عن المدون و المدونة

بسم الله الرحمن الرحيم

.

اسمي خالد ، سعودي من مواليد جده عام ١٩٨٨ . مجال دراستي الأساسي هو في هندسة البرمجيات في جامعة كونكورديا في مونتريال في كندا. مثل كثير من الناس أنا أحب الأكل الجيد و أستمتع فيه وهذا اللي خلاني أحب الطبخ في البداية. يوم بدأت أتعلم أكثر و أكثر عن الطبخ شدتني الحرفية العالية و الإهتمام بأدق التفاصيل اللي شفت طباخين كثير يعطونه لأكلهم. من يوم كنت صغير ماكنت بعيد عن المطبخ ، ماكنت أخلي أحد يسويلي فطوري يوم الخميس و الجمعة كنت دايما أسويه بنفسي بس كان أشياء بسيطة زي ساندوتش أو إندومي أو بيض مع شاهي يعني أشياء جدا بسيطة ما تعتبر طبخ من الأساس. بعد ما كبرت شوي تقريبا في المتوسط صرت أطبخ أشياء أصعب شوي من وقت لوقت ومن باب المتعة لا أكثر، أتذكر كنت آخذ صدور دجاج و أتبلها من راسي و أشويها على الشواية الكهربائية وهذا يمكن أول طبق أتذكر كنت أسويه ممكن يعتبر طبخه حقيقية. مع هذا كان الطبخ مجرد شي أسويه للمتعة من وقت لوقت ومن باب كسر الروتين لا أكثر.

.

التحول الكبير لي كان يوم رحت لكندا وعشت لحالي. في البداية كان كل أكلي تقريبا من مطاعم، مدينة جديدة غنية بثقافة أكل وشباب كلنا نحب المطاعم فأكيد ماكنا نوفر فرصة إننا نذوق أي مطعم نلاقيه. كثير من المكونات و المطابخ ما تعرفت عليها إلا هناك. ماكنت أعرف طعم الخبز كيف مفروض يكون وطعم الكروسان كيف مفروض يكون وطعم البف بيستري كيف مفروض يكون إلين جربتهم من مخبز فرنسي هناك ، ماكنت أعرف طعم التشيز كيك كيف مفروض يكون إلين ذقت واحد هناك وما أعتقد كان فيه أمل أذوق أكل تايلندي وياباني وصيني وفيتنامي وجامايكي وبرازيلي ويوناني ويهودي وحتى أكل فرنسي على أصوله لو مارحت هناك. كنت أطبخ مع الشباب من وقت لوقت ومن باب كسر الروتين لا أكثر، أكلنا كان جيد بس ماكان شي الواحد ممكن يختار إنه ياكله الصراحة. مع هذا كنا نشتاق للأكل اللي حبيناه في السعودية و اللي تعودنا عليه. كانت أكثر أكله أحبها في ذاك الوقت هي الفيتوشيني ألفريدو وكل ما كنت أذوقها في مطعم هناك كانت مخيبة للآمال إلين جاء اليوم اللي فكرت أسويها في البيت. بدأت بالمواقع الأجنبيه ولقيت ملايين الوصفات. رحت بعدها للمواقع العربيه ولقيت بعد ملايين الوصفات. مع كثرة الوصفات إلا إنها كانت مختلفة بشكل جدا كبير وكنت محتار أي وحدة أطبق. بدأت أقرأ في الوصفات الأجنبيه ، قرأت يمكن ٢٠ أو ٣٠ وصفة أحاول أدور وش المشترك بينها إلين لقيت إن غالبية الوصفات فيها أشياء مشتركة. هي كلها تستخدم كريمة ما تستخدم صوص باشاميل ولقيت بعد إنها تختلف في النكهات المستخدمه بس كلها تستخدم جبن بارمزان عكس كثير من الوصفات العربيه اللي تستخدم أجبان ثانيه. بدأت أطبق بإني جربت وصفه لقيت إنها تستوفي كل الصفات اللي موجوده في غالبية الوصفات وفي نفس الوقت مافيها أشياء غريبه يعني قريبة من اللي كنت آكل في السعودية. طبقت الوصفة ومن يومها تغيرت نظرتي للطبخ ! الفيتوشيني اللي سويت كانت أفضل حتى من اللي كنت آكل في السعودية وبعد ما جربوها الشباب كان لهم نفس الرأي. أعجبتني هذي الطريقة في الطبخ بإني أقرأ كذا رأي وكذا طريقة وأختار اللي أشوف إنه الأصح، اللي لقيته بعدين إن كثير من الوصفات بنلاقي فيها خطوط أساسيه تشترك فيها. أستمريت على طريقتي هذي في البحث و الطبخ وسويت كثير من الأكلات اللي ماكنت يوم من الأيام أحلم إني أسويها في البيت وكلها كانت تطلع بجودة أكثر من ممتازه وبسعر رخيص وماكانت تاخذ وقت ! أتذكر في أول ترم لي هناك كنت أعرف أسوي مولتن كيك و صدور دجاج بصوص كريمة الفطر و أجنحة دجاج تنافس أي مطعم وحتى تشيز كيك بجودة خل نقول متوسطة على مقاييسي اليوم.

.

بعد ما تعلمت كثير من الأكلات السهلة و اللي أحبها بدأت أدور شي أكثر. صرت أدور على أكلات أشوف إني أقدر أسويها في كل مكان ، في النت ، في التلفزيون وحتى في المطاعم اللي أروح بإني أجرب أشياء وأدور طرقها وأسويها. في البداية كنت أدور أشياء أرتاح معها وبمجرد ما أقرأ شي أحس إنه صعب أتركه و أدور شي ثاني. من يوم أقرأ في وصفة مكون غريب أتركها ومن يوم أقرأ في وصفه إني أحتاج أقطع دجاجه كاملة مثلا أو أطبخ سمكة كاملة أترك الموضوع علطول ، فكرة عمل باستا في البيت كانت شي من المستحيلات ، فكرة عمل مرق في البيت من عظم كانت نكتة بالنسبة لي وتجربتي الأولى في عمل عجينة بيتزا خلتني أبعد عن أي شي ممكن يقرب حتى من فكرة عجينة.

.

في هذيك الفترة كنت أبحث عن وصفات طول وقت فراغي بمعنى طول وقت فراغي. إذا كنت أذاكر كنت أفتح فوود نيتورك food network بدون صوت على أمل أشوف طبخة جديدة تشدني. إذا كنت عاللابتوب دايما ما تكون فيه صفحة ما تنقفل فيها وصفات أقرأ فيها وعلى هذي الحالة. مع الوقت تبدأ تخلص الوصفات ونبدأ نشوفها تتشابه ونبدأ ندور شي جديد ، شي غير ، شي يعطينا الشعور الرهيب اللي يجينا إذا ذقنا نكهة جديدة علينا ما قد تخيلناها حتى مجرد تخيل. مع الوقت لقيت إن فيه أشياء كثير الناس يعطونها إهتمام خاص وأنا مقدر أجربها بسبب شروطي الغبية في تصفية الوصفات. أتذكر شفت إسكريم بارمزان وفوقه فراولة وصوص بلسمك وقلت الله يكرم النعمة إسكريم سلطة ! بس بعد فترة زاد الفضول اللي فيني إني أعرف طعم هذي الأشياء و إني أجرب طرق الطبخ الغريبة هذي ، صرت أفكر طيب كل الناس يمدحون هذا الشي هل معقول إنهم كلهم غلطانين أو ما يعرفون يذوقون ؟ هل معقول إن ذوقي غير عن كل الناس هذي ؟ بعدها بديت أدخل مناطق مظلمة و أجرب أشياء ما يكون عندي حتى فكرة ولو بسيطة كيف مفروض يكون طعمها ومع العلم إنه موب دايما يطلع الشي فعلا يستاهل التجربة إلا إنه ماقد طلعت من تجربة إلا وأنا كاسب شي جديد هذا غير كمية الأطباق و المكونات الكبيرة اللي عرفت طعمها.

.

إلى هذي المرحلة كنت مازلت أعتمد على الوصفات في كل شي. كنت مازلت أعتمد على نفس طريقتي القديمة بإني أشوف كذا وصفة و أقارن بينهم وأشوف وش الأشياء المشتركة وكيف يفرقون عن بعض و إذا أحتاج آخذ الأشياء اللي حبيت من الوصفات كلها و أجمعهم مع بعض. بس مع هذا كان دايما عندي رغبة إني أعرف ليش كل خطوة في كل وصفة تتم بالطريقة هذي ؟ على قد ما قرأت طرق للستيك كلها تتشابه بس إذا كان كذا ليش فيه مطاعم تسوي ستيك ممتاز و مطاعم أقل و أنا في بيتي أسوي بلاستك ؟ مشكلتي ببساطة كانت في فهم الوصفات. ليش نقطع الأكل كذا ؟ طيب إذا كانت هذي الوصفه تقول نقطع الثوم مثلا شرايح نحيفة بس هذي الوصفة تقول ثوم مقطع صغار وش الفرق ؟ ليش وصفة التشيز كيك هذي تقول ٥ بيضات بس هذي ١٠ صفارات بيض ؟ كيف بيفرقون ؟ ليش هذي الوصفه تقولنا نطبخ التشيز كيك في حمام مائي وهذي لأ ؟ طيب هذي معها طحين وهذيك لأ وش فايدة الطحين ؟ طيب ليش الستيك يطلع عندي ناشف مع العلم إني مشيت عالوصفة ؟ ليش الستيك يوم يستوي في دقيقتين على كل وجه ويوم دقيقتين تخليه محروق ؟ ليش البيتزا عندي تلصق أو ليش ما تنفرد زي ما شفت في الصور ؟ أو ليش الخبز هذا بحليب وهذا بدون ؟ أسئلة كثيرة كانت تطلعلي زي ماتطلع في راس كثير ناس. كثير من الأحيان هذي الأشياء اللي نجهلها تكون سبب خراب أكلة أو بأقل تقدير سبب خيبة الأمل من تجربتها وحلي كان زي غالبية الناس هو إني أتهم الوصفة إن فيها مشكلة و أروح للي بعدها.

.

مع الوقت زاد الفضول عندي إني أعرف ليش كل شي يصير. كنت أقرأ عن مواضيع طبخ كثير في النت بس المواضيع اللي كانت تشدني أكثر شي هي اللي تتعمق وتفسر ليش كل شي يصير. مافيه أي تفاصيل كنت أحس إنها زايدة عن المطلوب ، عمري ماقرأت موضوع وقلت هذا كلام ما يهني كواحد يطبخ بالبيت. لو واحد كان يشرحلي كيف أطبخ بيضة ودخل في كيف البروتين يتغير مع الحرارة ويسويلنا شبكة تعيق حركة المويه وهذا اللي يخلي البيضه تجمد وتتحول لشي زي الجيل هذي معلومة يمكن ما تساعدني بشكل مباشر أعرف كيف أطبخ بيضه بس هي معلومة جدا ممتعة بالنسبة لي وتخليني أعرف ليش كل شي يصير. للأسف مواقع الإنترنت ما تدخل كثير في هذي التفاصيل نادرا ما نلاقي مواقع تشرح هذي المواضيع بشكل كان يشفي فضولي وإهتمامي فيها وعشان كذا صرت أدور مصادر ثانية. بالصدفة طحت على كتاب رائع إسمه On food and Cooking الكتاب كبير بس غير كل كتب الطبخ اللي كنت أعرفها ذاك الوقت هذا الكتاب ماكان فيه صور ولا كان فيه وصفات أصلا. الكتاب كان يشرح المكونات وطرق الطبخ بطريقة علمية بحتة ، بدأت أدور على مثل هذي الكتب وعلى كتب ثانية تقدر تخليني أستفيد من هذي المعلومات بشكل عملي أكبر.

.

اللي أنا ما كنت أعرفه ذاك الوقت هو إن الطريقة اللي أنا كنت أتعلم فيها هي الطريقة اللي يدرسونها الطباخين في معاهد الطبخ. معاهد الطبخ ما تعلم الناس مجموعة من الوصفات وتعطيهم شهادات. معاهد الطبخ تعلم الناس أساسيات الطبخ وتدربهم عليها. أساسيات الطبخ هي العمود الفقري للوصفات كل وصفة في العالم هي إما حالة مستقلة على تطبيق لأحد هذي الطرق أو مجموعة من التطبيقات لكذا طريقة طبخ مجموعة بطريقة معينة. خل ناخذ طبق سعودي تقليدي اللي هو الكبسة ونشوف كيف إن خطواته هي مجموعة من التطبيقات على كذا طريقة طبخ أساسية. كل وصفة كبسة فيها كذا خطوة : أول شي نختار اللحم ونقطعه إذا ماكان مقطع ، بعد كذا نسوي مرق (بالأصح هو سليق لحم موب مرق) من هذا اللحم ونطبخه مع بهارات إلين ينطبخ اللحم تماما ويصير لين ، آخر شي نحط على هذا المرق رز ونطبخ الرز وهذي الكبسة. إختيار اللحم ومعرفة الجودة وكيف كل منطقة من كل حيوان يكون طعمها هذا موضوع أساسي في الطبخ. تقطيع اللحم بطريقة صحيحة بحيث يستوي في نفس الوقت ويكون سهل للأكل هو بعد من طرق الطبخ اللي تدخل في فن الجزارة butchery ، عمل المرق و الأشياء اللي تفرق فيه وكيف نطعمه وكل هذي المواضيع موضوع أساسي في الطبخ ، إستخدام البهارات و الملح و إختيارها موضوع أساسي في الطبخ ، طبخ اللحم في مرق موضوع أساسي في الطبخ (طريقة اليخنة) و أخيرا طبخ الرز موضوع أساسي بعد في الطبخ. هذي أكلة سعودية وزي ما شفنا مهارات الطبخ اللي يتعلمونها في أي معهد طبخ ممكن تتطبق معها ولو تعلمنا كل وحدة من هذي الأساسيات بنعرف كيف نخلي كل خطوة تعطينا أفضل نكهة وكيف نتغلب على أي مشكلة تجينا في أي خطوة. تعلم طرق الطبخ بيخليكم تفهمون أي وصفة تقرونها وتعرفون ليش كل شي فيها يصير ولو فيها خطأ بتعرفون وين الخطأ. تعلم طرق الطبخ هو الطريقة الصحيحة في تعلم الطبخ وفهمه بشكل جيد.

.

بدأت أكتب في النت في منتدى عالم حواء. بالصدفة طحت على موضوع هناك كان وصفة تشيز كيك ويوم بدأت أقرأها لقيت فيها ألف مشكلة ومشكلة هذا خلاني أسوي بحث عن كلمة تشيز كيك بالعربي وشفت كذا موضوع وكان أغلبها يعاني من نفس المشاكل. كثير من الوصفات كانت ناقصه ، كثير منها كان يحط مكونات بدون أي سبب (بيكربونات أو بيكنج باودر في تشيز كيك مثلا ؟) ، كثير منها ماكان حتى تشيز كيك كان مافيه أي جبن !! كان بس ظرف كريمة مع ظرف دريم ويب مع سكر وأشياء ثانية وحتى المواضيع اللي كانت تحط مقادير جيده كانت تهمل الأشياء اللي فعلا تسوي كل الفرق في التشيز كيك مثل كيف نعرف إنها أستوت ! نزلت موضوع عن التشيز كيك في عالم حواء وبعده نزلت أكثر من موضوع عن الفهيتا وعن تارت الجاناش وبعدها بكم يوم أنطردت من المنتدى لمخالفتي لشروطهم اللي صراحة ماقد قرأتها. تركت الكتابة في النت فترة بعدين رجعت لمنتديات المساطيل ومن بعدها لمنتدى شامواه و مقهى العيال و جسد الثقافة. بعد سنة تقريبا من الكتابة في المنتديات وبعد مشورة عدد من الزوار جزاهم الله خير قررت أترك المنتديات وما أرجع أنزل مواضيع هناك بسبب شروطهم اللي ما تخدم أحد إلا ملاكها. هذا القرار كان من أفضل القرارت اللي سويتها في حياتي ومن هنا أنولدت هذي المدونة.

.

من يوم فتحت المدونة كنت حاط هدف واحد ناوي إني أمشي عليه في هذي المدونة. أي واحد قرأ الكلمة اللي مكتوبة بالخط الصغير تحت البنر الرئيسي حق المدونة و اللي مكتوب فيه Cooking Techniques Explained ومعناها طرق الطبخ مشروحة هذي تمثل هدفي لهذي المدونة إن شاء الله. هذي المدونة راح يكون هدفها شرح طرق الطبخ الأساسية واللي كان لها الفضل الأكبر في إني أتعلم كل شي تعلمته. راح يكون فيه وصفات أكيد بس الهدف الأساسي من هذي الوصفات هو إنها تكون تطبيقات أو أمثلة على طرق الطبخ اللي شرحت أو اللي راح أشرحها بشكل مفصل أكبر في المستقبل إن شاء الله. إرضاء الناس غاية لا تدرك أنا عارف إن موب كل الناس يهمهم تعلم طرق الطبخ الأساسية وأنا عارف إن كثير من الناس ما يحب يعرف ليش كل شي يصير أو ماعنده وقت يقرأ كل الكلام الطويل اللي أكتب بس أنا أستهدف بكل صراحة الناس اللي يفكرون زيي وراح أشرح زي ما أحب إن أحد يشرحلي.

.

.

شكر خاص للأخت نورة على مساعدتي في إعداد هذي الصفحة.

.

Follow TopChefCooks on Twitter

325 comments

Skip to comment form

  1. روان

    مشاء الله عليك اخوي …أمامك مستقبل واعد
    ممكن اعرف كم باقيلك وتنهي برمجه ؟؟
    أنا لو كنت مكانك راح اشتغل في مطاعم كندا واحد واحد
    حد ما أجمع خبرة و رأس مال
    وارجع السعودية افتح مطعم راقي وأصير مشرف عليهم …بلا ماك بلا سم
    ثم اكبر فروعي وانشرها واقول لماك اذهب للجحيم ههههه :”)
    من أفضل المدونات العربية
    تمنياتي لك بالتوفيق

  2. a.alnaemi

    ماشاء الله عليك تبارك الرحمن ربي يحفظك ويسلم ايدينك من كل شر وضر ويجزاك كل خير على هالمدونه المفيده جداً وتشجيعك للناس بعدم اليأس اذا فشلت الطبخه وانهم لازم يعيدونها اكثر من مره لين مايوصلون للمستوى المطلوب ،، الله يجعل كل اللي تسويه لتعليم الناس في ميزان اعمالك الصالحه اخوي خالد ومبارك عليك مابقى من الشهر الفضيل

    1. Top Chef

      مشكورة على مرورك وكلامك وكل عام وأنتي بخير …

  3. غير معروف

    هل اليوزر في شبكة الأقلاع ” توب شيف ” تبع لك أم لا ؟

    1. Top Chef

      هلا والله …

      إيه تابع لي …

  4. none

    ياخي حبيتك قسم بالله حبيتك :(
    الله يخليك لعين ترجيك

  5. أم شروق

    ماشاء الله
    اكثر من رائع
    اتفاجأت أن شاب سعودي يقدم هذه المعلومات الدقيقة وبهذا الشكل السلس في الطبخ واسعدني هذا كثير
    اسجل اعجابي بكل ما قدمت وأسل الله لك التوفيق

    1. Top Chef

      مشكورة على كلامك وحياك الله دايما ….

  6. SARA

    تم وضع المدونه في المفضله .. :$
    بصراحه كلمه ابداع شوي عليك ..
    انت اكثر من مبدع
    شدتني وصفاتك كثيييير
    وحمستني اطبقهم برمضضضان :$
    مشاءالله عليك بالتوفيق وانا من الفانز تبعك :$

    1. Top Chef

      مشكورة على كلامك ومرورك …..

  7. الاوتار

    الف شكر أخوي على المدونه الاكثر من رائعة

  8. غير معروف

    لا اظن ان جهدك يتعدى الترجمة يا استاذ توب شف…

    1. Top Chef

      ما اتذكر اني قد قلت اني اضفت الكثير لفن الطبخ ؟ انا تعلمت وقرأت واستنتجت وقارنت ونقلت اللي اعرف للناس اللي لقوا في بعض كلامي فائدة. اللي يتخرج من الجامعة هل تقدرين تقولين ان كل جهده في قرآة المنهج ؟ هل هذا ينقص من كل عمل يسويه بعد تخرجه ؟

      اذا كنتي تقصدين ان كل شي مأخوذ من مصدر ثاني ياليت تعطيني اياه عشان اوفر التعب على نفسي.

  9. Shaikha

    صباح الورد، بصراحة أتذكر قبل سنة او أكثر لمحت لك موضوع عن الماكروني و نفرت من مواضيعك بقوة لبعض الأسباب الغبية، وهي اني ما استخدم مقادير معيارية + معدّات مطبخ بيتنا ما تساعد، بالإضافة الى خوفي من الفشل.
    لكن الآن و بعد ما ايقنت ان النجاح مايجي الا بعد الفشل
    و بالذات لما سمحت لنفسي اقرأ لطريقة وصفك للوصفات من ججججد ذُهلت!
    ماشاءالله يعني كافي اسهابك في الشرح و بشكل عفوي ❤❤❤❤❤❤❤❤❤❤
    أنا أهوى شي اسمه طبخ، لكن وقتي مايسعفني أطور من مهارتي الا الآن في ما تبقى من هالصيفية،
    و ان شاءالله ناوية ما يخلص رمضان الا و أنا متقنة معظم المهارات اللي تكلمت عنها يا شيف خالد ❤
    ماعرف وش اقول اكثر من شكراً لكونك شخص بالفعل مُلهِم و مبدع.. عساك ع القوة. ❤

    1. Top Chef

      هلا والله ….

      الحلو في الطبخ إن أغلب حالات الفشل بتعطيك شي ينوكل أو عالأقل يستفاد منه فليش الخوف ؟

      مشكورة على كلامك وحياك الله دايما ….

  10. غير معروف

    ماشاء الله عليك من زمان وانا ابحث عن احد يشجعني
    شكرا لك

    1. Top Chef

      أتمنى أكون أفدتك

  11. الدكتورة سلمى سيبيه

    الله يوفقك يا ولدي

    1. Top Chef

      آآآمين الله يسمع منك

  12. ضحى

    إبداع يا خالد !
    تفاجئت أن من خل الوصفات (شاب) على غير المعتاد.
    راح أكون متابعة وراح أطبق صوص البستو (شدّني صراحة).بالتوفيق إن شاء الله في مجال دراستك أولاً ثم في مجال الطبخ ثانياً.

    لكن عندي سؤال:وشهو الأكل اليهودي؟ (مطبخ ياباني صيني فيتنامي معروفين ولأن الطبخ ينتمي للبلد,أو هكذا متعارف عليه/ لكن كيف مطبخ ينتمي للديانة أو القومية اليهودية؟ أعطنا نبذة.

    بإنتظارك.

    /
    المدونة في المفضلة.

    1. Top Chef

      الأكل اليهودي هو أكل المهاجرين اليهود في أمريكا تقريبا هو أكل شرق أوروبي يعني أكل بولندي وروسي وكذا بس كون اليهود لهم طقوس غذائية تختلف جدا معقدة طلع لهم أكل تقدرين تقولين خاص فيهم.

      عندك مثلا البيجل bagel اللي يجي خبز يشبه الدونات ، هذي أكله روسيه في الأصل بس كان يختص فيها اليهود هناك. عندك شي إسمه الماتزو ميل ، يجي زي الشابوره لها دلاله دينيه عندهم. يقولون إن سيدنا موسى عليه السلام يوم كان في سيناء كان أكله كله من هذي الشابوره مصنوعه من نوع حبوب قديم ويستخدمونها كثير في أكلهم. يسوون منها أشياء زي كرات اللحم (بالخبز) وياكلونها مع مرق الدجاج وهذي شوربة مره مشهورة عندهم.

      عندهم طبعا أشياء زي الكريبلاخ و اللاتكس اللي هي بانكيك بطاطس و اللحوم و الأسماك المدخنه و المخللات وغيرها كثير.

  13. غير معروف

    راااائعة و مميزة. و طريقتك في الشرح جميلة

    1. Top Chef

      مشكورة .. من ذوقك

  14. غير معروف

    المدونة بتاعتك متميزة جدا و من زمان و انا بادور على حد اتعلم منك تكنيك الطبخ و اخيرا لقيت , متشوقة اوى انى اقرا كل وصفة فى المدونة

  15. Najla

    ما شاء الله .. الله يوفقك ويجزاك كل خير على هالمدونة شدتني وصفة الماكرون بس لما شفت محاولات الفشل اللي مالها عدد صرفت نظر عنها تطبيقك كان روووعة .. حرام ما تستغل الموهبة اللي عندك في مشروع صغير مثلا ..عندنا بالكويت شاب كويتي اتجه من الماجستير لفن تزيين الكيك واخذ دورات لحد ما صار بروفيشينال وسوا مشروع لتزيين كيكات الاعراس ..

    1. Top Chef

      مشكورة أختي ….

      الماكرون أبدا موب صعب هو زي أي شي ثاني شي يحتاج تدرب عشان يضبط معك بس.

  16. ام نورة

    ماشاء الله تبارك الله اخ خالد انا متابعه لك من زمان اول ماشفت طبخك كان في منتدى مساطيل عرفت على طول انك موهوب جدا ومحترف وشيف حقيقي وبدات اتابع طبخاتك بكل اهتمام واحفضها عندي بملف خاص باسم طبخات توب شيف وعرفتك من خلال البحث بقوقل كنت ادور وصفه بالعربي للمكارون ودخلت على موضوعك وربي انذهلت من دقه الوصف لاني اصلا مالقيت وصفه عربيه الا هي ؛ وبعد متابعه شديده لك بحثت عن توب شيف على امل وكانت المفاجاه بالنسبه لي الي طيرتني من الفرح اني لقيت لك مدونه والف شكر

    1. Top Chef

      مشكورة على كلامك وحياك الله دايما ..

  17. منير

    السلام عليكم ورحمة الله
    أخي الكريم أسجل إعجابي بك أولاً، وأدعو الله أن تحقق جميع طموحاتك في مجال الطبخ وخارجه… آمين
    أرجو أخي الكريم من كل قلبي أن تضع تصنيفًا جديدًا في خانة التصنيفات وهو عن “الأكلات السهلة”، والتي تتضمن
    مكونات سهلة نجدها في أي سوبرماركت فبعضنا يعيش في مناطق يكون من الصعب أن يجد فيها بعض المكونات مثلي أنا، على كل حال أحببت أن أدخل عالم الطبخ كهواية وأحببت أن تكون بدايتي مع أكلات سهلة، أرجو أن تقبل إقتراحي وجزاك الله خيرًا على ما تقدمه وستقدمه لنا إن شاء الله :)

    1. Top Chef

      وعليكم السلام و الرحمة …

      مشكور أخوي على كلامك و إن شاء الله بحاول أسوي اللي تقول.

  18. غير معروف

    ماشاء الله عليك ربي يحميك ويحفظك
    عرفت المدونة عن طريق تويتر وحبيتها جداً
    أكثر شي عجبني هو شرحك لطرق الطبخ وليه كل شي يصير , أنا هذي الفترة صايرة أحب اتعلم الطبخ مرة وكنت حابه أفهم كل شي ليش يصير عشان أعرف بعد كذا اشتغل من نفسي
    يعطيك العافية يارب ويقويك

    1. Top Chef

      أكيد هذي الطريقة الصحيحة في التعلم …

  19. غير معروف

    صدفة وصلت إلى هنا … كنت أبحث عن وصفة تصلح لـ “غداء” زوج ، وشروطه الصعبة في الأكل ..
    استمتعت جدًا … وأفدتني ….
    بارك الله فيك وهنيا لك هذي الروح والفكر ….. بس في أشياء صعبة علي بحكم إني مبتدئة+ماتتوفر عندي كل الأغراض غالبًا :d

    1. Top Chef

      ههههه حياك الله دايما سواء جيتي صدفة ولا بقصد

  20. learningbdoing

    السلام عليكم ورحمة الله وبركاته..

    لطالما بحث عن ( لماذا ومافائده) استخدام المكونات في الاطباق المختلفه, ابحث لفترة ثم اتعبمن البحث بلا فائده, بدأت بالتجارب ولكنني لم استطع التكلمه لكثرة الفشل دون استنتاج شيء! ! ..

    عندما اعطيت.رابط المدونه فتحتها كالعاده, متوقعة ان تكون مدونة اجنبيه بها بعض الوصفات الجميلة, ولكن عندما رأيت اللغة العربية … ! تصفحتها سريعا الى ان وصلت لموضوع البيض. . قرأته وبدأت بالشك أن هذه مدونة مترجمة! ! ولكن تحدثك عن اكلات سعودية جعلني اتأكد انها مدونة ” اصلية” ..

    شكرا لإثراء المحتوى العربي, وشكرا لهذه المعلومات القيمة, وشكرا لاستمرارك: )

    1. Top Chef

      وعليكم السلام و الرحمة …

      مشكورة على مرورك وفعلا واجهتني نفس المشكلة في البداية وحتى في المدونات الأجنبية ماكنت ألاقي مواقع تشفي غليلي وتعطيني التفاسير اللي أبي. نادرة هي الأماكن اللي تتكلم عن المواضيع من هذي الزاوية وترى اللي أحط هنا هو إختصار لكثير أشياء. بعد بحث أحسن لقيت مصادر تشرح هذا الشي بشكل موسع و أفضل وهي الكتب فيه كتب كثيرة تتكلم عن الطبخ من هذي الناحية وعن نفسي فهم ليش كل شي يصير يساعدني أطبخ أفضل بس موب كل الناس يشوفون الموضوع من هذي الزاوية للأسف.

      1. learningbdoing

        صح!
        وأنا اشوف بعد ان الطريقه الابتكار وصفات جديده تكون بمعرفة وظيفته وتأثير كل مكون!

        ممكن تعطيني اسماء الكتب اللي استفدت منها في هذا المجال؟

        1. Top Chef

          مواقع وكتب كثيييره جدا عندك اللي كتبت في الصفحة التعريفية on food and cooking هذا رهيب وعندك المراجع الثانيه في الطبخ زي larousse gastronomique و jack pepin le technique وغيرهم الصراحة مرررره كثير. طبعا غير المواقع و المقالات اللي عالنت .

  21. عفاف ،

    اخ خالد ، استمتعت كثير وانا اقرأ صفحتك كنت متابعه لك في المساطيل وقلت حرام موهبتك هاذي تروح سُدى
    اهني فيك طموحك وعجبني انك تدرس الوصفه دراسه وفي كل وصفه تعلمنا شي جديد مدونتك ممتعه جداً جداً
    خالد ماشا الله تبارك الله انصدمت يوم شفت اننا بعمر واحد انت انتجت الكثير في عالم الطبخ وانا لا هههههه
    بس احييت فيني روح العزيمه كل مااشوف وصفه اقول ان شا الله اسويها :)
    خالد الله يوفقك ويرجعك بالسلامه واهم شي ترجع لنا جده وتسوي لنا زيارات للمطاعم وتقييم لنا اكلهم ههههه

    متابعه لك بأذن الله

    1. Top Chef

      هلا والله …

      اي انتجت لا انا ولا انتي فالحين ترانا فيه ناس كبرنا executive chefs الحين يعني بمسكون مطاعم بكبرها.

      انا لي اكثر من سنة في جده الحين واكتب تجاربي في المطاعم دايما على حسابي في تويتر بس كلها نقاط صغيرة تعطيك المهم يعني موب شي مفصل

      1. عفاف ،

        اوكي متابعه لك في تويتر ، شفت لك كم تغريده انك تشتغل في مطعم
        عادي تقول لنا وين ؟ :)

        1. Top Chef

          كاتبه في البايو ؟

          لا غير إني أشتغل أكتب تويتات عن المطاعم اللي أروح بالعادة

  22. غير معروف

    ما شاء الله لا قوة الا بالله
    اخيرا في ناس فاهمة الطبخ وبتتكلم عربي لا وكمان سعودي والله كنت افكرك انثى ماشاء الله لا قوة الا بالله والله يبارك لك من قوة ودقة المعلومات
    الزبدتو
    انا احب
    allreciprs.coml
    واخذ منه طبخات كثير بس مشكلتي مكونات الحقيقية للطبخات مش متوفرة هنا بسهوله واذا توفرت غالية وسعرها مش ولا بد مثل جبنة الماسكربوني وغيرها انا مااحب الطبخ سبحان الله بس اذا طبخت ابدع ومن راسي وما اتقيد بكمية او وصفة احيانا
    افكر اخذ دورة متخصصه في الحلويات الفرنسية اذا سافرت برا هل تنصحني او اكتفي بالنت

    1. Top Chef

      هلا والله ….

      مافيه إبداع بدون حب للشي … يا إنك ما تحبين الطبخ يا إنك ما تبدعين أختاري هههههه

      إذا ما تحبين الطبخ ليش تاخذين دورة فيه ؟ وش الهدف ؟ بتفتحين شغل ؟ إذا لأ أجل وش الفايدة ؟

  23. fofa

    مدونه رووعه
    زي الحلم بالنسبة لي لانو احب الطبخ واطبخ كثير بس عندي مشكله انو ماطبق نفس المقدار يعني ازود او انقص او استبدل مقدار معين فما تنجح معي الطبخة بعد تصفحي لمدونتك عرفت انو الاهتمام بالمقدار اهم شي .
    حبيت اسألك اخوي هو انت الشيف خالد عارف الي يجي بصباح الخير ياعرب على mdcيهمني خيو تجاوب على هالسؤال

    1. Top Chef

      هلا والله …

      لا لا أبدا موب الشي اللي أبي أوصله إن الإلتزام بالمقدار أهم شي. بالعكس أنا اللي أبي أوصله هنا هو إن الواحد يطبخ بدون الإعتماد على وصفة. المقادير ضروري تكون بالمملي في حالة المعجنات و الحلويات بس في أغلب وصفات الموالح عندك مجال جدا كبير للتبديل و التغيير. كثير ناس يبدلون ويغيرون للأسباب الخطأ مثل إنه ما يحس إن الشي هذا مهم أو بيفرق في الطعم فياخذ وصفة صوص سيزر مثلا ويشيل البارمزان ويشيل الأنشوجة بعدين يقول ليش طعمها موب سيزر مع العلم إني ألتزمت بكل شي ؟

      ههههه أنتي خامس وحدة الظاهر تسألني ذا السؤال أنا منيب خالد عارف ولا لي أي علاقة فيه.

  24. راس الحانوت

    السلام عليكم أخي والله فرحت كونك سعودي ولك كل هذا الشغف بالطبخ والمطبخ شيء مبهج والله ربي يوفقك
    انا من الجزائر ومن سنة انتقلت لدبي وهاذي مشكلتي
    وأنا اقرا مدونتك والله حسيت بشغفك للطبخ والمطبخ لأني من فترة سنتين تقريبا دخلت لهذا العالم الممتع ورجع الطبخ عنديي تجربة كلها متعة وسعادة لما ادخل للمطبخ احس انى سافرت في رحلة بين النكهات والروائح الطيبة والشذية للخضار والبهارات واروع لحظة بالنسبة لي لما اقدم الطبق وينزل زوجي يشمشم في الطبق ويتلذذ بريحة النكهات ويهجم على الصحن ههههههه
    لكن للأسف هاذي المتعة قلت الآن اللي لاحظتو انو منذ قدومي لدبي ان النكهات في الخضار والتوابل ضعيفة جداااااا مقارنة بالجزائر…. مثلا لما كنت بالجزائر كنت امسك حبة طماطم شكلها غير مجانس اقربها من انفي اشم منهارائحة نفاذة من النكهة الطازجة ولما اقسمعا بسكين عصارتها تغرق لوح التقطيع اما بدبي فالطماطم شكلها متجانس محسوب بالملي واللون احمر قاني مغررررررري لكن لما تشمها تحس انك تشم قطعة بلاستيك مالها ريحة تقطعها عادي قطع ماسكة نفسها قليلة العصارة هي ولوح التقطيع نفس الصلابة والنتيجة في الاخير أكلة طيبة لكنها ضعيفة النكهة والرائحة والفرق شاااسع بين نفس الاكلة في الجزائر وهنا في دبي
    الخضار والتوابل الطبيعية الغير معالجة والغير مجمدة والطازجة تلعب الدور الاكبر في انجاح عملية الطهي وفي صنع فرق النكهات بين الطبق الواحد

     

    1. Top Chef

      وعليكم السلام و الرحمة …

      فاهم عليك ، للأسف كل ما كبرت المدن كل ما خربت المكونات بسبب السوبرماركتات الكبيرة وبسبب بعد المدن عن المزارع. صدقيني الشي هذا موب بس في دبي بتلاقين نفس الشي في كل مدينه كبيرة في العالم. اللي تسوينه هو إنك تدورين أحسن وبتلاقين اللي تبين. في الفترة الأخيرة في فترة صحوة غذائة مكتسحة العالم ، صح لسا ما وصلتنا هنا بنفس الدرجة بس هي في الطريق. السوبرماركتات الكبيرة صارت توفر مكونات أفضل كخيار للي يبون الطعم الأفضل وطبعا بسعر أعلى بس المهم إنها متوفرة.

      دوري على أسواق الخضار الشعبية وبتلاقين فيها منتجات جيدة. شوفي وين أهل البلد يشترون خضرواتهم و أسماكهم وبتلاقين دايما شي حلو. غير كذا صح المكونات تلعب دور وواحد من وظائف الطباخ إنه يختارها بعناية ومن أحسن نوعية ، ففي حال ما لقيتي طماط أو توت طازج ممتاز على سبيل المثال ممكن تستخدمين معلب أو مفرز وبتلاقينهم بجودات عالية. وفي حال أضطريتي إنك تستخدمين طماط طازج وما لقيتي ففيه أكلات ثانيه ممكن تتسوى .. الخيارات جدا كثيرة ..

  25. lollita

    سلام
    الله يوفقك يااخوي
    بس ابغى اعرف انت اسمك خالد ايش؟
    واذا ماتبغى تجاوب عادي
    و ابي طلب وصفة الميرانق اذا تعرفها

    1. Top Chef

      آمين وياك ان شا الله

      المرانج من اكثر المواضيع اللي تكلمت عنها في المدونة نزلت الفرنسي والسويسري والبافلوفا اللي هي المرانج المجفف

  26. غير معروف

    إذا ممكن تخبّرنا باسم المخبز الفرنسي بمونتريال؟

    1. Top Chef

      Premier Moisson

  27. lazizah

    ماشاء الله تبارك اللله مبروووك المدونه .. انا من متابعينك بشمواه وجدا معجبه بمواضيعك ماشاء اللله عليك شي يفرح القلب ان شبابنا يتعلمو كل شي والاحلى انو بنفسك اتعلمت ماشاء اللله عليك .. اشكرك على مواضيعك المرتبه والتفاصيل الدقيقه جدا بصراحه فادتني مرررررررررره واستفدت منك لاني مبتداه بالطبخ وسرت احب اطبخ من بعد مواضيعك السهله والمميزه اللله يعطيك العافيه واتمنى لك مزيد من التقدم والنجاح الدائم في حياتك

  28. Mada

    السلام عليكم ..
    اهنئى نفسي اولاً و اهنئك لانك فتحت مدونه ، و اشكرك من اعماق قلبي ، بصراحه انت شخص رائع ، كنت اقراء مواضيعك
    و لا امل منها ، انبهرت فيك ما شاء الله ، لانك تشرح اشياء ب ادق التفاصيل و تهتم بكل صغيره ، ماعمري شفت احد يشرح مثل شرحك ما شاء الله ، اول موضوع شفته لك في شمواه
    و من بعدها صرت ابحث عن مواضعيك لقيتها في مساطيل
    و بعدها لقيت مدونتك هي كنز لانها تحمل معلومات مهمه ..
    و حطيت موقعك في المفضله ، صارت اهتم ب طبخي تقريباً
    انت مو بس تهتم ب الطبخ لا تهتم ب الطعم كثيير ..
    استفدت منك و مازلت اتعلم منك ..
    و اتمنى ان ادخل يوم ما مدونتك و اجدك كاتب تم افتتح مطعم ..
    شكراً لك ب حجم السماء ..
    و وفقك الاله بما يحبه و يرضى ..

    1. Top Chef

      وعليكم السلام و الرحمة …

      مشكورة على كلامك وثقتك أختي وحياك الله دايما.

      إحنا نهتم بالطبخ لأننا نبغى أحسن طعم وأحلى شكل هذي أكيده.

  29. Ana

    اخيرا لقيتك. 
    كنت اتابعك بشامواه وجدا معجبه بمواضيعك وبيوم بحثت عن اسمك بقوقل ولقيت هالمدونه الرائعه ،،،
    الله ينفع بك ياكريم.
    ع فكره ماتبغى نسوي مشروع مطعم انت بكندا وانا ادير الموضوع بالسعوديه هههههههه.
    موفق ان شاء الله

    1. Top Chef

      أنا موجود هههه

      مشكورة على مرورك وحياك الله …

      هههههههه أبد دبريلي فيزا لكندا ومن عيوني هههه

  30. MASHAL

    السلام عليكم , ماشاء الله تبارك الرحمن , الاجمل من كلامك واطباقك هالشغف الي لمسنه واستشعرنه في المقدمه الي كتبتها , واضح جدا انك تتكلم عن شي انت تحبه حب عميق , وفهمنا ان حبك ماهو حب للاكل ولكن حبك الاكبر لم هو خلف هذا الاكل من تفاصيل , وواضح من خلال شرحك وتجاربك الكثيره وبحثك انك شخص صبور وماتمل بسرعه ورغم انك تحب التعمق في خفايا الاكل الي انك بعد تتميز بالبساطه في طرحك وفي اسلوبك بالشرح والكلام وماانكر عليك استمتعت جداا وانا اقرا المقدمه حسيت في متعه ورغبه لمعرفة النهايه وكانها قصه من قصص هاليومين ههه,, على العموم الله يوفقك ويرزقنا الله محبة عمل الاكل وطبخه مثل مارزقك ,, موفق اخوي .

    1. Top Chef

      وعليكم السلام و الرحمة …..

      مشكورة على مرورك وهو فعلا والله شغف أكثر من مجرد حب للشغله.

  31. شاكرة

    اخوي مدونتك ولا اروع…
    اشكرك عليها لأنها حدمة مجانية لنا ..
    عندي مشيكلة في الطبخ..وهي: اني ما احب اغسل المواعين بعد الطبخ!!!

    1. Top Chef

      مشكورة ….

      هههه كلنا نفس المشكلة محد قد قابلته وقالي ماعنده هذي المشكلة. أطبخي لناس ما يعرفون يطبخون وأشرطي عليهم ينظفون هههه

  32. نوره السعودية

    مرحبا اخوي خالد انا عندي مشكلة اخصائيين التغذية ما قدروا عليها …الغذاء المحتوي على الالياف يثير قلوني ، لكن في نفس الوقت احتاج الياف لتسهيل عملية الاخراج (اكرمك الله)،وش الحل وش اكل ؟بليز عطني وصفات صحية ولذيذة .شاكرة وممتنة .نورة السعودية

    1. Top Chef

      والله ما أقدر أفيدك في هذي للأسف مالك إلا تسألين دكتور الصراحة.

  33. غير معروف

    بصراحة مدونتك مختلفة وجذابة اهنئك عيها وساكون متابعة دائمة لك .اختك نورة السعودية

    1. Top Chef

      شاكرلك مرورك ومتابعتك …

    2. Top Chef

      مشكورة على متابعتك وحياك الله …

  34. ريم

    بصراحه احيي فيك مجهودك ومثابرتك لتعلم الطبخ وعقبال ما يكون لك كتاب طبخ مميز ومشهور وبكل اللغات

    1. Top Chef

      مشكورة على كلامك الحلو …

  35. أم جوجو

    الله يعطيك العافية أخوي خالد والله ماقصرت جعلك تتنعم بثمار الجنة بالفردوس يارب .
    انا عن نفسي كنت مرررة مو راضية عن طريقة طبخي وطريقة الاكل السعودي نوعا ما لأسباب :
    1- النظرة الخاطئة للاكل اللي هي عبارة عن اكل يشبع وبسس وعدم اعتبار ان “انت ما تاكل “من ناحية الجسم والتفكير وغيره وخاااصة الاطفال بالاضافة الى اغفال جانب المتعة.
    2- عادات الطبخ الخاطئة اللي تروح كثير من القيمة الغذائية للمواد الغذائية المطبوخة .
    3- استخدام مكونات غير صحية بكثثثرة في الطبخ وخصوووووصا الحلويات .
    ف المقابل كانت كثير من الوصفات الاجنبية تشدني لقيمتها الغذائية وموادها ومقاديرها اللي اغلبها طبيعية فحاولت ابحث عنها ف المواقع العربية فماتكون زي اللي ف بالي ولما اروح للمواقع الاجنبية ماتساعدني لغتي كثيير ، ف ااما اجرب من راسي او تصيبني خيبة امل واوقف عند هالنقطة .
    اليين شفت مواضيعك بشمواه وبعدها بالمدونة كان خبرتك ومجهودك طايح علي من السماء لان خلاصة قراءاتك ومحاولاتك وتجربتك تجي تنقلها لنا وحنا ناخذها باردة مبردة ع قولتهم -الله لايحرمك اجرها – وماعلينا الا نسوي ونستمتع باللي سويناه .
    لكن عندي طلب : انك تزيد من اهتمامك بالجانب الصحي في الوصفات ، او ممكن تعرض بدائل صحية للمقادير لاهنت .
    وحبيت اقول لك اخوي بالنسبة لبهار جوزة الطيب كثير تستعملها لكن اغلب العلماء على تحريم استعمالها لدليل:”ما اسكر كثيره فقليله حرام” لكن فيه قلة قالوا بجواز استعمالها لكن ابحث عن المسألة وتحقق منها..
    حبيت اسوي اقل مجهود اشكرك فيه على مجهودك ووقتك اللي تعطيه لنا . اسفة طولت عليك .

    1. Top Chef

      الله يعافيك والله يحييك في أي وقت ….

      بالنسبة للجانب الصحي أكون صريح معك ما أحب أدخل فيه كثير. أنا ما عندي خلفية صحية كبيرة عشان أتكلم في هذا الموضوع بشكل موسع وعشان أكون صريح أكثر معك أنا يشدني في الطبخ الطعم أولا و أخيرا وعشان كذا أنا آخر واحد أتكلم عن الصحة الصراحة.

      بحثت في موضوع جوزة الطيب وأقتنعت بالرأي اللي يبيح إستخدامها. غير جوزة الطيب القرنفل و بعض أنواع الفلفل زي الفلفل السيشواني تسبب الهلوسة بكميات كبيرة.

  36. Chif cake

    الله يوفقك ويسر امرك من جد الله الهمتنا …. انا الطبخ من مجال دراستي بس ماكنت احب المواد كمواد علميه اكثر من الشغل في العملي والانتاج اللي اطلع فيه لما اطلع من المطبخ واشوف اهلي مبسوطين فيه ويحسون بالفخر ….وكثير استفدت من اشياء بالخبره اكثر من الدراسه .. وعرفت بمدونتك بالصدفه عن طريق التويتر ولقيتك تهتم بالتفاصيل الوصفه وهذا شوقني اطلع على المدونه اكثر واستفيد منها … بالتوفيق مره ثانيه

    1. Top Chef

      آمين يارب وياك و الجميع إن شاء الله….

      العملي و النظري أحسهم ما ينفصلون عن بعض. لازم الواحد يكون فاهم وش يصير إذا يبي يسوي شغله بأحسن طريقة.

  37. غير معروف

    الله ييسر دربك
    انت بطل في الطبخ ماشاءالله واتوقع نادر نلقى زيك
    تتخلى عن شهادتك لاجل هوايتك
    بس انت محظوظ لانك لو بدأت قبل عشره سنوات كان حتى اهلك زعلو عليك وقالو عين

    1. Top Chef

      هلا والله …

      مشكورة على كلامك بس ما احس شي غريب ؟ كثييييير ناس ما يشتغلون بشهاداتهم الشهادة ابدا موب كل شي وكثييييير اعرفهم شخصيا معهم شهادات عليا يعني ماجستير وبعضهم يحضر لدكتوراه بعد وأقسم بالله ما يستاهلون حتى ينجحون من الثنوي. اقولك هذا الكلام عن ناس عاشرتهم من ايام المدرسة واعرف عقليتهم

    2. Top Chef

      هههههه ليش وش قايل انا ودي افتح مطعم ؟ ما اعتق شي غريب عندنا؟

  38. كيك

    ماشالله اقدر جهودك هنا والحين فهمت سر شرحك الدقيق جدا والمتميز جدا ،ماقول الا اني استفدت منك الكثير الكثير واستمتعت بهالمعلومات الغزيره والقيمه لدرجة بعض المواضيع اقراها كم مره عشان افهمها صح
    واصل ابداعك الله يقويك

    1. Top Chef

      مشكورة وحياك الله في أي وقت …

  39. loooly

    بصرااااااااااحه انك شخص مبدع ماشاء الله تبارك الله لقيت اللي كنت ابحث عنه الله يوفقك

    1. Top Chef

      مشكورة على كلامك ومرورك وحياك الله دايما.

  40. مطعونة بسكين المطبخ

    براااااااااافو يا خالد شوف شلون العالم مبسوطة ما صدقوا يعرفون قصة توب شيف هههههههه
    بصراحة استمتعت بالقراءة ومتأكدة هالقصة راح تكون ملهمة لكثير ناس تعشق الطبخ واكتشاف الأكلات …

    يعطيك العافية

    1. Top Chef

      مشكورة يا أخت مطعونة D-: هههههه

  41. الحلم البنكي

    يعطيك العافيه طيب بالنسبه للكتاب ممكن اعرف مؤلفه و كمان انت من فين اشتريته؟ اذا مو من السعوديه راح اطلبه اونلاين وجزيت خيرا

    1. Top Chef

      المؤلف إسمه harold mcgee أعتقد متوفر نسخة إلكترونيه لو منيب متوهم.

  42. غير معروف

    و ماذا عن البرمجه ؟
    لماذا درستها ؟
    هل يمكن أن تشرح يوماً في مدونة ثانية هندسة البرمجيات بنفس الطريقة الرائعه التي تشرح بها تقنيات الطبخ ؟

    1. Top Chef

      درستها من باب حبي للمجال ومازلت احبه بس موب شي ممكن اختاره كمجال عمل.

      ما اتوقع الصراحة اشرح عن هندسة البرمجيات

  43. أم رهف

    طريقة تفكيرك هي سبب نجاحك (طبعا مو الاسكريم بالسلطة..خخخخ) وبحثك الدائم
    ماشاء الله عليك والى الأمام دوما

  44. الحلم البنكي

    ماشاء الله عليك الله يحميك و يحفظك وييسرلك امورك يارب المدونه جدا رائعه واحلى مافيها طريقة شرحلك للأمور بطريقة كيميائيه من زمان كنت ادور على تفسير علمي بحكم تخصصي في الكيمياء الحيويه احب احد يشرحلي اي وصفه باسلوب علمي و منطقي ننتظر مواضيعك عن القلي و الكيكات بفارغ الصبر والله يوفقك

    1. Top Chef

      مشكورة هذا من ذوقك.

      لو مهتمة في الموضوع دوري على الكتاب اللي حطيت on food and cooking ماراح تندمين.

  45. reemsaeed

    بديت اقرأ مواضيعك بمنتديات حارة المساطيل ..
    كانت ممتعة لأنها تفصل كل شي .. أدق التفاصيل في الطبخة ..
    كنت لما أطبق وصفة أكون واثقة أنها إن شاء الله بتضبط ..

    قرارك بفتح المدونة أشوف أنه قرار ممتاز جدًا ..
    لك ولنا ..

    استمر و عقبال ما تفتح لك مطعم :) ..
    و إن شاء الله بيكون من أحسن المطاعم عندنا ..

    1. Top Chef

      حياك الله دايما .

  46. غير معروف

    الله يوفقك ، وإن شاء الله نسمع فاتح مطعم يرضي شغفك بالطبخ ..

    1. Top Chef

      آمين يارب الله يكتب اللي فيه الخير.

  47. غير معروف

    انت انسان رائع ياخالد
    حلو الواحد يحط هدف بحياته ويسعى لتطويره خليتني اعيد وجهة نظري بكتير امور
    الله يحميك ويسرلك امورك وترقى لاعلى المراتب

    1. Top Chef

      مشكورة على كلامك.

      الصراحة انا اشوفه ضروري موب بس مهم.

  48. طارق

    الله يوفقك شيف خالد …عرفت قبل بأيام من تويتر أن سنك 23 سنة والصراحة لو أكملت المشوار وتخصصت في الطبخ فسيكون لكن شأن كبير إن شاء الله سنك مثالية لصقل الموهبة والوصول بها الى العالمية … طبعا لو كنت مهتم توقف برمجة وتكمل طبخ : ) …طبعا أن تعرف رأيي في مدونتك التي أدخلها يوميا أكثر من مرة الله يوفقك : )

    1. Top Chef

      آمين وياك والجميع ان شاء الله.

      معاهد الطبخ ابدا موب ضرورية اذا حاب تقرأ مثال حلو دور عن شيف بريطاني إسمه هيستون بلومنثيل heston blumenthel وشف كيف دخل في الطبخ.

      اللي ابغاه هو تجربة عملية اكبر في مطبخ مطعم وهذا اللي بسويه قريب ان شاء الله. البرمجة ما ابغاها ولا اتخيل نفسي اشتغل فيها اصلا بس ابغى آخذ شهادتي واخلص منها.

      1. طارق

        أعرف هذا الشيف من ماستر شاف استراليا وأذكر انه عصامي وتعلم لحاله.. وتدرب لمدة اسبوع أو اسبوعين في مطعم محترف في بدابته مشواره … وأطباقه غريبة شوي : ) أكل زي الرمل وقواقع تسمع منها اصوات بحر عصائر كأنها حمم براكين : )

        1. Top Chef

          هو موب الوحيد كل الطباخين اللي اعمارهم اكثر من ٤٠ سنة تقريبا غالبا ما تلاقيهم متعلمين عن طريق الممارسة مادخلوا معاهد طبخ. اصلا معاهد الطبخ كلها مالها كم سنة.

          هذا الطباخ يسوي اطباق حديثة تعتمد على استخدام مكونات شوي غريبة زي النايتروجين السايل وغيرها. هذا النوع من الطبخ يسمونه موليكلار جاسترانومي molecular gastronomy وكثير طايحين فيه الحين.

  49. غير معروف

    الله يوفقك مدونتك اختصرت الكثير كنت ابحث عن المعلومة والاقيها اجزاء مفرقة ومدونتك جمعتها وترجمتها واضافت عليها جزاك الله خير :)

  50. غير معروف

    ماشاء الله عليك الله يحفظك ويجزاك خير على تعبك ياليت تواصل وحنا معك قلباً وقالباً موفق

Page 1 of 41234»

View all comments

أضف تعليقاً

لن يتم نشر عنوان بريدك الإلكتروني.

يمكنك استخدام هذه HTML الدلالات والميزات:

%d مدونون معجبون بهذه: