إنجلترا : بودنج الخبز .. Bread Pudding

هلا والله …

هذا الموضوع تابع لفعالية حول العالم في ٣٠ يوم.

المطبخ البريطاني موب واحد من المطابخ اللي مشهورة بأكلها. صح هي دولة كبيرة وكانت أقوى دولة في العالم في وقت من الأوقات إلا إنه لسبب مجهول أكلهم جدا بسيط وما تطور بشكل كبير زي جيرانهم الفرنسيين مثلا. المطبخ البريطاني يغلب عليه البساطة في كل شي مثل الخضار المطبوخة بالبخار مثلا أو اللحوم المحمرة أو اليخنات البسيطة أو أكلتهم الشهيرة الفيش آند تشيبس اللي هي عبارة عن سمك مقلي مع بطاطس. كل شي زي ما نلاحظ مباشر وبدون تعقيد ويعتمد على المقادير الممتازة بالدرجة الأولى عشان يطلع الأكل بشكل جيد. الفرنسيين معروف عنهم إنهم يكرهون البريطانيين ويحتقرونهم دايما  و في الطبخ الفرنسي كلمة “إنجليز” إذا دخلت على شي تعني البسيط أو السهل وكأنها تحقير بشكل غير مباشر، مثلا عندنا كسترد إسمه “كريم أنجليز” أو الكريمة الإنجليزية ومع العلم إن هذا الكسترد إختراع فرنسي إلا إنه دخل عليه كلمة إنجليز كونه سهل وغير معقد. نفس الشي عندنا التغطية الإنجليزية حقت القلي اللي هي طحين بعدين بيض بعدين بقسماط وغيرها أكلات كثير. المطبخ البريطاني تأثر بشكل كبير بأكل البلدان اللي كانت محتلتها مثل الهند مثلا. بودرة الكاري اللي الناس يحسبونها شي هندي هي إختراع بريطاني ولا له علاقة بالهند أبدا. كثير من الأكلات الهندية أو بالأصح اللي الناس يحبسونها هندية هي إختراع بريطاني ولا له علاقة بالهند إلا بالأسماء بس، مثال على هذي الأكلات هي التشيكن تيكا مسالا واللي تعتبر وحدة من الأكلات الرسمية لبريطانيا ! ولا لها علاقة بالهند أبدا إلا في كون البهارات اللي داخلة فيها مستوردة من هناك.

أكلتنا اليوم عبارة عن حلى وهي واحد من ألذ الحلويات و أسهلها و أكثرها مرونة في التعديل. بودنج في الطبخ يعني سائل ( غالبا من مشتقات الحليب ) مثقل بنشا بينما كسترد تعني سائل مثقل ببيض، مع هذا بودنج الخبز مثقل ببيض وهذا يعني إنه كسترد موب بودنج. سبب الإختلاف في التسمية هو إن البريطانين من زمان كانوا يسمون أي حلى بودنج ولصق هذا الإسم في هذا الحلى. بودنج الخبز واحد من ألذ الإختراعات في الطبخ و أي طفل يقدر يسويه بسهولة. بودنج الخبز عبارة عن خبز قديم مشرب كسترد ومطبوخ في الفرن (قريب جدا من أم علي) ، البودنج ممكن ينوكل حار أو دافي أو حتى بارد.

المقادير :

كوبين ونص حليب

كوبين ونص كريمة

عود قرفة

ملعقة صغيرة جوزة طيب

١٥ حبة قرنفل

١٥ حبة فلفل أسود

ملعقة صغيرة قشر برتقال مجفف

تقريبا 15 جرام زنجبيل مسكر ياجاهز يا تسوونه في البيت. مقطع صغار

3 بيضات

3 صفارات بيض

1/2 كوب سكر

3/4 كوب سكر بني غامق

ملعقة كبيرة فانيلا سايلة

تقريبا 10 – 12 كوب خبز خميرة قديم من أي نوع مقطع مكعبات.

كوب إضافات حسب الرغبة (إختياري).

* الخبز ممكن يكون أي خبز أهم شي يكون خبز قديم وكل ماكان قديم أحسن. لو ماعندكم خبز قديم حطوا الخبز في فرن بارد ( يعني حرارته على أقل شي ) وخلوا الخبز ينشف فيه. أي نوع خبز بشرط يكون خبز خميرة ممكن يستخدم يمديكم حتى تستخدمون كروسان أو بريوش لو تبون وبيعطيكم طعم رهيب.

* المقصود بالإضافات يعني مكسرات أو فواكه مجففة أو طازة ( الموز بالذات رهيب ) أو حتى هيرشي أو أي شي ثاني. أنا أستخدمت هنا موز مستوي مررره مع جوز ( خليط دايما رهيب ) بس حطوا اللي يعجبكم.

الطريقة :

نخلط نص الحليب مع نص الكريمة في قدر ونضيف عليهم القرفة و القرنفل و  الفلفل الأسود و قشر البرتقال و الزنجبيل و جوزة الطيب ونخليهم إلين يوصلون غليه جدا هادية بعدين نطفي النار ونغطي القدر ونخليه يتطعم ربع ساعة. نصفي الخليط ونحطه عالجنب.

الحين في صحن خلط كبير نخفق البيض مع صفار البيض و السكر الأبيض و البني مع رشة ملح إلين يصير الخليط  متجانس ومنفوش شوي بعدين نخلط عليه الفانيلا و الكريمة و الحليب اللي طعمنا و باقي الحليب و الكريمة. هذا الكسترد اللي بنصبه عالخبز ، إذا تبون أحسن نتيجة سووا الكسترد هذا قبل بيوم أو يومين وحطوه في الثلاجه، الكسترد يتحسن دايما في الثلاجه.

الحين رصوا الخبز الناشف و الإضافات إذا بتحطون في الصحن اللي بتستخدمون بعدين صبوا الكسترد عليه.

غطوا الخليط بنايلون وخلوه يتشربه ساعتين تقريبا على حرارة الغرفة أو ٨ ساعات في الثلاجة.

شغلوا الفرن على ٣٢٥ .

دخلوا البودنج الفرن إلين ينفش شوي ويجمد الكسترد تقريبا ساعة إلا ربع ( الوقت اللي حاط للصحون حقتي الوقت راح يختلف كثير مع كل حجم وشكل صحن ). أو اللي عندهم ميزان حرارة إلين توصل حرارته الداخلية ١٦٥ – ١٧٠ فهرنهايت. طلعوه من الفرن وكلوه بعد ما يبرد شوي أو خلوه يبرد لحرارة الغرفة أو حتى كلوه بارد من الثلاجه.

قدموا مع البودنج صوص كاراميل أو دولتشي دي ليتشي أو حتى بترسكوتش لو تبون بس هو لحالة رهيب.