«

»

مايو 22 2011

أوكرانيا : بورشت .. Borscht

هلا والله …

ANY CHARACTER HERE

هذا الموضوع تابع لفعالية حول العالم في ٣٠ يوم.

ANY CHARACTER HERE

الأكل الأوكراني متشابه بشكل كبير مع أكل شرق ووسط أوروبا و الأكل الروسي وهذا طبعا منطقي كونها كانت جزأ منها.

ANY CHARACTER HERE

البورشت وحدة من أشهر الأكلات في شرق أوروبا و موجودة حتى في أنحاء من تركيا و البلقان بس هي أوكرانية الأصل. البورشت عبارة عن شوربة بنجر مع إضافات تختلف من مكان لمكان ومن طباخ لطباخ. البورشت ممكن تتقدم وهي حارة أو باردة ( زي ما يسوون في ليثوينيا ). غير كذا ممكن تكون مطحونة وناعمة أو ريفية وبقطع . ممكن تكون شوربة بنجر بس أو ممكن ينضاف عليها خضار ثانية زي البطاطس ، الجزر ، الكراث ، الملفوف ، الفجل ، الطماط أو حتى قطع لحم وبكذا تصير وجبة كاملة موب بس شوربة.

ANY CHARACTER HERE

البنجر واحد من الخضروات المظلومة برأيي كثير ناس ما يعرفون طعمه إلا وهو مخلل ومع البليلة بس ! وكثير ناس حتى ما يدرون وشو اللي ياكلونه ما يعرفون إلا إنه “هذاك الشي الأحمر”. البنجر زي خضروات كثير ( البصل مثلا ) بيختلف طعمه حسب كيف أنطبخ . إذا سلقناه أو طبخناه بالبخار بنذوق طعمه الأصلي اللي يجي حلو مع نكهة بنجر خفيفة و إذا حمرناه في الفرن بيتكرمل السكر اللي فيه ويجي طعمه معقد أكثر. اللي يبي يجرب طبق جانبي جديد مع دجاج أو لحم محمر أو أي شي ثاني يجرب يقشر شوي بنجر ويطبخه في الفرن مع شوي زيت زيتون على ٣٥٠ إلين يصير لين ويبدأ يتكرمل شوي بعدين يرش بلسمك آخر ١٠ دقايق. غير إنه لذيذ بيعطي أي طبق ينحط فيه لون أحمر حلو.

ANY CHARACTER HERE

المقادير :

ANY CHARACTER HERE

٤ ملاعق كبيرة دهن بيكون ( أو زيت زيتون إذا ما تبون )

بصلة كبيرة مقطعة صغار

عود كرفس مقطع صغار

تقريبا ٧٥٠ جرام بنجر مقشر ومقطع مكعبات صغيرة ( تقريبا ٥ حبات وسط )

٧ أكواب مرق دجاج ( الطريقة في الرابط )

٣ ملاعق كبيرة خل عنب

ملعقة كبيرة خل بلسمك

ورقة غار

سيقان بقدونس

حبة جزر كبيرة مقطعة مكعبات

حبة بطاطس كبيرة مقطعة مكعبات

٤ ملاعق كبيرة شبت مفروم

ملح وفلفل أسود

ساور كريم للزينة ( إختياري )

بيكون مقلي للزينة ( إختياري )

ANY CHARACTER HERE

* دهن البيكون بيعطي طعم لحم مع دخان رهيب مع الشوربة و مع البنجر. تاخذون شرايح البيكون وتطبخونها على حرارة وسط بدون زيت في مقلة تيفال عادية إلين ينزل الدهن منها ويصير البيكون يقرمش ( لاتخلون البيكون ينحرق ! ) تاخذون الدهن وتستخدمونه مع الشوربة و البيكون نفسه تقدرون لو تبون تقطعونه وتقدمونه فوق الشوربة في الأخير كزينة.

ANY CHARACTER HERE

* البنجر بيصبغ كل شي يلمسه وصعب يروح اللون فإذا جيتوا تقشرونه أفضل حل إنكم تلبسون قفاز إذا خايفين على لون يدكم. إذا جيتوا تختارون بنجر أختاروا الحبات اللي تكون قاسية وثقيلة مقارنة بحجمها.

ANY CHARACTER HERE

peeled beets

ANY CHARACTER HERE

* المرق وجودته ممكن تكون الفرق بين شوربة رهيبة وشوربه عادية. تقدرون تستخدمون مويه بس الطعم راح يكون باهت شوي وممل.

ANY CHARACTER HERE

* الخل هنا ضروري، الخل يتفاعل مع الصبغة الحمراء في البنجر ويعطي لون أحمر قوي بدال ما يقلب على رمادي مع الطبخ الطويل.

ANY CHARACTER HERE

الطريقة :

ANY CHARACTER HERE

نطبخ البصل و الكرفس في دهن البيكون ( أو الزيت ) مع رشة ملح على حرارة هاديه إلين يذبل ويصير البصل شفاف. بعد ما يذبل نحط البنجر ونطبخه شوي ( تقريبا دقيقتين ) بعدين نحط المرق و سيقان البقدونس وورق الغار و خل العنب وخل البلسمك ونخليهم يغلون على غليه جدا خفيفه مع رشة ملح وفلفل أسود. نخلي الشوربة تطبخ ( بدون غطاء ) تقريبا ٣٠ – ٤٥ دقيقة  أو إلين يستوي البنجر ويصير لين . بعد ما يستوي البنجر نحط الشبت و الجزر و البطاطس ونطبخهم إلين ما يستوون وتصير الخضار لينه تقريبا ٥ – ١٠ دقايق .

ANY CHARACTER HERE

نطحن الشوربة في خلاط على دفعات بعدين نرجعها للقدر ونذوق الملح و الفلفل الأسود و الخل ونعدل حسب الرغبة ونعدل قوام الشوربة بإننا نضيف زيادة مرق أو مويه إلين توصل للقوام اللي نبي. هذي الخطوة إختيارية ، طحن الشوربة مسألة شخصية زي ما قلت في المقدمة حقت الموضوع تقدرون تخلونها زي ما هي بدون طحن يعني بس تذوقون وتعدلون الطعم بعدين تقدمونها أو تطحنونها الخيار راجعلكم.

ANY CHARACTER HERE

نزين الشوربة بشوي ساور كريم وورق شبت والبيكون المقلي لو حبيتوا ونقدمها مع خبز عالجنب.

ANY CHARACTER HERE

بورشت

borscht

بورشت

borscht

Follow TopChefCooks on Twitter

عن الكاتب

Top Chef

19 comments

3 pings

Skip to comment form

  1. عائشة

    ربي يرضى عليك كم كمية سيقان البقدونس في الوصفة؟

  2. الاوتار

    مشكور اخوي على الوصفة اذا سويته ابحط فوقة قطع خبز محمص ويصلح الغار المجفف بدال العادي

    1. Top Chef

      أكيد خذ راحتك حط اللي تبيه عليها. الغار مجفف دايما اللي أستخدم الطازج موب متوفر دايما

  3. غير معروف

    الله يصلحك بس
    تقول بيكون واقول يا ربي وش هذا البيكون واروح اسو يبحث يطلع لي فرانسيس بيكون هههههه

    في الاخير عرفت وشو اثرك تقصد لحم قديد <<الاسم العربي له كان يستخدم كثير هنا لكن الحمدلله مع تغير الاحوال وكثرت النعم ما احد يستخدمه لكن مازال يستخدم في افريقيا بكثرة وتبي تشوفه وشلون يجهونه رح لمنى "بكسر الميم" تشوفه وتشم الريحة الي توديك عالم اخرررررررررههههههه

    تشكر يا شيف ماقصرت

    1. Top Chef

      لا لا البيكون موب القديد .. البيكون غير ، البيكون لحم مملح مع بهارات وبعدين مدخن ، القديد لحم بدون شحم متبل ومجفف ، فرق كبير بين الإثنين ..

  4. غير معروف

    بعد مايستوي البنجر نضيف الجزر والبطاطس؟؟؟

    وش الغرض اني احطهم بعد مايستوي البنجر ليش ما احطه معه من الاول واخليه يطبخ معه هذا واحد

    اثنين ليش ما احط الغطاء هل هذا راح يأثر على اللون الاخير ؟؟

    1. Top Chef

      وقت الطبخ الطويل بيسوي شيين في البطاطس ( اللي هي الشي اللي بيثقل الشوربة ) . أول شي نشا البطاطس مع الطبخ الطويل مره يصير ما يثقل يعني يخرب. الشي الثاني هو إن البطاطس إذا أنطبخت وقت طويل بعدين أنخلطت بقوة ( زي ما بنسوي في خلاط مثلا ) تصير قاسية تقرياب زي الصمغ.

      السبب الثاني بعد هو إنك كذا تقدرين تاكلين الشوربة بدون طحن وبتلاقين البطاطس لينه بس ماسكة شكلها و الجزر نفس الشي.

      1. Top Chef

        القدر ما نحطه عشان نبي المويه تتبخر . كل ما تبخرت المويه كل ما تركزت النكهة أكثر و أكثر

  5. ماريوشكا

    يؤ يؤ لا ما أقصد شَيْ بس قلت يمكن في نوع ثاني -بديل- أو له اسم ثاني بس السؤال طلع عفوي ومدري وش يبي
    هو فعلًا نادر بالذات بالأسواق العربية

    ع فكرة هالشوربة تشبه شوربة بولندية بس البولندية أخفّ ومصفّاة وفيها قطعتين رافيولي محشي بلحم

    1. Top Chef

      هههههه عادي خصل خير

      ماتشبه إلا هي نفسها ، البورشت منتشرة في كل شرق أوروبا لها نسخ كثيييير

  6. ماريوشكا

    البيكون في منه لحم بقر أو غنم ؟
    أشوفه في سبينيس بس خنزير -وانتوا بكرامة- :s

    1. Top Chef

      هههه حلوه .. وش تحسبيني آكل أجل هههههههه

      البيكون أقصد بيف بيكون أو بط ( ولو إنه صعب تلاقينه ) ، فيه منه دجاج و ديك رومي بس طعمه أستغفر الله ..

  7. نور

    عمري ما تخيلت اسوي من الشمندر شوربه
    العاده افوحه بماي و اقطعه مكعبات حق السلطه اكثر من جذي ما فكرت استخدمه
    مشكور على الوصفه شكلها يعقد
    بس الشمندر قاسي شلون بقشره و هوا لي الحين ما انطبخ ؟

    1. Top Chef

      قشرية عادي بقشارة بطاطس .

  8. حمد

    يعطيك ألللللللف عافية على الطبق ،،، اللون لحاله خرااافي ،، وشكل الطعم بنفس المستوى

    البنجر يطبخ و هو مقطع مكعبات ،، صح !!

    1. Top Chef

      الله يعافيك …

      البنجر إيه .. يمديك تقطعه أي شكل ما يفرق بس راح يفرق في كم ياخذ عشان يستوي.

  9. bent el deera

    تسلم الايادي عاد قبل جم يوم كنت اشوف فوود نتورك وكانت اينا غارتن مسويه البورشت البارد

    وصفتك قابله للتطبيق عندي اكثر

    بجربها ان شاء الله بالويكند

  10. غير معروف

    مرحبا توب شيف
    طبق رائع نحنا محتاجين لنتعرف على الخضار أكتر لأن في منها مظلوم متل البنجر واليقطين
    بالنسبة للبنجر بعملوا متبل وبيطلع طيب وجربته بالفرن مع ليمون المرة الجاية رح جربه بالبلسمك
    ألف شكر لك وان شاء الله تكون دراستك تمام وماتكون الفعالية مأثرة عليها

  11. غير معروف

    اللون صراحة لحاله حكاية

    انا من الاشخاص الي يحبون البنجر استخدمه دايم في السلطات احس له نكهة مميزة .

    مشكور ماقصرت يعطيك العافية

  1. اليونان : سلطة الشعير اليونانية مع الفطر .. Greek Barley Salad with Sauteed Mushrooms » Top Chef Blog .. مدونة توب شيف

    […] أوكرانيا : بورشت .. Borscht » Top Chef Blog .. مدونة توب شيف على مرق الدجاج الأبيض .. White Chicken Stock […]

  2. ختام فعالية حول العالم في ٣٠ يوم …. « مدونة توب شيف … Top Chef

    […] أوكرانيا : بورشت […]

  3. اليونان : سلطة الشعير اليونانية مع الفطر .. Greek Barley Salad with Sauteed Mushrooms « مدونة توب شيف … Top Chef

    […] في أكلهم. في الشمال في مقدونيا نلاقي أكلهم مشابه لأكل شرق أوروبا وغني بأكلات ريفية بسيطة من يخنات وغيرها. في الغرب و […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: