذ خبز برجر في العالم !! .. Burger Buns

هلا والله ….

ليش تسوي خبز برجر في البيت ؟ السوبرماركت مليان ؟ كثير ناس بيقولون كذا .. بس أضمنلكم إذا ذقتوه بتغيرون كلامكم . السالفه صارت قبل سنة ونص تقريبا ، كانت مجرد تجربه وحب إستطلاع خل نجرب وش خسرانين . بس يوم ذقت اللي سويته ذاك الوقت ( وكان أقل من هذا بألف مره ) تغيرت نظرتي للموضوع كله عرفت وقتها إن الخبز موب بس شي نحط عليه اللحم ! .. الخبز يسوي كل الفرق في البرجر .

وش الصفات اللي نبغاها في الخبز هنا ؟ عشان البرجر نبغى شي لين ( وهو قطن موب بس لين هنا ) بس في نفس الوقت نبي شي يقدر يشيل نفسه ويمسك شكله إذا شلناه مانبيه ينفغص في أصابعنا بسهوله ( اللي جرب يسوي برجر بخبز توست يفهم وش أقصد ) ولا نبي شي يشرب مويه البرجر زي الإسفنجه ويصير شي رطب بعد ثواني ( بعد زي التوست ) . بعد مهم إن الخبز يكون له نكهة خاصه فيه ! نكهة خفيفه بس .. اللي بيجرب يسوي الخبز ويرجع لخبز السوبرماركت بيعرف الفرق في النكهة اللي أقصد ( طبعا هذا كله عشانهم ما يستخدمون زبده يستخدمون سمن نباتي أو شورتننج ) .الخبز هذا لييييين ورطب وبفتحات كبيره داخل وله نكهة زبده خفيفه وطعم حلو مثالي للبرجر.

الخبز مافيه أي شي صعب ، الطريقة جدا سهله ويمديكم تستخدمون نفس العجينة لخبز الهوتدوق بعد أو حتى تسوون فيها أي خبز ثاني لو تبون. كثير ناس يعتقدون المعجنات تعتمد بس على العجينة السحريه اللي لو ملكتها صرت فنان ولو ما عندك فأنت ما عندك سالفه !! هذا كلام سخيف و اللي يقوله ما عنده سالفه !!. العجينة مهما كانت جيده إذا ما عرفتوا تسوونها صح وتخبزونها صح وتشكلونها صح ما راح تنفعكم. خطأ سخيف زي إنكم تريحون الخبز أكثر من اللازم أو تخلونه في الفرن وقت أقل أو أطول ممكن يخرب أي عجينة. عشان كذا لحد يجي يقرأ المكونات ويسويها بطريقته بعدين يجي يقولي سويتها بس ما أعجبتني !! هذا الشي واجهته كثير وخصوصا في البيتزا وصراحة كان شوي مزعج !! كثير ناس نقلوا المقادير بس وسووها زي أي بيتزا يسوونها بالعاده يعني حطوا العجينة في صينية وحطوها في فرن وسط وجوني يقولون ما طلعت زي حقتك ؟؟؟ أو ناشفه أو ما تحمرت ! …

المكونات :

حبة بطاطس كبيره مقشرة ومقطعه مكعبات كبيره. بنهرسها في الأخير أهم شي إنها تعطينا ١/٢ كوب بطاطس مهروس في الأخير.

٦ ملاعق كبيره زبده دافيه موب ذايبه ! . تقريبا أصبع إلا شوييي

٢ ملعقة كبيره سكر

٢ ملعقة كبيره عسل أو اللي ماعنده يحط سكر عادي.

١/٢ ملعقة صغيره ملح

بيضه

١/٢ كوب حليب مسخن شوي بس مانبيه حار ولا بارد.

١/٤ كوب من مويه سلق البطاطس

كوبين ونص طحين

ملعقتين وربع صغار خميره

لمسح الوجه ( وجه الخبز موب الطباخ ) :

بيضه

ملعقة كبيره حليب

سمسم للتزيين

الطريقة :

أول شي نسلق البطاطس في قدر فيه مويه تغلي على غليه جدا خفيفه إلين تستوي البطاطس ، نعرف إن البطاطس إستوت بإننا ندخل فيها سكين ونشوف كيف تدخل إذا دخلت بسهوله يعني أستوت .

بعد ما تستوي ناخذ ربع كوب من مويه البطاطس . مويه البطاطس فيها سكريات و نشويات بسيطه تحبها الخميره وبتسرع شغلها بعدين .

الحين نصفي البطاطس بعدين نخليها تبرد شوي ، شوي بس لا تخلونها تبرد كثير عشان لا تصير زي الصمغ بعدين . الحين أهرسوا البطاطس أو أبشروها زين بعدين خلوها تبرد لحراره الغرفه .

الحين نخلط نص كوب من البطاطس المهروسه مع البيضه و الزبده الدافيه و السكر و العسل في صحن خلط كبير، بعدين نحط عليهم الحليب و مويه البطاطس ونخلط زياده . الحين نحط الطحين  و الخميره و الملح ونحركها مع الخليط إلين يكونلنا كوره رطبه وتلصق بس لينه . الحين نبدأ نعجن العجينة ، لو عندك عجانه أعجنوها بالخطاف تقريبا ٥ دقايق أو إلين تعطي عجينة لينه وناعمه وتلصق شوي بس . لو ماعندكم عجانه أعجنوها على طاوله المطبخ بس لا تستخدمون طحين كثير وقت العجن كونه بيخلي العجينة قاسيه بعدين . أعجنوها إلين ما يصير عندكم عجينة لينه وناعمه وتلصق شوي بس بتاخذ أكثر من ٥ دقايق باليد . لحد يتعذر بالعجانه !! العجانه ما تسوي خبز أحسن من خبز هي بس أريح ، لو عجنتوها صح باليد بتطلع نفس أو أحسن من اللي بالعجانه .

الحين نحط الخبز في صحن مدهون شوي زيت ونغطيه بفوطه رطبه شوي أو نايلون ونحطها في مكان دافي في المطبخ . ما يحتاج فرن ولا يحتاج في الشمس أي مكان دافي مافيه تيار هواء بينفش الخبز عادي . نخلي العجينة تتخمر إلين يتضاعف حجمها .

بعد ما تتضاعف العجينة نقلبها على طاوله المطبخ بعد ما نرشها بشوي طحين بس. لاحظوا قلت نقلبها ما نضرب العجينة إلين نطلع الهواء اللي فيها ، نبي الهواء هذا ليش نضربها ونطلعه ؟ الحين نرش وجه العجينة بشوي طحين ( عشان يسهل التقطيع بس ) بعدين نقسمها ٦ أقسام متساويه ( في الصور بتلاقون إني قسمتها ٧ أقسام بس هذا لأني قسمت الخبز بالوزن موب بالشكل).

نشكل كل قسم على شكل كوره بعدين نحطها في صينية فرن مغطيه بورق زبده ( أو سيلبات للي عنده ) ونخليهم بعيدين شوي عن بعض عشان ما يلصقون في بعض أو الجدران حقت الصينية. أسهل طريقة للتشكيل هي إنكم تاخذون العجينة وتلصقون الأطراف عالوسط بعدين تقلبونها وتلفونها إلين تكون كوره .

الحين نغطي الصينيه بمنشفه نظيفه خفيفه وناشفه ونخليها تتخمر من جديد إلين ما تتضاعف الكور إلا شوي تقريبا  ، راح تاخذ ٣٠ – ٤٠ دقيقه تقريبا .. هذي الخطوه هي اللي بتدخل كل الهواء في العجينة وتعطينا الفتحات الكبيره و القوام الهش حق العجينة . كثير بيقولون طيب مدام كذا أجل أكثر يعني أحسن ، أجل خل أحط العجينة كذا ساعتين عشان ندخل هواء أكثر ! بس هذا بيسوي العكس وبيطيح الخبز في الفرن بعدين. عشان كذا ألتزموا بالطريقة .

نشغل الفرن على ٣٧٥ من تحت بس !
بعد ما يجهز العجين نخلط البيضه مع الحليب في صحن صغير . الحين ندهن الخبز حقنا بالمسحه هذي عشان تعطيه لمعه وعشان تخلي السمسم يلصق بعدين . الخبز الحين بالضبط زي البلونه أي لمسه قويه بتطلع الهواء كله عشان كذا شوي شوي و أنتم تدهنون الخبز هنا . أدهنوا وجه الخبز و الجوانب كلها بس لا توصل المسحه للمنطقه بين الخبز و الصينيه كونها ممكن تجمد في الفرن وتكون زي الصمغ يمنع الخبز ينفش على فوق . الحين رشوا السمسم على الخبز .

دخلوا الصينيه الفرن في الرف الوسط بعدين خذوا ملعقتين كبار مويه تقريبا وكبوها داخل الفرن على الأرضيه حقته وعلطول قفلوا الباب. المويه هنا بتتحول بخار علطول وهذا بيخلي الفرن رطب وبكذا ينفش الخبز أكثر.

خلوا الخبز في الفرن حوالي ١٣ دقيقه أو إلين يصير ذهبي من كل مكان .

طلعوا الخبز وخلوه يبرد عالأقل نص ساعة على شبك تبريد قبل الإستخدام .. منيب أنكت هنا .. داري كل الناس تحب الخبز حار بس صدقوني خلوه يبرد قبل تاكلونه .