هلا والله …
هذا الموضوع تابع لفعالية حول العالم في ٣٠ يوم.
الأكل الأوكراني متشابه بشكل كبير مع أكل شرق ووسط أوروبا و الأكل الروسي وهذا طبعا منطقي كونها كانت جزأ منها.
البورشت وحدة من أشهر الأكلات في شرق أوروبا و موجودة حتى في أنحاء من تركيا و البلقان بس هي أوكرانية الأصل. البورشت عبارة عن شوربة بنجر مع إضافات تختلف من مكان لمكان ومن طباخ لطباخ. البورشت ممكن تتقدم وهي حارة أو باردة ( زي ما يسوون في ليثوينيا ). غير كذا ممكن تكون مطحونة وناعمة أو ريفية وبقطع . ممكن تكون شوربة بنجر بس أو ممكن ينضاف عليها خضار ثانية زي البطاطس ، الجزر ، الكراث ، الملفوف ، الفجل ، الطماط أو حتى قطع لحم وبكذا تصير وجبة كاملة موب بس شوربة.
البنجر واحد من الخضروات المظلومة برأيي كثير ناس ما يعرفون طعمه إلا وهو مخلل ومع البليلة بس ! وكثير ناس حتى ما يدرون وشو اللي ياكلونه ما يعرفون إلا إنه “هذاك الشي الأحمر”. البنجر زي خضروات كثير ( البصل مثلا ) بيختلف طعمه حسب كيف أنطبخ . إذا سلقناه أو طبخناه بالبخار بنذوق طعمه الأصلي اللي يجي حلو مع نكهة بنجر خفيفة و إذا حمرناه في الفرن بيتكرمل السكر اللي فيه ويجي طعمه معقد أكثر. اللي يبي يجرب طبق جانبي جديد مع دجاج أو لحم محمر أو أي شي ثاني يجرب يقشر شوي بنجر ويطبخه في الفرن مع شوي زيت زيتون على ٣٥٠ إلين يصير لين ويبدأ يتكرمل شوي بعدين يرش بلسمك آخر ١٠ دقايق. غير إنه لذيذ بيعطي أي طبق ينحط فيه لون أحمر حلو.
المقادير :
٤ ملاعق كبيرة دهن بيكون ( أو زيت زيتون إذا ما تبون )
بصلة كبيرة مقطعة صغار
عود كرفس مقطع صغار
تقريبا ٧٥٠ جرام بنجر مقشر ومقطع مكعبات صغيرة ( تقريبا ٥ حبات وسط )
٧ أكواب مرق دجاج ( الطريقة في الرابط )
٣ ملاعق كبيرة خل عنب
ملعقة كبيرة خل بلسمك
ورقة غار
سيقان بقدونس
حبة جزر كبيرة مقطعة مكعبات
حبة بطاطس كبيرة مقطعة مكعبات
٤ ملاعق كبيرة شبت مفروم
ملح وفلفل أسود
ساور كريم للزينة ( إختياري )
بيكون مقلي للزينة ( إختياري )
* دهن البيكون بيعطي طعم لحم مع دخان رهيب مع الشوربة و مع البنجر. تاخذون شرايح البيكون وتطبخونها على حرارة وسط بدون زيت في مقلة تيفال عادية إلين ينزل الدهن منها ويصير البيكون يقرمش ( لاتخلون البيكون ينحرق ! ) تاخذون الدهن وتستخدمونه مع الشوربة و البيكون نفسه تقدرون لو تبون تقطعونه وتقدمونه فوق الشوربة في الأخير كزينة.
* البنجر بيصبغ كل شي يلمسه وصعب يروح اللون فإذا جيتوا تقشرونه أفضل حل إنكم تلبسون قفاز إذا خايفين على لون يدكم. إذا جيتوا تختارون بنجر أختاروا الحبات اللي تكون قاسية وثقيلة مقارنة بحجمها.
* المرق وجودته ممكن تكون الفرق بين شوربة رهيبة وشوربه عادية. تقدرون تستخدمون مويه بس الطعم راح يكون باهت شوي وممل.
* الخل هنا ضروري، الخل يتفاعل مع الصبغة الحمراء في البنجر ويعطي لون أحمر قوي بدال ما يقلب على رمادي مع الطبخ الطويل.
الطريقة :
نطبخ البصل و الكرفس في دهن البيكون ( أو الزيت ) مع رشة ملح على حرارة هاديه إلين يذبل ويصير البصل شفاف. بعد ما يذبل نحط البنجر ونطبخه شوي ( تقريبا دقيقتين ) بعدين نحط المرق و سيقان البقدونس وورق الغار و خل العنب وخل البلسمك ونخليهم يغلون على غليه جدا خفيفه مع رشة ملح وفلفل أسود. نخلي الشوربة تطبخ ( بدون غطاء ) تقريبا ٣٠ – ٤٥ دقيقة أو إلين يستوي البنجر ويصير لين . بعد ما يستوي البنجر نحط الشبت و الجزر و البطاطس ونطبخهم إلين ما يستوون وتصير الخضار لينه تقريبا ٥ – ١٠ دقايق .
نطحن الشوربة في خلاط على دفعات بعدين نرجعها للقدر ونذوق الملح و الفلفل الأسود و الخل ونعدل حسب الرغبة ونعدل قوام الشوربة بإننا نضيف زيادة مرق أو مويه إلين توصل للقوام اللي نبي. هذي الخطوة إختيارية ، طحن الشوربة مسألة شخصية زي ما قلت في المقدمة حقت الموضوع تقدرون تخلونها زي ما هي بدون طحن يعني بس تذوقون وتعدلون الطعم بعدين تقدمونها أو تطحنونها الخيار راجعلكم.
نزين الشوربة بشوي ساور كريم وورق شبت والبيكون المقلي لو حبيتوا ونقدمها مع خبز عالجنب.
19 comments
3 pings
Skip to comment form ↓
عائشة
10 فبراير, 2017 الساعة 6:22 ص (UTC 3) Link to this comment
ربي يرضى عليك كم كمية سيقان البقدونس في الوصفة؟
الاوتار
7 ديسمبر, 2011 الساعة 9:21 ص (UTC 3) Link to this comment
مشكور اخوي على الوصفة اذا سويته ابحط فوقة قطع خبز محمص ويصلح الغار المجفف بدال العادي
Top Chef
7 ديسمبر, 2011 الساعة 1:21 م (UTC 3) Link to this comment
أكيد خذ راحتك حط اللي تبيه عليها. الغار مجفف دايما اللي أستخدم الطازج موب متوفر دايما
غير معروف
23 مايو, 2011 الساعة 5:38 م (UTC 3) Link to this comment
الله يصلحك بس
تقول بيكون واقول يا ربي وش هذا البيكون واروح اسو يبحث يطلع لي فرانسيس بيكون هههههه
في الاخير عرفت وشو اثرك تقصد لحم قديد <<الاسم العربي له كان يستخدم كثير هنا لكن الحمدلله مع تغير الاحوال وكثرت النعم ما احد يستخدمه لكن مازال يستخدم في افريقيا بكثرة وتبي تشوفه وشلون يجهونه رح لمنى "بكسر الميم" تشوفه وتشم الريحة الي توديك عالم اخرررررررررههههههه
تشكر يا شيف ماقصرت
Top Chef
23 مايو, 2011 الساعة 6:58 م (UTC 3) Link to this comment
لا لا البيكون موب القديد .. البيكون غير ، البيكون لحم مملح مع بهارات وبعدين مدخن ، القديد لحم بدون شحم متبل ومجفف ، فرق كبير بين الإثنين ..
غير معروف
23 مايو, 2011 الساعة 1:29 م (UTC 3) Link to this comment
بعد مايستوي البنجر نضيف الجزر والبطاطس؟؟؟
وش الغرض اني احطهم بعد مايستوي البنجر ليش ما احطه معه من الاول واخليه يطبخ معه هذا واحد
اثنين ليش ما احط الغطاء هل هذا راح يأثر على اللون الاخير ؟؟
Top Chef
23 مايو, 2011 الساعة 6:53 م (UTC 3) Link to this comment
وقت الطبخ الطويل بيسوي شيين في البطاطس ( اللي هي الشي اللي بيثقل الشوربة ) . أول شي نشا البطاطس مع الطبخ الطويل مره يصير ما يثقل يعني يخرب. الشي الثاني هو إن البطاطس إذا أنطبخت وقت طويل بعدين أنخلطت بقوة ( زي ما بنسوي في خلاط مثلا ) تصير قاسية تقرياب زي الصمغ.
السبب الثاني بعد هو إنك كذا تقدرين تاكلين الشوربة بدون طحن وبتلاقين البطاطس لينه بس ماسكة شكلها و الجزر نفس الشي.
Top Chef
23 مايو, 2011 الساعة 6:54 م (UTC 3) Link to this comment
القدر ما نحطه عشان نبي المويه تتبخر . كل ما تبخرت المويه كل ما تركزت النكهة أكثر و أكثر
ماريوشكا
23 مايو, 2011 الساعة 8:34 ص (UTC 3) Link to this comment
يؤ يؤ لا ما أقصد شَيْ بس قلت يمكن في نوع ثاني -بديل- أو له اسم ثاني بس السؤال طلع عفوي ومدري وش يبي
هو فعلًا نادر بالذات بالأسواق العربية
ع فكرة هالشوربة تشبه شوربة بولندية بس البولندية أخفّ ومصفّاة وفيها قطعتين رافيولي محشي بلحم
Top Chef
23 مايو, 2011 الساعة 8:37 ص (UTC 3) Link to this comment
هههههه عادي خصل خير
ماتشبه إلا هي نفسها ، البورشت منتشرة في كل شرق أوروبا لها نسخ كثيييير
ماريوشكا
23 مايو, 2011 الساعة 6:37 ص (UTC 3) Link to this comment
البيكون في منه لحم بقر أو غنم ؟
أشوفه في سبينيس بس خنزير -وانتوا بكرامة- :s
Top Chef
23 مايو, 2011 الساعة 7:22 ص (UTC 3) Link to this comment
هههه حلوه .. وش تحسبيني آكل أجل هههههههه
البيكون أقصد بيف بيكون أو بط ( ولو إنه صعب تلاقينه ) ، فيه منه دجاج و ديك رومي بس طعمه أستغفر الله ..
نور
23 مايو, 2011 الساعة 5:21 ص (UTC 3) Link to this comment
عمري ما تخيلت اسوي من الشمندر شوربه
العاده افوحه بماي و اقطعه مكعبات حق السلطه اكثر من جذي ما فكرت استخدمه
مشكور على الوصفه شكلها يعقد
بس الشمندر قاسي شلون بقشره و هوا لي الحين ما انطبخ ؟
Top Chef
23 مايو, 2011 الساعة 5:45 ص (UTC 3) Link to this comment
قشرية عادي بقشارة بطاطس .
حمد
23 مايو, 2011 الساعة 4:10 ص (UTC 3) Link to this comment
يعطيك ألللللللف عافية على الطبق ،،، اللون لحاله خرااافي ،، وشكل الطعم بنفس المستوى
البنجر يطبخ و هو مقطع مكعبات ،، صح !!
Top Chef
23 مايو, 2011 الساعة 4:13 ص (UTC 3) Link to this comment
الله يعافيك …
البنجر إيه .. يمديك تقطعه أي شكل ما يفرق بس راح يفرق في كم ياخذ عشان يستوي.
bent el deera
23 مايو, 2011 الساعة 1:39 ص (UTC 3) Link to this comment
تسلم الايادي عاد قبل جم يوم كنت اشوف فوود نتورك وكانت اينا غارتن مسويه البورشت البارد
وصفتك قابله للتطبيق عندي اكثر
بجربها ان شاء الله بالويكند
غير معروف
23 مايو, 2011 الساعة 12:51 ص (UTC 3) Link to this comment
مرحبا توب شيف
طبق رائع نحنا محتاجين لنتعرف على الخضار أكتر لأن في منها مظلوم متل البنجر واليقطين
بالنسبة للبنجر بعملوا متبل وبيطلع طيب وجربته بالفرن مع ليمون المرة الجاية رح جربه بالبلسمك
ألف شكر لك وان شاء الله تكون دراستك تمام وماتكون الفعالية مأثرة عليها
غير معروف
23 مايو, 2011 الساعة 12:09 ص (UTC 3) Link to this comment
اللون صراحة لحاله حكاية
انا من الاشخاص الي يحبون البنجر استخدمه دايم في السلطات احس له نكهة مميزة .
مشكور ماقصرت يعطيك العافية
اليونان : سلطة الشعير اليونانية مع الفطر .. Greek Barley Salad with Sauteed Mushrooms » Top Chef Blog .. مدونة توب شيف
27 ديسمبر, 2012 الساعة 5:14 ص (UTC 3) Link to this comment
[…] أوكرانيا : بورشت .. Borscht » Top Chef Blog .. مدونة توب شيف على مرق الدجاج الأبيض .. White Chicken Stock […]
ختام فعالية حول العالم في ٣٠ يوم …. « مدونة توب شيف … Top Chef
5 يوليو, 2011 الساعة 9:26 م (UTC 3) Link to this comment
[…] أوكرانيا : بورشت […]
اليونان : سلطة الشعير اليونانية مع الفطر .. Greek Barley Salad with Sauteed Mushrooms « مدونة توب شيف … Top Chef
25 مايو, 2011 الساعة 9:33 م (UTC 3) Link to this comment
[…] في أكلهم. في الشمال في مقدونيا نلاقي أكلهم مشابه لأكل شرق أوروبا وغني بأكلات ريفية بسيطة من يخنات وغيرها. في الغرب و […]