هلا والله …
اليوم وصلنا اليوم الثامن في فعالية حول العالم في ٣٠ يوم و عندنا جنوب أفريقيا. كثير من الناس يسمع جنوب أفريقيا وعلطول يتخيل غابات وناس بدائيين وكذا بس هذا كلام خطأ. جنوب أفريقيا بلد جدا متطور ، بخليط أعراق ولغات و أديان كثيره وهذا يعني مطبخ متطور و متنوع. سكان جنوب أفريقيا غالبيتهم من أصول أفريقية بس من عدة مناطق بعضهم هاجر لجنوب أفريقيا من مناطق ثانيه وبعضهم سكان أصليين ، بعد كذا عندنا السكان البيض اللي من أصول بريطانيه و هولنديه و فرنسيه وعددهم جدا كبير ، وبعد كذا عندنا المهاجرين من الهند و ماليزيا و أندونيسيا.
الأكلة اللي بسويها اليوم إسمها بوبوتي وهي تقريبا الأكلة الرسمية ( أو وحدة منهم ) لجنوب أفريقيا. الأكلة عبارة عن صينية لحم مفروم مع بهارات وفواكه وفوقها طبقة كسترد، الأكله بالعادة تتقدم مع صوص أو شطة ورز عالجنب. الصوص اللي بسويه معها هو نوع من أنواع “التشتني” chutney إسمه “بلاتجانج” مشهور في ماليزيا و أندونيسيا ، التشتني عبارة عن مربيات هندية مبهرة وحامضة. البوبوتي أكله جدا لذيذة بطعم وقوام معقد. حلاوة الفواكة المجففة مع الكاري و الأعشاب رهيبة مع بعض وبعدين عندنا الكسترد اللي فوق تقريبا زي السوفليه يكملهم. البوبوتي أكله من أصل ماليزي-برتغالي ودخل عليها مكونات جنوب أفريقية وهندية.
المقادير :
للبوبوتي :
كيلو لحم غنم أو بقر أو خليط منهم ، مفروم
حبتين بصل مقطعة صغار
فص ثوم كبير مقطع صغار
ملعقة كبيرة بودرة كاري
ملعقة صغيرة كركم
نص ملعقة صغيرة زنجبيل مطحون
شريحتين خبز قديم مقطعة
ربع كوب حليب
بشر و عصير نص ليمونه
ربع كوب دوش مفروم . ناس يسمونه بردقوش أو مردقوش.
بيضه
ملح وفلفل أسود
100 جرام مشمش مجفف مقطع صغار
حبة تفاح أخضر مقطعة صغار
1/4 كوب زبيب أصفر
50 جرام لوز مقطع ومحمص
شرايح ليمون أو برتقال وورق غار
للكسترد :
كوب حليب
بيضتين
1/2 ملعقة صغيرة ملح
للصوص :
٧٠ جرام مشمشم مجفف مقطع
٧٠ جرام زبيب مقطع
٣ أكواب خل عنب أو تفاح
حبة بصل كبيره مقطعة صغار
فص ثوم مقطع صغار
١٢٠ جرام سكر بني
٥٠ جرام لوز مقطع
نص ملعقة كبيرة ملح
٣/٤ ملعقة كبيرة زنجبيل مطحون
نص ملعقة كبيرة كزبرة مطحونه
نص ملعقة كبيرة بذور خردل
ملعقة صغيرة فلفل أحمر مجروش
* الدوش متوفر في كل مكان إذا ماعندكم أستخدموا حبق أو أتركوه بعد.
* البوبوتي أساسها البهارات و الفواكه المجففة ، داري بيجيني أحد يقول ينفع أسويها بدون فواكه و الجواب هو ينفع بس ماراح تكون بوبوتي راح تكون صينية لحم بس ..
* كمية الكسترد اللي حطيت يمكن ما تكفي لو كانت الصينية كبيرة مره، ضاعفوا الكمية حسب الحاجة .
* الصوص هذا كثير على الكمية اللي حطيت ، بس هو صوص رهيب يمشي مع أكلات كثير ويعيش وقت طويل في الثلاجة.
الطريقة :
للصوص :
يفضل تبدون بالصوص أول شي لأنه ياخذ وقت ولأنه ممكن يتسوى قبلها بشهر لو تبون.
أنقعوا الزبيب و المشمش في الخل طول الليل. أو إذا تبون أسرع خلوهم يغلون مع بعض ١٠ دقايق بعدين خلوهم يتشربون الخل ساعة تقريبا.
حطوا باقي المقادير وخلوهم يطبخون على غلية خفيفة إلين يثقل ويصير ثلث حجمه الأصلي تقريبا ساعة ونص مع التحريك من وقت لوقت. أحفظوا التشتني في الثلاجه في علبة تتقفل بإحكام.
للبوبوتي :
نسخن الفرن على ٣٢٥ و ندهن صينية فرن بشوي زيت أو زبدة .
نطبخ البصل في شوي زبدة أو زيت إلين يذبل بعدين نحط عليه الثوم إلين تطلع ريحته ، نضيف الكاري و الكركم و الزنجبيل و الدوش و نطبخهم شوي بعدين نشيل القدر من الحرارة ونضيف عليه اللحم المفروم و الخبز و الحليب و البيض و الليمون وقشر الليمون و و الملح و الفلفل الأسود و اللوز و الزبيب و المشمش المجفف و التفاح ونخلطهم كلهم مع بعض. نرص الخليط في الصينية اللي دهنا ونفرش الوجه بشريح الليمون أو البرتقال وورق الغار.
نغطي الصينية بقصدير وندخلها الفرن ساعة وربع تقريبا بعدين نطلعها من الفرن ونشيل القصدير ونرفع حرارة الفرن ل ٤٠٠ .
الحين نسوي الكسترد بإننا نخفق الحليب مع البيض و الملح بعدين نصبه فوق البوبوتي. ندخل الصينية الفرن مرة ثانيه ونخليها إلين يجمد الكسترد ويبدأ يتحمر في مناطق. نخليها ترتاح ١٠ دقايق بعدين نقدمها مع الصوص و رز.
19 comments
2 pings
Skip to comment form
مو كل الناس تتقبل الحلو مع المالح لكن وصفة تستحق التجربة
غرييبة الأككله .. شكل طعمها وااو
مع ان فكرة كاسترد وفواكة مع لححم
بسس نجرب وش ورانا
Author
الفواكه المجففة رهيبة مع اللحوم. بالعكس جدا منطقية لو فكرتي فيها شوي. عندك لحم دسم وعندك فواكه شوي حالية مع طعم كراميل خفيف. الفواكه تستخدم كثير مع الموالح شوفي المطبخ المغربي كمثال لو تبين
هلا اخوي انا من منتدى شمواه بس انا مثلك ادخل الطبخ ولايهمني مسلم ولايهودي انا ابي اكله مابيه يدخلني الجنه ولا النار
عمومآ بجرب هالاكله وبردلك لانها بصراحه جديده وغريبه في السعوديه بيحبون الغريب
اكلة غريبة عجيبة
اتوقع زوجي راح تعجبه لانه يحب الاكل المالح مع الحلو
بس عندي سؤال
تعرف ايش اسم الدوش بالانجليزي
تسلم يدك مقدما
Author
لا لا هو ما يكون حلو .. هو يعطيه حلاوه بالضبط زي إذا قلنا حلاوه البصل المقلي مثلا يعني يكون حلو طعمه بس لسا طبق فيه طعم لحم وكذا…
الدوش يسمونه marjoram
هلا ياشيف
الله يحفظك ويسلم هالايدين ,, فنان ما شاء الله
شيف حبيت اعطيك معلومه على الطاير
انت مشترك في عدة منتديات .. احدها اسمه “شامواه ”
اتمنى ما ترجع تشارك فيه لأنه شيعي مغلف بالعلمانيه للأسف الشديد .. انا ما عرفت هذا الا بعد طرد صديقتي منه بسبب تعليقها على احداث البحرين
تشكرات ياغالي
Author
هلا والله …
والله بكون صريح معك لو اللي يكتب فيه يهود مافرق ههه .. أنا ساحب نفسي من كل شي غير الطبخ ما ودي وجع راس
عجيب غريب رهيب
يعطيك العافيه توب
looks delciuous
لالالالا الا عاد طريقة شغالتكم هذه بالذات ابيها هنا ضروري وابيها بعد ضمن الفعالية
انااحسبها لك عن 5 ايام كاملة ههههه
شوف عاد اذا تبي تقول طمام هذا اصلا ماله طعم حلو اذا صح التعبير . لكن اقصد حلو مثلا من الطبيعي انك تحط زبيب في بعض انواع الرز صح هذا شي متعارف عليه كثير عندنا وكثير من الناس اعرفهم يحبونة وخصوصا لو كان مقلب في شوي زبدة يصير منتفخ وطعمه مركز ومكرمل اذا في اقول عنه لكن انا !!!!noway
مستحيل اتقبل طعمه . في بعد وصفة صينية يحطون اناناس مع الطق المالح ما اكذب عليك اطلبه بل اسوي في بيتي دايم لكن الكل مو بس انا اسحب الاناناس من الطبق .
في بعد صوص اكله في المطعم الصيني رهيب قليلة عليه الان عرفت وشلون يسويها وطول الوقت تشوفها بثلاجتي السر فيها السكر البني <<<يعني حلوة لكن لذيذة
الشي الي ابيك تفهمه من كلامي ان رفضي للمالح مع الحلو ان النكهتين تكون بنفس القوة ومتداخلة .مدري انت تتذوق المالح او الحلو . كانك تاكل حلى وكثرت فيه رشة الملح وش تحس فيه ؟؟؟
عرفت علي جرب مرة سوي لك صنف حلو وزيد كمية الملح وش راح يكون رايك فيه ؟؟هذا نفس شعوري اذا اكلت مالح وطعم الحلو فيه قوي احس اسلاك مخي تتشابك وتضرب الفيوز ههههههه
Author
طريقة شغالتنا خذيها من الحين .. بيض مقلي مقلوب وناشف هههه
الطماط حلو .. وله طعم حلو أو عالأقل مفروض يكون كذا .. إذا ما تصدقين ذوقي الطماط الصغير وهو مستوي وشوفي ..
أنا فاهم وش تقصدين ما يحتاج تشرحين .. بس هنا النقطة .. ليش تشيلين الأناناس ؟ أوكي هو أكلك هههه لا تفهميني غلط كلي اللي يعجبك بس أحس لو شلتيه صار زي أكلات ثانية غيره .. راح الشي اللي يخلي هذا الطبق هذا الطبق ! زي اللي يقنع نفسه إنه يحب السوشي ومايطلب إلا شي مقلي ويغرقة بالصويا عشان يغطي على أي طعم ثاني .. وزي اللي يسوي سيزر ويشيل كل شي يخليها سيزر ويحط بس زبادي وثوم ..
حلى ومالح موب عكس بعض .. ما أعتقد إنه إثبات إنك تقولين خذ حلى وحط عليه ملح وشف كيف يصير ؟؟؟؟
عموما قلتي نقطة حلوه وهي إنك ما تحبين يكون الطعم الحلو قوي بحيث ما تذوقين شي ثاني وهذي النقطة أكيد مهمة بس هنا الفرق بين واحد يعرف يطبخ وواحد لأ .. الطعم في النهاية مفروض يكون موزون بحيث الحلى يكون شي حلو ما يكون شي مزعج ..
في الاول والاخير يسعدني دائما النقاش معك واحد يطبخ وهو يستمتع وهذا صراحة قل ما اجده في حتى النساء من حولي “يطبخون عشان ياكلون بس ”
الفرق بينك وبين ناس كثير هو انه يطبخ لاجل المتعة والتجديد في الوصفات او النكهات بحد ذاته تسلية او على الاقل هذا الي اشوفه فيك
وخصوصا الفعالية اعطتني الشي الي انا فعلا كنت ابحث عنه “وصفات جديدة بنكهات جديدة بافكار جديدة”
لاني مليت من وصفاتنا المللة . رز ومكرونة وايدامات وصواني كلها احسها صارت مثل بعض مافي شي جديد
انا متابعة لك باستمرار وكل ماطبقت شي بعطيك رائي فيه
Author
حياك الله دايما .. ومشكورة على كلامك
ماشاء الله ..
طعم معقد .. عجزت اتخيل كيف بيكون طعمه النهائي..
يعطيك العافية توب شيف
متابعين
شكلها محتاج جراءة عشان الواحد يطبقها تعرف مو كل الناس تتقبل الحلو مع المالح لكن وصفة تستحق التجربة
لكن عندي سؤال لو تتكرم الوصفة هذه ذكرتني” بالقليل” بكور اللحم الي تسويها اقدر اسويها كور واصب عليها الكسترد واخليه سايل نوعا ما “اخففه ” او تشوف اني اطبقها بحذافيرها افضل
شي ثاني بما اني اثق في ذوقك وجربت عدد كبير من وصفاتك هل هي فعلا لذيذه برأيك ام انها نكهة من نوع اخر فقط !!!!انتظر اجابتك
Author
جرأة وزحمة ؟ ليش ؟ أكله تراها موب شي خرافي الواحد لازم يخططله .. الناس أستغرب منهم أحيانا يحطون لنفسهم شروط تعجيزية قبل ياكلون ؟ وش مشكلة الحلو مع المالح ؟ هي بس فكرة في راسهم إن الحلو مع الحلى و المالح مع الموالح .. الواحد لازم يفتح عقله شوي ويتقبل الأكل لأن لو فكرتي فيها زي هذي الأكله ياكلها ملايين الناس هل معقول هذول الناس كلهم خطأ ؟ ولا ماعندهم ذوق ؟ أكيد لاقين شي فيها عشان ياكلونها …
الأكله قريبة من كرات اللحم وقريبة من فطيرة اللحم وقريبة من أكلات ثانيه كثير .. داري إنك تقصدين الخبز و البيض و الحليب بس هذي في أكلات كثيرة ترى .. تقدرين طبعا تسوينها كرات وتطبخينها ليش لأ … اللي فهمته إن هدفك تخلين الكسترد صوص كريمة بدال ما يكون كسترد ثابت .. ماراح يكون القوام حلو لو سويتي الكسترد كذا لأنه بيكون شوي غريب ..
السؤال الأخير أغرب سؤال مر علي ؟؟؟؟؟؟ ليش آكل شي لمجرد إنه “غريب؟؟؟؟؟؟؟” الهدف من الأكل هو الطعم أولا وأخيرا …
ما اشوف انه اغرب سؤال لكن بجد في ناس تحب تاكل او تجرب وصفات جديده فقط لانها تبي تجرب شي جديد لذيذ او لا مو مهم عندها بقدر متعة التجربة هذا بحد ذاته يشوفون انه شي رائع
اما ان الطعم الحلو مع المالح ما اقول انه خطأ لكن انا مثلا ما ناسبني مو معنى هذا اني انا غلط لكن
اقول انه ما ناسبني جربت وصفات كثيرة ماحبيتها تقدر تقول اني غلط!!!المسألة مجرد اذواق
ابداً مو فكري مغلق بالعكس اطبخ هندي وصيني ومكسيكي ومستمتعة جدا جدا بالفعالية وكل يوم ادخل واشوف جديدك ويسعدني دائما اكون متواجده في صفحاتك اقلب بينها واحسد نفسي كثير اني تعرفت على شيف مثلك
الله يسعدك بالصحة والعافية ويديم عليك رضاه ويكفيك شر الناس والشيطان
Author
صحيح معك في هذي أنا أحب أجرب و حتى لو ما أعجبني أحب أعيد أجرب في مكان ثاني عشان أتأكد إنه ما أعجبني وكل شي .. بس ماراح أنزل وصفة هنا ما أعجبتني هذا اللي أنا أستغربت منه ؟ ليش بحطلك وصفة هنا أنا ما أبي آكلها ؟؟
أنتي تقولين إنك ما تاكلين حلو مع مالح .. بس لو دققتي في أكلك متأكد بتلاقين أشياء حلوه كثير فيه .. هي ببساطة أنتي تعودتي إن هذي المكونات في القائمة البيضاء لا أكثر .. أعطيك مثال .. أنا متأكد إنك تاكلين طماط و الطماط حلو و الطماط فاكهة و يعطي أي أكله حلاوه .. سواء كانت صوص بيتزا أو باستا الطماط حلو ! .. طيب ليش ما قلتي إنك ما حبيتي الطماط هنا ؟ لأنك تعودتي على هذا الطعم من زمان وصار عندك شي بديهي .. هذا اللي أقصده بتفكير مقفل إن الواحد يرفض يدخل شي جديد أو طعم جديد على أكله .. لو قلتلك حلى بالطماط وش بيكون أول رد فعل لك ؟ أو لغالبية الناس منيب أقصدك بالذات..
إن الواحد يفتح عقله ويتقبل أكل مايعني بس إنه يطبخ أكل من بلدان ثانيه .. اللي أقصده هو فكرة إنك تدخلين مطعم مثلا وتطلبين شي تعتقدين إنك ما تحبينه أو مستحيل تجربينه وتاكلينه وبكل حياديه تحكمين على طعمه.
هو شي موب سهل ، وشي موب لكل الناس بعد أكون صريح معك .. فيه ناس تحب تذوق وتتعرف على الأكل بشكل أحسن وهذا يمثل متعة بالنسبة لها وفيه ناس بس تبي تاكل لا أكثر ..
نقطة أخيرة بقولك إياها .. هو إن طول حياتي تفكيري كان كذا وتغيرت قريب يعني فاهم بالضبط وش تقصدين… ماكانت آكل سمك ني ، ماكنت آكل أغلب الأكل الصيني و الياباني ، طبعا أكل أندونوسي وغيره كان مستحيل آكله ، ماكنت آكل شي من البحر إلا السمك و الربيان ! ، الأفوكادو ماكنت آكلها ، الزبدة ماكنت آكلها ، البيض كان لازم يكون مطبوخ بطريقة خاصة جدا ماتعرفها إلا شغالتنا ههههه …
[…] جنوب أفريقيا : بوبوتي […]
[…] جنوب أفريقيا : بوبوتي […]