نيجيريا : أكارا .. Akara

هلا والله …

اليوم السابع في فعالية حول العالم في ٣٠ يوم و اليوم عندنا نيجيرا. الأكل النيجيري هو مثال على أكل غرب أفريقيا اللي تقريبا يتشابه مع بعض. الأكل الغرب أفريقي جدا بسيط وشعبي وأبدا موب معقد. أغلب الإعتماد يكون على طرق طبخ سهلة ومتوفرة مثل الشوي و القلي. الأكل النيجيري يستخدم كثير بهارات و أعشاب و يميل للحرارة غالبا. أغلب المكونات الموجوده تكون محليه ، كثير من هذي المكونات مثل البقوليات مثلا أنتشرت لأماكن ثانيه من العالم زي جنوب أمريكا و البرازيل من غرب أفريقيا عن طريق تجارة العبيد. في الأكل النيجيري نلاقي إستخدام كبير للحوم و البقوليات و الأسماك ( وخصوصا المجففه ) و جوز الهند وزيت جوز الهند و طبعا البطاطس الحلوه و الذرة .

اليوم بسوي أكله إسمها أكارا وهي أكله منتشره في نيجيرا و سيراليون و غانا. الأكلة عبارة عن نوع فاصوليا مفرومة و مقلية ومقدمه مع صوص، تقريبا تقدرون تعتبرونها فلافل نيجيريه. الأكله ممكن تكون سناك أو طبق مقبلات و جدا سهلة ولذيذ وهشة بشكل ما تتخيلونه كأنها قطن مقلي بالضبط.

المقادير :

للأكارا :

كوب فاصوليا مجففة ، أستخدمت هنا فاصوليا أم عين black eyed peas هههه

حبة بصل صغيرة مقطعة صغار

ملعقة صغيرة أحر فلفل عندكم . أنا أستخدمت الهابانييرو اللي في موضوع الجرك تشكن .

بيضة

ملعقة صغيرة ملح

نص ملعقة صغيرة بيكنج صودا

شوي مويه ( تقريبا ملعقتين إلى ثلاث ملاعق )

زيت للقلي

للصوص :

٤ حبات فلفل أحمر بارد

حبة بصل مقطعة كبار

حبتين طماط مقطعة كبار

ملعقة كبيرة من أحر فلفل عندكم . أنا أستخدمت الهابانييرو اللي في موضوع الجرك تشكن

شوي ملح

١/٤ كوب زيت .

* الفاصوليا اللي أقصد صراحة مدري وش أسمها بالعربي الظاهر إسمها لوبيا لو منيب واهم ، بالإنجليزي إسمها black eyed peas وهي فاصوليا صغيرة مع نقطة سوداء عالجنب. نوع الفاصوليا هذي مهمة عشان تعطينا القوام اللي نبي، تقدرون طبعا تجربون بأي نوع فاصوليا ثاني بس ما أدري كيف بتختلف النتيجة.

* أستخدموا أحر فلفل تلاقونه عندكم للصوص وللأكارا ، الكمية اللي حاط ماراح تعطي شي حار مره حتى مع الفلفل اللي أستخدمت فلو تبونها شوي أحر زيدوا الكمية.

* زيت القلي المستخدم تقدرون تستخدمون أي نوع.  زيت النخيل و زيت الفول السوداني بيعطيكم طعم رهيب غير أي نوع زيت ثاني.

الطريقة :

للأكارا :

أول شي نسويه نغسل الفاصوليا زين بعدين نفرشها على صينية ونتأكد إن مافيها أي قطع حصى أو خشب صغيرة. نحط الفاصوليا في صحن ونغطيه بمويه بارده وننقعه ٨ ساعات عالأقل.

نصفي الفاصوليا من مويه النقع بعدين نحطها في خلاط مولينكس مع البصل و الفلفل الحار ونطحنها زين إلين تصير ناعمه. نحط الملح و البيضه و البيكنج صودا و نكمل خلط. الحين يمكن نحتاج مويه ويمكن لأ، إذا كان الخليط سايل لدرجة إنه ممكن يتشكل بملعقة بسهولة يعني خلاص جاهز إذا كان شوي ناشف زيدوا شوي مويه . البيكنج صودا فايدتها هنا إنها تسرع التحمير في الزيت إذا قليناها وتعطينا قشرة لونها متساوي أكثر و تقرمش أكثر.

نسخن الزيت على حرارة أعلى من وسط بشوي إلين يصير حار ( ٣٦٠ للي عندهم ميزان حرارة ). الحين بإستخدام ملعقتين كبار أو ملعقة إسكريم صغيرة ناخذ من الخليط ونحطه في الزيت. نقلي ٨ كور تقريبا كل مره عشان ما يبرد الزيت أكثر من اللازم . نقلب الخليط في الزيت عشان نلونه من كل مكان وبعد ما يصير لونه ذهبي نشيله من الزيت على مناديل رول عشان نشيل الزيت الزايد. قبل ما نحط دفعة ثانيه من الخليط نخلي الزيت يرجع لحرارة القلي.

للصوص :

في خلاط نطحن الفلفل الأحمر و الفلفل الحار و الطماط و الملح و البصل. نسخن الزيت على حرارة وسط إلين يصير حار مره بعدين نحط الخليط اللي سوينا عليه ( الخليط راح يطلع دخان فبعدوا يدكم عن القدر ). نزلوا الحراره و أطبخوا الخليط إلين يتحول لصوص ثقيل شوي تقريبا ١٠ دقايق.