«

»

مارس 03 2011

صلصة الطماطم الأساسية .. Basic Tomato Sauce

هلا والله …

 

أغلب الصوصات الموجودة هي عبارة عن تفرعات من صوصات أكبر وتعديلات عليها، هذي الصوصات الكبيرة يسمونها الصوصات الأم في الطبخ وهي تنعد على الأصابع. صوص الترتار مثلا ( اللي يتقدم مع السمك ) واحد من تفرعات المايونيز اللي هو صوص أم. صوص الجبن أو المورنيه (اللي سوينا فيه الماك آند تشيز) هو واحد من تفرعات الباشاميل اللي هو صوص أم بعد. تعلم كل التفرعات هذي عملية مستحيلة كونها كثيرة وكون كل شخص له طريقة خاصة فيها،  بس تعلم الصوصات الأم وكيف نسويها صح وكيف نعدل عليها عملية ممكنة ومهمة.

 

اليوم راح أتكلم عن واحد من أهم الصوصات الأم اللي هو صوص الطماط الأساسي. هذا الصوص له إستخدامات كثير في الطبخ وموب بس في المطبخ الإيطالي و الفرنسي.  بعد أساسها هذا الصوصبعد هذا الموضوع راح أوريكم تفرعات و إستخدامات كثير لهذا الصوص. بس قبل نتكلم عن تفرعاته و إستخداماته لازم نتعلم كيف نسويه صح ! بدون أساس صح أي تفرع نسويه منه ماراح يكون بالمستوى المطلوب.

 

كثير ناس يشترون الصوص هذا من السوبرماركت إما لكسل أو لأن تجاربهم السابقة في إنهم يسوونه ماكانت في المستوى المطلوب. فيه آلاف الوصفات في النت لهذا الصوص وكثير منها إلى يومك أحاول ألاقي تفسير لكثير من الخطوات. مثلا نفرم طماط في الخلاط ونحطه في قدر مع نص علبة صوص طماط جاهز ؟ طيب وش الفايدة هنا ؟ ليش أستخدم صوص طماط من السوبرماركت عشان أسوي صوص طماط في البيت ؟ كأني أخلط شوربة كنور مع شوربة البيت عشان أسوي شوربة جديده ؟؟ طبعا غير الإضافات اللي بعد مالها داعي مثل الماجي و الزبادي !!! المشكلة في كل هذي الطرق و اللي يقهرني أكثر هو إنها أصعب ومقاديرها أكثر من الصوص الأصلي ! و الطعم بعيد تماما عن الصوص الأصلي بعد. الصوص جدا سهل ومقاديرة متوفرة في كل مكان و أي واحد يقدر يسويه.

 

السر عشان نسوي هذا الصوص صح هو إننا نختار أحسن مكونات متوفرة وبعدين نطبخها مع بعض بطريقة صحيحة. الطماط هو يمكن أهم مكون هنا وراح أستخدم طماط معلب لهذي الوصفة. الطماط موسمة جدا قصير (من شهر ٦ – ٨ ) برا موسمة الطماط ماله أي نكهة طماط وما فيه حلاوة زي إذا كان في موسمة بعكس الطماط المعلب اللي يكون معلب في عز موسمة وراح يحافظ على نكهته إذا كان من نوعية جيدة في الأساس وكان معلب بطريقة ممتازة. حتى في موسمة موب دايما نلاقي طماط زي الناس. سبب ثاني يخلينا نستخدم معلب هو إن الطماط المعلب مقشر جاهز لو أستخدمنا طماط طازج لازم نسلقة أول شي بعدين نقشرة قبل ما نستخدمه.

الطماط المعلب بيجي بأنواع كثير بعضها مقطع و بعضها كامل و بعضها مطبوخ وبعضها مع بهارات أو أعشاب.. أختاروا النوع اللي يكون كامل. المقطع و اللي مع أعشاب وغيرة يستخدمون فيه أسوأ أنواع الطماط كون الطعم راح يتغطى بالإضافات اللي يحطون.

غير كذا دوروا على علب طماط بدون أي إضافات .. أقرأوا المكونات حقت العلبة وشوفوا وش حاطين معها.. إذا لقيتوا مكتوب “حامض الستريك” أو citric acid مع المكونات أو لقيتوا “ملح” أو “كلوريد الصوديوم” salt , sodium chloride بعدوا عنه .. هذي موب مواد ضارة هذي كلها طبيعية بس هي تنحط مع الطماط عشان تخليه يستوي في العلبة في حال ماكان مستوي على الشجر وهذا معناه إن الطماط موب من نوعية جيدة وغالبا بيكون حامض وبدون نكهة طماط قوية. المكونات المكتوبة مفروض تكون طماط وعصير طماط بس ! .. لاحظوا إن الطماط المعلب مافيه أي مواد حافظة زي ما يعتقد كثيرين !

 

tomato sauce

لاحظوا المقادير .. طماط كامل وعصير طماط بس !

 


 

 

المقادير :

 

٦ علب طماط معلب

نص علبة معجون طماط (صلصة) ، تقريبا ٣ ملاعقة كبيرة

بصلة كبيرة مقطعة صغار

٦ فصوص ثوم مقطعة شرايح نحيفة

رشة ملح

زيت زيتون من أحسن نوعية عندكم

رشة فلفل أسود

ريحان طازج ( إختياري بس راح يسوي فرق كبير و أنصحكم تدورونه ولو مرة وحدة ) .

 

* لاحظوا مافيه أي بهارت قوية أو أعشاب قوية زي الروزماري أو غيره.

* لاحظوا بعد إن مافيه أي سكر !

* الثوم ما نستخدم ثوم مفروم ! نقطع الثوم شرايح نحيفة كل ماكانت نحيفة أكثر أحسن. لو الثوم كان ناعم بينحرق وبيعطي طعم مر.

* لاحظوا بعد الطاحونة اليدوية اللي في الصورة عاليسار .

 

tomato sauce


sliced garlic

 

 

الطريقة :

 

١ـ في قدر ستانلس ستيل ثقيل ، نسخن شوي زيت زيتون على حرارة هادية بعدين نحط البصل مع رشة ملح ونطبخهم إلين يذبل البصل ويقلب شفاف تقريبا ٥ دقايق. لا تخلونه يقلب ذهبي و لا تستخدمون قدور ألمنيوم إذا جيتوا تطبخون طماط ، الألمنيوم يتفاعل مع الأشياء الحامضة زي الطماط وبيعطي صوص طماط لونه غريب وطعمه معدني. مهم بعد إن القدر يكون ثقيل من تحت عشان ما ينحرق الصوص وهو يطبخ.

 

تذبيل بصل

 

٢ـ الحين نحط الثوم و نطبخه إلين تطلع ريحته بس تقريبا ٣٠ ثانيه.

 

٣ـ الحين نحط معجون الطماط ونطبخه شوي تقريبا دقيقه .

 

٤ـ الحين نحط الطماط عالصوص. بس قبل ما نحطه لازم نشيل البذور اللي داخل. البذور حقت الطماط تعطي الصوص مراره وعشان كذا لازم نشيلها. أسهل و أفضل طريقة إننا نشيلها هي إننا نستخدم الطاحونة اليدوية ( اللي في الصور تحت وفوق )  بأصغر قرص لها نطحن الطماط فيها وبنلاقي إن البذور و الألياف حقت الطماط باقيه. لو ماعندنا طاحونة نصفي الطماط من العصير في صفاية بعدين نمسك الطماط حبة حبة ونقطعة بالنص ونشيل البذور اللي داخل بيدنا بعدين نقطع الطماط صغار ونحطه هو والعصير اللي صفيناه عالقدر عشان نكمل الصوص. طيب ليش ما نستخدم خلاط عادي أو خلاط مولينكس مثلا  ؟ الخلاط راح يطحن كل شي مع بعض ويعطينا شي أقرب ما يكون عصير طماط وما راح يثقل ويصير صوص زي هنا ..

 

tomato sauce

 

 

٥ـ نطبخ الصوص على غلية جدا خفيفه مع التحريك من وقت لوقت إلين يثقل ويوصل الثقل المطلوب بياخذ من ٢٥-٥٠ دقيقة تقريبا حسب عرض القدر وكمية الصوص اللي سوينا.

 

٦ـ بعد ما يخلص الصوص نطفي النار ونحط رشة ملح ورشة زيت زيتون ورشة فلفل ونقطع شوي أوراق ريحان معه وبس هذا الصوص .. تبون تعدلون عليه أو تبون تستخدمونه زي ماهو (على باستا مثلا مع رشة زيت زيتون و بارمزان وصار عندنا صوص مارينارا ) .. تبون تغمسون خبز فيه .. تبون تقدمونه مع دجاج أو سمك أو لو تبون تطبخون رجل عجل فيه وتسوون أكله مشهورة يسمونها أوسو بوكو .. الخيارات كثيرة ..

 

 

 

الحفظ

 

 

الصوص هذا أخليه دايما عندي زي المرق بالضبط ما يدري الواحد متى يحتاجه عشان كذا في الغالب أسوي كمية كبيره و أحفظه. بيعيش تقريبا شهر في علبة تتقفل بإحكام في الثلاجة. أو تقريبا ٦ شهور أو أكثر في الفريزر.

 


عن الكاتب

Top Chef

42 comments

10 pings

Skip to comment form

  1. غير معروف

    مرحبا شيف
    شكرا على الوصفة بصراحة جدا مريحة وصارت معتمدة عندي لكن عندي سؤال محرج صراحة.
    انت قلت ان الصوص ممكن يبقى لشهر بالثلاجة ببرطمان محكم الإغلاق طيب.. انا بقا معاي شهرين بالثلاجة بدون مايعفن واستخدمته ” أوبس!!”
    فهل أنا خاطرت بصحتي من هالناحية أو أبطل هالعادة وأرميه بعد شهر حتى لو ماخرب.
    وهل ممكن تتغير خواص الصوص وطعمه لما ينترك هالوقت بالثلاجة؟

    1. Top Chef

      بإمكانك تطلعينه من العلبه وتغلينه كم ثانيه وترجعين تحطينه في علبه نظيفه وبيعيش معك بهذي الطريقة سنين بدون مشاكل. يوم نقول شي بيعيش مدة فلانية في الثلاجه فهذي بس أوقات تقريبية ، إحنا ما نقدر نتنبأ بشكل دقيق متى شي يفسد أو متى بكتيريا تتكاثر على شي بحيث توصل كميات خطرة على صحة الشخص وبعد اللي يخلي شخص يمرض أو لأ هو قوة مناعته فعشان كذا إحنا بس نعطي وقت تقريبي وناخذ إحتياط كبيييير بعد فيه. أفضل تمشين على أوقات الحفظ المكتوبه ولو لقيتي أي أي تغير في الشكل أو الريحة أو اللون علطول أرميه حتى لو كنتي شاكه في الموضوع.

  2. samiah

    انا مشكلتي استخدمت طماط طازج ما طلعت معي مثل الصوص اللي استخدمته انت في الباستا و كرات اللحم قطع البصل و الثوم و الطماط و اضحه ما ذابت مع بعض اش الحل اضيف ماء ممكن تفيدني

  3. samiah

    طيب انا استخدمت طماط طازج و قشرته و كل شي اضيف ماء و لا ايش الحل لان انا صلحته و طالعه معي مثل طريقة التكشين يعني مو سايله البصل و قطع الطماط و الثوم واضحه في الخلطه يعني ماجات معي سايله مثل اللي انت مستخدمه في الباستا و كرات اللحم

    1. Top Chef

      غالبا بسبب نوعية الطماط. إن كنتي مسويتها قبل كم يوم فإحنا في عز الشتاء وين تلاقين طماط زي الناس ذا الوقت من السنة ؟ أستخدمي طماط معلب أضمن والطعم أفضل صدقيني.

  4. سعيد

    البصل عادي بصل احمر؟

    1. Top Chef

      أكيد عادي

  5. M

    السلام عليكم .. اخ خالد ..

    ما شاءالله على الابداع اول شي والله يوفقك يارب … نادر ما نلاقي حب للطبخ عند الرجال السعوديين … وانا احترم واقدر طبخ الرجال .. دايم له ميزة غير عن طبخ الحريم .. ما اقول افضل او اسوأ .. أقول حلو التغيير .. وكثيييير سعيدة بمدونتك وموهبتك ..

    ثاني شي .. وانا اقرا الموضوع تبع صوص الطمام قعدت اضحك لسبب واحد .. لانه الطريقة الوحيدة الي لو الوالدة عطتني مهمة الطبخ في البيت واشتهيت اكله ايطالية فيها الصوص هي هذي الطريقة .. احب طبخي يكون مميز .. وكل مرة اجرب شي جديد او اضيف نكهات من دون ما اوزنها لاني احب استطعم .. ضحكت انه طريقتي صحيحة بنسبة كبيرة .. وانها تندرج عن دراسة خلينا نقول واستفد اكثر انه كيف اضبطها مية بالمية ان شاءالله …

    ثالثا … المشمووم يا عالم تراه نبات زراعي قوي الرائحة يستعملون اهل الشرقية اكثر شي للزينة سواء في البيت او الشعر .. ولا يمت بصلة للريحان الي الشيف هنا يتكلم عنه .. وما قد سمعت انه في احد ياكل مشموم !!
    الريحان بالخليجي يعني “حبق” مدري عاد ايش يسمونه باقي مناطق السعودية وهو الي يستعمل بعد فيه الشاي في المنطقة الشرقية… الفرق اللهم في الشكل ويختلف قوته وطعمه اختلافات بسيطة .. انتو جربوا النوع الي متعارف في منطقتكم الى ان يعجبكم النسبة الي حطيتوها .. مو خسرانين شي .. مو لازم الريحان الي تشوفونه في التلفزيون ينطبق حرفيا لوما لقيتوه عندنا في السوق .. كل بلد ولها محاصيلها .. الريحان الايطالي اتوقع اخف حدة من الريحان الخليجي عشان كذا يكون طعمه احلا في الطبخ وما يطغى على باقي النكهات بس ما يمنع نجرب الريحان الي عندنا..

    ان شاء الله ما يزعل مني الشيف خالد على مداخلتي .. بس من حبي للطبخ الجيد وعشقي اللامنتهي للاكل وتجربة النكهات المختلفة.. حبيت افيد واستفيد..

    وسامحوني على الاطالة

    بالتوفيق

    1. Top Chef

      محد يقدر يذوق اكل ويعرف هذا طبخ حرمه او طبخ رجال صح ولا لا ههههه على هذا نقدر نقول ان فيه آدمي يعرف يطبخ وفيه آدمي ما يعرف يطبخ او بالاصح ما تعلم يطبخ بغض النظر هو حرمه او رجال هذا ماله اي دخل. من ناحية الطبخ كمهنه الرجال مسيطيرين لسبب وحيد وهو انها متعبه للحريم وقلة يقدرون يستحملون العمل بشكل تجاري

      بالنسبة للريحان والمشموم بدون ما ان احد يأشرلي على شي ويقولي هذا مشموم مقدر صراحة اعرف كلامك صح او خطأ. السبب هو اختلاف التسميات وتشابه الاشكال. الحبق هنا هو نبات اقرب شي له النعناع بس بطعم جدا حاد وبعيد عن الريحان بس في الشام مثلا يسمون الريحان اللي احنا نسميه ريحان حبق ويسمون الريحان لنبات ثاني هههه طبعا اذا في السعوديه تختلف التسميه من الشرق للغرب فلك ان تتخيلي.

      حسب ماكثار قالولي الريحان كثار يسمونه مشموم بس انا عن نفسي ما اعرف بشكل اكيد. انا اقدر اشم نبته واقولك هي وشو بس التسميات ضعت فيها الصدق ههههه

  6. مستعجل

    هلا أخوي خالد
    ممكن سؤال
    الصوص بعد ما ينتهي ممكن أحطه بالخلاط ؟
    عشان يصير سائل فقط ؟

    1. Top Chef

      أكيد ممكن ….

  7. Majd

    يسعد مساك شِف

    سؤالي في الخطوة الرابعة :

    ١- ما عندي العصارة تبعتك ينفع بعد ما أطلع البذور أبشر الطماطم بدل ما أقطعها صغار ؟

    ٢- وهل أستخدم الصوص (الي يجي بعلبة الطماطم) كله ولا نصه ولا علبه وحدة ؟

    ٣- في الصورة الثانية بالموضوع فيه شي جنب السكينة هذا وش استخدامه ؟

    ** الملاحظة الي حطيتها عن حمض الستريك جدآ مفيدة .. وبالفعل لما رحت اشتري الطماطم لقيت كذا نوع وكلها بالملح أو حمض الستريك ما عدا واحد فأخذته ..

    يعطيك ربي العافية .. وشكرا ..

    1. Top Chef

      هلا والله ….

      ينفع بس ما يفرق أبدا هو كله بيذوب في النهاية .. يمديك حتي تكتفي بإنك تقطع الطماطم بيدك بس بدون سكين هو بيذوب في الصوص.

      أستخدم أكيد المويه حقت الطماط ، كل العلبة تستخدم بإستثناء البذور.

      هذي عصا تعديل السكين (أرجع لموضوع السكاكين إذا تبي معلومات أكثر) ، ناس يسمونها مسن بس هي موب مسن هي بس ترجع شفرة السكين لمكانها الطبيعي وتستخدم وقت الطبخ دايما عشان سكينك تقعد حاده.

  8. امل

    بالنسبه للبذور انت ذكرت انها تعطي مراره
    هل هي تعطي مراره اذا انطحنت او مجرد مانه تنطبخ مع الصوص بتعطيه مراره
    لانك ماذكرت انك تشيله او حتى تنخلها في المطحنه اليدويه

    1. Top Chef

      بمجرد الطبخ وتزيد مع الطحن.

      أقري الخطوة الرابعة في الوصفة شرحت زييييييين كيف تنشال ….

  9. معلمة مظلومة

    جزاك الله خير ودي اعرف شكل الريحان هل هو اللي يستعملونه اهل الحنوب والا لا
    اذا ممكن صورته

    1. Top Chef

      الريحان له أشكال كثير بس هو معروف. ممكن إستخدام حق أهل الجنوب أكيد طبعا …

  10. fofo lovely,, (@Falcon_jap)

    سؤال اقدر استغني عن الثوم ,, لآن اللي عندي ابدن مايحبونه ,, بسس حسافة ,, يبين طعمه طيب ؟؟

    1. Top Chef

      سؤال غريب احيانا صراحة. لو ما يبين طعمه ليش نحطه ؟

      تقدرين تشيلينه لو تبين بس موب شي انا بسويه.

  11. sa7arm

    للمعلومية.. المشموم اللي ينزرع عندنا في الحدايق وريحته قوية وتنبت له ازهار طويلة من فوق ما يناكل وطعمه غير مستساغ..

    الريحان المقصود للطبخ تحصلونه غالباً في السوبرماركت او اذا كنتوا مجربين تزرعونه بالبيت.. انا جربت فترة وطلع معي عال العال ..

    بخصوص الطماطم المعلبة ممكن اعرف اكثر ماركة تستخدمها؟

    1. Top Chef

      أنا ما أعرف المشموم قالولي كثار إنه هو الريحان بس ما أعرف هل هو نفسه أو لأ وفي الأعشاب دايما فيه إختلاف واحد يأشر على ريحان ويقول حبق وواحد يأشر عليه ويقول ريحان وواحد بيأشر عالحبق اللي نعرف ويقول نعناع !!

      بالنسب للريحان الريحان أنواااااااع !! الريحان أنواع كثييييييييييييييييره وفكرة إن اللي ينوكل بس حق السوبرماركت هذي خطأ في خطأ. الريحان حق السوبرماركت هذا يسمونه ريحان إيطالي أو ريحان جنوا وهو أكثر شي منتشر في أوروبا و أمريكا بس هو موب الوحيد !!! عموما ياما جربت ريحان من اللي ينزرع من الحدايق شي لونه بنفسجي وشي أخضر وشي ورقته نحيفه وشي عريضه مدري هل هو مشموم أو لأ بس كان طعمه دايما ممتاز وريحان وهذي متأكد منها.

      أمشي عاللي كاتب في الموضوع ماعليك من الماركه.

  12. ام عبدالله

    السلام عليكم
    معلومات مفيدة بصراحة يعطيك العافية .. حبيت اوضح نقطة المشموم غير الريحان .. المشموم يكون ريحته قوية وشديد المرورة واستخدامه للعطور مو للاكل .. اما بالنسبة للريحان الموجود في اسواق الخليج ريحته شوي نفاذة وطعمه بيه مرورة واوراقه فاتحة وصغيرة عكس الريحان اللي احنا نستخدمه في العراق تكون نكهته غير نفاذة وطعمه مابيه مرورة ورقه كبير نوعا ما ولونه غامق وطعمه ونكهته جدا رائع مع البيتزا

  13. ريفاند

    السلام عليكم الف الف شكر لجهودك وجعلها الله في ميزان حسناتك يارب اتمنى منك طلب واحد انك تنزل طريقة مكعبات الماجي والمايونيز المنزلي والكاتشب فضلا لا أمرا

    1. Top Chef

      وعليكم السلام و الرحمة ….

      ما تحتاجين مكعبات ماجي. أفهمي أول وش الماجي ؟ قبل ٥٠ أو ٦٠ سنة ماكان فيه شي إسمه ماجي كان فيه شي إسمه مرق دجاج وشي إسمه مرق بقر ومرق عجل ومرق أي شي ثاني تبينه وكان يستخدم هذا المرق في كل شي إما عشان نسلق لحم فيه مثلا أو لشوربة أو لصوص أو كذا.

      كون الناس يستصعبون صناعة مرق في البيت جت شركات زي ماجي وسوت مرق وباعته عالناس. بعض الناس ما يبي يشتري كمية مرق سايل فراحوا سوولهم مكعبات عبارة عن مرق دجاج مجفف وأنتي وقت الطبخ ترجعين المويه له (زي الحليب المجفف) ويصير عندنا مرق. السؤال هو إذا بنسوي المرق في البيت ليش نجففه ؟ إحنا ما نحتاج ماجي إحنا نقدر نسوي مرق مرق صدقي وأطعم من أي شي يسوونه ماجي بعد. دوري في المدونة نزلت موضوع عن أساسات عمل المرق وشرحت كل شي بالتفصيل الممل.

      المايونيز صوص أساسي وراح يكون له موضوع إن شاء الله.

      الكتشب تلاقين طريقته في صفحة الوصفات.

  14. Ashwaq Al-Ghamdi

    =) الله يعطيك العافيه .. لكن ليت حطيت الشكل النهائي لشغلك
    جزاك الله خيراً .. معلومات جميلة أستفدتها من الموضوع
    وإن شاء الله أجرب طريقتك

    1. Top Chef

      شكل نهائي لأيش بالضبط ؟ الصوره كانت موجوده عندي بس عطيني فايدة وحده من إني أحد صوره صحن فيه صوص أحمر ؟ الصور أحطها للتوضيح بس وهذي ما تزيد شي برأيي

  15. الاوتار

    مشكور على الوصفة واقدر اسوي فيه بطاطس وكرات لحم ورايح الحين لكورات اللحم

  16. zainab1985

    مرحببا
    توني اتناقش مع الوالدة على موضوع الريحان
    مدري اذا نفسه الي نسميه مشموم بس اسمع ان اسمه الثاني ريحان
    الي معنا طعمه عططططري قوووي
    كذا مرا احاول اجرب اكله احس اني اشرب عطر
    ذاا غير ان الي اشوفهم يستخدموه في الطبخ لون ورقه كبير و اخضرر
    الي معنا يضرب على بنفسجي و اخضرر دااكن !
    السؤال هل الريحان نفسه المشموم؟

    1. Top Chef

      والله ما أعرف المشموم بس الريحان معروف أحس ؟ هل هم نفس الشي أو غير ما أعرف الصراحة.

      الريحان زي كل الأعشاب طعمه مر لحاله هو ينحط مع الأكل في آخر مراحل ويعطر الأكل بشكل قوي.

      الريحان أنواع كثير ، اللي تقصدين أوراقه عريضه هذا ريحان جنوا أو ريحان إيطالي بس فيه غيره أنواه كثيره مره.

  17. abeer

    الريحان هو المشموم
    وشلون ينأكل ذا

    1. Top Chef

      وش المانع في أكله ؟ إذا طعمه حلو وما يضر ويجوز ؟

  18. نور

    عندي سؤال/ ممكن نسوي الصوص بس بطماط فرش؟
    ادري النكهه غير بس فيه طريقه تعدل لي النكهه بحيث انها تصير قريبه من الصوص اللي مسوينه بطماط معلب
    لاني ما احب المعلبات

    1. Top Chef

      الطماط طماط ، النكهة وحده .. السؤال هو تقدرين تجيبين طماط طازج زي الناس ؟ غالبا لأ عشان كذا نستخدم معلب .

      التعليب طريقة حفظ لا يهمك كل الكلام اللي تسمعينه إنها مضره أو غيره هي تعتمد على الشي اللي تعلبينه .. بعض الأشياء تحتاج مواد حافظة و إضافات بس الطماط موب واحد منهم . لو كان مثلا سبانخ أو ذرة يمكن معليش بس طماط ما أشوف وين المشكلة إن الواحد يستخدم معلب ؟

      لو مصره عالطازج لازم تسلقين الطماط قبل وتقشرينه حبه حبه . حطي علامة + بالسكين في جهة من الطماط بعدين أسلقيه ٣٠ ثانية وبعدين حطيه في مويه بارده وبتلاقين القشر طلع بسهولة بعد ما تسوين كذا بكل الطماط اللي عندك سويي زي ما قلت في الموضوع

  19. غير معروف

    شيف سويت صلصتك وكانت حلوه وبالفعل اول مره من بديت اطبخ طعمها حلو مو زي مااعرفها حامضه

    لكن الشي اللي بهذلني شوي درجة كثافتها ؟؟؟؟ لاني لمن سويتها كنت ابيها للبيتزا وبنفس الوقت لطبخات ثانيه فكانت كنها مرق مو كثيفه ؟؟؟

    الشي الثاني شغله اني اصفي ومعرف ايه متعبه جدا الاله اللي معك احسها راح تشيل نص الشغل وتريحك

    اشكرك والله

    1. Top Chef

      في الغالب ما طبختيها وقت كافي بس .. هذا اللي يخليها خفيفه كل ما طبختيها أكثر مويه تتبخر أكثر و بتلاقين طعم الطماط صار أقوى و صارت أثقل لدرجة إنك لو طبختيها وقت طويل مره مره (تقريبا ساعتين) بتلاقينها صارت زي المعجون حتى .

      شغله إنك تصفين ؟؟ المسألة ماتاخد ٥ دقايق على ٦ علب ؟ الآلة اللي معي هذي طاحونة يدوية لها إستخدامات كثير مره غير الصوص هذا. غالبا بتلاقينها في أي محل أواني منزليه .

  20. غير معروف

    صادق الاوريجانو هو اللي طعمه قوي موب الريحان لخبطت انا …

  21. غير معروف

    اها اا لالا اجل الريحان في حوشنا الحمد لله وانا احبه طعما ورائحتنا ..

    بس ماتلاحظ شيف ان الريحان لمن يكون طازه يكون طعمه بالاكل احسن من لمن يكون مجفف
    ونشتريه بهار جاهز ..بالنسبه لي احبه طازه ولا اذوقه مجفف يصير طعمه قوي بالحيل …

    الله يسلم ايديك يارب

    1. Top Chef

      حلو .. حظك أجل .. أنا في السعوديه بالموت ألاقيه .. حتى جربت أزرعه مره بس سافرت قبل ينبت هههه ….

      الريحان بالذات مستحيل مستحيل أستخدمه مجفف ، ماله أي طعم .. الأوريجانو المجفف بالنسبة لي أطعم من الطازج ، صح طعمه شوي غير عن الطازج بس أشوفه أقوى و أحلى .. الريحان و النعناع و البقدونس هذي مستحيل أستخدمها مجففه.

  22. غير معروف

    السلام عليكم

    طيب انت قلت 6 علب وانت حاط 4 علب ؟؟؟

    الشي الثاني وش قصدك بالريحان ياليت تدورونه ؟؟

    هو في حوشنا لايكون الريحان اللي تقصد له مواصفات خاصة ؟؟؟غير انه طازه

    1. Top Chef

      وعليكم السلام ….

      ماعليك من الصوره … أنا حاط ٤ فصوص ثوم وهي ٦ ؟ الصوره صورتها من سنة ونص تقريبا مدري ليش ما حطيت العلبتين الثانيه ؟ يمكن صورتها و الأكل في القدر ؟ ناسي والله …

      الريحان ريحان ؟ نفس اللي في الحدايق .. بس كثير ناس مايلاقونه .

  23. غير معروف

    الله يسعدك متى دور المرق بديل الماجي نحتاجه كثير

    1. Top Chef

      هلا والله …

      موضوعه مهم و أبغى أعطيه وقته صراحة .. وحاليا مضغووووووط مره ….. بس إن شاء الله قريب …

  1. صوص الروزيه ( كريمة الطماطم ) .. Rosée Sauce » Top Chef Blog .. مدونة توب شيف

    […] « صلصة الطماطم الأساسية .. Basic Tomato Sauce […]

  2. صوص البوتتانيسكا .. Puttanesca Sauce » Top Chef Blog .. مدونة توب شيف

    […] الإيطالية .. Italian Pizza » Top Chef Blog .. مدونة توب شيف على صلصة الطماطم الأساسية .. Basic Tomato Sauceحشوة الريكوتا و السبانخ .. Ricotta and Spinach Filling » Top Chef Blog .. […]

  3. البيتزا الإيطالية .. Italian Pizza » Top Chef Blog .. مدونة توب شيف

    […] .. Ricotta and Spinach Filling » Top Chef Blog .. مدونة توب شيف على صلصة الطماطم الأساسية .. Basic Tomato Sauceكريم تشيز فروستنج .. Cream Cheese Frosting » Top Chef Blog .. مدونة توب […]

  4. حشوة الريكوتا و السبانخ .. Ricotta and Spinach Filling » Top Chef Blog .. مدونة توب شيف

    […] ، أو حتى في اللزانيا) . الحشوة تمشي بشكل حلو مع صوص الطماط الأساسي ( ومشتقاته ) ومع صوصات الزبدة الذايبة. الحشوة لها […]

  5. البيتزا الإيطالية .. Italian Pizza « مدونة توب شيف … Top Chef

    […] راجعلكم. شخصيا أستخدم صوص الطماطم الأساسي اللي سويته هنا  بعد ما أطبخة زيادة وأخليه أثقل شوي ويمكن أزيد عليه ثوم […]

  6. إيطاليا : كرودو التونا .. Tuna Crudo « مدونة توب شيف … Top Chef

    […] هو الشي المشترك تقريبا في كل أكلهم. لو أخذنا شي بسيط زي صوص الطماط الأساسي  نلاقي إن المقادير الأساسية له سهلة وتافهة (طماط ، ثوم ، […]

  7. حشوة الريكوتا و السبانخ .. Ricotta and Spinach Filling « مدونة توب شيف … Top Chef

    […] ، أو حتى في اللزانيا) . الحشوة تمشي بشكل حلو مع صوص الطماط الأساسي ( ومشتقاته ) ومع صوصات الزبدة الذايبة. الحشوة لها […]

  8. صوص البوتتانيسكا .. Puttanesca Sauce « مدونة توب شيف … Top Chef

    […] صوص البوتتانيسكا تفرع ثاني لصوص الطماط الأساسي. طريقة الصوص الأساسي هنا. […]

  9. صوص الأرابياتتا .. Arrabiata Sauce « مدونة توب شيف … Top Chef

    […] الأرابياتتا تفرع ثاني مشهور من صوص الطماط الأساسي. موجود هنا . […]

  10. صوص الروزيه ( كريمة الطماطم ) .. Rosée Sauce « مدونة توب شيف … Top Chef

    […] الصوص واحد من تفرعات صوص الطماط الأساسي هنا […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: