«

»

أبريل 11 2011

كيكة الآنجل فوود .. Angel Food Cake

هلا والله …


كيكة الأنجل فوود أو طعام الملائكة عبارة نوع من أنواع الكيك الأسفنجي. هذي الكيكة تتميز عن كل أنواع الكيك الثانيه بإنه مافيها أي نسبة دسم ٠٪ ولا شي !! ومع هذا الكيكة خفيفه ولينه إذا تسوت صح. سبب التسميه هو طبيعة الكيكة البريئة إن صح التعبير ، كونها خفيفه وبيضاء وبنفس الوقت بدون أي دسم .. في المقابل فيه كيكة ثانيه اللي هي تقريبا عكس هذي الكيكة وهي كيكة الديفل فود أو طعام الشياطين ههه devils food cake اللي هي عبارة عن كيكة شكولاته دسمه مره و ثقيلة عكس كل شي تمثله هذي الكيكة ..


الكيكة تعتبر كيكة إسفنجية sponge cake وهذا يعني إنها مرفوعة ببيض ، الكيكة مافيها أي مواد رافعة غير بياض البيض وعشان كذا مهم إن المرانج اللي نسويه يكون مضبوط صح. وشلون تنفش الكيكة بدون مواد رافعة ؟ السر في الهواء المحبوس داخل المرانج . الهواء داخل المرانج يتمدد في الفرن وهذا يرفع الكيك ويخليه خفيف نفس العمليه هي اللي ترفع السوفليه و الكيكات الإسفنجية الثانيه .  بياض البيض فيه مشكلة وهو إنه ينشف ويصير حجر إذا ماكان معه دهن وهنا يجي دور السكر اللي يلين الكيك ويخليه رطب حتى بعد ما يطلع من الفرن .


المقادير :


كوب ونص سكر مطحون

١/٤ ملعقة صغيرة ملح

كوب طحين كيك منخول

١٢ بياض بيض على حرارة الغرفة بدون أي أي نقطة صفار

١/٣ كوب مويه دافيه

ملعقة صغيرة فانيلا سايلة أو عود فانيلا زي ما سويت أو أي خلاصة نكهة تحبون

ملعقة صغيرة ونص كريمة ترتار

* السكر هنا لازم سكر بودرة ماينفع السكر العادي


* طحين الكيك ضروري لهذي الوصفه . طحين الكيك هو طحين مصنوع من قمح لين أو قمح صيفي ويجي مطحون أنعم و مبيض و فيه بروتين أقل من الطحين العادي أو طحين الخبز. البروتين هو اللي يخلي الكيك قاسي وكون طحين الكيك فيه بروتين أقل هذا يخليه يعطي الكيك ليونه أكثر. إذا مالقيتوا طحين كيك تقدرون تسوون شي قريب في البيت بإنكم تشيلون من كل كوب طحين ملعقتين كبار وتبدلون بدالها نشا ذرة.

* كريمة الترتار بعد مهمه هنا . كريمة الترتار صح بتثبت المرانج بس فايدتها الحقيقيه هنا هي إنها تخلي الكيكة حمضيه شوي وبكذا ما تتحمر أسرع من اللازم وتنحرق قبل ما تستوي من داخل.


*الكيكة بسويها بالفانيلا بس تقدرون تستخدمون أي نكهة ثانيه تحبون ، تقدرون تحطون أي خلاصة نكهة زي البرتقال مثلا أو قشر حمضيات وتسوون الكيكة بنكهات ثانيه .

*بنحتاج بعد صينية كيك اللي فيها عود في الوسط واللي لها قاعدة متحركة ، الصينية هذي بهذا الشكل ضروريه لهذا النوع من الكيك مافيه أي بديل ، الصينية هذي يسمونها أحيانا angel food cake pan .


الطريقة :


نسخن الفرن على ٣٥٠

ننخل الطحين مع الملح ونص السكر في صحن .

نخلط المويه مع بياض البيض و كريمة الترتار  ونسوي فيهم مرانج فرنسي بباقي السكر إلين يوصل مرحلة الرؤوس المتوسطة بس ! زي ما شرحت في الموضوع حق المرانج هنا . نطعم المرانج بالفانيلا زي ما شرحت في الموضوع.

meringue

مرانج

 

بعد ما نسوي المرانج ننخل نص خليط الطحين على المرانج بعدين نخلطة شوي شوي بإستخدام أعرض ملعقة عندنا . مهم جدا هنا إنكم تخلطون شوي شوي عشان ما نطيح المرانج ويكون الكيك خفيف وهش. بعد ما ينخلط شوي ننخل النص الثاني من الطحين ونكمل خلط إلين يتجانس الخليط .


angel food cake

 

الحين ننقل خليط الكيك لصينية الكيك بدون ما ندهن الصينية بأي دهن ! نستخدم ملعقة كبيره أو مغرفه وننقل الخليط بالملعقة للصينية شوي شوي . بعد ما تصبون الخليط لا تساوونه بملعقة ولا شي خلوه زي ماهو . لا تصبون الخليط زي ما تسوون مع أنواع كيك ثانيه. الهدف هنا هو إننا ما نفقع الفقاعات اللي في الخليط وهذا بيخلي الكيك ناشف .

لاحظوا إني قلت ما ندهن الصينية ! هذي العملية ضروريه لهذا الكيك ، الكيك صح راح يلصق في الصينية وهنا الهدف ، الكيك يحتاج شي يتمسك فيه وهو ينفش ولو دهنا الصحن الكيك ماراح ينفش وبكذا الكيك بيطلع ناشف . الكيك هذا جدا هش وسهل يطيح وهنا يجي دور العامود اللي في النص كونه يوفر شي يمسك هيكل الكيك إلين ما يتصلب .


تيوب بان

angel food

ندخل الكيكة الفرن إلين يطلع منها عود نظيف ٣٥ دقيقه تقريبا بدون ما نفتح باب الفرن قبل هذا الوقت ! . بعد ما تستوي نطلعها من الفرن بعدين نقلبها على شبك تبريد ونخليها تبرد بالمقلوب ساعة ونص عالأقل بدون ما نطلعها من الصينية . الكيكة أول ما تطلع من الفرن بتكون هشة مره ولو خليناها تبرد بوضعها الصحيح ( يعني موب مقلوبه ) إحتمال كبير تطيح علينا وعشان كذا مهم إنكم تبردونها وهي مقلوبه .


angel cake

طعام الملائكة

angel food cake

بعد ما تبرد نفك الأطراف بسكين حاده ونحيفة بعدين نشيل الجوانب حقت الصينية . بعدين بنفس السكين نفك القاعدة عن الكيكة شوي شوي .

آنجل فوود كيك

cake

 

وبس هذي الكيكة …  إذا جيتوا تقطعون الكيكة أستخدموا سكين خبز السكاكين العاديه إحتمال تضغطها بقوة .

الكيكة تنحفظ على حرارة الغرفة يومين إلى ثلاث أيام تقريبا بشرط تتغلف بشكل جيد بنايلون عشان ما تنشف .

قدموها مع كوليه فواكه أو أي صوص ثاني تحبونه ..


Angel food cake with rasberry

قدمتها هنا مع صوص راسبري

عن الكاتب

Top Chef

87 comments

5 pings

Skip to comment form

  1. الهاشمي

    السلام عليكم
    بس كنصيحة يا أستاذ خالد قد تكون الوصفة جميلة و طيبة لكن التسمية ليست كذلك. . . من قال ان الملائكة تأكل و تشرب؟
    فأنت خذ المفيد و اترك ما ليس له داع. . . بارك الله فيك.

  2. هاجر

    احب مدونتك جميلة جدااااااااااااااااااااااااااااااااااااااا ماشاءاالله فنان مبدع

  3. غير معروف

    السلام عليكم شيف
    انا سؤالى هل يمكن اعمل الكيكة دى فى قالب مربع عادى او دائرى عشان اعمل تورتة ارجو ينفع او لا
    تحياتى

    1. Top Chef

      وعليكم السلام و الرحمة ….

      شرحت في الموضوع أهميه إن الكيكة تتبرد بالمقلوب وأهمية عامود في الوسط لتحمل الكيكة بس بإمكانك تجربين لو تبين

  4. غير معروف

    السلام عليكم شيف

    شيف ياريت تعطينى طريقة كيكة العسل الروسية

    وبغيت كمان اسئل على احسن نوع شوكلالالا للحلويات

    فديتك

    1. Top Chef

      وعليكم السلام والرحمة.

      اول مره اسمع الصدق يكيكة العسل الروسية.

      اقري موضوع الشكولاته في المدونة بتلاقين كللل اللي تحتاجينه عشان تفهمين الانواع والفروقات والاختيار

  5. غير معروف

    لو بستبدل بياض البيض ببودرة بياض البيض كم بحتاج جرام عشان أسوي هالكيكة ؟

    1. Top Chef

      لو قرأتي علبه بياض البيض البودره بيكتبلك كم تخلطين مويه وبودره عشان يعادلك بياض بيضه وحده. ضاعفي هذي الكمية على عدد بياض البيض اللي طالب هنا

  6. غير معروف

    سلام ..
    اخيرا عملت الآنجل فود .. بس ترى خوفتوني من ذا القالب … عاد بعض البنات تشتري نفس القالب وكمان تطيح … قلت بابنت ليش اعذب عمري الا اجيب القالب ..
    وعملتها في قالب الباوند كيك المستطيل … وبقي اشوي من الخليط وعملته في صينيه دائريه 9 انش … وعملت نفس الخطوات بالضبط ..
    وطلعت تهبل في القالبين وعين الله عليها .. بعد ماتركتها تبرد تماما وهي مقلوبه طبعا قالب الباوند كيك حطيته على كوبين من الاطراف علشان تفضل مقلوبه ..
    ولما بردت دخلت سكين من الاطراف ونزلت 100 %
    يافرحتي يوم شفتها سليمه .. : )
    تسلم يدك شيف ماقصرت …

    1. Top Chef

      وعليكم السلام و الرحمة …..

      بالعافية على قلبك ….

      اللي طاحت عليها الكيكة ماكانت بسبب القالب الخاص في الكيك … سبب طلبي للقالب الخاص بهذا النوع من الكيك كتبتبه في الموضوع وهو إن هذا الكيك يحتاج شي يتمسك فيه عشان يرتفع بالشكل المطلوب وبدون ما يطيح. طبعا لو شفتي في النت راح تلاقين آلاف آلاف التجارب من الناس اللي صارت لهم مشاكل بسبب إستخدامهم لأشكال قوالب مختلف وعشان كذا طلبت هذا القالب. ماقلت الكيك راح يفشل بدونه بس قلت جربوه على مسؤوليتكم الخاصه …

  7. غير معروف

    الصينية هذ تمشي؟ والا فيه شي افضل منها
    http://www.amazon.com/Chicago-Metallic-Non-Stick-2-Piece-Angel/dp/B003YKGR5U/ref=sr_1_21?s=home-garden&ie=UTF8&qid=1356653910&sr=1-21

    1. Top Chef

      ماجربتها بس اعتقد تمشي. افضل شي اقري آراء اللي جربوها تحت.

  8. غير معروف

    ياليت لو تكتب المقادير بالأوزان

    1. Top Chef

      معك حق وهو الأصح بعد … إن شاء الله في المستقبل كله بيكون كذا

      1. غير معروف

        إن شاء الله

        طيب لو بحول من أكواب لغرامات هنا يمشي؟
        يعني بدل كوب ونص سكر مطحون أحط 170 غرام ؟
        وبدل الطحين أحط 110 ؟

        1. Top Chef

          بس مين قال إن ١٧٠ جرام سكر مطحون تعادل الكمية اللي حاط هنا ؟ كل المواقع اللي تحسبلك هذي الحسابات يعني تحول الوزن بالحجم تعتمد على التقريب وموب شي ممكن يعتمد عليه أبدا !

        2. غير معروف

          طيب وش الحل :/

        3. Top Chef

          أستخدمي الحجم زي ما كتبت حاليا

        4. غير معروف

          الاكواب قصدك فيها الاكواب المعيارية مهيك؟
          وعذرا ع الاطالة
          الله يعطيك العافية :)

        5. Top Chef

          داااايما معياريه اكيد

  9. غير معروف

    لوسمحت انا اللي سويت الكيك وطاح بعد ما قلبتها القالب قالب الانجل فود له عامود من النص زي صينيتك بالضبط بس الاختلاف ان اللون اسود ما ادري فين الغلط يمكن عشان الجو عندنا بااااارد ارجو افادتي

    1. Top Chef

      القالب حق الآنجل فوود موب بس فيه عامود. العامود دايما اطول من القالب نفسه وغالبا القاعدة تنفصل. فيه كذا قالب مفتوح من النص بس موب كلها قوالب إنجل فوود وعشان كذا سالت

  10. غير معروف

    سويت الكيك وقلبتها وطاح الكيك وتكسر يمكن عشان نوع الصينيه لان اللي عندي لونها اسود مو فضي ما ادري فين الغلط سويتها اكثر من خمس مرات وكل ما قلبتها تطيح

    1. Top Chef

      أعتقد إنك حاولتي تسوينها بصينية كيك bundt اللي تجي مفتوحة من النص بس موب اللي فيها عامود زي هنا ؟ الصينية السوداء غالبا مادة زي التيفال وهذي تخلي الأكل ما يلصق عليها وإحتمال هي اللي خليتها تطيح بعد القلب.

  11. Sosoffdd

    طيب فيه بديل لها واذا لا لو ما أحطها بتضبط ، وآسفه ع كثرة الأسئلة

    1. Top Chef

      من الموضوع :
      ” كريمة الترتار بعد مهمه هنا . كريمة الترتار صح بتثبت المرانج بس فايدتها الحقيقيه هنا هي إنها تخلي الكيكة حمضيه شوي وبكذا ما تتحمر أسرع من اللازم وتنحرق قبل ما تستوي من داخل.”

      لو فيه بديل أكيد بكتبه والكريمة متوفرة في كل سوبرماركت ترى.

  12. Sosoffdd

    لازم الكريمة هذي ? مؤ متوفره عندي

    1. Top Chef

      اقري الوصفة شرحت كل شي

  13. ريم

    السلام عليكم
    شيف هل ينفع اسوي هل الكيكه بصينيه بدون قاعده تنفك قاعده ثابته عمود بالوسط بس القاعده ثابته

    1. Top Chef

      وعليكم السلام و الرحمة ….

      ممكن بينجح بس مدري الصراحة كيف بتطلعينه ؟

  14. learningbdoing

    معلومات قيمة، شكرا لافادتنا بها ..

    سؤالي أستاذ خالد، ماهو ال cream of tarter ? هل هناك أنواع منه أم هو نوع واحد؟ لانني أذكر انني بحثت عنه مرة فوجدت انه يستخرج في عملية صناعة الخمر! فهل هذه المعلومة صحيحه أم لا؟

    شكرا لك مرة أخرى

    1. Top Chef

      كريمة الترتار نوع من أنواع الأحماض اللي تكون على شكل ملح يعني هو حمض صلب. تقريبا زي فكرة ملح الليمون بس نوع حمض ثاني.

      هو نوع واحد.

      صحيح هو يستخرج كمتج ثنوي من صناعة الخمر. العنب غني بحمض الترتاريك وهذا الحمض يترسب داخل براميل الخمور الخشبيه بسبب التفاعلات اللي تصير مع الوقت. إذا خوفك إنه حلال أو حرام هو حلال ١٠٠٪ لنفس السبب اللي يخلي الخل حلال. الخل بجميع أنواعه كان في مرحلة من المراحل مشروب كحولي. الخل اللي من النبيذ الأبيض يسمونه خل عنب أبيض و الخل اللي من العنب الأحمر يسمونه خل عنب أحمر و الخل اللي من البيره يسمونه خل الملت و الخل اللي من التفاح يسوونه من السيدر (اللي هو كحول التفاح) وحتى الخل الأبيض العادي يسوونه من الكحول الساده.

  15. سميه درويش

    الله يعطيك الف عافيه ممكن اعملها في حلةالكيك اللي مفتوحه زي دي بالظبط بس العامود قصير شويه

    1. Top Chef

      إذا القاعدة متحركة غالبا تقدرين

  16. جار القمر

    السلام عليكم يا شيف

    شيف ضرورى منو الكريم ترتار ممكن استبداله بشى تانى زى الليمون او رشة ملح

    لانه مهمة هدا الكريم ايحافظ على البياض البيض بس موموجود عند نا ممكن اعملو بدونها ولالا ومشكور خوى

    1. Top Chef

      قرأتي موضوع المرانج اللي رابطه موجود في الموضوع ؟

  17. جار القمر

    ما شاء الله عليك يا شيف

  18. حــــلا

    ايه شفت البارفيه مره حلوووو ..ودي مشكلتنا لما نأكل شي اعجبنا نقيس عليه

    وانا سويته ترايفل بقطع الفروالة والكريمة

    بس طلب ياشيف ابيك تشرحلي اهمية البياض واهمية الصفار بالكيك بطريقة شرحك المعتادة

    لاني لاحظت الفرق بين الكيكتين

    وننتظر جديدك دائما

    1. Top Chef

      يبيلها صفحات عشان أشرحها بشكل كامل وزي ما أقول داااااايما أكيد أكيد أكيد إن شاء الله بشرحها إذا جا الوقت ..

      عموما إذا تبين الفرق بين الإثنين هنا الفرق ببساطه هو في الدهن اللي موجود في صفار البيض واللي موب موجود في البياض.

  19. حــــلا

    شكرا شيف سويتها بس ماتوصل لمستوى الكيكة الاسفنجية العادية

    هي صح اسفنجية وبيضا بس مو سهلة بالاكل زي الي بتكون بالبياض والصفار المفصولين

    …ربي يوفقك دائما الف شكر

    1. Top Chef

      هذي شي وهذي شي ليش لازم نختار نوع واحد ونثبت عليه في كل إستخدام ؟ أنا ماقلت هذي الطريقة بديل للكيكات الإسفنجيه بس هي نوع من أنواعه الأساسيه.

      هذي الكيكة ممكن تنوكل لحالها بس الهدف من تسويتها كان إني أستخدمها في الوصفه اللي سويتها بعدها اللي هي البارفيه.

  20. حلي حلاوه

    شرح رائع من زمان ادور علي الطريقه الصح لانجيل كيك
    سؤالي هل ممكن عملها بصينه عاديه وحشوها بعد التبريد وتغطيتها بالفوندان مثل تورتات العروس الهشه شاكره الرد

    1. Top Chef

      صينية مربعه ما أضمنلك ، تكلمت كثير عن سبب إستخدام هذي الصينية هنا في الموضوع. بس بخصوص الحشو و التغطيه ممكن ليش لأ.

  21. زينب

    سلام كيفك شيف فعلا وصفات اكثر من رائعة .. حابي استأذنك بمشاركة وصفاتك في هيد الموقع http://www.sa7etna.org/home/
    انا دايما بشارك فيه هوي موقع للعرب في البرازيل وانا بتابع فيه بكحم اني عايشي بالبرازيل وطبعا لما حط وصفاتك رح اذكر المصدر لهوي حضرتك
    واذا انت بتحب تشاركنا فهيدا اكيد شرف ومكسب النا واتمنى موافقتك مع الشكر

  22. كيك

    شكرا ع الجهد الكبير. والشرح الواضح – حبيت اضيف ان كريمة الترتار متوفره في هايبر بنده ،،

  23. D=

    آنجل فوود .. حتى اسمها يشهوي ..
    ودي أسويها.. بس مدري ليه أنا حظي مخيس مع الكيك =(
    بسس ما ودك تنزل كيكة الديفل فوود ؟ << وسيعة وجه
    D=

    1. Top Chef

      الحظ ماله علاقة دوري السبب وحلي المشكلة وبتضبط كل الكيكات معك …

      الديفل فوود بنزلها إن شاء الله بس كل شي بوقته ..

  24. يوميرو

    شيف.,عندي سؤال..

    في البداية قصدك ننخل مع الطحين 1/2 كوب سكر

    وللمرانج كوب سكر؟؟..,,

    وشكراً على الوصفات الرووعة

    1. Top Chef

      هلا والله …

      لأ .. نص الكمية أقصد يعني 3/4 كوب مع الطحين و 3/4 كوب مع المرانج .

  25. lemn

    شيف،،الكيكة شكلها روووعة

    بس البياض كم بالوزن

    لأن عندي بالفريز بس ماأذكر الكمية بالضبط…

    1. Top Chef

      أحسبي ٣٣ جم تقريبا لكل بياض دايما

  26. ✿ мŏ₫мάżiļ Ɗσ∂σ

    يمي يمي

    مرررره احسسها طريه وتجنن

    بس سؤال طحين الكيك كيف صاير..؟ اول مره اسمع فيه

    1. Top Chef

      تفضلي شرح لأنواع الطحين كلها :

      http://www.shamoa.com/vb/showthread.php?t=20329

  27. عمة احلى بنوته

    اقدر اعملها تغطيه ولا راح تهبط

    1. Top Chef

      طبعا تقدرين .. هذي الكيكة حساسه في أول مراحل الطبخ بس بعد ما تبرد خلاص تصير زي أي كيكة عاديه.

  28. Lama

    ايش كريمة ترتار ؟؟ وكيف تجي سائلة ولا بودرة
    يعني زي الدريم ويب ولا كيف ؟

    شكلها مشهي ولو اني مو من محبي الحلويات بس بجربها

    ويابخت زوجتك فيك , يارب يجيني واحد يعرف يطبخ زيك :)

    1. Top Chef

      كريمة الترتار تجي بوردة تلاقينها جنب البيكنج باودر و البيكنج صودا وهذي الأشياء

  29. جيلآتينو

    وصفة مرة خطيرة و لي عودة بعد آلتجربة . .

    و يآبخت من بتزوجهآ

  30. Reme89

    مرحبااا :)
    شكرا ع الوصفه الحلوه .. جربتها وطلعت لذييييذه =)
    بس بسألك.. ممكن ابدل الكوليه بشوكولاه؟؟
    و مشكووور اخوي

    1. Top Chef

      بالعافية …

      وش المانع اللي تشوفينه ؟

  31. كونتيسا

    1- عجينة خبز الهمبرغر بتكون جيدة اذا اضفنا لها البطاطا المسلوقة , اناكتير بعمل عجائن ممتازة بس هذه العجينة لم اجبرها
    2- بالنسبة لكيك الملائكي جرتو مرة وما نجح معي , بس بدي جرب مقاديرك واجرب مرة ثانية

  32. موني

    سؤال دوم يخطر في بالي زوجتك تطبخ ههههه

    لو عندي ريل جي جان انا مرتاحه بس بعد طبخ يمشي بعروقي

    1. Top Chef

      هههههه توني ماتزوجت نشوف بعدين هههه

  33. غير معروف

    لو سمحت ياتوب شيف حابه اسالك عن كيكة الانجل فود ريحتهاماراح تكون بيض بسبب كمية بياض البيض اللي فيها

    1. Top Chef

      ريحتها كيك

  34. mzajyh

    توب انا عشقي الكيك.. ياليت تحط وصفات غريبة والآهم الزينة والشكل بعد
    موفق (f)

    1. Top Chef

      هلا والله …

      الصراحة موب شي يهمني أبدا .. ماراح يكون التركيز هنا على الحلويات لأن خبرتي فيها جدا بسيطة ، فيه ناس فنانين في الأشياء هذي .

      1. mzajyh

        :)

  35. Top Chef

    فعلا كيكه رهيبه .. تعجب كل افراد عائلتي .. وخفيفه وهشه طريه
    ومع الصوص تكمل الحكايه …:)

    شكرا لك

  36. غير معروف

    اهلين شيف
    ينفع احط ليمون بدال الترتار؟
    واذا لا وين القى الترتار في السوبر ماركت ؟
    هل هو مثل شكل البيكن باودر ؟

    1. Top Chef

      ينفع وينفع خل بعد أو أي شي حامض بس كم بالضبط تحطين ما أدري . المشكلة إن هنا الكمية ضروري تكون صحيحة لاحظي إن كريمة الترتار هنا هدفها موب بس تثبت البيض زي المرانج العادي .

      كريمة الترتار تلاقينها جنب البيكنج باودر وهذي الأشياء وشكلها تقريبا نفس الشي .

  37. غير معروف

    ممكن احط في القاعده ورق زبده؟
    والجوانب بعد ؟
    لاحظت ان الكيكه ما ارتفعت بعد الطبخ نفس اللي صبيته طلع كما هو بدون زياده !!

    1. Top Chef

      الكيكة أرتفعت بس الصوره موب واضحة مره ، لاحظي اللي تشوفينه عالجنب هذا من الملعقة لأني قلت لا تنظفين الكيك .

      سويها زي ما سويت أو جربي براحتك أنا عطيتك اللي مفروض يتسوى بس أنتي وراحتك ..

  38. غير معروف

    يا هلا وغلا

    طيب عندي الصينية بس بدون قاعدة متحركة وش اسوي فيها تنفع او لا اتمنى ترد علي سريع

    1. Top Chef

      هلا والله …

      الصراحة ما أعرف ، تقدرين تجربين ، خليها تبرد بالمقلوب إلين تبرد تماما بعدين فكي الأطراف بس كيف توصلين السكين للقاعدة تحت ؟

      1. غير معروف

        طيب ما اقدر احط روق بارشمنت تحت على الاقل عشان تطلع بسهولة ؟؟

        ما اقدر احطها في كوالب الكب كيك كنوع من الاستبدال لان الصينيى هذه بالذات مو عندي وخاطري اطبق الكيكة بكرة

        1. Top Chef

          زي ماقلت أختي .. ما أعرف جربي وشوفي ما ودي أقولك ينفع وتقولين بعدين مارضت تطلع شخصيا ما شفت أحد مسويها وعشان كذا صعب أقولك إذا ينفع أو لأ ..

  39. لحن الجحيم

    هذي الكيكة ماضبطة معاااي

    مانتفشة و صارت معجنه مدري هل من الصينيه انها ام عمود وسيعه او الخلطه عندي فيها غلط

    تنفع صينية الشيزكيك الحجم الوسط

    مشكوورررر على الكيكه

    1. Top Chef

      هلا والله …

      مدري الصراحة ؟ فيه أكثر من سبب .. فتحتي الفرن وأنتي تطبخينها ؟

      1. لحن الجحيم

        لا زي الكيكه العاديه اذا بينت ريحتها عرفت انها استوت يمكن لانها كميه صغيرها و صينيه كبيره

        هذي المقادير الى ستخدمتها

        بياض 2 بيض كبير او 3 صغير

        1 كوب دقيق

        ¾ كوب سكر (او كوب اذا تبيها حلوة زيادة)

        1 م ط بكنج باودر

        رشة ملح

        ½ م ص خل

        1 م ص فانيليا

        1 كوب حليب
        ؟؟؟؟؟!!!!!

        نورني الله ينورك

        1. Top Chef

          هذي ميب آنجل فوود كيك ؟ هذا غير إن المقادير للكيك عمرها ما تنكتب كذا .. كمية البيض ميب شي إختياري يختاره الشخص و كمية السكر أكيد نفس الشي هذي كلها أشياء بتأثر بشكل كبير مره في نتيجة الكيك ولازم تكون محدده في الوصفه

  40. غير معروف

    مابغيت ياشيف ترضى عن الكيك وتسوي لنا منة شي
    بصراحة منزمان ودي اسويها بس متكيسلة حتى اني كسرت 16 بيضة وشلت البياض بكيس وعلى لفريز الا اني بعدني كسلانة

    1. Top Chef

      هههه والله زي ماقلت كثير ، ما أحلي غالبا وصراحة ما يهمني الحلى كثير. إذا كان فيه مناسبة ولا بيجيني ناس ولا كذا سويت حلى..

    2. غير معروف

      فية بعد حركة حلوة لهاذا النوع من الكيك لما تجي تبردة تخلي الفتحة اللي بالصينية بعنق غرشة طويلة وتقلبها يعني الصينية وداخلها الكيك مقلوبة راسا على عقب وموقفة بالغرشة بدل الكولينق راك تقول روز ليفي انها افضل طريقة لتبريد الاينجل فود

      1. Top Chef

        صح .. بس الحركة هذي بالذات مفيدة إذا ماكان عندك الصينية زي اللي عندي .. لو لاحظتي الفتحة اللي داخل الصينية إرتفاعها أطول من الصينية نفسها ، وعشان كذا ما تفرق في هذي الحالة . الهدف من الحركة إن الهواء يبردها من كل مكان ما يكون فيه مكان مقفل. بس لو أستخدمتي صينية كيك عامودها أقصر أو بنفس إرتفاع الأطراف بيفرق شوي .

  41. شغف

    أمممممممممممممم
    واضح إنها طريه مره

    ناقصها كريمه شوكلاته بالبندق وتصير توب

    تسلم ماقصرت

    1. Top Chef

      هلا والله ..

      هههه كل شي أطعم مع نوتيلا ..

  1. بارفيه الموز بالشكولاته و اللوز و جوز الهند.. Banana ,Coconut, Chocolate and Almond Parfait » Top Chef Blog .. مدونة توب شيف

    […] كيكة الآنجل فوود .. Angel Food Cake » Top Chef Blog .. مدونة توب شيف على المرانج الفرنسي .. French Meringue […]

  2. البيض .. Eggs » Top Chef Blog .. مدونة توب شيف

    […] ويتحول لرغوة كثيفة تفتحلنا أبواب ثانية زي السوفليه و الكيك الإسفنجي وأنواع و أنواع من الكوكيز و البيتي فور ، ندهن المعجنات […]

  3. البيض .. Eggs « مدونة توب شيف … Top Chef

    […] ويتحول لرغوة كثيفة تفتحلنا أبواب ثانية زي السوفليه و الكيك الإسفنجي وأنواع و أنواع من الكوكيز و البيتي فور ، ندهن المعجنات […]

  4. اليابان : تيمبورا .. Tempura « مدونة توب شيف … Top Chef

    […] كيك تقدرون تسوون بديل طحين الكيك زي ما شرحت في موضوع كيكة الآنجل فوود. لو أستخدمتوا في البديل طحين غير مبيض هذا بيعطي أقرب […]

  5. بارفيه الموز بالشكولاته و اللوز و جوز الهند.. Banana ,Coconut, Chocolate and Almond Parfait « مدونة توب شيف … Top Chef

    […] شرايح من كيكة الآنجل فود كيك زي اللي سويت هنا […]

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: