ألذ خبز برجر في العالم !! .. Burger Buns

هلا والله ….

ليش تسوي خبز برجر في البيت ؟ السوبرماركت مليان ؟ كثير ناس بيقولون كذا .. بس أضمنلكم إذا ذقتوه بتغيرون كلامكم . السالفه صارت قبل سنة ونص تقريبا ، كانت مجرد تجربه وحب إستطلاع خل نجرب وش خسرانين . بس يوم ذقت اللي سويته ذاك الوقت ( وكان أقل من هذا بألف مره ) تغيرت نظرتي للموضوع كله عرفت وقتها إن الخبز موب بس شي نحط عليه اللحم ! .. الخبز يسوي كل الفرق في البرجر .

وش الصفات اللي نبغاها في الخبز هنا ؟ عشان البرجر نبغى شي لين ( وهو قطن موب بس لين هنا ) بس في نفس الوقت نبي شي يقدر يشيل نفسه ويمسك شكله إذا شلناه مانبيه ينفغص في أصابعنا بسهوله ( اللي جرب يسوي برجر بخبز توست يفهم وش أقصد ) ولا نبي شي يشرب مويه البرجر زي الإسفنجه ويصير شي رطب بعد ثواني ( بعد زي التوست ) . بعد مهم إن الخبز يكون له نكهة خاصه فيه ! نكهة خفيفه بس .. اللي بيجرب يسوي الخبز ويرجع لخبز السوبرماركت بيعرف الفرق في النكهة اللي أقصد ( طبعا هذا كله عشانهم ما يستخدمون زبده يستخدمون سمن نباتي أو شورتننج ) .الخبز هذا لييييين ورطب وبفتحات كبيره داخل وله نكهة زبده خفيفه وطعم حلو مثالي للبرجر.

الخبز مافيه أي شي صعب ، الطريقة جدا سهله ويمديكم تستخدمون نفس العجينة لخبز الهوتدوق بعد أو حتى تسوون فيها أي خبز ثاني لو تبون. كثير ناس يعتقدون المعجنات تعتمد بس على العجينة السحريه اللي لو ملكتها صرت فنان ولو ما عندك فأنت ما عندك سالفه !! هذا كلام سخيف و اللي يقوله ما عنده سالفه !!. العجينة مهما كانت جيده إذا ما عرفتوا تسوونها صح وتخبزونها صح وتشكلونها صح ما راح تنفعكم. خطأ سخيف زي إنكم تريحون الخبز أكثر من اللازم أو تخلونه في الفرن وقت أقل أو أطول ممكن يخرب أي عجينة. عشان كذا لحد يجي يقرأ المكونات ويسويها بطريقته بعدين يجي يقولي سويتها بس ما أعجبتني !! هذا الشي واجهته كثير وخصوصا في البيتزا وصراحة كان شوي مزعج !! كثير ناس نقلوا المقادير بس وسووها زي أي بيتزا يسوونها بالعاده يعني حطوا العجينة في صينية وحطوها في فرن وسط وجوني يقولون ما طلعت زي حقتك ؟؟؟ أو ناشفه أو ما تحمرت ! …

المكونات :

حبة بطاطس كبيره مقشرة ومقطعه مكعبات كبيره. بنهرسها في الأخير أهم شي إنها تعطينا ١/٢ كوب بطاطس مهروس في الأخير.

٦ ملاعق كبيره زبده دافيه موب ذايبه ! . تقريبا أصبع إلا شوييي

٢ ملعقة كبيره سكر

٢ ملعقة كبيره عسل أو اللي ماعنده يحط سكر عادي.

١/٢ ملعقة صغيره ملح

بيضه

١/٢ كوب حليب مسخن شوي بس مانبيه حار ولا بارد.

١/٤ كوب من مويه سلق البطاطس

كوبين ونص طحين

ملعقتين وربع صغار خميره

لمسح الوجه ( وجه الخبز موب الطباخ ) :


بيضه

ملعقة كبيره حليب

سمسم للتزيين

الطريقة :

أول شي نسلق البطاطس في قدر فيه مويه تغلي على غليه جدا خفيفه إلين تستوي البطاطس ، نعرف إن البطاطس إستوت بإننا ندخل فيها سكين ونشوف كيف تدخل إذا دخلت بسهوله يعني أستوت .

بعد ما تستوي ناخذ ربع كوب من مويه البطاطس . مويه البطاطس فيها سكريات و نشويات بسيطه تحبها الخميره وبتسرع شغلها بعدين .

الحين نصفي البطاطس بعدين نخليها تبرد شوي ، شوي بس لا تخلونها تبرد كثير عشان لا تصير زي الصمغ بعدين . الحين أهرسوا البطاطس أو أبشروها زين بعدين خلوها تبرد لحراره الغرفه .

mashed potato

الحين نخلط نص كوب من البطاطس المهروسه مع البيضه و الزبده الدافيه و السكر و العسل في صحن خلط كبير، بعدين نحط عليهم الحليب و مويه البطاطس ونخلط زياده . الحين نحط الطحين  و الخميره و الملح ونحركها مع الخليط إلين يكونلنا كوره رطبه وتلصق بس لينه . الحين نبدأ نعجن العجينة ، لو عندك عجانه أعجنوها بالخطاف تقريبا ٥ دقايق أو إلين تعطي عجينة لينه وناعمه وتلصق شوي بس . لو ماعندكم عجانه أعجنوها على طاوله المطبخ بس لا تستخدمون طحين كثير وقت العجن كونه بيخلي العجينة قاسيه بعدين . أعجنوها إلين ما يصير عندكم عجينة لينه وناعمه وتلصق شوي بس بتاخذ أكثر من ٥ دقايق باليد . لحد يتعذر بالعجانه !! العجانه ما تسوي خبز أحسن من خبز هي بس أريح ، لو عجنتوها صح باليد بتطلع نفس أو أحسن من اللي بالعجانه .

burger bun

خبز برجر

الحين نحط الخبز في صحن مدهون شوي زيت ونغطيه بفوطه رطبه شوي أو نايلون ونحطها في مكان دافي في المطبخ . ما يحتاج فرن ولا يحتاج في الشمس أي مكان دافي مافيه تيار هواء بينفش الخبز عادي . نخلي العجينة تتخمر إلين يتضاعف حجمها .

بعد ما تتضاعف العجينة نقلبها على طاوله المطبخ بعد ما نرشها بشوي طحين بس. لاحظوا قلت نقلبها ما نضرب العجينة إلين نطلع الهواء اللي فيها ، نبي الهواء هذا ليش نضربها ونطلعه ؟ الحين نرش وجه العجينة بشوي طحين ( عشان يسهل التقطيع بس ) بعدين نقسمها ٦ أقسام متساويه ( في الصور بتلاقون إني قسمتها ٧ أقسام بس هذا لأني قسمت الخبز بالوزن موب بالشكل).

burger bun

نشكل كل قسم على شكل كوره بعدين نحطها في صينية فرن مغطيه بورق زبده ( أو سيلبات للي عنده ) ونخليهم بعيدين شوي عن بعض عشان ما يلصقون في بعض أو الجدران حقت الصينية. أسهل طريقة للتشكيل هي إنكم تاخذون العجينة وتلصقون الأطراف عالوسط بعدين تقلبونها وتلفونها إلين تكون كوره .

burger buns


الحين نغطي الصينيه بمنشفه نظيفه خفيفه وناشفه ونخليها تتخمر من جديد إلين ما تتضاعف الكور إلا شوي تقريبا  ، راح تاخذ ٣٠ – ٤٠ دقيقه تقريبا .. هذي الخطوه هي اللي بتدخل كل الهواء في العجينة وتعطينا الفتحات الكبيره و القوام الهش حق العجينة . كثير بيقولون طيب مدام كذا أجل أكثر يعني أحسن ، أجل خل أحط العجينة كذا ساعتين عشان ندخل هواء أكثر ! بس هذا بيسوي العكس وبيطيح الخبز في الفرن بعدين. عشان كذا ألتزموا بالطريقة .

نشغل الفرن على ٣٧٥ من تحت بس !
بعد ما يجهز العجين نخلط البيضه مع الحليب في صحن صغير . الحين ندهن الخبز حقنا بالمسحه هذي عشان تعطيه لمعه وعشان تخلي السمسم يلصق بعدين . الخبز الحين بالضبط زي البلونه أي لمسه قويه بتطلع الهواء كله عشان كذا شوي شوي و أنتم تدهنون الخبز هنا . أدهنوا وجه الخبز و الجوانب كلها بس لا توصل المسحه للمنطقه بين الخبز و الصينيه كونها ممكن تجمد في الفرن وتكون زي الصمغ يمنع الخبز ينفش على فوق . الحين رشوا السمسم على الخبز .

دخلوا الصينيه الفرن في الرف الوسط بعدين خذوا ملعقتين كبار مويه تقريبا وكبوها داخل الفرن على الأرضيه حقته وعلطول قفلوا الباب. المويه هنا بتتحول بخار علطول وهذا بيخلي الفرن رطب وبكذا ينفش الخبز أكثر.

خلوا الخبز في الفرن حوالي ١٣ دقيقه أو إلين يصير ذهبي من كل مكان .

طلعوا الخبز وخلوه يبرد عالأقل نص ساعة على شبك تبريد قبل الإستخدام .. منيب أنكت هنا .. داري كل الناس تحب الخبز حار بس صدقوني خلوه يبرد قبل تاكلونه .

خبز برجر

burger buns

خبز برجر


154 comments

7 pings

Skip to comment form

    • Anonymous on 10 August, 2012 at 4:41 pm
    • Reply

    طيب أنا لو بغيتها استخدم العجينه للكروسان رح اضطر اني افردها بعد التخميره الأولى هل بتخرب وبيطلع الهواء معي ؟

    1. العجينة للبرجر منزلها .. الكروسان له عجينة ثانيه مختلف تماااااااااما عن هذي مابينهم أي أي وجه شبه …

    • taimaa on 13 July, 2012 at 1:36 pm
    • Reply

    🙂 انا اللي غلطت في مكان السؤال
    انا فاتحة موضوع البرجر وفاتحة موضوع الخبز ( سؤالي يتعلق بالصور اللي في موضوع صنع البرجر)
    الموهم …
    انا سؤالي ,,, بعد ما استوى الخبز كيف قطعته وفصلته ل جزئين ( قبل ماتحشيه ) بالشكل المرتب ده ؟
    وكيف نحمر الجزئين اللي فصلتهم زي المطاعم ؟؟

    1. ؟؟ ما أعتقد إن الموضوع يبغاله أي تعقيد الصراحة ؟ خذي الخبزة وبسكين قصيها بالنص ؟

      حتى التحمير موب خطوة صعععبه … عندك كذا حل ، يا إنك بعد ما تشيلين اللحم تنزلين حراره المقله وتحطين الخبز عليها وبكذا بيتحمر الخبز أو إنك تحطين الخبز في الفرن ويكون الوجه المقطوع على فوق وتسخنين الفرن من فوق بس وتخلينه إلين يتحمر.

  1. يسلمووو شيف خالد على الوصفة المشهية خاطري اجربها ,,, بس نفسي أعرف كيف قصيت الخبز بالشكل المرتب ده ماشاء الله لا قوة الا بالله

    1. بالوزن ودايما بتطلع معك مرتبه وكلهم نفس الحجم

  2. ماشاء الله وانا اقراه ٣مراات تحمست و فعلا اليوم سويتها لذذذذذيذة بشكل لو اكل الخبز لوحده طِعِيييم
    تسسلم يا كبير 🙂

  3. وااااو تجنن

    بإذن الله بسويهااا

    • Anonymous on 20 May, 2012 at 4:00 pm
    • Reply

    مسااء الخيير
    يعطيك االعافية اول شي انا بدي اعرف فيه فرق بين الكبايه (الكوب ) اللي انت كاتبها وكاس الجبن احنا عندنا بنستخدم كاس جبن في الطبخات بتكون المقادير مزبوطه ؟؟ثانيا انت بتقول نخلط البطاطا والزبده الدافييه وو الخ اخلطهم بالخلاط ؟ ثالثا / بتقول نخلي العجينة الي يضاعف حجمها تقريبا كم بتاعد نص ساعه متلا ؟ رابعا / طيب كيف نقلبها على طاولة المطبخ من دون مانضربها يعنني علطول اخد العجينة واطلعها واحطها فوق الطاولة وهي ورة طيب انا بدي اكثر من 6 اقسام يعني متلا 20 كورة لان بدي تصير كتيره وصغيره اقسمها واكمل عاتي ؟ خامسا ورق الزبده هو الورق الابيض اللي بيلفوا فيه السندويشات ؟ سادسا / انت بتقول احط 2 ملعقه ميه عالفرن طيب انا باستخدم الفرن الكهرب يصير احط عليه ميه ؟ لان من تحت فيه الكهرب لانو صغير كيف اخاف يصير التماس ههه
    يعطيك العافيه وما بتواخزني بكترة اسئله لانو توي مبتدئه

    1. مساء النور …

      لا طبعا !! كاسات الجبن تختلف وعمرك لا تستخدمينها للقياس. أي وصفة تلاقين كلمة كوب يعني كوب معياري شي معترف فيه في كل مكان في العالم.

      الخلط بيدك أو الخلاط على راحتك الإثنين ينفعون.

      إلين يتضاعف حجمها … حاولي تتعلمين كذا ، أنسي الأوقات في الطبخ.

      بالضبط أقلبيها علطول بدون تضربينها وبعدين قسميها على راحتك.

      فيه ورق زبدة وفيه ورق شمع ! ورق الزبدة يسمونه أحيانا ورق بارتشمنت ويسمونه أحيانا ورق فرن بس ورق الشمع هذا شي ثاني وما ينفع هنا.

      هههه لا عادي حطي مويه الجزأ اللي طالع في الفرن هذا السخانات حقت الكهرب بس كل الدوائر والكهربائية و الأسلاك فوق أو تحت بعيدة عن داخل الفرن.

    • Anonymous on 8 May, 2012 at 6:26 pm
    • Reply

    السلام عليكم شيف
    ماشاء الله الخبز طلع واااااااااااااااااااااااااو جمييييييييييييييل جدا والطعم حكايه وفعلا يتاكل لوحده من غير حاجه بجد تسلم ايدك وجزاك الله خيرا
    بس انا على فكره زودت الدقيق عشان العجينه تلم معايا وتبقا كوره لينه تلتصق زودت حوالى كوب دقيق هل دا عشان نوعيه الدقيق تختلف هو دقيق عادى جميع الاستخدامات ؟؟؟

    1. وعليكم السلام و الرحمة …

      كوب طحين كثيييييير و أكيد خلا الخبز قاسي شوي. عارف إن الخبز يمكن شوي صعب في التعامل معه بس لازم تعودين نفسك على التعامل مع عجاين لينه زي كذا. مع الوقت تتعلمين.

        • Anonymous on 8 May, 2012 at 8:57 pm
        • Reply

        لا خااااااااااااااالص مش قاسي بالعكس طري وجميل والعجينة كانت لينه وبتلزق شوى
        بس انا فعلا لو مكنتش حطيت دقيق تانى كان استحاله اعرف اتعامل معاه دى كانت العجينة الى حد كبير سايله وماتكونتش كوره وكانت لازقه في الصحن فكان استحاله اتعامل معاها ابدا دى فكرتنى بعجينة الزلابيه اللى بناخدها بالمعلقه ونقليها فى الزيت

          • Top Chef on 8 May, 2012 at 9:01 pm
            Author

          هههههه اجل يمكن نسيتي في عد الاكواب. تصير انك تشكين انتي في الكوب الثاني ولا الثالث

          • Anonymous on 19 May, 2012 at 9:44 pm

          انا عملت الخبز تاني والتزمت بكميه الدقيق وبكل حاجه بس هيا العجينة كانت بتلزق فى الطبق ولينه قوووى المهم قلت ولايهمنى هكمل برده ههههههههههههههه المهم خبزتها وطلت فعلا هشه هشه اكتر من اللى عملتها قبل كدا بس المشكله بقا انها بعد ما بشكلها واخمرها بتفرد اكتر من الجناب لكن من فوق شويه بسيطه غير اللي عملتها قبل كدا ولما خبزتها برده فردت اكتر من الجنب ومن فوق شويه بسيطه بمعنى اصح هيا شكلها اشبه بالقرص او الكحك مش طالعه لفوق يعني زى خبز البرجر ههههههههههههههه اعمل ايه بقا انا عاوزاها تبقا بالشكل اللي عملته قبل كدا وبهشاشيه المره دي ههههههههههههههههههههههههه

          • Top Chef on 20 May, 2012 at 2:31 am
            Author

          في أي وصفة خبز أمشي عالكميات بعدين عدليها إلين تصير زي الوصف المكتوب. الطحين أنواع وكيف يشرب المويه بيختلف من مكان لمكان ومن وقت لوقت فعشان كذا كمية الطحين في كل وصفة عمرها ما تكون مضبوطة ١٠٠٪. أنا كاتب في الموضوع أخلطي إلين تعطيك عجينة لينه وتلصق وبعد العجن مفروض تصير لينه وتلصق بس بشكل جدا خفيف. زيدي طحين عالعجينة (تقريبا كم ملعقة مو كوب زي ما سويتي أول) إلين تصير زي ما أنا كاتب في الوصف.

  4. مرحبا شيف ،

    تسلم يدك ، ويعطيك ألف عافية يارب ..

    الخبز رآئع جدا ، والطعم ولا أحلى

    مع إن العجينة شوي تعبتني لأني عجنتها بيدي ، بس النتيجة حلوة

    ،،

    حبيت أسألك ، إذا حبيت أسوي العجينة واستبدل جزء من الطحين الأبيض بالطحين الأسمر أو النخالة ، ممكن يضبط الخبز ؟

    ،،

    صورة لتطبيقي المتواضع 🙂

    http://dc407.4shared.com/img/4YptlO3U/s7/0.3141248479062768/_online.jpg

    1. هلا والله.

      ممكن يضبط بس اشوفه يلغي الهدف الأساسي من مثل هذا الخبز وهو إننا نبي الين خبز نقدر نسويه عمرك عمرك ما تقدرين تسوين خبز نخالة بليونة الأبيض.

      إذا بتبدلين اي خبز بطحين اسمر بدلي نص الطحين بس واستخدمي ٣/٤ كوب اسمر لكل كوب ابيض.

      الخبز اللي سويتي من الصوره مبين جيد بس المرات الجايه بعد نص الوقت لفي الصينية عشان يتحمر الخبز بالتساوي من جميع النواحي يمكن فرنك فيه مشكلة توزيع حرارة شوي.

    • ريم on 7 April, 2012 at 7:47 pm
    • Reply

    تسلمين تستاهل التجربه الله يعطيك العافيه

    1. الله يسلمك بس تراني ولد

  5. يعطيك العافية على شرحك الواضح والمفيد .. أحب مواضيع الطبخ اللي فيها تفاصيل وسواليف : )
    كثييير استفدت من معلوماتك وملاحظاتك .. اللي حولي لاحظوا تحسن في طبخاتي .. والفضل بعد الله لمدونتك .
    طبقت الخبز وأعجب أهلي كثير .. وطلع زي ما وصفته أنت .. لين ولذيذ .. بس الملاحظة الوحيدة عليه إن طعمه حالي .. المره الجايه إن شاء الله بقلل السكر وأزيد الملح : )

    1. مشكورة على كلامك ….

      أنا مدري أستخدميه مع وشو بالضبط بس حطي في بالك إن تقليل السكر وزيادة الملح لها تأثير أكبر بكثييييير من إنه يخلي هذا الخبز أقل حلاوة وأكثر ملوحة.

      السكر يلين الخبز. السكر أبدا أبدا موب بس عشان الطعم. تقليل السكر راح يخلي الخبز أقسى و أنشف وراح يخليه ينشف بعد أسرع.

      الملح يقسي الجلوتن وهذا يخلي الخبز قاسي وغير كذا هو يبطأ عمل الخميرة كثيييير فكل التواقيت راح تتغير شوي.

      خبز البرجر حلاته إذا كان فيه نكهة زبدة وعلى حلاوة شوي مع اللحم و الدهن بتمشي الأمور تمام هههههه بس لو خلطتي الخبز مع شي ثاني يمكن الحلاوه تكون شوي أكثر من اللازم عليك.

      لو بتقللين السكر قللي بس إحسبي حساب إنه ماراح يصير بنفس الليونه بالضبط ولا تزيدين الملح أبدا لا في هذي الوصفه ولا أي وصفة ثانيه هي كمية محسوبة بالضبط.

  6. يعطيييك ألف عاافيه

    اليوم جرربت وعملت الخبز وطلع رهيييب >> كل يوم مجربة لك شئ 🙂
    هذاا خبزي الأنيق 🙂

    http://img04.arabsh.com/uploads/image/2012/02/21/0a37444266f0.png

    بس ليه الخبزة تشققت شوي 🙁 ؟!

    1. الخبز بيتشقق إذا كان الفرن حار أكثر من اللازم أو إذا ما شكلتيه صح ، لازم في التشكيل و أنتي تكورين الخبز تكون القشره حقت الكوره مشدودة مره لو كان فيها نقاط ضعيفة بتسوي هذي التشققات.

    • أم يوسف on 12 February, 2012 at 7:28 am
    • Reply

    يعطيك العافيه اخوي

    استفساري عن الفرن

    انا الفرن اللي عندي يفتح تحت بس من دون ماعرف الدرجه ويفتح فوق بدون ماعرف الدرجة

    والدرجات اللي عندي لين 250 ( فوق وتحت )

    كيف أضبط فرني عشان الوصفه ؟؟؟

    وشلون تحمرت وياك بدون لا تفتح الفرن من فوق ؟

    1. هلا والله …

      ولو إني مافهمت بالضبط وش تقصدن بدون ما تضبطين الدرجة بس إذا الدرجات عندك ل ٢٥٠ يعني عندك درجات. الفرن اللي عندك بالمئوي ٣٧٥ فهرنهايت تساوي بالمئوي ١٩٠ يعني حطي فرنك على ١٩٠ . لو فرنك من الأفران اللي فيها مروحة طبيعي يشتغل من فوق ومن تحت المروحة بتسوي باقي الشغل.

      في الأفران الحراره تحطي بالأكل ما تكون موجهة عليه، المفروض الأكل يتحمر بدون الحاجة إننا نوجه الحراره عليه مباشره زي ماكثير ناس يعتقدون.

  7. سؤال اذا ممكن

    الحين البطاطس ماتخلي الخبز ثقيل مدري احس كذا لاني بكره بسويه ان شاءالله

    1. البطاطس تعطي الخبز نشا إضافي وألياف تمسك المويه وبدون ما تعطيه جلوتن زي ما الطحين يسوي عشان كذا هي تلين الخبز وتطلعه أرطب موب العكس.

    • Nosa on 29 January, 2012 at 11:32 am
    • Reply

    لوسمحت خاصيه البحث وينها بالمدونه وشكرا ع الوصفات الاكثر من رائعه

    1. بتلاقين مربع فوق عاليسار بس هي ترى بس تبحث في المواضيع ما تدور في الردود للأسف.

  8. اممم تقول تفرق عن التوست
    طيب ممكن وصفة التوست
    انا جربت في موضوعك الخبز اصلح منه توست ما حسيته هش و ليين مثل تبع المراعي

    طيب وش وظيفة محسن الخبيز الي اشوفه مكتوب على خبز المخابز الاوتوماتيكيه ؟

    1. خبز التوست حق المخابز هذا شبه خبز هو شي يتخمر في دقايق بخمائر خاصه وإضافات إلى الليل و مصنوع بأجهزه خاصه بحيث طبخه من الصفر للنهايه ما ياخذ أكثر من ساعة تقريبا. لو لاحظتي بتلاقينه لين بدرجة جدا كبيره وفي نفس الوقت يعيش وقت جدا طويل وهذا موب تصرف خبز عادي.

      دايما ألاحظ الناس يهمهم شي واحد في المعجنات وهو الليونه كل ماكان ألين كل ماكان أحسن بس هذا مبدأ غبي الصراحة ، فيه أشياء ثانيه كثير مثل النكهة و القوام العام هي اللي تميز خبز عن خبز كون خبز ألين ما يعني إنه أحسن دايما. خبز التوست حق السوبرماركت مافيه أي أي أي نكهة خبز.

  9. كنت حابه اعرف اقدر استخدم هالعجينة حق كل شي مثل الفظائر والبتزا ومعجنات الاخري

    1. هي عجينة أكيد أستخدميها في أي شي بس مدري عن النتيجة تعجبك أو لأ ؟

    • الاوتار on 16 December, 2011 at 6:51 am
    • Reply

    مشكور على الوصفة مع اني اشوفها هنا سهلة لاكن اذا سويتها انواع المشاكل يبغالها اكثر من مره الله يعين

    • نور on 2 December, 2011 at 4:26 pm
    • Reply

    السلام شيف
    انا سويت الخبز و ضبط 100%
    بس ودي اعرف شلون اذا بسويه اصغر حق الميني بيرجر
    لان طالبين مني ميني بيرجر الاسبوع الياي و ما ودي اقدكه مع خبز الجمعيه
    جم دقيقه اخليه ينفش ؟
    و هل تتغير حراره الفرن و الوقت اللي بحطه بالفرن ؟

    1. وعليكم السلام ..

      زي ما كتبت في الموضوع إلين ما تتضاعف إلا شوي الوقت اللي كتبت مجرد تقريبي لا تمشين عليه أبدا دايما أمشي على الدلائل موب الوقت.

      حرارة الفرن ثابتة بس طبعا الوقت بيتغير وبعد زي هنا أطبخيه إلين يستوي موب إلين يخلص الوقت.

    • هبة on 29 November, 2011 at 9:04 am
    • Reply

    معليش شيف بس سؤال ينفع ادهن الصينية بالزبدة بدلا من الورق لعدم توفره عندي ؟؟

    1. إذا ما عندك ورق رشي الصينية بشوي سميد بعدين حطي العجين عليه لا تدهنين زبده بينحرق الخبز من تحت.

  10. هلا اخوي ،،

    دورت لموضوع السباغيتي وتعبت وانا ادور <~ تسذوب

    لا جد دورت شوي بس ،،

    ممكن رابطه لو سمحت ،،

    الصوص امممم لاهو قريب من الباشاميل طبعا بالمكونات ،، مدري ،، واذا ممكن طريقه ثانيه لطبخ السلمون غير اللي ذكرتها ،، قبل كذا بالسي فود ؟

    1. هلا والله ..

      لو كتبتي سباجيتي كان طلعلك أول واحد في البحث.

      http://topchefcooks.com/2011/03/08/spaghetti-aglio-olio/

      دوري في المدونة بتلاقين وصفات أو أفكار كثير للسالمون.

  11. انا من متابعينك من زمان .. ومادريت انك فتحت لك مدونه الا بالصدفه قسم بالله ومن قوقل بعد ..
    تصدق قبل فتره تمنيت لو احصل طريقه لصوص ابيض مالح يجي فوق سمك السلمون <~ امممم بايكيا ذقته وعجبني ،،
    فتمنيت وقتها لو كنت باقي بالمنتدى كان سالتك … وقسم بالله من بكرا بالصدفه الاقي مدونتك ،، ماتتخيل فرحتي والله ،،

    طبعا انا جربت لك اشياء كثير وحبيتها وكانت مميزه ماشاء الله .. ربي يسعدك .

    1. هلا والله …

      الله المستعااااان يالمدونه لها الحين أكثر من سنة .. أصلا كل المنتديات اللي كنت مشارك فيها إلا شمواه موجود العنوان في التوقيع.

      بالنسبة للسالمون والله فيه موب واحد ولا إثنين ولا حتى عشر صوصات بيضاء ممكن تنحط فوق السالمون فيه كثيييييير صعب أعرف أي واحد تقصدين. شوفي موضوع السباجيتي أليو أوليو فيه صوره سالمون مع صوص أبيض يمكن يكون هو اللي تقصدين

    • الجواهر on 11 October, 2011 at 10:06 pm
    • Reply

    مساء الخير/

    المعذرة ع الازعاج، صنعت الخبز كثير، آخر مرتين فقدت القدرة على التحكم في الشكل، مع إن الطعم لا يزال رائع..
    ياريت تعالج لنا هالمشكلة..

    1. مسا النور …

      مافهمت المطلوب الصراحة ؟ وشلون فقدتي القدرة على التحكم في الشكل ؟

      عموما كونك سويتيه كم مره وكان مضبوط أعتقد مافيه شي يمنعه يضبط المرات اللي بعدها.

    • الجواهر on 30 August, 2011 at 7:07 pm
    • Reply

    عيدك مبارك و كل عام وأنت بألف خير..

    حقيقة قلما اعترف بالشيء اللذي يعجبني عن سواه، ولكن مدونتك هذه أعجوبة سهلة و خفيفة..

    لدي مطعم صغير، و جربت وصفتك هذه وتذوقتها العائلة وكان هناك فرق شاسع بينها وبين تلك اللتي تصلني من المخبز..

    سؤالي ياعزيزي، هل يمكنني الاحتفاظ بها لاستخدامها في المطعم؟ لمدة 9 ساعات مثلاً؟

    أفكر في إضافة البارميزان لها و نكهة ما كالبابريكا فما رأيك؟

    1. و أنتي بخير وعيدك مبارك …

      مشكورة على كلامك و إن شاء الله القادم أحلى …

      تقدرين تحفظين الخبز يوم أو أكثر على حرارة الغرفة بس بتحتاجين تسخنينه قبل الأكل عشان يرجع يلين من جديد.

      طبعا تقدرين تضيفين بارمزان أو أي شي ثاني فوق أو مع العجينة ، شخصيا كونه خبز برجر أحبه زي ماهو بس أكيد تقدرين تحطين اللي تبين دايما

    • نور on 14 August, 2011 at 1:34 am
    • Reply

    هلا شيف انت كاتب بالمقادير 2 ملعقه سكر و 2 ملعقه عسل
    فاذا ما عندي عسل احط 4 ملاعق سكر ؟
    و يعطيك العافيه
    بانتظار جديدك

    1. بالضبط

  12. حلوووووووووه زيك حلوه وتراي بنوته

    • نجمة on 20 May, 2011 at 11:15 am
    • Reply

    ماشاء الله طبخاتك كلها روعة وتشرح من قلب الله يجعله بميزان حسناتك

    بسألك انا فرني بأستراليا ما اقدر اشغله من تحت وبس

    فيه من فوق فيه من فوق مع مروحة و فيه الفرن كله يعني من فوق وتحت اسوي فيه الفطاير عادة

    اخليها من فوق و تحت .. بس تتحمر بسرعة من فوق ووتتحمر خفيف من تحت ..

    تتوقع ينفع او لا ؟؟

    1. هلا والله …

      الأفران اللي تجي بمروحة هذي هي الأفران الجديدة حاليا وهي أحسن شي . هذي الأفران تستخدم مروحة عشان توزع الحرارة حولين الأكل وبكذا الأكل يطبخ أسرع و بشكل متساوي أكثر. إذا جيتي تسوين أي وصفة شغليه من تحت ومن فوق مع المروحة بس حطي في بالك إن الأكل بيستوي أسرع يعني لا تمشين على وقت الوصفة أبدا .

    • ام اقوبي on 8 May, 2011 at 11:58 am
    • Reply

    شي راااائع تبارك الرحمن …

    اذا ابي اشتري عجانه شنو افضل ماركه تنصحني فيها ؟

    1. عن تجربة كيتشن إيد وكينوود .. أقولك خذي الكيتش إيد ..

  13. مااشااء مرره يشهي ..
    الله يعافيك نبي طريقه التوست ..

    • عبلة كامل on 26 April, 2011 at 2:09 pm
    • Reply

    الله يجزاك كل خير .. بصراحة صور مشهيييييييييييييية

  14. السلام عليكم
    يعطيك العافيه .. هالوصفات احبها اي شي فيه تعجين وتخبيص احب اطبقه

    انا جربت قبل مره وصفه صمون او ما يسمونها بدينر رول وكانت من مكوناتها بطاط مجفف اللي يجي بالعلبه وكانت طريه ولذيذه بشكل مو طبيعي فلما شفتها بوصفتك تشجعت اني اطبقها
    والنتيجه روعه
    يعطيك العافيه
    وان شاء الله انزل الوصفه ببلوقي قريب

    1. الله يعافيك …

      بالعافية على قلبك .

      1. الله يعافيك يا رب

        انا نزلتها ببلوقي مثل ما وعدت وادري تاخرت
        تسلم ايدك مره ثانيه :>

        ملاحظه : بالغلط تركت تعليق بيوزر بلوقي الثاني meondiet
        واعتذر عن هالخطا

          • Top Chef on 16 May, 2011 at 9:07 am
            Author

          خذي راحتك ما أنتبهت والله إن البلوجين لك ما شاء الله ..

          بالتوفيق

    • njoodh on 25 April, 2011 at 9:44 am
    • Reply

    يسلمك يارب
    سويته الجمعه واتقنته اكثر المره الاولى حسيته لين شوي , المره الثانية سويته حجم صغير حيل ..
    جدا لذيذ روعه حتى لو ماحشيتة .. الله يعطيك الف عافيه

    http://29.media.tumblr.com/tumblr_lk7ncnOtDJ1qcaakuo1_500.jpg

    1. تصغير العجين أو تكبيره يحتاج تعديل شوي .. كل شي بيصير أسرع إذا صغرتي حجم العجين يعني وقت التخميرة الثانيه لو حطيتيه نفس الوقت اللي بالحجم الأصلي ممكن تنفش أكثر من اللازم وتطيح عليك في الفرن وهذا بيعطي خبز أقل ليونه . حرارة الفرن ووقت الخبز بعد مفروض تتغير إذا سويتي أي شي بحجم أصغر .

    • njoodh on 16 April, 2011 at 5:06 pm
    • Reply

    مرحبا خالد , امس كان اروع برقر , مع انوه استعجلت علية بالفرن ولاحمرتة كفاية من تحت بس روعة روعة
    الله يعطيك الف عافية
    http://www.flickr.com/photos/46459754@N08/5623160502/in/photostream

    1. بالعافية على قلبك … ما أشوف فيه مشكلة ؟ بالعكس طالع حلو ؟

    • Anonymous on 30 March, 2011 at 6:05 pm
    • Reply

    لونها وشكلها رووعه تبارك الله

    اخوي بسألك السيلكون اللي يتحط تحت الفطاير اش اسمها بالضبط؟؟
    وانا شفت اكثر من شكل في امازون واحترت فيهم فيه الغالي وفيه الرخيص مدري هل السعر يحدد جودة المنتج؟؟؟واللا اشوف انسبها سعر؟؟؟وفيه لون اسود بدال الخط الاحمر عندك هل هذا يفرق؟؟
    وسؤال اااخر عن هالسجاده…هل تنضيفها صعب؟؟؟

    1. السيليكون إسمه سلبات silpat ،، أي محل كيك قوليله أبي سجادة سيليكون وبيعطيك إياها ما يحتاج تطلبينها من أمازون لو ما تبين .

      الأنواع ما تختلف في الجودة بس تفرق في الحجم . الماركة الأصلية إسمه silpat وأعتقد هي أغلى شي بس أنتشرت الحين بكثرة وصار فيه أنواع أرخص دوري أرخص شي ماعليك من الجودة ما تفرق .

      السجادة فايدتها إنه ما يلصق عليها شي .. أصلا الهدف من إستخدامها إن تنظيفها جدا سهل .

    • huda on 8 March, 2011 at 6:53 am
    • Reply

    روووعة انشااء اللة اجربها قريب

    • zo0ozah on 2 March, 2011 at 6:30 pm
    • Reply

    واووووووو حبيته بجد جاري التجربه وتصوير النتيجه يسلموو شيف واسمح لي ان اكون من متابعينك*_^

    1. هلا والله …

      مشكورة .. وحياك الله معنا دايما ..

    • Anonymous on 19 February, 2011 at 5:28 am
    • Reply

    الفرن قلت اني حطيته 370 وانا حسيت انه حار مثلا اذا سويت فطاير احطة على 180 تقريبا وتاخذ راحتها ما تحترق ابد من فوق وتحت وماشي الحال

    الفتحات قلت لك مدري ليش كذا بس على فكرة هذه المرة ارحم من المرة الماضية مافي فتحات تذكر ابد

    مع اني خليتها لين تضاعفت وبعدين قسمتها وخليتها ترتاح بعد فترة لين تضاعفت بعدين حطيتها في فرن حامي ورشيت قاع الفرن بعد <<<شفت كيف دقيقة هههه

    اللون هذا عاد سري الخاص كل شيف لازم يكون له لمستة الخاصة ولا ؟؟ ^_*

    لا امزح ما اقدر ما اعلمك ماخليت شي ماعلمتي اياه هذا بسبب العسل مو قلت لك لو لاحظت كلامي قلت ان اللون اسمر بزيادة بسبب العسل ومعطي نكهة للخبز ترى بعد ما تدري وش هذه النكهة بس حلوة طالعة

    1. أهاا … والله مدري بس غريبه .. اللون قلتي أصفر أول . هذا وين و الأصفر وين شوفي هذا الأصفر اللي أقصد :
      http://painbrioche.com/wp-content/uploads/2010/08/What-is-brioche.jpg

      طبعا موب شرط يطلع نفس اللون بالضبط ( حسب لون صفار البيض و الزبده ) بس كذا بيكون على صفار موب بني زي ما طلع معك ؟ أنا والله توقعت إنك أستخدمتي طحين أسمر ؟

        • Anonymous on 19 February, 2011 at 6:38 am
        • Reply

        وين الاسمر و ين هذا اللون اسوي لك عجينة بدقيق اسمر تعرف انه غير تمام عن هذا

        هذا اللون سلمك الله طالع مثل حليب بشاهي هههه

          • Top Chef on 19 February, 2011 at 6:34 pm
            Author

          والله مدري يمكن في الواقع غير بس اللي أشوفه لونه شوي غريب طالع مدري

    • Anonymous on 18 February, 2011 at 7:27 pm
    • Reply

    بقول لك شي وانت قول السبب اوك

    هالحين العجينة سويتها من الساعه 12 وما تخمرت وصارت الضعف الا بعد 2ونص تقريبا

    في غلط مع اني في حياتي ما عجنت وطولت بالشكل هذا . الخميرة جديده وتاريخها زين وحافظتها في الفريزر يعني مو منها المقادير بالملي تمام مرة .

    بخصوص الفرن اشغلة قبل اتخميرة الاخيرة ولا وقت دخول الخبز للفرن بس؟؟؟

    1. عادي تصير .. حتى لو سويتي عجينتين في نفس الوقت بنفس المقادير بالجرام ما تقدرين تحسبين بالضبط متى بتنفش أهم شي ما تستعجلين عليها عطيها وقتها إلين تتضاعف .

      الخميرة كائن حي .. فيه أشياء كثير تأثر على الخميرة وسرعة شغلها أكثرها هي الحرارة و الرطوبة .

      الحرارة : يمكن واحد من أكثر الأشياء اللي تأثر عليها ، الخميرة تقل سرعتها في الأماكن البارده و تسرع مع الحرارة .. بس لو زادت الحراره عن حد معين تموت .

      الرطوبة : كمية الرطوبه اللي في الخبز و الجو كل مازادت كل ما نفشت أسرع و العكس .

      السكر : الخميرة تتغذى على السكر اللي في العجين ،وبعد على النشا اللي يتحول سكر بعدين ، حسب نوع الطحين وكمية السكر في العجينة هذي العملية تبطأ أو تسرع .. شي ثاني لازم تعرفينه السكر يسرع شغل الخميرة لحد معين بعدين يبدأ يبطأها إذا زاد عن حده .

      البيئة : بيئة العجينة بعد تفرق كثير .. يعني درجة الحموضة و نسبة الكحول و كذا هذي كلها تفرق معها …

      ………………………….

      اللي أتوقعه في الغالب هو الحرارة هنا .. يمكن العجينه كانت باردة شوي أو المطبخ كان بارد شوي بس …ولا تنسين كمية الزبده و السكر هنا تأخر التخمر موب العكس .

      الفرن في أي خبز في العالم .. أي أي أي خبز أو كيك بعد .. كل ما سخنتيه قبل كل ماكان أحسن .. سخنيه عالأقل ربع ساعة قبل تحطين أي شي فيه .

    • Anonymous on 18 February, 2011 at 3:23 pm
    • Reply

    سلام شيف

    تذكر قلت لك ان الخبز طلع لونة اصفر بزيادة !!!

    هالحين عرفت ليش لان العسل غامق حبتين ^_^

    اليوم رجعت عجنتها ثاني قلت بشوف هالمرة وش يصير لانها قبل كانت لابده شوي بس انت تقول في الفرن 13 دقيقة!!!!!!!!

    اخذت مني اكثر من كذا بكثير وفي مشكلة ثانية انها تتحمر بسرعة مرة من تحت وفوق لا يعني يحترق من تحت ويا دوووووب يقلب لون الوجة ها يالله

    1. وعليكم السلام ….

      الخبز يطلع أصفري طبيعي ما أشوف فيها مشكلة ؟؟ لو قد ذقتي بريوش أو حتى السينامون رول يكون في الغالب أصفر من جوا ؟

      “خلوا الخبز في الفرن حوالي ١٣ دقيقه أو إلين يصير ذهبي من كل مكان .” هذا كلامي بالضبط .. ماقلت ١٣ دقيقه !!!!!!!!!

      كيف تعرفين الخبز أستوى ؟ هذا موضوع كبير .. بس عموما الوقت موب مقياس دقيق المفروض تتعلمين تحكمين بالشكل و الصوت و اللون . حرارة الفرن الفعلية موب دايما زي ما تبين .. يعني كثير أفران تحطينها على حرارة وتعطيك حرارة غير ، غير غير بعد .. أغلب الأفران لها دورة يعني تشتغل وتوصل الحراره المطلوبه بعدين تطفى إلين توصل حراره معينة بعدين تشتغل من جديد وكذا … لو مهمته بالدقة أفضل حل تستخدمين ميزان حرارة مخصص للأفران ينحط داخل الفرن ويعطيك حرارة الفرن الفعلية بالضبط …

      من يوم فتحت المدونة تجنبا للمشاكل أستخدمت ميزان حرارة لكل الوصفات بحيث إن الوقت التقريبي اللي أعطي يكون أقرب شي للوقت الحقيقي. غير كذا أستخدم حرارة الخبز الداخليه عشان أحكم على الخبز إنه أستوى أو لأ .. وفي فرني بنفس العجينة بعد ما قطعتها ٢٠٠ جرام وصلت حرارتها الداخليه ٢٠٠ فهرنهايت ( درجة إستوى الخبز ) في ١٣ دقيقه ….. عشان كذا في الغالب فرنك حار أكثر من اللازم بس ….

      إذا كانت تنحرق من تحت أكثر من فوق في الغالب الصينية توصل حرارة أسرع من اللازم يمكنها شوي نحيفه والله أعلم أو إنك حطيتي الصينية في رف تحت شوي .. فيه سبب ثاني ولو إني أستبعده صراحة وهو إن فرنك من النوع اللي يجي فيه مروحة .

        • Anonymous on 18 February, 2011 at 11:54 pm
        • Reply

        هلا والله ونك تأخرت عن مواعيدك طول الليل احتري جوابك ههههه

        المهم يمكن انا دقيقة شوي في الوصفات الي اخذها ولا احب اغير في البداية عشان ما اقول انا غيرت عشان كذا خربت مثلا

        الحرارة في المطبخ ما اخفيك حلو مرة بس يمكن للعجين لا بارد شوي .
        يمكن صح فرني حامي شوي وانا حسيتها كذا بس قلت هو طلب هذه الدرجة اوك خليني امشي معه

        الرف لا ممتاز في الوسط عادي الصينية ممكن تكون نحيفة “صواني الفرن الاصلية الي تجي معه ”

        عموما هذه المرة والي قبل نفس الطعم لذيذه اوك ماعليها كلام لكن النفشة هذه المرة احسن بكثير من الي قبل مدري يمكن ماء سلق البطاطس مسوي كل هذا الفرق ؟؟ عموما شوفها هنا وشوف اللون الي اقصده فعلا غير مثل الشابورة تقريبا

        http://sub3.rofof.com/img4/02slmep19.jpg

          • Top Chef on 19 February, 2011 at 2:03 am
            Author

          التغيير أحيانا مطلوب بس ما يكون إعتباطي بس … ولا يلمس أساسات الشي …

          الحرارة لو كانت باردة لا تحسبين إن هذا شي سيء بالعكس .. دايما في الخبز وقت = نكهة .. كثير عجاين تتحسن بتركها فترات طويله في مكان بارد .

          الفرن يكون حار قصدي إن الفرن ما يكون عالدرجة المطلوبة بالضبط هذا كان قصدي … موب إنك أنتي حطيتيه على حراره خطأ .. يعني تحطين الفرن على ٣٧٥ مثلا بس يكون فعليا على ٤٠٠ أو أكثر .. تصير دايما ..

          بالنسبة للصورة متأكده نفس الخبز ؟ لأن غريبه النتيجة شوي وباينه شوي قاسيه و الفتحات ميب كبيره مره زي ماهي مفروض تكون … طيب سؤال ثاني بس لاحظت لون الخبز شوي أسمر وشلون صار كذا ؟

    • Anonymous on 15 February, 2011 at 5:23 pm
    • Reply

    ينفع اشكلها مثل الكروسان واحشيها جبن

    1. جربي وشوفي ليش لأ

    • Anonymous on 14 February, 2011 at 10:25 am
    • Reply

    صح نسيت اقول ليه استخدم زبده شوي ثقيله ومحنا ناقصين زياده وزن ههههه
    ليه مااستخدم زيت زيتون ….؟؟

    1. إذا الوزن هو المشكلة الزيت و الزبده واحد … ملعقة من هذا أو هذا لهم نفس عدد السعرات بس الزبده أطعم هنا .. جربي وشوفي .

    • Anonymous on 14 February, 2011 at 10:18 am
    • Reply

    ٦ ملاعق كبيره زبده دافيه موب ذايبه ! . تقريبا أصبع إلا شوييي( انت تقول )

    طيب يعني ذائبه يحيث اني اخذها بالملعقه وامسح الزائد ..

    اشكرك وباذن الله اجربه

    1. ملعقة معياريه إيه ينفع كذا .. بس أسهل تقيسين بالنظر .

    • Anonymous on 13 February, 2011 at 5:16 am
    • Reply

    يااااااااااااااااااااهو ايش هذا

    فعلا جربت الخبز في البيت لذيذ وفرق عن السوق

    تصدق عاد طريقة العجينة هذه من زمان ادور عليها روعة للدونات بشكل ما تتخيل “اذا ما جربتها ”

    كانت تسويها شغالة اختي وسافرت ولا اعطت احد الطريقة فيها بطاطس<<نحاسة حريم ههههه

    الله يجزاك ووالديك الجنة يا رب ويرضى عليك ويوفقك ويسهل لك كل صعب

    1. هلا والله …

      خبز البيت غير هذي أكيد مافيها كلام …

      الدونات اللي تقصدين جربتها هي اللي يسوون في بيتنا وفعلا رهيبه ..

        • Anonymous on 13 February, 2011 at 6:24 am
        • Reply

        تكفى هي نفسها مقادير الدونات ولا غيرها ؟؟؟

        اذا غيرها طلبتك يرحم والديك تحطها لي سنين ابيها

        شي ثاني ذكرت ان المايونيز منزلي تتكرم علينا بوصفتك لاهنت

          • Top Chef on 13 February, 2011 at 6:34 am
            Author

          لا والله للأسف الدونات غير شوي .. ما أعرف المقادير حقت دونات البطاطس الصراحة .

          المايونيز خليه بعدين بنزله بموضوع مفصل كونه موضوع شوي كبير.

  15. ممكن بعد ما نعجنها على طول نقسمها كور نخليها تتضاعف و نتفش 40 دقيقه
    يعني نخليها تختمر مره وحده بعد التقسيم و نلغي تخميرها قبل << عشان الوقت 🙂

    1. في الخبز دااايما أمشي عالوصفه … النفشة الأولى راح تكون الهيكل حق الخبز و الطعم من الخميره وكذا .. النفشة الثانيه بس للهواء ..

    • rand on 12 February, 2011 at 10:34 pm
    • Reply

    رووووعه ماشا ءالله
    جاري التجربة ان شاء الله قريبا

    1. مشكورة .. حياك الله دايما

  16. تجربة جميلة .. إن شاء الله أجربها .. الخبز شهي جداً تسلم إيدك :”)

    1. الله يسلمك .. ومشكوره على كلامك ومرورك

        • Anonymous on 5 March, 2012 at 7:58 pm
        • Reply

        جزاك الله خيرا

  1. […] الإسفنجي وأنواع و أنواع من الكوكيز و البيتي فور ، ندهن المعجنات بشوي بيض وتعطيها لمعة ذهبية ما تتوفر من أي مكون ثاني […]

  2. […] الصمون المصنوع بالبيت وااااايد لذيذ والذ من اللي ينتسوا بره بالف مره … انا نزلت كذا وصفه للصمون من قبل وهالوصفه اخذتها من بلوق اخوي توب شيف اضافه البطاط بالعجينه استخدمتها من قبل وكانت على هيئه بطاط مجفف والنتيجه كانت واااو .. هالمره استخدمت البطاط المسلوق نفسهالوصفه الرئيسية تلقونها هنيhttp://topchefcooks.com/2011/02/12/burger-bun […]

  3. […] خبز البرجر بس شكلته على شكل خبز ساندوتش ، الطريقة هنا للي مستعد يسوي […]

  4. […] البيت لأني أشوفه يسوي فرق كبيييير عن حق السوبرماركت . هنا طريقة الخبز . نحمص الخبز شوي في الفرن ، بس شوي عشان يرجع حار ويكون […]

Leave a Reply

Your email address will not be published.

%d bloggers like this: