الماكروون ( الماكرون الأمريكي ) … Macaroon

هلا والله ….

داري طفشناكم بنفس الموضوع كل مره ماكروون ، ماكرون ، كرات ثلج إلخ ….. بس هي زي السلسة وحبيت أنهيها . هي كلها إمتداد لموضوع الماكرون الفرنسي اللي راح ينزل إن شاء الله قريب مع تعديلات شوي عليه .

 

الماكروون الأمريكي ( بحرفين واو ) يختلف عن الماكرون الفرنسي كثير من ناحية الطعم و الشكل ، بس بنفس الوقت هو يتشابه معه بشكل كبير من ناحية المكونات و الطريقة . هذا الحلى له نسخ كثييير لأن كل شخص يحبه بطريقة غير فلا تستغربون إذا لقيتوا وصفات كثير له في النت . بعض الناس مثلا يفضل إنه يكون ناشف زي الحجر وعشان كذا يحطونه في فرن بارد وقت طويل يمكن ٤ ساعات إلين ينشف تماما … وفيه ناس يحبونه يكون يقرمش من برا شوي بس طري من الداخل . فيه ناس يسوونه بمرانج عشان يكون خفيف من الداخل وفيه ناس تستخدم بياض بيض بس عشان يمسك الخليط مع بعض .

 

أنا أحبه يكون خفيف من الداخل شوي وعشان كذا أستخدم مرانج فرنسي عادي . أحبه بعد يكون شوي طري من جوا أو تقريبا له طعم قريب من المارشمالو السايح مع طعم جوز هند قوي . هو مصنوع من جوز الهند بالأساس بس أي نوع مكسرات أو خلطة مكسرات ممكن تستخدم هنا بس ماراح تكون على شكل بودرة زي الماكرون الفرنسي يعني خلو المكسرات لو حبيتوا تكون مقطعه كبار بس . بدلوا بنفس كمية جوز الهند اللي حاطها تحت يعني لو بحط كوب لوز مثلا أزيد عليه كوب نارجيل وكذا ..

 

كوبين جوز هند ( نارجيل ) .

بياض بيضتين

٢/٣ كوب سكر

رشة ملح

رشة فانيلا سايلة أو بودرة إذا مافيه

ملعقتين كبار طحين ( عشان يمسك شكله بس )

 

 

نشغل الفرن على ٣٢٥ فهرنهايت .

نسوي مرانج فرنسي بالبيض مع الملح . اللي ما يعرف وش المرانج وكيف يسويه يشوف هنا .

الحين نضيف جوز الهند مع السكر و الفانيلا و الطحين على المرانج ونخلط شوي شوي إلين ينخلط .

نغطي صينية فرن بورق زبده (بارتشمنت) أو سيلبات .

بعدين نشكل الماكروون على ورق الزبده بالشكل اللي نبغاه ، ممكن نستخدم ملعقة عاديه ، ممكن نستخدم ملعقة إسكريم عشان نطلعها كور ممكن نستخدم قوالب حتى لو نبغى نطلعها بشكل مختلف . أو ممكن نسوي الشي التقليدي ونشكلها بيدنا على شكل أهرام . أنا شكلتها على شكل بيضاوي .

ندخلها الفرن إلين توصل للدرجة اللي نبغى أنا أحب الأطراف شوي تقرمش ولونها ذهبي عشان كذا أخليها إلين تقلب الأطراف شوي ذهبي حوالي ١٥ – ٢٠ دقيقه بالكثير . اللي يبيها ناشفة أكثر أو متلونه أكثر يخليها أكثر .

 

نطلعها من الفرن ونخليها تبرد شوي قبل التقديم ..

 

بس هذا الماكرون الأمريكي جدددا سهل ..

 

macroon

ماكرون

macroon

فيه ناس يحبون يضيفون أشياء مع الخليط حق الماكروون مثل إنهم يبدلون جزأ من جوز الهند بمكسرات مثلا أو إنهم يضيفون أشياء مثل بشر ليمون ( الليمون الأخضر رهيب هنا ) . أو ممكن تضيفون مثلا زبيب أو فواكه مجففه أو بهارات لو حابين .

 

بعد ما يخلص الماكروون ويطلع من الفرن ممكن بعد تغطونه بطبقة شكولاته ذايبه أو بعد كاراميل لو تبون .


 

 


 


37 comments

1 ping

Skip to comment form

    • ٍShoShettaa on 7 September, 2014 at 1:16 am
    • Reply

    الله يعطيك ألف ألف عافية .. اليووم سويت الماكروون الأمريكي .. وبكره بإذن الرحمن بسوي الماكرون الفرنسي اللي أمووووت عليه وكمان الفاصوليا المقلية المكسيكية ..

    • Zahraa on 16 October, 2013 at 12:43 pm
    • Reply

    يعطييك الف عافيه ❤️

    عملت الماكرون كم مرة ولذيييذ واعجب الكل ❤️

    سهل ويفك أزمات

    • Mori on 12 February, 2013 at 3:38 am
    • Reply

    ينفع أحط على الماكرون الأمريكي ألوان
    زي الفرنسي ؟

    1. ينفع من ناحيه إنه راح يضبط وإنه صالح للأكل بس من ناحية سبب هل تشوفينه منطقي ؟ يمدينا نحط ألوان أكل زرقاء مع تتبيلة دجاج ونطلع بصدر دجاج مشوي لونه أزرق وهو صالح للأكل وموب مضر ولا شي بس السؤال هو هل هذا شي مشهي وأحد يبي ياكله ؟

      في الماكرون وأي حالة نستخدم ألوان أكل إحنا نستخدمها لتعزيز النكهة. الماكرون الذهبي بالكراميل ، الأزرق ممكن بالتوت الأزرق ، الأحمر فراولة مثلا ، البرتقالي برتقال وكذا … ممكن نضيف ألوان أكل لكوليه مثلا عشان نعزز من لون الفاكهة بس هنا عندنا جوز هند وبس ليش نحط معه لون أخضر أو برتقالي مثلا ؟ طبعا الموضوع راجعلك بس عن نفسي أشوف اللون لازم يعكس شي في الأكل …

    • Anonymous on 27 December, 2012 at 12:27 am
    • Reply

    مرحبا شيف خالد

    عندي جوز هند طازج ، أقدر اسوي الوصفق به ؟!

    1. اكيد ممكن

    • ام عبد الرحمن on 31 August, 2012 at 1:25 pm
    • Reply

    هل ممكن اصغر الحجم واحط ثنتين بينهم حشو مثل الماكرون الفرنسي

    1. أكيد ممكن ليش لأ … تقدرين حتى تغمسين الماكروون بشكولاته ذايبة لو تبين أو تغطين نصها بس الخيارات كثيرة.

  1. وصفة أكثر من رائعة
    من حلاوتها سويت 3 أضعاف الكمية
    يعطيك الف عافية شيف خالد

  2. جربته….
    طلع معاي حلو..
    أعجب عشاق جوزالهند..كثيرا .

    يعطيك العافية ..

    • الاوتار on 12 December, 2011 at 6:19 pm
    • Reply

    شكراً اخوي شيف على الماكرون

    • احلام on 15 November, 2011 at 2:52 am
    • Reply

    سهل يشجع نسويه

    مشكووور ويعطيك العافيه

    وياليت تفيدنا بطريقه البتي فور الحالي والمالح الهش

    1. الله يعافيك…

      البيتي فور ما أتوقع أنزل شي له الصراحة.

    • جود الفهد on 6 September, 2011 at 9:19 am
    • Reply

    سويت نفس الطريقه بس لمن جيت اشكله .. استخدمت ملعقة الاسكريم وتشكل معي بس ع طول يتكسر مايمدي انقل الخليط من الملعقه للصينيه الا تكسر شوي هل هو كذا ولا في خطاء؟

    1. هو كذا طبيعي ، إذا كان مره مستحيل نقله معناه إنك زودتي جوز الهند شوي.

    • جود الفهد on 5 September, 2011 at 10:36 pm
    • Reply

    ٢/٣ كوب سكر ، مافهمت ، يعني اقل من الكوب بشوي ولا كيف ؟؟

    1. يعني ثلث كوب + ثلث كوب … ما أعرف أقل من كوب بشوي لازم القياسات تكون دقيييييقة ..

    • fano on 1 April, 2011 at 5:25 am
    • Reply

    حبيت الوصفة خفت ان السكر يكون طاغي على الطعم بس طلع اوك وسويته وهذا تطبيقي 🙂

    http://store2.up-00.com/Mar11/X8y49879.jpg

    1. بالعافية على قلبك …

  3. غششششششششش
    ماجاني ع الايميل ليه !؟

    ||

    ياأالله أبدا أبدا شكله مايشبه الفرنسي !!

    أحس مع التشوكلت بيكون لذيييذ

    تسلم ولاهنت توب

    1. هلا والله ..

      شيكي عالسبام مفروض تلاقينه هناك ..

      هو شكله مختلف صح بس المكونات تقريبا وحده

    • Anonymous on 25 December, 2010 at 4:26 pm
    • Reply

    http://m002.maktoob.com/alfrasha/ups/u_new/000/02/29/86/38341/510636.jpeg

    http://m002.maktoob.com/alfrasha/ups/u_new/000/02/29/86/38341/510637.jpeg

    هذا انا رجعت لك ووفيت بوعدي ^_^ انتظر التقييم

    1. الشكل رهيب …

      بس ليش تطلبين تقييمي .. أنتي وش رايك فيه ؟ هذا المهم ….

        • Anonymous on 25 December, 2010 at 5:50 pm
        • Reply

        انا ما ذقته الى الان احتري القهوة بعد المغرب ههههههههه

        التقييم يعني وش رايك فيه بس ^_^

        • Anonymous on 25 December, 2010 at 6:51 pm
        • Reply

        تبي الصدق يمي يمي. لذيذ جدا وخصوصا لانه مقرمش طلع نكهته احلى .ومثلك من محبين حلويات جوز الهند لكن ما احب لها اضافات ابي نكهة النارجيل قوية وطاغية ما ابي نكهة ثانيه تختلط معها

        انتظر الجديد منك داااااااااااااائماً

        دمت لنا بصحة وعافية

    • Anonymous on 25 December, 2010 at 1:50 am
    • Reply

    يسسسسسسسسسسسلمو ايديك خيو بجد مشهي ويفتح النفس لي عودة باذن الله في اقرب وقت مع الصور كما انا دائما ^_^

    1. الله يسلمك …..

      مشكوره و أنتظر صورك .

    • Amola on 24 December, 2010 at 1:18 am
    • Reply

    ماشاءالله علييك مبدع كعاادتك

    1. مشكورة على كلامك وحياك الله دايما

  4. كل الشكر للطريقه

    اجربها وراده ان شالله

    1. أنتظر عودتك ..

      1. شي عجيب لذيذه جدا اليوم سويتها 🙂

        سويتها بس الحجم الكبير تطلع احسن من الحجم الصغير الصغير تنشف والكبيره تطلع رطبه ولذيذه

        الف شكر لك

          • Top Chef on 2 April, 2011 at 5:53 pm
            Author

          بالعافية على قلبك …

          مايفرق صغير أو كبير .. هي مسألة توقيت بس كم حطيتي الصغير في الفرن وكم حطيتي الكبير في الفرن هذا المهم في الأخير

    • Anonymous on 23 December, 2010 at 10:37 pm
    • Reply

    الله يسلم هالأيدين
    روووووعة دائما شغلك (واو)

    1. الله يسلمك … ومشكوره على كلامك .

    • شوكولانا on 23 December, 2010 at 10:24 pm
    • Reply

    تدري عاد

    انت احسن واحد بالحته >>> قلبت مصري

    انا احبه موت و ان شالله لي تجربه معاه

    مشكور ع الطرح

    يسلمووو

    1. ياهلا والله .. حياك … وبالعافيه مقدما .

  1. […] هلا والله …. داري طفشناكم بنفس الموضوع كل مره ماكروون ، ماكرون ، كرات ثلج إلخ ….. بس هي زي السلسة وحبيت أنهيها . هي كلها إمتداد لموضوع الماكرون الفرنسي اللي راح ينزل إن شاء الله قريب مع تعديلات شوي عليه .   الماكروون الأمريكي ( بحرفين واو ) يختلف عن الماكرون الفرنسي كثير من ناحية الطعم و الشكل ، بس بنفس الوقت هو يتشابه معه بشكل كبير من ناحية المكونات و الطريقة . هذا الحلى له نسخ كثييير لأن كل شخص يحبه بطريقة غير فلا تستغربون إذا لقيتوا و … Read More […]

Leave a Reply

Your email address will not be published.

%d bloggers like this: